Mateo 8
8
Kubukwa kwa muntu wa mbumba
(Mako 1:40-45; Luka 5:12-16)
1Kabiji byo aikijile pa mutumba, mabumba akatampe amulondejile. 2Kabiji ponkapo, kwaishile muntu wa mbumba ko aji ne kumupopwela amba, “Nkambo, umvwe mwaswa, mwayuka kumbuka.”
3Ne Yesu watanyikile kuboko kwanji ne kumukwata amba, “Naswa, mubukiwe.” Kabiji ponkapotu wabukilwe ku mbumba yanji. 4#Levi 14:1-32Kepo Yesu wamwambijile amba, “Kechi mubuule muntu nangwa umotu ne; yaingatu mukemweshe kwi ng'anga wa Lesa ne kulambula mulambu ye akambiizhe Mosesa, kikale ke kiyukilo ku bantu.”
Kubukwa kwa kalume wa mukulumpe wa bashilikale
(Luka 7:1-10)
5Kabiji pa kutwela mu Kapenama, kwaishile mukulumpe wa bashilikale wamusashijile amba, 6“Nkambo, kalume wami walaala mu nzubo yami ubena kubeela kalepu, wamanama bingi.”
7Kumvwa aye amba, “Nsakuya namubuke.”
8Kabiji mukulumpe wa bashilikale wamwambijile amba, “Nkambo, kechi kyafwainwa anweba kutwela mu nzubo yami ne; nanchi ambaitu jiwi, ne kalume wami usakukosa. 9Mambo ne amiwa ne muntu wapewa luusa pa bashilikale baji munshi yami; namwambila umo namba, yanga! Ne aye kaye; ne mukwabo namba, iya! Ne aye kaiye; ne kalume wami namba, uba kikye! Ne aye wikyuba.”
10Yesu pakumvwa wakuminye bingi, ne kwibambila bamulondejilenga amba, “Kine ne mwambila namba, kechi namwenepo lwitabilo lukatampe lwa byonkabye nangwa mubena Isalela ne. 11#Lu 13:29Kabiji nemwambila namba, bavula bakeya bakafuma ku musela ne ku muzhika, bakekala pamo ne Abulahama, ne Izaka, ne Yakoba, mu bufumu bwa mwiulu. 12#Mat 22:13; 25:30; Lu 13:28Bino baana bamu bufumu bakatayiwa mu mfishi ya pangye, amwa mukekala kujila ne kwisuma ku meno.” 13Ne Yesu wamwambijile mukulumpe wa bashilikale amba, “Bwelainga byonka byo mwaitaba bimubilwe.”
Kabiji kalume wanji wakosele ponkapotu mu kyonkakyo kimye.
Kubukwa kwa inanjivyala Petelo ne bantu bakwabo
(Mako 1:29-34; Luka 4:38-41)
14Kabiji Yesu pa kutwela mu nzubo yakwa Petelo, wamwene muko wanji Petelo, kasa alaala ne kubeela kikola kya mashika. 15Ne aye wamukwachile kuboko, ponkapo ne kikola kyamulekele, ne kwimana waimene ne kwingila ke ebengijile.
16Kabiji juba pakufika mabanga, Yesu bamuletejile bavula banonkelwe ku bademona ne aye wibapangilemo bapashi babipa mu bantu na jiwitu, ne kwibabuka bonse bakolwa. 17#Isa 53:4Amba kifike kya ambile ngauzhi Isaya amba, “Mwine washikwile bulema bwetu, ne kusenda bikola byetu.”
Basaka kwikala ke baana banji babwanga
(Luka 9:57-62)
18Kabiji Yesu, pa kumona mabumba akatampe sa amubumba wakambiizhe amba, “Twabukile ku bushiya.” 19Kabiji kwaishile munembeshi umo kwi aye, ne kumwambila amba, “Mufunjishi, nkemulondelanga konse konse ko mukaya.”
20Kumvwa Yesu wamwambijile amba, “Balubwala baji na mimbwa; ne bang'onyi bapita mwiulu nabo baji na binsa; pakuba Mwana Muntu kechi ujipo nangwa na pa kushakamina mutwe wanji ne.”
21Kabiji mukwabo mwana wabwanga wamwambijile amba, “Nkambo, akindekai patanshi nkiye na kuzhiika bataata.”
22Pakuba Yesu wamwambijile amba, “Ndondelaingatu, mwibaleke bafu bazhiike bafu babo bene.”
Kuzhindamika kwa kipuupu
(Mako 4:35-41; Luka 8:22-25)
23Kabiji byo a kanjinjile mu bwato, baana banji babwanga bamulondejile. 24Ponkapo pabuukile kipuupu kikatampe pa kizhiba, kyakuuba ne bwato ke bulobe na manyaki. Pakuba aye mwine wajinga mutulo. 25Kabiji baishile ko aji, ne kumubuusha amba, “Nkambo tupulushai twafwa!”
26Kumvwa aye amba, “Mwaubilaka moyo? Anweba ba kalwitabilo kacheche.” Ponkapo waimene, ne kukanya lubesha ne mema; ponkapotu paubile ne nzo!
27Ne abo bakuminye amba, “Awe ng'anyi musango wa muntu, aye nangwa lubesha ne mema byamukookela?”
Kubukwa kwa baana balume babiji banonkelwe ku bademona
(Mako 5:1-20; Luka 8:26-29)
28Kabiji byo afikile ku bushiya mu kyalo kya ba Ngadalene, kwamusambakene bantu babiji banonkelwe ku bademona, kasa bafuma ku bilende, bajinga na bukaji bukatampe, bwa kuuba kafwako nangwa umo wakonsheshe kwijipita aja jishinda ne. 29Ponkapo, babijikile amba, “Ikika kyo tusakuuba nenu, anweba Mwana Lesa? Mwaiya kuno na kwitumanyika kimye kasa kikyangye kufika nyi?”
30Kwajinga ne jitanga jikatampe ja bankumba kwalepa na ko bajinga kasa baja.
31Kabiji bademona bamusashijile amba, “Umvwe mwitupangemo, mwitutume tukatwele mu jitanga ja bankumba.”
32Ponkapo aye wibambijile amba, “Yainga,” Ne abo bafuminemo, ne kukatwela mu bankumba. Ponkapo kisaka kyonse kyavundumukile ne kukunkuluka mukolo lubilo ne kwitaya mu kizhiba, chu! Ne kufwa bafwile monka mu mema.
33Kabiji bajishishenga bankumba banyemene, ne kuya mu muzhi, bakabulang'ene byonse, ne akya kibamwekejile banonkelwe ku bademona. 34Kepo bena muzhi baimene na kumutundaila Yesu, ne pa kumumona bamusashijile amba, afumemo mu kyalo kyabo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mateo 8: KNTP
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
