Luka 23

Yeso ase obosio bwa Pilato gabana o Rumi

(Mat 27:1-2,11-14; Mar 15:1-5; Yoh 18:28-38)

1Bakaimoka bonsi, bakaira Yeso ase Pilato. 2Bagachaaka komosoera, bakobora, “Twanyorire omonto oyo oonchoire ense yaito, otokanirie titoa Kaisari ebango, okobora ng’a ere omonyene nere Kristo omorwoti.”

3Pilato akamobooria, “Naye Omorwoti bw’Abayahudi?”

Yeso akaimoiraneria, “Naye gwateebire.”

4Pilato agateebia abakuani abanene na emeganda, “Inche tindochi komocha konde ase omonto oyo.” 5Barabwo bakamobetereria, bakaboora, “Oburukanirie abanto, goetera ase amorokererio aye ase Boyahudi yonsi, korwa Galili ase achaakerete na goika bono oikire aiga.”

Yeso ase obosio bwa Herode

6Pilato agachia koigwa ring’ana eri, akaboria, “Omonto oyo n’Omogalili?” 7Agachia komanya ng’a nigo are inse ase obogambi bwa Herode, akamotoma gochia ase Herode. Na Herode omonyene nigo arenge Yerusalemu ase amatuko aria. 8Ekero Herode achia korora Yeso akagokigwa mono, ekiagera korwa kare nigo arigetie komoorora, ekiagera aigwete chinkuma chiaye, naende nigo asemeretie korora egekone kegokorwa nere. 9Akamoboria amaborio ase engaki entambe, korende Yeso tamoiraneria ing’ana rinde rionsi. 10Abakuani abanene na aborokia b’amariiko bagatenena, bakomosoera ne chinguru. 11Herode na abarwani baye bakamochaya, bakamosekereria, bakamobekera chianga chingiya mono, akamoirania ase Pilato. 12Erio Herode na Pilato abwo barenge ababisa agwo ritang’ani bakabwatana korwa rituko riria bakaba abasani.

Pilato, na Baraba, na Yeso

(Mat 27:15-26; Mar 15:6-15; Yoh 18:39—19:16)

13Pilato akarangeria amo abakuani abanene, na abagaambi, na abanto, 14akabateebia, “Mwandeterete omonto oyo, buna oyo baonchoire abanto; naunirie amang’ana aye ase amasio aino, na tindochi bobe ase omonto oyo ase aria mwamosoerete, 15nonya n’Herode tarochi, ekiagera omoiranirie gocha ase tore. Rora, ere takorete gento kemogwenerete akwe. 16Erio konamoakire, nimosibore.” 17Bono igo yamogwenerete kobasiborera omonto oyomo ekero kie rituko rinene.

18Bagaaka eriogi bonsi amo, bakaboora, “Morusie oyo, tosiborere Baraba!” 19(Ere nomonto obegetwe ase echela ase engencho y’eriomana riakoregete ase omochie ime, na ase oboiti.) 20Nabo eria kabere Pilato agakwana nabarabwo, akarigia gosibora Yeso. 21Korende barabwo bagaaka eriogi, bakaboora, “Mobambe, mobambe!”

22Ere akabateebia eria gatato, “Nase ki? Mbobe ki akorete oyo? Tindochi nonya ne ring’ana erimo asare rigwenerete akwe. Ase igo, nanchire komoaka na komosibora.”

23Korende bakagenderera kobora ase eriogi rinene ng’a goika abambwe. Eriogi riabo rikabua. 24Pilato akanacha amang’ana akoreke buna barigetie. 25Agasibora ere oyobegetwe echela ase eriomana na oboiti, oyobarigetie; akarua Yeso ase bare buna ogwancha kwabo kwarenge.

Okobambwa kwa Yeso

(Mat 27:32-44; Mar 15:21-32; Yoh 19:17-27)

26Bagachia komoira, bakabwata Simioni Omokurene, oyorenge korwa borabu, bakamotweka omosalaba, ayobogorie magega ya Yeso. 27Omoganda bw’abaanto okamotunyana, na abakungu baare kweaka‐aka, na komweng’erereria. 28Yeso akabeonchorera, akabora, “Abaiseke ba Yerusalemu, timondeera inche, korende ereere inwe abanyene, na abana baino. 29Naki amatuko naache ekero abanto barateebe: Mbasesenirie abare abagomba, ne chinda chitaiboreti, ne chimbeere chitana kogonkwa! 30#Hos 10:8; Okom 6:16Erio nabachaake goteebia ebitunwa: Togwere, na ebigoro: Totube. 31Onye bagokora aya ekero omote ore omobese, naki eraabe ekero bwomire?”

