Mateo 22
22
Kishimpi kya kijiilo kya masongola
(Luka 14:15-24)
1Kabiji Yesu wibeelele kishimpi kikwabo amba, 2“Bufumu bwa mwiulu bwapashang'ana na mfumu wateekele kijiilo kya masongola a mwananji. 3Kabiji watumine bakalume banji na kwibeta abo bo aichile ku kijiilo kya masongola, bino bakaine kwiya. 4Ponkapo watumine bakalume bakwabo amba, kabuulai abo bonalayile amba, talai napwisha kala kuteeka kijiilo kyami, ne bang'ombe bami ne banyama bami banuna naipaya, byonse byapya kala. Iyainga ku kijiilo kya masongola. 5Pakuba bekipelwile bapalang'ene, umo ku bujimi bwanji mwine, mukwabo ku bintu byanji byo apotesha, 6aba bashajilepo nabo bakwachile bakalume banji, bebayanjishishe, ne kwibepaya. 7Ne mfumu wazhingijile bingi, waimenye bulemo bwanji, bwakonawine aba bambanzhi, bwasokele ne muzhi wabo. 8Ponkapo wa ambijile bakalume banji amba, kijiilo kya masongola kyanengezhiwa, pakuba aba botwaichile kechi kibafwainwa ne. 9Onkao mambo yainga ku mansanga a mashinda, bonse bo musakukatanako, mwibete ku kijiilo kya masongola. 10Kabiji aba bakalume, pa kuya mu mashinda, bebapwizhizhe pamo bonse bo batainemo, ne babi ne bawama, ponkapo nzubo ya kijiilo kya masongola yayujile na benyi.
11“Aye mfumu pa kutwela amba mmone benyi, wamwenemo muntu wabula kuvwala kivwalo kya masongola. 12Wamwambijile amba, obewa mukwetu watwela byepi muno byo wabula kivwalo kya masongola? Kechi wamwene kya kwamba ne. 13#Mat 8:12; 25:30; Lu 13:28Ponkapo mfumu wibambijile bamwingilo banji amba, mukasai ku maboko ne ku maulu, mumutaye mu mfishi ya pangye. Mo mukekala majilo ne kwisuma ku meno. 14Mambo baitwa bo bavula, pakuba basalululwa bo bacheche.”
Mambo a kupana musonko
(Mako 12:13-17; Luka 20:20-26)
15Kepo Bafaliseo ke baye ne kuya na kunengezha mashinda a kumukwachilamo. 16Kabiji bamutumijile baana babo babwanga ne bena Heloda, ne kumwambila amba, “Mufunjishi twayuka namba anweba mwi wa kine, kabiji mufunjishatu jishinda ja Lesa mu bukine, kechi muchiina muntu nangwa umo ne, mambo kechi muta muchima ku bilungi bya bantu ne. 17Mwitubuule mwane, kana anweba mulanguluka byepi? Kizhila kusonka kwi Kesala nyi, inyi ne?”
18Pakuba Yesu byo ayukile bubi bwa milanguluko yabo, wibambijile amba, “Mungesekela ka, anweba ba kamfutumfutu? 19Mmweshai mali o mupana ku musonko.”
Ponkapo bamuletejile ndenali imo. 20Ne aye wibambijile amba, “Lelo akye kipasha ne kinembelo bya kwa ng'anyi?”
21Abo amba, “Bya kwa Kesala.”
Kepo ebambijile amba, “Panai kwi Kesala bya kwa Kesala, ne kwi Lesa bya kwa Lesa.”
22Pakumvwa byonkabyo bakuminye, bamushiile ke baye.
Kwipuzha mambo a kusanguka mu bafu
(Mako 12:18-27; Luka 20:27-40)
23 #
Byu 23:8
Mu jonkaja juba kwaishile Basadusea kwi aye, bonkabo bamba amba, kafwako lusanguko lwa bafu. 24#Mpitu 25:5Ne abo bamwipwizhe amba, “Mufunjishi, Mosesa wa ambile amba, kana muntu wafwa, ne kushapo baana ne, mulongo wanji amuswane mukazhanji, asemenemo mwana wa mulongo wanji. 25Mwi atweba mwajinga baana bankazhi batanu na babiji. Mubeji wasongwele mukazhi, wafwiletu ne kushamo mwana ne; washiila nkasanji mukazhanji. 26Ne wa bubiji naye byonkabyo, ne wa busatu naye pamotu, kufikizha ne ku wa butanu na bubiji. 27Kabiji panyuma ne mwanamukazhi mwine naye wafwile. 28Nanchi pa kukasanguka bafu ukekala ke muka ng'anyi? Mu aba batanu na babiji, mambo bonse bamusongwele?”
29Kumvwa Yesu amba, “Mwaya mungi, mambo kechi mwayuka binembelo nangwa bulume bwa Lesa ne. 30Mambo pa kukasanguka bafu, kechi bakasongola, nangwa kusongolwa ne, kabiji bakekala pamo nobe bamalaika ba mwiulu. 31Kabiji mwayila kusanguka kwa bafu, kechi mwatangilepo byo emwambijile Lesa nenyi amba, 32#Lupu 3:6amiwa ne Lesa wa Abulahama, ne Lesa wa Izaka, ne Lesa wa Yakoba? Aye Lesa kechi ye Lesa wa bafu ne, wa bomi.”
33Ponkapo mabumba pakumvwa bakuminye bingi mafunjisho anji.
Mukambizho mukatampe
(Mako 1:28-34; Luka 10:25-28)
34Kabiji Bafaliseo pakumvwa amba, wibashinkisha bulaka Basadusea, ponkapo bepwizhizhe pamo. 35Kepo umo wa kwabo, shayuka wa mizhilo, wamwesekele pa kumwipuzha amba, 36“Mufunjishi, nanchi mukambizho mukatampe wa mu buku wa Mizhilo ye wepi?”
37 #
Mpitu 6:5
Kumvwa aye Yesu amba, “Ukamutemwa Nkambo Lesa wobe na muchima wobe yense, ne na mweo wobe yense, ne na maana obe onse. 38Awo ye mukatampe, ye mukambizho mutanshi. 39#Levi 19:18Kabiji wa bubiji waesakana nanji ye ye uno amba, ukatemwa mukwenu pamo byonka byowitemwa obewa mwine. 40#Lu 10:25-28Pa yo ino mikambizho ibiji po pa kishina kya mu buku yense wa Mizhilo, ne wa Bangauzhi ba Lesa.”
Kilishitu ye mwana ng'anyi?
(Mako 12:35-37; Luka 20:41-44)
41Kabiji Bafaliseo sa bakipwila pamo, Yesu wibepwizhe amba, 42“Anweba nanchi mulanguluka byepi na mambo a Kilishitu? Ye mwana ng'anyi?”
Kumvwa abo amba, “Mwana Davida.” 43Aye wibepwizhe amba, “Mambo ka aye Davida na Mupashi umutela amba Nkambo?” Amba,
44 #
Sala 110:1
“Nkambo waambila Nkambo yami amba,
ikala ku kilujo kyami,
poso mbiike balwanyi bobe munshi ya maulu obe?”
45“Umvwe kabiji Davida wamutelele amba ‘Nkambo.’ Leelo kabiji ye mwananji byepi?”
46Kabiji kechi pajinga muntu nangwa umo wayukile kumukumbula ne, kufuma ku joja juba kafwako muntu wachinchikile kumwipuzha bikwabo ne.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mateo 22: KNTP
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
