प्रेरितां रे कम्म 7

स्तिफनुस रा भाषण

1तां फिरी प्रधान पुरोत्त ने पूच्छेया, कै ए इल्जाम सच हिन? 2स्तिफनुस ने बोल्लेया, ओ भाईयों, ते बुजूर्गों सुणो, असा रा बुजुर्ग अब्राहम हारान कस्बे बिच बसणे का पैल्ले जां मेसोपोटामिया बिच थिया, तां महिमामय परमेश्वर ने तिन्हा जो दर्शन दित्ता। 3ते तिसजो बोल्लेया, तू अपणे देस ते अपणे रिस्तेदारां बिच का निकली करी तिस देस जो जा, जिस जो मैं तेरे जो दिखाणा। 4तां अब्राहम कसदियां रे देस जे मेसोपोटामिया रे नां कने भी जाणेया जांदा, का निकली करी हारान कस्बे बिच जाई बसेया, तिसेरे पिता रे मौत रे बाद परमेश्वर ने तिसजो तित्ते का इस देस बिच लै आई करी बसाया जिस बिच अवे असी बसदे, 5ते तिस बेल्ले परमेश्वर ने तिसजो किच्‍छ मिरास बल्कि पैर रखणे री जगाह् नी दित्ती, पर वादा कित्ता कि मैं ए देस तेरे ते तेरे बाद तेरे वशं रे हत्थां करी दैणा हालांकि तां तिसेरा कोई पुत्तर भी ना थिया। 6ते परमेश्वर ने इय्यां भी बोल्लेया, तेरे सतांन रे लोक्कां ने पराये देस बिच परदेसी होणा, ते तिन्हा ने तिन्हेरे जो गुलाम बनाणा ते चार सौ साल्लां तिकर दुख दैणा। 7फिरी परमेश्वर ने बोल्लेया, जिस जाति रे से गुलाम होणे तिसजो मैं सजा दैणी ते इसेरे बाद तिन्हा ने तिस देस का निकली करी इसी जगाह् बिच मेरी अराधना करणी। 8ते परमेश्वर ने अब्राहम कने वादा कित्ता ते हुकम दित्ता कि अपणे टब्बर रे सारे मर्दां रा खतना करो ते से इस वादे री निशानी होणा, ते जां अब्राहम रे निक्का इसहाक पैदा होया ते अठमे दिन तिसेरा खतना कित्तेया गेया, ते इसहाक का याकूब ते याकूब का बारा मुंडे जे इस्राएल रे कुलपती होए, तिन्हेरे पैदा होणे तिकर ए परम्परा चलदी रेई। 9कुलपतियां ने तिन्हेरे भ्याल यूसुफ का हिर्स करी के तिसजो मिस्र देस जाणे वालेया जो बेच्ची दित्ता पर परमेश्वर तिसेरे कने थिये। 10ते परमेश्वर ने यूसुफ रे सारे दुखां का छुड़ाई करी मिस्र रे राजा फिरौन री नजर बिच दया ते समझ दित्ती, ते फिरौन राजा ने यूसुफ जो मिस्र पर ते अपणे सारे घर पर राज्यपाल बणाया। 11जां यूसुफ राज्यपाल थिया, तां सारे मिस्र ते कनान देस बिच अकाल पेया ते जिस कने बड़ा वरी दुख होया ते असा रे पूरखां जो अनाज नी मिलदा थिया। 12पर याकूब ने ए सुणी करी कि मिस्र बिच अनाज है अपणे मुंडेया जो जे असा रे पूरखां जो पैल्ली वरी तित्ते अनाज लाणे तांइ भेज्जेया। से यूसुफ कने मिल्ले ते तिसका अनाज भी खरिद्देया पर से मणू यूसुफ जो पछाणी नी सके। 