Luku 22
22
Yisɔs yukuyo yanfa
(Mathiyu 26:1-5; Maki 14:1-2; Yɔni 11:45-53)
1Wiki wo ka thɔma kutoŋ ku ka iŋ yisithi woŋ koŋ thuriye, malɔkɔ ma bindɛ dɔŋ maŋ, na “Malɔkɔ ma miŋ siyi na puntiyando nde mbembɛŋ ntuŋ beŋ iŋ maleka wo ka tuka haŋ woŋ maŋ ka Iyipiti.”#Fuŋa 12:1-27 2Bafodeni bibukuyuwɛ beŋ mɛnɛ karimɔkɔiŋ bi ka Siraŋ baŋ beŋ fooma, bi nde payɔ biya beŋ, huna bindɛ bohe deethuwa gboŋa ba ŋasɔiŋ ba bindɛ kore Yisɔs na.
Yudasi yɛrɔkɔy ba niya Yisɔs na gbɔŋ
(Mathiyu 26:14-16; Maki 14:10-11)
3Sithani thɔɔyɛ Yudasi na wo dɔma Isakariyɔti, wunthe ka karandeni kɔhi iŋ biye bi ka Yisɔs beŋ. 4Kɛna fuŋ Yudasi, wundɛ key gbonkitiyande bafodeni bibukuyɛ beŋ mɛnɛ bayahɛŋ bi dethiteke banka ba ka Masaala baŋ beŋ ba nɔŋ na wundɛ bindɛ niyite Yisɔs na gbɔŋ. 5Wuŋ yehe bindɛ haaŋ e bindɛ si bohinande ba niŋ thunkuna kɔbiri. 6Yudasi yɛrɔkɔy huŋ. Wundɛ bohe nda deethuwa hɛɛra ba wundɛ dunkune Yisɔs na kɛnamɛŋ naa sa wuŋ biya kothiye.
Yisɔs kɔsinɔkɔy ba thɔma thɔma hu ka lɔkɔ ba puntiyando nde biIsirɛli beŋ baŋ
(Mathiyu 26:17-25; Maki 14:12-21; Yɔni 13:21-30)
7Malɔkɔ mamayoŋ ma ka wiki wo bindɛ thome kutoŋ ku ka iŋ yisithi woŋ koŋ tɛŋ, ka lɔkɔ ba takɛŋ bi ka thɔma huthɔɔkɔ haŋ beŋ koro baŋ ba fuŋuno saraka. 8Yisɔs ŋindi Pita na iŋ Yɔni e tɛpa, na “Kaaŋ e beŋ ka kɔsinɔkɔ thɔma hu siyuwe malɔkɔ ma puntiyando nde siya ntuŋ baŋ maŋ.”
9Huna thonthiŋine bindɛ Yisɔs na, na “Kama thimo yi ba miŋ ka kosineke thɔma haŋ haŋ baŋ?”
10Huna tepe wundɛ bindɛ, na “Naa beŋ kɔ biyande ka mɛti ka, beŋ kɔŋ pɛnkande iŋ hati lamgba wo tutɔkɔy mandi ka ntha. Yemaŋ niŋ ka banka ba wundɛ ka biyande baŋ, 11e beŋ tepe wo biyɛ banka baŋ woŋ, na ‘Karimɔkɔ woŋ tepe, na ba miŋ yina si thɔnthiŋina ka yikiya baŋ ka wundɛ si thome thɔma hu ka mapuntande maŋ haŋ iŋ bakarandeni nama beŋ.’ 12Awa wundɛ kɔŋ bena toŋine makonko mamandiŋ maŋ maŋ ka thinthi ka banka baŋ, ma kosinoko nda awa ma nda iŋ ntha yo ntha, kɛna beŋ kiye mu niye bɛyi ntuŋ muŋ fooma.”
13Kɛna key bakarandeni beŋ, bindɛ key pɛnki bɛyi o bɛyi nanthe nathesi nɔŋ na tepe nthɔŋ bindɛ Yisɔs na. Bindɛ kɔsinɔkɔy kɛndɛ ba thɔma thɔma hu ka malɔkɔ ma puntiyando nde mbembɛŋ namɛŋ beŋ maŋ.
