MATIU 4
4
Seitana Lɔ Yesu Gɔlɛma
(Mak 1.12-13; Luk 4.1-13)
1Hugutungɔ na wooma Ngewɔ Yafei i pielɔ Yesu i li ndɔgbɔ lambɛi ma aako Seitana i ngi gɔlɛ. 2Kia i folo numu fele gbɔyɔngɔ kɛɛ kpindi numu fele gbɔyɔngɔ gbɔyɔni na ii mɛhɛɛ gbi mɛi, ndɔlei i ngi lɔilɔ. 3Kɛ Numu Gɔlɛmɔi i wanga ngi gama yɛ, “Ina Ngewɔ Hindoloi lɔ a bie, kɛ nde kɔtii jisia ma ti wote a bledii.”
4 #
Deu 8.3
Kɛɛ Yesu i poteilɔ yɛ, “Ngewɔ Gɔlɛi yɛ, ‘Nuuvu lɛɛvu ii hɛlɛni a mɛhɛɛ lekee, kɛ na lee gbi njɛpɛ le a gbua Ngewɔ laa.’ ”
5Kɛ Seitana i ya a ngie Jelusalɛm, ta magayemangɔi, i ngi lɛ Ngewɔ Wɛlei Wai yeeveenii hu, 6#Saam 91.11-12 i nde ngi ma yɛ, “Ina Ngewɔ Hindoloi lɔ a bie, gbenda bi gbuja, ajifa Ngewɔ Gɔlɛi i ndeilɔ yɛ,
‘Ngewɔ a bi malaahi wualɔ ngi malikeisia ma;
ta bi gbawolɔ a loko,
aako bi gɔwɔi vulii aa hɔwɔ kɔtu ma.’ ”
7 #
Deu 6.16
Yesu i ndeilɔ ngi ma yɛ, “Kɛɛ Ngewɔ Gɔlɛi i gbɔma ndeilɔ yɛ, ‘Baa Ndemɔi bi Yewɔɛi gɔlɛ.’ ”
8Na wooma Seitana i pieilɔ tia Yesu ti lɛ ngiye guha wa wumba, i mahawuisia kpɛlɛɛ gɛ a ngie dunyei hu kɛɛ ti gbateisia, 9i nde ngi ma yɛ, “Nga ji gbi velɔ bi wɛ ina bi wombi gbakpangaa bi nya vɛli.”
10 #
Deu 6.13
Kɛ Yesu i ndea ngi ma yɛ, “Hiye nya wooma Seitana! Ajifa Ngewɔ Gɔlɛi i ndeilɔ yɛ, ‘Ba Ndemɔi bi Yewɔɛi lɔ vɛli, tawao ta yakpe lɔ mahoungɔ bi ngi magbewe gbua.’ ”
11Kɛ Seitana i hiyenga Yesu wooma; kɛ malikeisia ti wanga gbɔva ngi ma.
Yesu Lɔ Ngi Yengei Lɔtoma Galili
(Mak 1.14-15; Luk 4.14-15)
12Kia Yesu i mɛnini kɛ ti Jɔn wunga kpindiwɛlei bu, i gbuailɔ, i lɛ Galili lɔlei hu. 13I liilɔ Nasalɛti kɛɛ ii lɛmbini na; i lini Kapaniɔm lɔ i hei na, Galili Wopei gbla, Sɛbiulɔn kɛɛ Naftali yeembondeisia ti nda lɔlei hu. 14Ji i wieilɔ aako na la i hou Ngewɔ i puni ngi lutui Aisaya la yɛ,
15“Sɛbiulɔn lɔlei kɛɛ Naftali lɔlei,
i laani gboyei gblanga,
Jɔdan yɛi yeengejahui, yeendɔlɛi la a Galili,
mia nasia tii yɛni a Juublaa ti heini na!
16 #
Ais 9.1-2
Nungei nasia ti yɛ heini kpindi hu
ti foofo wa lɔnga
tawao foofo i wunga nasia ma
ti yɛ heini hɛi yeenɛnɛi yeekpindii hu.”
17I hiye watii na ma Yesu i tɔtoilɔ a ngi wowili yekpei lela yɛ, “A wounve wu jumbuisia ma ajifa Ngelegoohu Mahayɛi lɔ na kpla!”
Yesu Lɔ Nyɛɛ Gbɛbla Naani Lolima
(Mak 1.16-20; Luk 5.1-11)
18Kia Yesu i yɛ jiama Galili Wopei gblanga, i ndeehinga fele lɔilɔ nyɛɛ gbɛbla a tie, Saimɔn na ti yɛ toli a Pita kɛɛ ngi ndewei Andru ta nyɛi gbɛ a ti bomɛi. 19Yesu i ndeilɔ ti ma yɛ, “A to nya wooma, nga wu gaalɔ a nuuvungaa houla wava a tie tova nya wooma.” 20Ti ti bomɛisia lɔilɔ ti to ngi ma ngama.
21I liilɔ kulo gbɔma kɛ i ndewehinga weka fele lɔnga, Jemisi kɛɛ Jɔn, Kenɛi Sɛbidi leengeisia. Ti yɛ ndɛndɛi hu lɔ tia ti kɛkɛ Jɛbidi-ni ta ti bomɛisia hugbatɛ, kɛ Yesu i ti lolinga. 22Ngama kɛ ti ndɛndɛi longa kɛɛ ti kɛkɛ ti to ngi ma.
Yesu Lɔ Nungaa Gaama, A Nungaa Bawo, A Ngewɔ Yiɛi Le
(Luk 6.17-19)
23Yesu i jiɛilɔ Galili lɔlei hu gbi a nungeisia gaa ti hɛɛ wɛleisia bu, a Ngowili Yekpei lekɔlongo Ngelegoohu Mahayɛi ma, a nungei nasia bawo heegbɛ laasi gbi lekee i yɛ ti ma. 24Ngi malɔwɔi i vayɛilɔ ndɔlei hu gbi kɛɛ Siria lɔlei bɛɛ, na hii nungaa ti wɛilɔ ngi gama a heegbɛbla gbi, nasia heegbɛ kɛɛ kpalɛ gɛwɛgɛwɛisia ti yɛ ti ma; nasia ngafa nyamuisia ti yɛ ti hu kɛɛ kpɔgbɔniblɛisia kɛɛ kpɔɔkpɔblɛisia, tawao i ti gbi bawoilɔ. 25Faha waa ti yɛlɔ a to Yesu ma ta gbua Galili kɛɛ Taa Puisia hu kɛɛ Jelusalɛm kɛɛ Judia kɛɛ ndɔlei na i Jɔdan yɛi wooma.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MATIU 4: MENNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Mende New Testament © The Bible Society of Sierra Leone, 2002.