13दुई वरी जां से मणू अनाज लाणे तांइ गे तां यूसुफ अपणे भाईयां रे सामणे आई गेया ते यूसुफ रे टब्बर रे बारे बिच फिरौन जो पैल्ली वरी पता चलेया। 14तां यूसुफ ने अपणे पिता याकूब ते अपणे सारे रिस्तेदारां जो जे पचत्तर जणे थिये, सद्दी लेया। 15तां बाद बिच याकूब मिस्र बिच गेया ते से ते असा रे पुरखे मरी गे। 16तिन्हेरी लासां शेकेम बिच पूजाई करी तिस कब्र बिच रखे गेईयां जिस जो अब्राहम ने चाँदी देई करी शेकेम बिच हमोर रे बच्चेया का खरीदी लित्ती थी। 17पर जां तिस वादे रे पूरे होणे रा बेल्ला नेड़े आया जे परमेश्वर ने अब्राहम कने कित्तेया थिया, तां मिस्र बिच से मणू बधी गे ते मते होई गे 18तां मिस्र बिच दुआ राजा होया जे यूसुफ जो नी जाणदा थिया 19तिसने असा री जाति कने चलाकी करी के असा रे पूरखां कने इत्ते तिकर बदसुलुकी कित्ती कि तिन्हा जो अपणे बच्चेयां जो सूटी दैणा पेया कि से मरी जाण। 20तिस बेल्ले मूसा पैदा होया से परमेश्वर री नजर बिच बड़ा ही छैल थिया से त्रै महिन्ने तिकर लुकाई करी अपणे प्यो रे घरे पालेया गेया। 21जां तिसेरे मां-प्यो तिसजो होर जादा दिनां तिकर लुकाई नी सके तां तिसजो नदी बिच रुढ़ाई दित्ता पर फिरौन री कुड़ी ने तिसजो नदी चुक्की लित्तेया ते तिसजो गोद लेई करी अपणा मुंडा करी के पालेया। 22मूसा जो मिस्र देस री सारी शिक्षा दित्ती गयी, ते से गल्लां ते कम्मां, दोन्नां बिच ताकतवर थिया। 23जां मूसा चाली साल रा होया तां तिसेरे मन बिच आया कि मैं अपणे इस्राएली भाईयां कने मिलां। 24मूसा ने इस्राएल रे इक्क मणू पर जुल्म हुदें दिख्खी करी तिसजो बचाया, ते इक्क मिस्र देस रे रैह्णे वाले जो मारी करी तिस सताए रे इस्राएली मणू रा बदला लित्ता। 25तिसने सोच्चेया कि तिसेरे इस्राएली भाई समजगे कि परमेश्वर ने तिसेरे जरिए तिन्हा जो गुलामी का छुटकारा दुआणा, पर इस्राएली मणूआं ने नी समजेया। 26दूए दिन जां से अप्पु बिच लड़ेया करदे थिये, तां से तित्ते आया ते ए बोल्ली करी तिन्हेरी सुलाह कराणे तांइ समजाया, ओ लोक्कों तुसा तां इक्क दूए भाई-बन्धु हिन, तां इक्क-दूए कने किजो लड़ेया करदे हिन? 27पर जे अपणे पड़ोसी पर जुल्म करेया करदा थिया तिसने तिन्हा जो ए बोल्ली करी नक्कारी दित्ता, कि तेरे जो कुसने असा रा हाकिम बणाए रा है? 28जिस तरिक्के कने कल तैं तिस मिस्र देस रे मणू जो मारी रख्खेया थिया तिय्यां ही मेरे जो मारी रखणा चाह्‍ंदा? 29ए गल्ल सुणी करी मूसा मिस्र देस का नह्सी गेया ते मिद्यान देस बिच परदेसी होई करी रैह्णे लग्गेया, ते तित्ते तिसेरे दो मुडें पैदा। 