JOHANA 8
8
1Ago kiwa Jesus tulwetab Emitik. 2Ak kimus karon konyo hekalut, ak kibwa bik tugul ole mi inendet; ak kiteb ng’ony, konet ichek. 3Ak kiimut sirik ak Parisaik kobogoriot ne kiginamji ibetab ge; ak ye kingo kaginde kwenut, 4kelenji, Konetindoni, kaginam kobogoriondoni eng’ ibetab ge, kota komi ibetab ge. 5King’atech Musa eng’ Ng’atutiet kole, kilage koik ne u nito: ara ilen nee inye? 6Kimwaei ng’olyondonito kotiemei inendet, si kosich kit ne kitaame. Ago kiing’uruk Jesu, kosir ng’ony eng’ mornennyi. 7Ago ye kingota koteepse inendet, kotonon, ak kolenji, Ingotoi ne matinye tengek eng’ okwek kowir eng’ koita. 8Ak kiing’uruk kogeny kosir ng’ony eng’ mornennyi. 9Ak ye kingogas ichek ng’olyondonoto, komanda kobee agenge agenge, koboch ne o agoi ne bo let: ak king’et Jesu inegei, ak kobogoriondonoto eng’ ole kimi, kotononi eng’ kwen. 10Kotonon Jesu anyun, ak kolenji, Kobogoriondoni, mi ano ichek? Ma igikyin chi? 11Ak kile, Ma igikya chi, Kiptaiyandani. Ak kilenji Jesu, Magikyinin agane: ui anyun; koboch nguno, komatata iyai tengek.]
Lapkeiyet ne bo ng’ony
12Kimwachi Jesu anyun ichek kogeny, kolenji, A lapkeiyet ne bo ng’ony: inendet ne isuba ko mawendoti eng’ mesundeito, ago nyoru lapkeiyetab sobondo.
13Kolenji anyun Parisaik inendet, Ibaorianjinige: ma bo iman baornateng’ung’. 14Kowolji Jesu kolenji, Agot ngabaorianjinige, ko bo iman baornatennyu; amu angen ole abunu, ak ole awendi; ago mongen ole abunu, anan ole awendi. 15Oruochi ko u magetab borto; maruokyini chi ane. 16Ee, agot ngaruoch, ko bo iman kiruogennyu; amu mami anege, ago kimi ak Kwanda ne kiiyokwa. 17Ee, ak kigisir eng’ Ng’atutieng’wong’ kele, bo iman baornatetab bik aeng’. 18A inendet ne abaorianjinige, ak baorianjina Kwanda ne kiiyokwa. 19Kolenji anyun ichek inendet, Mi ano Kwandang’ung’? Kowol Jesu kole, Mongena, anan Baba: nda kigonaa, ta kiongen Baba agine.
20Kimwa inendet ng’alechu eng’ ole kigonore siling’isiek, ye kiinetisiei eng’ hekalut: ak ma nam chi inendet; amu kitom koit sainnyi.
Kateunoik agobo betusiek che bwanei
21Kimwachi anyun icheget kogeny, kolenji, Awendi, ak tun ocheng’a, ak obegu eng’ tengektang’wong’: ole awendi, ko momuchi obwa. 22Kile anyun Yahudik, Tos bargei, amu mwaei kole, Ole awendi, ko momuchi obwa? 23Ak kilenji, O bo oli bo ng’ony, a bo barak: o bo ng’onyuni; ma bo ane ng’onyuni. 24Noto kaamwawok, ale, obegu eng’ tengekwogikwok: amu ngo moyuani ole a inendet, obegu eng’ tengekwogikwok. 25Kilenji anyun ichek inendet, I ng’o? Kolenji Jesu, Noto kiamwawok koboch taunet. 26Atinye tuguk che chang’ che amwae ak che aruochi agobo okwek: ago bo iman inendet ne kiiyokwa; ak amwachini ng’ony tuguk che kiagas eng’ inendet.
27Ago ma iguiyo kole mwachin agobo Kwanda. 28Kilenji Jesu anyun, Ye kaouite Weritab chi, onai anyun eng’ betunoto ole a inendet, amayae kiy anege, ago amwae tuguchu ko u ye kiineta Kwanda. 29Ak kimi tuwai ak inendet ne kiiyokwa; ma bagakta anege; amu ayae kotugul tuguchoto chamaksei eng’ inendet. 30Ak ye kita komwaei tuguchu, koyan inendet che chang’.