Thɔma hu ka Mariki woŋ haŋ
(Mathiyu 26:26-30; Maki 14:22-26; 1 BiKɔrinthi beŋ 10:16; 11:23-25)
14Naa tɛŋ wuŋ ba thɔma thɔma hu ka mapuntande maŋ haŋ, Yisɔs dɔŋɔy iŋ baseriŋ nama bithɔɔkɔ beŋ ba thɔma. 15Huna tepe Yisɔs, na “Yaŋ kɔŋ nɔŋ nda kufiyo wumandiŋ ba thɔma thɔma haŋ haŋ baŋ iŋ beŋ saanuŋ yaŋ kɔ niyo nambara. 16Awa yaŋ tepe bena, yaŋ sa nɔŋ nda thɔŋ thɔma haŋ haŋ baŋ iŋ beŋ, yɔkɔŋ nɔŋ nda huŋ toŋino kolo nama baŋ gbeeŋ ka Hugbakine hu ka Masaala haŋ.”
17Awa Yisɔs sekithe kɔɔpu haŋ e thiya Masaala na maamo, e tɛpa, na “Sɛkithaŋ kɔɔpu haŋ haŋ e beŋ huŋ hanande. 18There nda ka malɔkɔ mahɛ maŋ, yaŋ sa nɔŋ nda thiiye mampa maŋ maŋ baŋ yɔkɔŋ nɔŋ nda Hugbakine hu ka Masaala haŋ tɛŋ.”
19Awa wundɛ sekithe hɛlɛŋ kutoŋ koŋ e thiya Masaala na maamo, e kuŋ thinkinande e bindɛ kuŋ dunkune e tɛpa, na “Wuŋ, kɔtɔ niŋ koŋ kuna, ku dunkuŋ yaŋ koŋ ba beŋ. Niyaŋ wuŋ ba yama kɔ siyuwe.” 20Ka gboŋa banthe babɛina hɛlɛŋ, naa thanki bindɛ thɔma, wundɛ dunkune bindɛ kɔɔpu haŋ, e tɛpa, na “Kɔɔpu haŋ haŋ mayuku maŋama ma ka Masaala maŋ mɛna,#Yɛr 31:31-34 ma kahitino wasi bakiyaŋ baŋ, ba toŋe yaŋ baŋ ba beŋ.
21“Kɛrɛ dethaŋ, wo yama ni gbɔŋ woŋ, ndɛ doŋeŋ iŋ yaŋ ka thɔma haŋ dondo.#Ŋaiŋa 41:9 22Baa, Hati ka Wɔ woŋ kɔŋ kaaye nɔŋ na tepe nde Masaala na, na nɛŋ ma kaaye. Kɛrɛ nambara bɛ kɔŋ see ka hati lamgba wo ni niŋ gbɔŋ woŋ ka hadeni nama beŋ!”
23Kɛna bohe bindɛ thɔnthiŋinuwande ba wo dɛɛnkɛ ba niya wali baŋ baŋ woŋ.
Nkaana yamɛ makooye?