30मिद्दान देस बिच चाली साल रैह्णे रे बाद, परमेश्वर ने इक्क स्वर्गदूत रे रुप बिच सीने पहाड़ रे बियाबान बिच तिसजो बखदी झाड़ी री आग्ग बिच दर्शन दित्तेया। 31जां मूसा ने तिस बखदी झाड़ी जो दिख्खेया जे आग्ग कने फुकी करी खत्म नी होया करदी थी तां से हैरान होया, 32मैं तेरे बाबे-दाद्दे, अब्राहम, इसहाक ते याकूब रा परमेश्वर है, तां फिरी मूसा डर कने कमीं पेया, इत्ते तिकर की तिसजो दिखणे री हिम्मत भी नी रेई 33तां प्रभु ने तिसजो बोल्लेया, अपणे पैरां का जूत्ती उतारी लै, किजोकी जिस जगाह् तू खडित्ते रा है, से पवित्र जमीन है। 34मैं सच्ची अपणे लोक्कां री जे मिस्र देस बिच हिन, बुरी हालत जो दिख्खे रा है ते तिन्हेरी आह ते तिन्हेरे रोणे जो सुणे रा है इधेरे तांइ तिन्हेरे जो छुड़ाणे तांइ उतरे रा है अवे आ, मैं तेरे जो मिस्र देस बिच भेजणा। 35जिस मूसा जो तिन्हा ने ए बोल्ली करी नक्कारेया थिया कि तेरे जो कुसने असा पर हाकिम या इंसाफ करणे वाला बणाए रा है? तिसी जो परमेश्वर ने हाकिम ते छुड़ाणे वाला बणाई करी, तिस स्वर्गदूत रे जरिए जिस ने तिसजो झाड़ियां बिच दर्शन दित्ते रा थिया, भेज्जेया 36ए ही मणू मिस्र देस ते लाल समुन्द्र ते बियाबान बिच चाली साल तिकर हैरान करणे वाले कम्म ते चमत्कार दिखाई-दिखाई करी तिन्हा जो कड्डी करी लेई आया 37ए से ही मूसा है, जिनिये इस्राएल देस रे मणूआं जो बोल्लेया, परमेश्वर तुसा रे भाईयां बिच का तुसा बिच का मेरे सांई इक्क भविष्यद्वक्ता जो उठाणा 38ए से ही मूसा है, जिस ने बियाबान बिच इस्राएली मणूआं रे बिच-मझाटे तिस स्वर्गदूत कने सीने पहाड़ पर कने गल्लां कित्ती ते असा रे पूरखां कने थिया, तिसी जो जिन्दगी दैणे वचन मिल्ले कि असा तिकर पूजाए। 39पर असा रे पूरखां ने तिसेरी गल्लां मनणी नी चाई, बल्कि तिजसो नक्कारी करी मिस्र देस जो हटणा चाएया, 40ते मूसा रे भाई हारून जो बोल्लेया, असा तांइ इक्क इदेइ बछड़े री मूर्ति बणा जे असा रे अग्गे-अग्गे चले किजोकी ए मूसा जे असा जो मिस्र देस का कड्डी लेई आए रा है, असी नी जाणदे कि तिसजो कै होया? 41तिन्हा दिनां बिच तिन्हा ने इक्क बछड़ा बणाई करी तिसेरी मूर्ति रे अग्गे कुर्बानी चढ़ाई ते अपणे हत्थां रे कम्मां बिच मगन होणा लग्गी पे 42इस कने परमेश्वर ने मुँह मोड़ी करी तिन्हा जो छड्डी दित्तेया ताकि आसमान रे तारेयां री भक्ति करण जिय्यां भविष्यद्वक्ता री कताबां बिच लिख्खे रा भी है,