Ng’alek che kiting’e Jesu Yahudik
31Kilenji Jesu anyun Yahudichoto kiga koyan inendet, Ngot otebye okwek eng’ ng’olyondennyu, ko o alamalyennyu iman; 32ak onai imanda, ak kotiachak imanda. 33Kowolji ichek inendet kolenji, Ki keswekab Abraham, ak tom keegu otwogikab chi age tugul ole kinye kora: imwaitoi ano anyun ile, Kitiachok? 34Kowolji Jesu kolenji, Amwawok, iman, iman, ale, Age tugul ne yaei tengek ko otwogindetab tengek. 35Ak matebyei otwogindet eng’ got koigeny: tebyei werit koigeny. 36Ngotiachak anyun Werit, ko otiagotin iman. 37Angen ale o keswekab Abraham; ago ocheng’e obara, amu matinyei ng’olyondennyu ole tebe eng’ okwek. 38Amwae tuguk che kiageer eng’ Baba: ak oyae tuguchoto kiogas eng’ kwandang’wong’.
39Kowolji kolenji, Kwandanyo ko Abraham. Kolenji Jesu, Nda kio lagokab Abraham, ta kioyae boisiosiekab Abraham. 40Ago ngo ocheng’e obara, chito ne kamwawok ng’alek che bo iman, che kiagas eng’ Jehovah: kima yai ko u noto Abraham. 41Oyae boisionik che bo kwandang’wong’. Kilenji anyun inendet, Kima kisichech eng’ sokset; kitinye Kwanda agenge, noto ko Jehovah. 42Komwachi Jesu ichek kolenji, Nda ka Kwandang’wong’ Jehovah, ta kaochama: amu kianyo abunu Jehovah; kima anyo anege, ago kiiyokwa inendet. 43Amu nee si monai choto amwae? Amu momuchi ogas ng’olyondennyu. 44O bo kwandang’wong’ oindet, ak ochame oyai magutikab kwandang’wong’. Ki rumindet koboch taunet, ama tononi eng’ imanit, amu mami imanit eng’ inendet. Ye mwaei lembech, komwaei agobo tugukyik: amu kiplembechwa inendet, ak kwanda ne bo noto. 45Ago moyana amu amwae imanit. 46Ng’o eng’ okwek ne igikyina kole atinye tengek? Ngot amwae imanit, ko amu nee anyun si moyana? 47Inendet ne bo Jehovah kogasei ng’alekab Jehovah: noto anyun mogase okwek, amu mobo Jehovah.
48Kowolji anyun Yahudik kolenji, Magimwae achek iman kele, I Samarindet, ak itinye oindet? 49Kowol Jesu kole, Matinye oindet; ago agonyiti Baba, ak otewera. 50Ago macheng’e torornatennyu: mitei agenge ne cheng’ei ak koruochi. 51Amwawok, iman, iman, ale, Ngo rib chi ng’olyondennyu ko mageerei meet agoi. 52Kolenji anyun Yahudik, Kingen nguno kele itinye oindet. Kigome Abraham, ak kigobek maotik; ak imwae ile, Ngo rib chi ng’olyondennyu, ko machamjami meet agoi. 53Tos i o isiir kwandanyo Abraham, ne kigome? Ak kigobek maotik: iyaege iegu ng’o? 54Kowol Jesu kole, Ngot atororige, ko buch torornatannyu: Kwandanyu ne itorora; ne omwae ole, inendet ko Jehovah neng’wong’; 55ak tom onai inendet: ago angen inendet; ak ngot amwa ale, mangen inendet, aegu kiplembechwa, ko u okwek: ago angen inendet, ak aribe ng’olyondennyi. 56Kibaibai kwandang’wong’ Abraham kogeer betunnyu; ak kigeer, ak kogasgei. 57Kolenji Yahudik anyun, Tom iit kenyisiek konom, ak kiigeer Abraham? 58Kolenji Jesu, Amwawok, iman, iman, ale, Kingotom kobiit Abraham, ami. 59Kiinem anyun koik komachei kowire inendet: ago kiung’gei Jesu, ak komanda eng’ hekalut.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JOHANA 8: BUKUIT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
God's word open for all
©Bible Society of Kenya, 2020