24Kuyuŋande see hɛlɛŋ ŋɔti ka mateete ma ka bakarandeni beŋ ba wo si niyɔ bayaha woŋ nthɔŋ nda fooma.#Math 18:1; Maki 9:34; Luku 9:46 25Huna tepe Yisɔs kɛnamɛŋ, na “Gbakuiŋ bi ka siyani bahɛna baŋ beŋ bi kɔŋ tɔŋɔŋ sɛmbɛ ka bi bindɛ ka pothi beŋ, awa bakɛrɛni beŋ bi kɔŋ thunda keŋ, na ‘Bamaseŋ biya.’ 26Kɛrɛ beŋ, wuŋ ka ba nɛŋ niyɔ, wo bayaha woŋ kɔŋ ba simɔkɔ yɛthɛ nama nɔŋ wothahuwɔy woŋ nthɔŋ nda fooma, awa wo bakɔtɔkɔ woŋ, wundɛ kɔŋ ba niyɔ nɔŋ bawali.#Math 23:11; Maki 9:35 #Math 20:25-27; Maki 10:42-44 27Nkaana yamɛ bukuya, wo dɔŋɔy ka thɔma haŋ woŋ ndo, iŋ wo sisi muthɔma muŋ woŋ? E wo dɔŋɔy ka thɔma haŋ woŋ kutɛ? Kɛrɛ detha hɛ, yaŋ kɔŋ ka mateete makendeŋ nɔŋ basisi muthɔma.#Yɔni 13:12-15
28“Beŋ, bena pɛyɛ ka kuwaŋ kukiyaŋ ka malɔkɔ ma yaŋ ka gberiŋinuwo haŋ maŋ. 29Nɔŋ na dunkune nthɔŋ yama Fandaŋ woŋ mayoho ba kɛriŋa na, nɛna hɛlɛŋ yaŋ bena dunkune mayoho ba kɛriŋa. 30Ka lɔkɔ babɛina beŋ kɔŋ niyɔ iŋ mayoho ba thɔma e thiiye ka tha banthe iŋ yaŋ ka Hugbakine hukiyaŋ haŋ, awa beŋ kɔŋ dɛŋa ka thayensi ba kɛriŋiyɛ bɔnsɔni kɔhi iŋ baye ba ka biIsirɛli beŋ baŋ.#Math 19:28
Yisɔs tepe ba nɔŋ niŋ Pita ka thanthiye
(Mathiyu 26:31-35; Maki 14:27-31; Yɔni 13:36-38)
31“Saimɔŋ, Saimɔŋ, pona kuiha! Sithani dunkuno mayoho iŋ Masaala ba bena gbɛriŋinuwa fooma, ba haliko ba hakinande biyɔhɔy beŋ iŋ binɛnɔy beŋ, nɔŋ na bamahi woŋ hakinande paka baŋ na iŋ ŋawoy ŋaŋ. 32Kɛrɛ yaŋ thanki yina niyiyɛ kuraminɛ Saimɔŋ, ba haliko lanɛya bakɛnda baŋ ba be tha thamɔ. Awa naa yi sikiyɔkɔy hɛlɛŋ kiyaŋ, kahina mbɛnda thathukuma.”
33Huna tepe Pita, na “Mariki, yando kɔsinɔkɔy ba thiyo iŋ yi ka yeeli. Hali hintiŋ na ba tuka iŋ yi, yando kɔsinɔkɔy!”
34Huna tepe Yisɔs, na “Pita, koki woŋ sa niye kokire huyɛ bahɛ baŋ, yi kɔŋ yama buuhu dɔŋɔ kataati ba dɔma na yi kɔyta yama.”
Kɔbiri, ponthoiŋ, mɛnɛ silanhiŋ
35Huna tepe Yisɔs bakarandeni nama beŋ, na “Naa ŋindi nde yaŋ bena beŋ tha thiiti ka gbooti, maa pontho, maa dagbalɛŋ,#Math 10:9-10; Maki 6:8-9; Luku 9:3; 10:4 e beŋ panke nde ntha yo ntha?”
Bindɛ tepe, na “Ade.”
36“Kɛrɛ ka tete, wɔ yo wɔ wo iŋ kɔbiri maa pontho, diŋɛŋ muŋ ka kaa. Wɔ yo wɔ wo ka iŋ silanhi, wundɛ niyɛŋ kuhɔli nama gbɔŋ, e wundɛ boya silanhi banthe. 37Yaŋ tepe bena, magbali ma tɛpɛ maŋ ba dɔma, na ‘Wundɛ kɔnditando iŋ bahakɛŋ beŋ’#Ais 53:12 tɛŋ ka niyɔ nɔndi kiyaŋ, baa ba thankɛ gbalo baŋ ba yaŋ baŋ thanki thuriye.”
38Huna tepe bakarandeni nama beŋ, na “Mariki, detha, ya dondo silanhiŋ baye.”
Yisɔs tepe bindɛ, na “Atɛŋ.”
Yisɔs ni kuraminɛ
(Mathiyu 26:36-46; Maki 14:32-42)
39Kɛna fuŋ wundɛ. Wundɛ key ka kusɛri ku ka Ɔlifisi nɔŋ na bare nde ndɛ na, awa bakarandeni beŋ yeme niŋ. 40Awa naa tɛŋ wundɛ ka tha ka bɛina, wundɛ tepe bakarandeni nama beŋ, na “Niyaŋ kuraminɛ haliko beŋ be tha ŋɔti ka mathiiko.”
