Luka 17

Cinyonyoono

(Mateyo 18.6-7, 21-22; Maako 9.42)

1Jesu wakati kuli basikwiiya bakwe, “Zilebyo zicita kuti bantu babisye nkozili, pele maawe kumuntu uuzileta! 2Inga cabota kulinguwe kuti waangililwa ziyo munsingo akuwaalwa mulwizi, kwiinda kuti awisye wabaniini aaba kuti babisye. 3Amucenjele! Kuti naa munyoko wabisya mucenjezye, pele naa weempa, umulekelele. 4Kuti naa wakubisizya ziindi zili ciloba mubuzuba bomwe, nkabela kaboola kulinduwe akwaamba kuti, ‘Ndeempa’ uleelede kumulekelela.”

Lusyomo

5Batumwa bakati ku Mwami, “Kocituyungizizya lusyomo!” 6Mwami wakabavuwa kuti, “Kuti nimwalijisi lusyomo luli mbuli nseke yamasitadi nimwali kukonzya kwaambila bbuyu eeli kuti, ‘Kozyuka aawa, ukalisimpike mulwizi!’ ncobeni inga lyacita oobo.

Mulimo wamubelesi

7“Kuti naa umwi wanu kajisi mubelesi uulima mumuunda naa weembela mbelele, sena inga mbwaakotoka buyo waambila mubelesi kuti, ‘Fwambaana, ulye cakulya?’ 8Peepe! Pele ulati kumubelesi, ‘Kosama kabotu, undijikile cakulya, wamana, undibambile akundilindilila nencilya akunywa. Ndamana kulya, ayebo notikalye akunywa.’ 9Sena mubelesi ulalumbwa kuti naa wacita eeco ncaambilwa. 10Mbubonya oobo anywebo, mwacita nzomwaambilwa kucita zyoonse, kamwaamba kuti, ‘Tuli babelesi buyo. Tatweelede kulumbwa nkaambo twacita mulimo ngotweelede kucita!’”

Jesu mbwakaponya basicisenda bali kkumi

11Eelyo Jesu naakali kuya ku Jelusalemu wakainda akati kamunyinza wa Samaliya a Galilii. 12Naakali kunjila mumunzi umwi, kwakamucinga basicinsenda bali kkumi. Bakaima aalaale, 13bakoongolola akuti, “O Mwami Jesu! Kotufwida lubomba!”

14Jesu naakababona, wakabaambila kuti, “Kamuya mukalitondezye kubapaizi.” Nibakacili kuya bakapona. 15Umwi wabo naakabona kuti wapona, wakapiluka kuli Jesu kaya bulumbaizya Leza ajwi pati. 16Naakasika, wakavuntamina Jesu, wamulumba. Sicinsenda ooyu wakali Musamaliya.

17Mpoonya Jesu wakati, “Tee kwaponyezegwa bali kkumi, ino bali fuka bali kuli? 18Nkaambo nzi nikwaboola buyo wamasi ooyu kuzoolumba Leza?”

19Lino Jesu wakati kulinguwe, “Nyamuka, koya lusyomo lwako lwakuponya.”

Kuboola kwabwami bwa Leza

(Mateyo 24.23-28, 37-41)

20Jesu naakabuzigwa a Bafalisi kuti naa bwami bwa Leza bulasika lili wakati, “Bwami bwa Leza tabukalibonyi azitondezyo nibuyoosika pe. 21Taakwe uuzooamba kuti ‘Amulange, mboobu bwasika,’ naa kuti, ‘Mbobuya kuya’ nkaambo Bwami bwa Leza buli mulindinywe.” 22Eelyo wakati kuli basikwiiya bakwe, “Ciyoosika ciindi ncomuyooyandisya kubona buzuba bomwe bwamazuba aa Mwanaa Muntu, pele tamukooyoobubona. 23Kuyooboola bantu, bayoomwaambila kuti ‘Amubone, nguulya kuya’ naa kuti, ‘Amuboole, nguuno kuno!’ Mutakainki kuya bulangaula pe. 24Nkaambo mbubonya mbuli lulabo mbolulaba akwaandulula julu kuzwa lubazu lumwi kusikila kuli lumwi, mbubonya oobo mbobuyooba buzuba bwakuboola kwa Mwanaa Muntu. 25Pele kusaanguna Mwanaa Muntu uleelede kupenga mapenzi manji, akukakwa abantu bamazuba aano. 26Mbubonya mbuli mbokwakabede mumazuba aa Nowa, mbokuyooba amumazuba aa Mwanaa Muntu. 27Mumazuba aayo bantu bakali kulya akunywa, bakali kukwata akukwasigwa mane kusikila buzuba Nowa naakanjila mubwato, amuyoba mupati niwakasika kubanyonyoona boonse.

28“Alimwi kuyooba mbubonya mbokwakabede mumazuba aa Loti. Bantu bakali kulya akunywa, bakali kuula akuuzya, kusyanga akuyaka maanda. 29Pele buzuba Loti naakazwa mu Sodomu, kujulu kwakaloka mulilo asalufa akubanyonyoona boonse. 30Mbubonya oobo mbokuyooba buzuba mbwatikayubununwe Mwanaa Muntu.

31“Buzuba oobo, ooyo uuli atala aalululi lwaŋanda atakaselukili zintu zyakwe zili muŋanda kuti akazitole, mbubonya awalo uuli mumuunda atakabweedeli kuŋanda. 32Amuyeeye muka Loti!

33“Kufumbwa muntu uuyanda kufutula buumi bwakwe uyoobusweekelwa, pele ooyo uuyoosweekelwa buumi bwakwe akaambo kangu, nguuyoobujana.

34“Ndamwaambila kuti, masiku ngoonya aayo kuyooba bantu bobilo bayoojanika balilede abulo bomwe, umwi uyootolwa, umwi uyoosyaala. 35Kuyooba bakaintu bobilo bayoojanwa kabaziya antoomwe, umwi uyootolwa umwi uyoosyaala. [ 36Baalumi bobilo bayoojanwa kabali mumuunda, umwi uyootolwa, umwi uyoosyaala.”

37Basikwiiya bakamubuzya kuti, “Ino nkukuli, Mwami?” Mpoonya Jesu wakabavuwa wakati, “Ooko kuli mutunta abasikube nkoobayooyobolokela.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 17: Tonga96

Highlight

ಶೇರ್

ಕಾಪಿ