मरकुस 2
2
अद्रंगा रै मरीजा जो ठीक करू
(मत्ती 9:1-8; लूका 5:17-26)
1कई दिन बाद फिरी यीशु कफरनहूम ग्राँ मन्ज आ, अतै मणुऐ हुणु कि सो कसकि रै घरा मन्ज हा। 2फिरी ऐतनै मणु किठ्ठी गै कि दारा मन्ज भी जगह ना रैई; अतै सो तियां जो प्रमात्मैं रा बचन हुणाऊ करदा थू। 3अतै मणु अक्क अधरंगी जो चऊँर मणु थऊँ चूकवाई के तैस बलै लेई आये। 4पर जैहणै सो भिड़ा री वजह थऊँ तैस तक ना पुजी सकै, ता सो तैस छपरा जो चड़ी गै अतै छपरा रै हैळा जो खोलणा लगै; अतै जैहणै सो तैतिओ खोली बैईठै ता तियैं तैस अधरंगी मणु जो खाट समेत रस्सी पाई करी यीशु बलै थलै पुजाई दिता। 5यीशुऐ तंयारा विस्वास हेरी करी तैस अधरंगी सोगी बल्लू, “हे पुत्र, मैंई तेरै पाप माफ करी दितै।”
6ता कई शास्त्री जैड़ै तैड़ी बैहुरै थियै, अपणै-अपणै मना मन्ज सोचणा लगै, 7“ऐह मणु कजो इआं बल्लू करदा? ऐह ता प्रमात्मैं री निन्दा करू करदा। प्रमात्मैं जो छड़ी करी कोई होर कुण पापा जो माफ करी सकदा?”#यशा. 43:25. 8यीशुऐ आत्मा मन्ज झट जाणी लैऊ कि ऐह अपणै मना मन्ज कै सोचु करदै हिन, अतै तिनी बल्लू, “तुहै अपणै-अपणै मना मन्ज ऐह कजो सोचु करदै हिन? 9कै तुहै ऐह ना जाणदै कि ठीक करनै थऊँ पापा जो माफ करना आसान हा क्ओकि तैतिओ हेरी ना सकदै। पर चंगाई रै कम्मा जो हेरी सकदै हिन कि सो ठीक भूआ कि ना। 10पर तुहै ऐह जाणी लैन कि मणु रै पुत्रा जो धरती पुर मणु रै पाप माफ करनै रा अधिकार हा।” तिनी तैस अधरंगी सोगी बल्लू, 11“अऊँ तिजो सोगी बलदा, उठ अपणी खाट चुक अतै अपणै घरा जो चली गा।” 12सो झट ऊठु अतै अपणी खाट चुकी करी सबी रै सामणै थऊँ नकैई करी चली गो; ऐसा गल्ला पुर सब हैरान भूच्ची गै, अतै प्रमात्मैं री जय जयकार करीके बलणा लगै, “अहै ऐसा कदी भी ना हेरू।”
लेवी रा हैदया गाणा
(मत्ती 9:9-13; लूका 5:27-31)
13यीशु फिरी गलील री झीला रै कनारै जो गो, अतै सब भीड़ तैस बलै आई, अतै सो तियां जो उपदेश दिणा लगू। 14गान्दै टैमैं तिनी हलफई रै पुत्र लेवी जो चुंगी लैन्दै चौकी पुर बैहुरै हेरू, अतै तैस सोगी बल्लू, “मिन्जो पिचो चली पै।” अतै सो उूठी करी तैस पिचो चली पैऊँ।
15जैहणै यीशु अतै तसेरै चेलै मत्ती रै घरै खाणा बैईठै, ता मतै सारै चुंगी लैणैबाळै अतै इन्नै मणु जियां जो मणु पापी बलदै थियै क्ओकि सो मतै सारै थियै, अतै तसेरै पिचो चलुरै थियै। 16कुछ शास्त्री जैड़ै फरीसी थियै ऐह हेरी करी कि सो ता पापी अतै चुंगी लैणैबाळै सोगी खाणा लगुरा, तसेरै चेलै सोगी बल्लू, “ऐह ता चुंगी लैणैबाळै अतै पापी सोगी खान्दा पिन्दा हा।” 17यीशुऐ ऐह हुणी करी तियां सोगी बल्लू, “भलै चंगै जो बईद्दा री जरूरत ना भुन्दी, पर बमारा जो भुन्दी हा अऊँ धर्मी जो ना पर पापी जो बचाणा छूरा हा।”
ब्रता रा सवाल
(मत्ती 9:14-17; लूका 5:33-39)
18यूहन्ना रै चेलै, अतै फरीसी व्रत करदै थियै; अतै तियैं ईच्ची करी तैस सोगी ऐह बल्लू, “यूहन्ना रै चेलै अतै फरीसी रै चेलै कजो व्रत करदै, पर तेरै चेलै व्रत ना करदै?”
19यीशुऐ तियां सोगी बल्लू, “जैहणै तक दूल्हा बराती सोगी रैहन्दा हा, सो खान्दै पिन्दै रैहन्दै हिन। ता तियां जो व्रत करनै री जरूरत निय्आ। 20पर सो दिन ईणै हिन जैहणै दूल्हा तियां थऊँ अलग करी दिणा; तैस टैमैं तियां व्रत करना।
21“कोई भी मणु नोए कपड़ै री टल्ली पूराणै ओड़णा मन्ज ना लान्दा; ना ता तैसा टल्ली सो पुराणा कपडा खिन्जी लैणा, अतै जैहणै मणु सो धूणा तैस होर मतै फटी गाणा। 22यीशुऐ बल्लू नोए दाखरस जो पुराणी खलड़ी मन्ज कोई ना रखदा, ना ता नोए दाखरस खलड़ी फूली करी फाडी दिणी, अतै दाखरस अतै खलड़ी दूनी बर्बाद भूच्ची गाणा पर नौआ दाखरस नोई खलड़ी मन्ज भरदै हिन।”
विश्रामदिन रा प्रभु
(मत्ती 12:1-8; लूका 6:1-5)
23अक्क विश्रामदिन यीशु बगड़ी रै कनारै चलूरा थू, अतै तसेरै चेलै चलदै-चलदै हिल्लै त्रोड़ी करी खाणा लगै।#व्य. 23:25. 24तैहणै फरीसी धर्मगुरू तैस सोगी बल्लू, “हेर, ऐह विश्रामदिन सो कम कजो करू करदै जैडा ठीक निय्आ?”
25तिनी तियां जो जवाव दिता, “कै तुहै पवित्रग्रन्था मन्ज ना पढुरा कि जैहणै राजा दाऊद अतै तसेरै साथी भूखै थियै ता तियैं कै करू थू?” 26तिनी कियां अबियातार महायाजक रै टैमैं, प्रमात्मैं रै तम्बू मन्ज गिच्ची करी चढ़ाऊरी रोटी खाई, जियां रोटी सिर्फ याजका जो छड़ी होरी जो खाणा ठीक ना थू, अतै तिनी अपणै साथी जो भी दिती थी।
27ता तिनी तियां सितै बल्लू, “विश्रामदिन मणु तांयें बणाऊरा हा, ना कि मणु विश्रामदिन तांयें 28ठेरै तांयें मणु रा पुत्र विश्रामदिन रा भी प्रभु हा।”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
मरकुस 2: GBKNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