41Kɛna yɔsɔkɔy wundɛ wuyete. Wundɛ kunthuŋe e niya kuraminɛ, e tɛpa, 42na “Fandaŋ, mɛnɛ mamɛyi makɛnda mɛna, gbɔnina kɔɔpu hu ka thɔrɔ haŋ haŋ kuwaŋ kukiyaŋ. Kɛrɛ wu bɛiŋ niyɔ ka mamɛyi makiyaŋ nde, kɛrɛ bɛyi yo bɛyi ba thimo yi bɛ be niyɔ, ba niyɔyŋ.” 43Kɛna see niŋ maleka tɔŋinɔkɔ ŋaye ka ariana, e wundɛ niŋ si kahina thukuma. 44Thukuma nama haŋ see ni thɔrɔ. Kɛna ni wundɛ kuraminɛ wukahɛ-kahɛ haaŋ mamuheyani nama maŋ thonda nɔŋ wasi bɛna thondi ka kuyɛkɛŋ koŋ.
45Naa ŋaye wundɛ ka kuraminɛ koŋ, wundɛ penke bindɛ bi si nine, baa bindɛ niyɔy nkinikiniŋ wumandiŋ. 46Huna thonthiŋine ndɛ bindɛ, na “Mbɛ ba beŋ niniye? Ŋayeŋ e beŋ niya kuraminɛ haliko beŋ be tha thɔɔ ka mathiiko.”
Yisɔs boho
(Mathiyu 26:47-56; Maki 14:43-50; Yɔni 18:3-11)
47Naa wundɛ ka gbonkiya haŋ, kɛna tɛŋ sɛthɛ. Wɔ wunthe wo dɔma na Yudasi, wunthe ka bakarandeni kɔhi iŋ biye bi ka Yisɔs beŋ, kɔtiyɔkɔy bindɛ. Kɛna see wundɛ Yudasi niŋ thuriye ba niŋ si dɔɔkɔ. 48Huna tepe Yisɔs, na “Yudasi, e yi aniye Hati ka Wɔ woŋ gbɔŋ ka dɔɔkɔ?”
49Naa kute bakarandeni beŋ ba see ka niyɔ baŋ, bindɛ thɔnthɔŋɔŋ, na “Mariki, e miŋ yuwa iŋ silanhiŋ baŋ?” 50Wunthe ka bindɛ gbari kuiha kuthome ku ka bawali wo ka Bafode Womandiŋ woŋ koŋ.
51Kɛrɛ Yisɔs tepe, na “Pɛyaŋ, baŋ nda wuŋ ni!” Kɛna boheke wundɛ kuiha ku ka bawali woŋ koŋ e kuŋ pethina.
52Huna tepe Yisɔs bafodeni bibukuyuwɛ beŋ iŋ bidethiteke banka bamandiŋ ba ka Masaala baŋ beŋ iŋ bakalani bibayahɛŋ beŋ fooma bi sɛɛ ba niŋ saa ka bɔha beŋ, na “E beŋ asee iŋ silanhiŋ mɛnɛ ŋagbemgbe ba yama saa ka bɔha nɔŋ batuwaŋ? 53Naa nɔŋ yaŋ iŋ beŋ timo tima ka banka bamandiŋ ba ka Masaala baŋ,#Luku 19:47; 21:37 beŋ tha yama boheke. Kɛrɛ malɔkɔ maŋ mɛna tɛŋɛ ba beŋ, iŋ wo iŋ sɛmbɛ ba ka huntuma haŋ baŋ woŋ ba niya wali.”
Pita thanthiye Yisɔs na
(Mathiyu 26:57-58, 69-75; Maki 14:53-54, 66-72; Yɔni 18:12-18, 25-27)
54Kɛna ni bindɛ yamari ba ndɛ be bɔha e kata niŋ. Naa bindɛ niŋ kati ka banka ba ka Bafode Womandiŋ woŋ baŋ, Pita yemeŋ kahɛŋ wuthokiye. 55Buu ŋindo kɛndɛ ka gbada hu ka banka ba ka Bafode Womandiŋ woŋ haŋ mateete ba poyi. Pita thuriye ka poyi haŋ. 56Kɛna kute niŋ bawali woyɛrɛmɛ wo ka Bafode Womandiŋ woŋ naa doŋe wundɛ ka buu buŋ kuwaŋ. Kɛna dethe wundɛ niŋ natiŋ, e tɛpa, na “Hati lamgba woŋ baŋ, ndɛ kɔŋ nɔŋ iŋ Yisɔs.”
