MATIU 11
11
Jɔn Nguamɔi Lutuisia
(Luk 7.18-35)
1Kia Yesu i kpɔyɔni a kaa ji kpɛlɛɛ gɛla a ngi gaalopo puu maahu felesia i gbuailɔ yeehindei na i li Galili yeetaa wekeisia hu nunga gaava kɛɛ Ngewɔ yiɛi leva.
2Ji Jɔn Nguamɔi i loni kpindiwelɛi bu i hindei nasia mɛni Kristi i yɛ pie, i ngi gaalopoisia lɛɛnga loilɔ ngi gama. 3Ti ngi mɔlilɔ tɛɛ, “Bia lɔ Jɔn i ndeni yɛ biaa wama ɔɔ mu numu weka gulɔgbe?”
4Yesu i kpɛmboilɔ yɛ, “A yaama wu hugɛ a Jɔn gbɔɔ wu mɛnima kɛɛ na wu tɔma: 5#Ais 35.5-6; Ais 61.1 pumublɛisia lɔ hinda lɔma gbɔma, kpɔɔkpɔblɛisia ta jia, kpɔukpɔublɛisia ta bawo ti luwui a yɛ sɛwɛ, ngolihu-lutublɛisia ta njia mɛni, haableisia ta wu hee hu, Ngowili Yekpei a le fɛɛliblɛisia ma. 6Kohunɛ lɔ nasia ma nya hinda ɛɛ ti kiti!”
7Kia Jɔn gaalopoisia ti wounveni yamava, Yesu i tɔtoilɔ a yɛpɛla fahii gama kɔlooni Jɔn ma yɛ, “Gbɔɔ wu lii i yɛ ma tɔva ji wu lini wolova Jɔn ma ndɔgbɔ lambɛi ma? Konipɔwɛi fɛfɛi a sɛɛjia? 8Gbɔɔ wu lini tɔvaa? Hindoi ngi mayilingɔ guyɔɔ? Nungei nasia ta ti mayili guyɔɔ ta yɛ maha wɛleisia bu lɔ. 9Gbɔɔ hɔɔ wu lini tɔma? Ngewɔ lutui? A tɔnya, ngi hugɛ a wue, wu numu lɔilɔ tewengɔ Ngewɔ lutu ma. 10#Mal 3.1 Jɔn lɔ Ngewɔ Gɔlɛi i yɛpɛni ngi va yɛ, ‘Nga nya lutui lolɔ bi gulɔ i bi welei gbatɛ bi gulɔ.’ 11Gbɛɛ ngi hugɛ a wue, a tɔnya, kɛ Jɔn i leweni nasia gbi ma nyahangaa ti ti leni dunyei ji hu, kɛɛ numui na kulongɔ tewengɔ nasia gbi ma ti Ngelegoohu Mahayɛi hu i leweni ngi ma. 12I hiye watii na ma Jɔn i ngi Yewɔ yiɛi leni, Ngelegoohu Mahayɛi kpalɛ gboto hulɔnga tawao ndapiblaa lɔ lapima houva a kpaya. 13Pɛiŋ Jɔn watii i yaa hiti, Ngewɔ lutuisia gbi kɛɛ Mojisi Jawei ti kulɔmayia leilɔ kɔlooni Ngelegoohu Mahayɛi walei ma; 14#Mal 4.5 tawao wu lumangaa wu la a ti wowili, Ilaija na ti ndeni tɛɛ a wa, tamia a Jɔn. 15Ina ngoli gbi lɔ numu ma njia mɛniva, i wolo ji ma.
