प्रेरितां रे कम्म 5

हनन्याह ते सफीरा

1हनन्याह नां रे इक्क मणू ते तिसेरी लाड़ी सफीरा ने अपणी जायदाद रा किच्‍छ हिस्सा बेच्चेया, 2ते तिस रक्म का अप्पु जो थोड़ा बचाई लित्ता ते से गल्ल तिसेरी लाड़ी भी जाणदी थी, ते तिसेरा किच्‍छ हिस्सा अणी करी प्रेरितां जो सौंपी दित्तेया। 3पतरस ने बोल्लेया, ओ हनन्याह! शैतान ने ए गल्ल तेरे मन बिच किजो पाई की तू पवित्रात्मा कने झूठ बोल्ले, ते अपणी जायदाद बिच का थोड़ा हिस्सा बेच्चेया थिया, तिसेरे दाम बिच का किच्‍छ रख्खी छड्डे? 4जां तिकर से तेरे का थी, कै तेरी नी थी? ते जां से बिकी गई, कै तेरे वस बिच नी थी? ए बुरी गल्ल तैं अपणे मन बिच किजो सोच्ची? तैं मणूआं कने नी पर परमेश्वर कने झूठ बोल्ले रा है। 5ए गल्लां सूणदे ही हनन्याह छुड़की पेया ते तिसेरी जान निकली गई ते सारे सुनणे वाले बड़े डरी गे। 6फिरी जवान लोक्कां ने आई करी तिसजो चुक्केया ते तिसेरी अर्थी बणाई ते बाहर लै जाई करी गाड़ी दित्ता। 7लगभग त्रै घटें रे बाद तिसेरी लाड़ी, जे किच्‍छ होए रा थिया बगैर जाणे अन्दर आई 8तां पतरस ने तिसजो बोल्लेया, मेरे जो दस्स कै तुसा दोन्नां ने तिस जमीन इन्ने बिच ही बेचि थी? तिसने बोल्लेया, हाँ, इन्ने बिच ही। 9पतरस ने तिसजो बोल्लेया, ए कै गल्ल है कि तुसा दोन्नां ने प्रभु री आत्‍मा री परिक्षा तांइ इक्क मन बणाया? दिख, तेरे लाड़े रे गाड़णे वाले दुआर पर ही खड़ित्ते रे हिन ते तेरे जो भी बाहर लेई जाणा 10तां से तिस्सी बेल्ले तिन्हेरे पैरां पर पेई गई ते से मरी गई ते जवान लोक्कां ने अन्दर आई करी तिसजो मरे रा दिख्खेया ते बाहर लेई जाई करी तिसेरे लाड़े रे नेड़े दब्बी दित्तेया। 11यरुशलेम सहर री सारी कलीसिया रे मणू ते इन्हा गल्लां जो मनणे वाले सब मणू बड़े वरी डरी गे।

निशानियां ते अनौखे कम्म

12प्रेरितां रे जरिए बड़े चमत्कार ते अनौखे कम्म लोक्कां बिच दिखाए जादें थिये, ते से सारे विश्वासी मणू सुलैमान रे बरांड़े बिच कठिदें थिये।

13पर होर लोक्कां बिच का कुसकी जो ए हिम्मत नी हुदी थी कि तिन्हा प्रेरितां बिच जाई मिल्ले, तां भी मणू तिन्हेरी बड़ाई करदे थिये। 14प्रभु बिच विश्वास करणे वाले मते सारे मणू प्रभु री कलीसिया बिच बड़ी वरी गिनती बिच मिलदे रे। 15प्रेरितां रे कम्म रा ए नत्तीजा रेया कि मणू बिमारां लोक्कां जो सड़कां पर अणी-अणी करी मज्जेयां ते झुल्लेयां पर लेटाई दिदें थिये ताकि जां पतरस आये तां तिसेरी परछाई ही तिन्हा बिच का कुसकी पर पेई जाए। 16यरुशलेम सहर रे नेड़े-तेड़े रे सहरां बिच का भी विश्वासी मणू बिमार ते दुष्टात्मा रे सताए रे लोक्कां जो लाई करी कठिदें थिये, ते से सारे प्रेरितां रे जरिए ठीक करी दित्ते जादें थिये।