“ओ इस्राएल रे लोक्कों,

कै तुसा बियाबान बिच चाली साल्लां तिकर जानवर री कुर्बानी ते अनाज रा चढ़ावा सिर्फ मेरे जो ही चढ़ादें रेय?”

43तुसा मोलेक रे तम्बू ते रिफान देवते रे तारे जो लेई करी फिरदे थिये मतलब तिन्हा छवियां जो जिन्हा जो तुसा अराधना करणे तांइ बणाए रा थिया, अते मैं तुसा जो बेबिलोन देस का अपणे लेई जाई करी बसाणा। 44गवाई रा तम्बू बियाबान बिच असा रे बाबे-दादेयां रे बिच-मझाटे थिया, जिय्यां परमेश्वर ने ठैहराया जिनिये मूसा कने बोल्लेया, जे अकार तैं दिख्खे रा है, तिसेरे हिसाब कने इसजो बणा। 45गवाई रे तम्बू जो मते साल्लां बाद असा रे बाबे-दाद्दे पुराणे जमाने का पाई करी यहोशू कने इत्ते लेई आए जिस बेल्ले कि तिन्हा ने तिन्हा जातियां पर हक पाया, जिन्हा जो परमेश्वर ने असा रे बाबे-दाद्दे रे सामणे का कड्डी दित्तेया, ते से तम्बू दाऊद राज्जा रे बेल्ले तिकर रेया। 46दाऊद राज्जा पर परमेश्वर ने दया कित्तेया अते तिसने बिनती कित्ती कि से याकूब रे परमेश्वर तांइ रैह्णे रा घर बणाए 47दाऊद राज्जे रे मुंडे सुलैमान ने परमेश्वर तांइ मन्दिर बणाया। 48पर परमप्रधान रे हत्थां रे बणाए रे मन्दिर बिच नी रैहन्दा, जिय्यां कि यशायाह भविष्यद्वक्ता री कताब बिच लिख्खे रा है, 49प्रभु बोलदे कि स्वर्ग मेरा सिहांसन ते दुनिया मेरे पैरां रे थल्ले री पीढ़ी है, मेरे तांइ तुसा कुस तरिक्के रा मन्दिर बणागें? ते मेरे अराम करणे री कुण सी जगाह् होणी? 50कै ए सारी चीजां अप्पु नी बणाए रे हिन? 51तुसा तिन्हेरी गल्ल मनणे का हमेसा टलदे, तुसा हमेसा पवित्रात्मा रा विरोध करदे जिय्यां तुसा रे बाबे-दाद्दे करदे थिये, तिय्यां ही तुसा भी करदे। 52भविष्यद्वक्ता बिच का कुस जो तुसा रे बाबे-दादेयां ने नी तगं कित्ता? तिन्हा ने तिस धार्मिक रे आणे री खबर दैणे वाले तिन्हा पैल्ले जमाने रे लोक्कां जो मारी रख्खेया ते जां मसीह आए तां तुसा तिन्हा जो पकड़वाई करी मरवाई रखणे वाले मणू हिन। 53तुसा ने स्वर्गदूतां रे जरिए ठैहराए री मूसा रा कानून तां पाया पर तिसजो मन्नेया नी।

स्तिफनुस जो बट्टे मारणा

54ए गल्लां सुणी करी से यहूदी अधिकारी फुकी पे ते स्तिफनुस पर दांद्द पिह्णा लग्गी पये। 55पर तिसने पवित्रात्मा कने भरी करी स्वर्ग रे पास्से दिख्खेया ते परमेश्वर री महिमा जो ते यीशु जो परमेश्वर रे सज्जे पास्से खड़ित्ते रा दिख्खी करी 56बोल्लेया, दिख्खो, मैं स्वर्ग जो खुले रा ते मणू रे पुत्तर, जे मैं ही है जो परमेश्वर रे सज्जे पास्से खड़ित्ते रा दिख्खेया करदा है 57तां तिन्हा ने बड़ी जोरे लेर मारी करी कान्न बांद्द करी लित्ते, ते कठे ही तिस पर झपटे 58ते तिसजो यरुशलेम सहर रे बाहर कड्डी करी तिस पर बट्टे मारी करी तिन्हेरे जो जान का मारणा लग्गी पये। स्तिफनुस रे खिलाफ गुआई दैणे वालेयां ने अपणे चोग्गे उतारी करी शाऊल नां रे इक्क जवान मणू का रख्खी दित्ते। 59से स्तिफनुस पर बट्टे मारदे रे ते से ए बोल्ली करी प्रार्थना करदा रेया, ओ प्रभु यीशु मेरी आत्‍मा जो अपणाई लेयो। 60फिरी गोड्डे भारे बेई करी बड़ी अवाज कने बोल्लेया, ओ प्रभु, ए पाप इन्हा पर मत ला ते ए बोल्ली करी से मरी गेया शाऊल तिसेरे मारे जाणे बिच सहमत थिया।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

प्रेरितां रे कम्म 7: CDHNT

Highlight

ಶೇರ್

ಕಾಪಿ