16“Kɛɛ nga haableisia huma gbɛ lɔ ma? Ti gbuangɔ a jialeengeisia lɔ ti heini njɔpɔwaahu ta ti mbaangɛisia loli 17tɛɛ ‘Mu nyaha-gɔli-gomɛi yee ngulei yaanga kɛɛ wuii lumani waa looli; mu haa-wuleisia yaanga kɛɛ wuii lumani waa wɔɔ.’ 18Ji Jɔn i wani, i yɛlɔ a sui hou tawao ɛɛ ndɔ gboli, kɛ numui gbi ti ndea tɛɛ, ‘Ngafa nyamui lɔ ngi woma’; 19Nuuvu Hindoloi i wɛilɔ, a mɛhɛɛ mɛ a ndɔ gboli, kɛ numui gbi ti ndea tɛɛ, ‘A taamɔi ji lɔ lɛɛ! Ndiimɔ mia a ngie kɛɛ ndɔ gbolimɔ gbama, pawa wɔyɔblɛisia kɛɛ jumbubleisia ti ndiamɔi!’ Na hu gbi Ngewɔ nɛmahulewei yengeyii lɔ a ngi lɔnyayii gɛ.”
Tei Nasia Tii Yɛ Lani A Ngewɔ
(Luk 10.13-15)
20Tei nasia Yesu i ngi gabande yengei gbotoma wieni na, yeenungeisia tii wounveni ti jumbuisia ma, faale i tɔtoilɔ a yialaa ti ma. 21#Ais 23.1-18; Ɛji 26.1—28.26; Joe 3.4-8; Emɔs 1.9-10; Sak 9.2-4 I ndeilɔ yɛ, “I wama nyamuma kpa wu va Kolasi! I wama nyamuma kpa wua bɛɛ va Bɛtsaida! Ajifa ina kabande yengei nasia ti wieni wu hu i wieilɔ Taya kɛɛ Saidɔn, yeenungeisia taa bɛki yililɔ, ti nduvui gbɛkpɛi wumba kɛva kɛ ti wounvenga ti jumbuisia ma. 22Gbɛɛ ngi hugɛ a wue a tɔnya, kpɛmbo-volei ma kɛyila, Ngewɔ a manulɔ Tayablɛisia ma kɛɛ Saidɔnblɛisia i lewe wu ma. 23#Ais 14.13-15; Jɛn 19.24-28 Wu Kapaniɔmblɛisia! Wu yɛ loni wu wua yekpe lɛ wu fo Ngelegoohu. Ngewɔ a wu yeilɔ jahama. Ajifa ina kabande yengei nasia ti wieni bi hu ti wieilɔ Sɔdɔm, aa yɛlɔ na kiahuna bɛɛ. 24A la la kɛ kpɛmbo-volei ma kɛyila, Ngewɔ a manulɔ Sɔdɔmblɛisia ma i lewe wu ma.”
A Wa Nya Gama Wu Lɛɛvu
(Luk 10.21-22)
25A watii na Yesu i ndeilɔ yɛ, “Kɛkɛ, ngelegoohu kɛɛ dunya yee Ndemɔi, ngi siɛgbua bi ma ajifa bi hindei jisia lɔwunga nɛmahulewebleisia ma kɛɛ hinda hugɔɔ blɛisia bi hugɛnga a ndolangaa. 26Hii i na, Kɛkɛ, ajifa hii i nɛni bi wɛ pieva.
27“Nya Kɛkɛ i hani gbi loko wuaanga nya yeya. Numu gbi ii Hindoloi gɔɔ kɛlee Kɛkɛi tawao numu gbi ii Kɛkɛi gɔɔ kɛlee Hindoloi kɛɛ nasia a nɛɛ ngi wɛ ngi gɛva a tie.
28“A wa nya gama wua wu gahu gbɔyɔngɔ tawao kiti gbangɔngaa ti wu ma, nga yeekitiisia gbualɔ wu ma. 29#Jɛ 6.16 A nya gaiŋ wumbu kɛɛ kaa na nga kɛ; ajifa nya lii gɔlɛngɔ tawao ngii mamanini, na wiengaa wu yafeisia ta ndiilɛli majɔlɔ. 30Gbamaile kaiŋ nasia nga fe wu wɛ ti bɛɛbɛɛngɔ li va la; tawao ngengei nasia nga fe wu wɛ tii kpaukpauni pieva.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
MATIU 11: MENNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Mende New Testament © The Bible Society of Sierra Leone, 2002.
