Maki 16
16
Yisɔs ŋaye ka tuka haŋ
(Mathiyu 28:1-8; Luku 24:1-12; Yɔni 20:1-10)
1Naa daŋande malɔkɔ ma nde biYusu beŋ hemuwe maŋ, Mariyama wo ka mɛti ba ka Makadala, Salomi, mɛnɛ Mariyama nanda ka Yemisi boye mayɔ mathimɔy huru ba ka konke kubeli ku ka Yisɔs koŋ. 2Ka Sɔnde sanka-sanka naa thɛri theyaŋ haŋ, bindɛ key ka yoma ka. 3-4Naa bindɛ key, bindɛ bohe kaa kaŋ gbonkiya ka wunthe iŋ ntɔ nama, na “Mbɛ mina ka binkiliniyɛ raka haŋ maŋaye ka biyo hu ka yoma haŋ?” Raka huna nde humandiŋ-mandiŋ. Naa bindɛ hintiŋ wuthokiye wuyete, bindɛ kute ba dɔma na raka haŋ binkilino maŋaye ka yoma haŋ ka. 5Huna biyande bindɛ kaake ka yoma haŋ e bindɛ kuta kɛndɛ hati lamgba wunthe doŋe kuwaŋ ka yɔnkɔ huthome haŋ, wo thɔɔyɛ kuhɔli kuhuhɛ napooŋ. Kɛna ni bindɛ thakaba wumandiŋ.
6Hati lamgba woŋ tepe bindɛ, na “Baŋ ni thakaba; yaŋ kɔthɛŋ ba dɔma na beŋ kɔŋ dethi ba Yisɔs wo ka Nasarɛthi woŋ, wo yanto ka kuyeŋ kubariŋande koŋ woŋ. Wundɛ ka dondo baŋ; ndɛ ŋayino ka tuka haŋ. Saaŋ dethi du taaye nde bindɛ niŋ do. 7Bɛna kaaŋ e beŋ ka tɛpa huseri haŋ haŋ baŋ ka bakarandeni nama beŋ, thiyitaŋ Pita na: na ‘Wundɛ kɔŋ bena kɔtiyɔkɔ ka kuyɛkɛŋ ku ka Kalili koŋ;#Math 26:32; Maki 14:28 kɛna beŋ niŋ ka kute, nɔŋ na tepe nde nthɔŋ ndɛ bena na.’”
8Kɛna pɛyɛŋ bindɛ ka yoma ka e bindɛ kaa kaŋ thara iŋ gbɛki mɛnɛ payɔ humandiŋ. Bindɛ tha gbonkiye wɔ yo wɔ baa bi nde iŋ payɔ humandiŋ.
MAPEYE MATIYƆ MA KA HUSERI HUYƆHƆI HU GBALE MAKI HAŊ
Yisɔs tɔŋinɔkɔy ka Mariyama wo ka Makadala
(Mathiyu 28:9-10; Yɔni 20:11-18)
[9Naa ŋaye Yisɔs ka tuka haŋ ka Sɔnde woŋ sanka, wundɛ yenke tɔŋinɔkɔ ka Mariyama wo ka Makadala wo kaninande ndɛ mbayiŋ bisɔŋ-biye beŋ. 10Wundɛ key e ka tepe bi nɔŋ iŋ Yisɔs beŋ. Wundɛ penke bindɛ fooma bi si boki. 11Naa yuye bindɛ Mariyama si dɔŋ na Yisɔs kiŋ wohɛmɛ awa ndɛ kutiyɔkɔy niŋ, bindɛ tha niŋ ni lanɛya.
Yisɔs tɔŋinɔkɔy ka bakarandeni biye
(Luku 24:13-35)
12Naa daŋande wuŋ, Yisɔs tɔŋinɔkɔy ka bakarandeni nama biye ka maniyɔ mahɛna naa kooye nde bindɛ gboŋa maŋaye ka mɛti baŋ. 13Kɛna dapiyɔkɔy bindɛ ba ka tepe bakarandeni bihɛna beŋ, kɛrɛ bi tepo beŋ tha huŋ ni lanɛya.
Yisɔs tɔŋinɔkɔy ka bakarandeni kɔhi iŋ wunthe beŋ
(Mathiyu 28:16-20; Luku 24:36-49; Yɔni 20:19-23; Baseriŋ Bithɔɔkɔ beŋ 1:6-8)
14Ka wumankɛ nagbɔŋ, Yisɔs tɔŋinɔkɔy ka bakarandeni kɔhi iŋ wunthe beŋ naa nde bindɛ thɔŋ. Wundɛ tepe bindɛ ba bindɛ niya nde wunɛnɔy, baa bindɛ ka nde iŋ lanɛya awa banapiŋ bina nde hɛlɛŋ nɛŋ ba thana niya lanɛya hu tepe bi kutɛ niŋ naa ŋaye ndɛ ka tuka haŋ. 15Wundɛ tepe bindɛ, na “Kaaŋ ka fa woŋ fooma e beŋ kaa kaŋ niya kɛwandi Huseri Huyɔhɔy haŋ ka biyamɛti fooma.#BB 1:8 16Wo ni lanɛya woŋ e ndɛ biyo biye hu ka Masaala haŋ, ndɛ kɔŋ niyɔ kisi; kɛrɛ wundɛ wo sa ni lanɛya woŋ, wundɛ kɔŋ thonkino. 17Balanɛyani beŋ bi kɔŋ dunkuno sɛmbɛ ba niya bɛyiniŋ bathakaba: bi kɔŋ kaninande biya mbayiŋ naa bindɛ hiŋ keŋ kukiyaŋ koŋ; bi kɔŋ gbonkoy ka thayuni thahɛna. 18Mɛnɛ bindɛ boheke bikɛkɛni maa bindɛ thiiye mayara yo mayara, bindɛ sa kutu bɛyi yo bɛyi; bi kɔŋ tutu bithoonɔy beŋ thɛnkɔ, awa bi kɔŋ pethɔ.”
Yisɔs ŋatito ka ariana
(Luku 24:50-53; Baseriŋ Bithɔɔkɔ beŋ 1:9-11)
19Naa thanki Mariki woŋ Yisɔs gbonkiya iŋ bakarandeni beŋ, ndɛ ŋatito ka ariana#BB 1:9-11 e ka dɔŋɔ ka yɔnkɔ huthome hu ka Masaala haŋ ka madoŋe mayiki maŋ. 20Kɛna fuŋ bakarandeni beŋ ba kaa kaŋ niya kɛwandi kamo kama, awa Mariki woŋ ni wali iŋ bindɛ haaŋ e wuŋ tɔŋina ba dɔma na kɛwandi namɛŋ woŋ woseŋa na maŋaye ka bɛyiniŋ bathakaba ba bindɛ ni baŋ.]
MAPEYE MATIYƆ MAHƐNA MAŊ
[ 9 Yɛrɛmɛŋ beŋ key ka Pita ka mɛnɛ binyathiki nama beŋ e toŋe bindɛ kuna kuthurɔy ba bɛyiniŋ fooma ba thanki bindɛ tepo baŋ. 10 Naa daŋande wuŋ kɛndɛ, Yisɔs ka yɛthɛ nama wundɛ ŋindi bakarandeni nama beŋ iŋ huseri hu ka Masaala hu niyɔ ba kɔy yo kɔy haŋ ka fa woŋ fooma.]
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Maki 16: LMBNT
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
© The Bible Society of Sierra Leone, 2011