32Abande babere abasaria bakairwa, baitwe amo nere. 33Bagachia goika aase akorokwa Ekeore, bakamobamba aroro, na baria abasaria, oyomo ensemo y’okoboko gw’okorio, na oyonde ensemo y’okoboko gw’okobee.

34 # Zab 22:18 Yeso akabora, “Tata, baabere, ekiagera tibamanyeti eke bagokora.”

Bakagabana chianga chiaye, bagachiakera obomera. 35#Zab 22:7Abanto bagatenena, bakarigereria. Na barabwo abanyene bakamokorera echeche, bakaboora, “Natooretie abande, tiga etoorie ere omonyene, onye oyo nere Kristo o Nyasae, Omochore oye.” 36#Zab 69:21Abarwani boigo bakamosekereria, bakamochiera, bakamoa chinkama, 37bakaboora, “Onye aye naye Omorwoti bw’Abayahudi, etoorie.” 38Igoro asare nkiarengeo ekemanyererio keriikire ase omonwa bw’Ekegiriki, na Ekerumi, na Ekeiberania “OYO NERE OMORWOTI BW’ABAYAHUDI.”

39Oyomo bwa baria abasaria baabambetwe akamorama, akabora, “Inee! Tari aye Kristo? Etoorie aye omonyene, naintwe ototoorie.” 40Oyo o kabere akamokania, akabora, “Aye tori komoiroka nonya Nyasae, aye kore ase ekiina keria keria? 41Intwe ekeene mboronge; ekiagera twaeirwe eng’eria ya boronge y’ogokora gwaito, korende oyo takoreti gento kende kebe.” 42Erio agateebia Yeso, “Yeso, ong’inyore ekero ogocha ase oborwoti bwao!”

43Yeso akamoteebia, “Ekeene nagotebirie: Reero nobe amo nainche Paradiso.”

Ogokwa kwa Yeso

(Mat 27:45-56; Mar 15:33-41; Yoh 19:28-30)

44 # Okong’ 26:31-33 Bono nigo chiarenge ang’e chinsa isano nemo, omosunte okaba igoro ase ense yonsi goika chinsa kianda, 45ekero omobaso orimire. Na egetambaa gi’okonacha Hekalu kegatandoka gati‐gati. 46#Zab 31:5Yeso akarera ase eriogi rinene, akabora, “Tata, ase amaboko ao nabekire omoika one!”

Magega gakwanire aya agatweka mo. 47Omotang’ani bw’abarwani rigana agachia korora aya, agatogia Nyasae, akabora, “Ekeene, omonto oyo nigo arenge omonyene oboronge.” 48Naende emeganda yonsi, abasangererekanete korora aya, kobachia korora ayakoreka, bakairana chinka chiabo, bakweaka ebikuba. 49#Luk 8:2,3Abasani baye bonsi na abakungu abamotunyanete korwa Galili, bagatenenera are, bakarora ayio.

Ogotindekwa kwa Yeso

(Mat 27:57-61; Mar 15:42-47; Yoh 19:38-42)

50Rora, narengeo omonto oyomo, erieta riaye Yusufu, omonto bw’Arimathaya, omochie o Boyahudi, ere nomonto bw’ekegambero kiabo, omonto omuya, naende omooronge. 51Ere tanchete amang’ana abo, nonya nogokora kwabo, nigo aganyete oborwoti bwa Nyasae. 52Omonto oyo agachiera Pilato, akamosaba aegwe omobere o Yeso. 53Akayoikia, akayoboyia egetambaa ki’egatani, akayobeeka ase oboina bwabaachetwe ase egetare, aase monto onde atana kobekwa. 54Nigo riarenge rituko ri’Okwearigania, na Esabato egachaaka gosoa. 55Abakungu abaachete amo nere korwa Galili, nigo batunyanete korwa magega, bakarigereria oboina na buna omobere oye bwareretigwe. 56#Okong’ 20:10; Okoir 5:14Bakairana, bakaroisia amanukato na amaguta ye rimisu rigiya.

Ne rituko ri’Esabato bagatimoka buna yachiigetwe.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 23: EKGE

Highlight

ಶೇರ್

ಕಾಪಿ