57Kɛrɛ Pita thanthiye, e tɛpa, na “Hatiŋ woŋ, yaŋ kɔyta niŋ.”
58Wuŋ tha hɛlɛŋ nambi hati lamgba wohɛna kute hɛlɛŋ niŋ. Wundɛ tepe hɛlɛŋ, na “Yi, yi kɔŋ wunthe wo ka bindɛ.”
Huna tepe hɛlɛŋ Pita, na “Hatiŋ woŋ, yaŋ ka wunthe wo ka bindɛ.”
59Naa daŋande wuŋ bɛrɛ ba wakathi wunthe wɔ hɛna see hɛlɛŋ gbonkoy wukahɛ, e tɛpa, na “Yaathi hati lamgba woŋ, kɔnsɔŋ ndo ka, ndɛ kɔŋ nɔŋ iŋ Yisɔs, baa wɔ ka Kalili na woŋ.”
60Kɛrɛ Pita tepe, na “Wɛiŋ woŋ, yaŋ kɔyta hu yi dunkunɔkɔy haŋ.”
Ka wuthurɔy wubɛina naa wundɛ dunkunɔkɔy, koki woŋ kokori. 61Kɛna sikiyɔkɔy Mariki woŋ e detha Pita na. Pita siyi thampa tha ka Mariki woŋ thaŋ ba dɔma, na “Saanuŋ koki woŋ ba kokira hɛ, yi kɔŋ yama buuhu dɔŋɔ kataati.” 62Kɛna fuŋ Pita. Wundɛ bereŋ wuthoonɛ-thoonɛ.
Yisɔs hetho e wundɛ thorino
(Mathiyu 26:67-68; Maki 14:65)
63Lamgbeŋ bi bɔhɛ Yisɔs na beŋ bohe hɛtha niŋ e bindɛ niŋ kɔ thorinuwa. 64Bindɛ yuku niŋ thaaya, e tɛpa, na “Awa, banabi, hina hɛ wo thorinɛ yina woŋ!” 65Kɛna gbonkoy bindɛ bɛyiniŋ bahɛna banɛnɔy babɔyɛ ma sɔkinɔkɔ Yisɔs na.
Yisɔs kato ka Kaama woŋ
(Mathiyu 26:59-66; Maki 14:55-64; Yɔni 18:19-24)
66Naa puthɔy kaŋ woŋ, Kaama wo ka bakalani bibayahɛŋ bi ka biYusu beŋ woŋ fooma thuŋande ka tha banthe, thiyitaŋ bafodeni bibukuyuwɛ beŋ mɛnɛ karimɔkɔiŋ bi ka Siraŋ baŋ beŋ. Kɛna kato Yisɔs ka Kaama namɛŋ woŋ, e bindɛ tɛpa, na 67“Mɛnɛ yina Banikisi wo niyo nde lahiri, tepe mina.”
Kɛrɛ Yisɔs tepe bindɛ, na “Mɛnɛ yaŋ tepe bena, beŋ sa yama ni kulanɛya. 68Awa mɛnɛ yaŋ thɔnthɔŋɔŋ bena, beŋ sa yama ni yaabi. 69Kɛrɛ there nda ka lɔkɔ bahɛ baŋ, Hati ka Wɔ woŋ kɔŋ dɔŋɔ ka yɔnkɔ huthome hu ka Masaala wo iŋ sɛmbɛ woŋ haŋ.”
70Huna thonthiŋine bindɛ, na “E huna yina nda Hati ka Masaala woŋ?”
Huna tepe Yisɔs, na “Na tepe nda nɛŋ beŋ.”
71Huna tepe bindɛ, na “Mbɛ nda maseri ma nda miŋ deethi? Miŋ fooma yuyɔkɔy nda ŋaye ka hothi hukɛnama!”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luku 22: LMBNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© The Bible Society of Sierra Leone, 2011