प्रेरितां री गिरफ्तारी

17तां प्रधान पुरोत्त ते तिसेरे सारे साथी जे सदूकियां रे पथं का थिये, हिर्स कने भरी गे। 18ते प्रेरितां जो पकड़ी करी जेलखाने बिच ढप्पी दित्ता। 19पर रात्ती प्रभु रे इक्क स्वर्गदूत ने जेलखाने रे दुआर जो खोल्ली री तिन्हेरे जो बाहर लाई करी बोल्लेया, 20जाओ, मन्दिर बिच खड़ी करी इस हमेसा री जिन्दगी री गल्लां सारे लोक्कां जो सुणाओ। 21जिय्यां तिन्हा जो बोल्लेया गेया थिया, तिस हिसाब कने से भ्यागा उठी करी मन्दिर बिच जाई करी ए उपदेस दैणा लगे, तां प्रधान पुरोत्त ते तिसेरे साथिया ने आई करी महासभा जो ते इस्राएली लोक्कां रे सारे बुजुर्ग मणू जो कठेरेया ते जेलखानेयां बिच ए बोल्ली भेज्जेया कि तिन्हेरे जो लेई आए, 22पर मन्दिर रे पैहरेदारां जां तित्ते पूज्जी ते दिख्खेया कि से मणू तित्ते नी हिन, ते हटी करी तिन्हेरे जो खबर दित्ती, 23असा ने जेलखाने जो बड़ी सावधानी कने बांद्द कित्ते रा थिया ते पेहरे वालेयां जो बाहर खड़ित्ते रे पाया पर जां खोल्लेया तां अन्दर कोई ना मिल्लेया 24जां मन्दिर रे पैहरेदारां रे सरदार ते बड्डे पुरोत्तां ने ए खबर सूणी, तां तिन्हेरे बारे बिच बड़ी चितां बिच पेई गे कि तिन्हेरा कै होया! 25इन्ने बिच कुसकी ने आई करी तिन्हेरे जो दस्सेया, दिख्खो, जिन्हा जो तुसा जेलखाने बिच बांद्द करी के रख्खे रा थिया, से मणू मन्दिर बिच खड़ित्ते रे लोक्कां जो उपदेस देया करदे हिन 26जां तिनिये सूणेया तां सरदार ने पैहरेदारां कने जाई करी, तिन्हेरे जो लेई आया, पर जोर-जबरदस्ती कने नी, किजोकी से लोक्कां का डरदे थिये कि असा पर बट्टे ना सुटण। 27तिन्हा ने तिन्हेरे जो अणी करी महासभा रे सामणे खड़ेरी दित्ता, ते प्रधान पुरोत्त ने तिन्हा का पूच्छेया, 28तां बड्डे पुरोत्त ने तिन्हेरे जो पूच्छेया, कै असा ने तुसा जो चितौणी देई करी हुकम नी दित्तेया थिया कि तुसा इस नां कने उपदेस मत करदे? तां भी तुसा ने सारे यरुशलेम सहर जो अपणे उपदेस कने भरी रख्खे रा है ते तिस मणू रा खून रा इल्जाम असा री सिर पर लाणा चाहंदे। 29पर पतरस ते होर प्रेरितां ने जवाब दित्ता, मणूआं रे हुकम का बधी करी परमेश्वर रे हुकम जो मनणा ही असा री जिम्मेदारी है 30असा रे बाबे-दादेयां रे परमेश्वर ने यीशु जो जिन्दा कित्तेया, जिस जो तुसा ने सुली पर लटकाई करी मारी रख्खेया थिया। 31तिसजो परमेश्वर ने प्रभु ते छुटकारा दैणे वाला बणाई करी अपणे सज्जे हत्थ पास्से उच्चां करी दित्तेया कि से इस्राएलियां जो तौबा करी के ताकत ते पाप्पां री माफी देई सके। 32असी इन्हा गल्लां रे गवाह हिन ते तिय्यां ही पवित्रात्मा भी, जिस जो परमेश्वर ने तिन्हा जो दित्ते रा है जे तिन्हेरा हुकम मनदे 33ए सुणी करी सभा रे सदस्य मणू जलणा लग्गी पे ते प्रेरितां जो मारी रखणा चाएया। 34पर गमलीएल नां रे इक्क फरीसी ने जे शास्त्रि लोक्कां ते सारे लोक्कां बिच बड़ा मन्नेया जादां थिया, सभा बिच खड़ी करी प्रेरितां जो थोड़ी देर तांइ बाहर करी दैणे रा हुकम दित्तेया, 35तां तिसने बोल्लेया, ओ इस्राएल रे लोक्कों, तुसा जे कि ओ इन्हा मणूआं कने करणा चाह्‍ंदे सोची-समजी करी ही करेयो 36किजोकी इन्हा दिनां का पैल्ले थियुदास ए बोलदा होया उठेया थिया, कि मैं भी किच्‍छ है ते कोई चार सौ मणू तिसेरे कने होई गे, पर से मारेया गेया ते जिनिये मणू तिसजो मनदे थिये, सारे तित्तर-बित्तर होई गे ते मिटी गे। 37तिसेरे बाद नां लिखणे रे दिनां बिच गलील प्रदेश रा यहूदा आया, ते किच्‍छ लोक्कां जो अपणे पास्से करी लित्ता, ते से भी मुकी गेया ते जिनिये मणू तिसजो मनदे थिये सारे तित्तर-बित्तर होई गे। 38इधेरे तांइ अवे मैं तुसा जो बोलदा कि इन्हा मणूआं का दुर ही रेयो ते इन्हेरे कने किच्‍छ कम्म मत रख्खो किजोकी जे ए धार्मिकता रा कम्म मणूआं रे पास्से का हो तां मिटी जाणा 39पर जे परमेश्वर रे पास्से का है तां तुसा तिन्हेरे कदी मिटाई नी सकगे कुते इदेया ना हो कि उसी परमेश्वर कने भी लड़ने वाले बणी जाओ 40तां तिन्हा ने तिसेरी गल्ल मन्नी लित्ती ते प्रेरितां जो सद्दी करी कुटवाया, ते ए हुकम देई करी छड्डी दित्तेया कि यीशु रे नां कने फिरी कोई उपदेस मत करदे। 41से इस गल्ल का खुस होई करी महासभा रे सामणे का चली गे, कि असी यीशु रे नां री बड़ाई होणे रे जोग्गे तां ठैहरे। 42से हर रोज मन्दिर बिच ते घर-घर बिच प्रचार करणे, ते इस गल्ल रा सुब बसेख सुनाणे का कि यीशु ही मसीह हिन, नी रुके।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

प्रेरितां रे कम्म 5: CDHNT

Highlight

ಹಂಚಿಕೊಳ್ಳಿ

ಕಾಪಿ