JOHANA 10
10
Mestowot ne Mie
1Amwawok, iman, iman, ale, Chorin ak ko rebin inendet ne mabunei kurgetab biutab kechirek, ne lanyei oldo age. 2Ago mestowotab kechirek inendet ne bunei kurget. 3Yatyin inendet ribindetab kurget; ak kasei kechirek kutinnyi: ak kuurei kechirekyik eng’ kainaikwak, ak kondoe ichek. 4Ak ye kagomaanda inendet chechiget tugul koba sang’, kondoe, ak kosub kechirek inendet: amu ingen kutinnyi. 5Ak machamei kosub toondet, ago mwee: amu manaei kutuswekab toek. 6Komwachi Jesu ichek kalewenoni: ago ma iguiyo ichek kole nee tuguchoto kiga mwachi.
7Kolenji anyun Jesu ichek kogeny, Amwawok, iman, iman, ale, A kurgetab kechirek. 8Chorik ak ko rebik tugul che kiindounena: ago ma kas kechirek ichek. 9A kurget: ngwo chi age tugul go ne buna ane, kesoru, ak kwo go, ak komanda sang’, ak konyor ole kiyage. 10Nyonei chorindet si kochor, ak kobar, ak kong’em kityo: kianyo si kobiit konyor sobondo, ak kotepto sobonato inne.
11A mestowot ne mie: igoitoi mestowot ne mie sobondanyi agobo kechirek. 12Ago inendet ne otwogin, ne ma mestowot, ne ma chitab kobo kechirek, kogeerei konyonei suiyot, ak kobagakta kechirek, ak komwei, ak konam anyun suiyot ichek, ak koiyesta: 13komwei inendet amu otwogin, ak mamage kiy kechirek. 14A mestowot ne mie; ak angen chechuk, ak kongena chechuk, 15ko u ye ingena Kwanda, ak angen Kwanda; ak agoitoi sobondanyu agobo kechirek. 16Ak atinye kechirek alak, che ma bo biuni: kanyol aget choto agichek, si kogas kutinnyu: ak koek akwet agenge, ak mestowot agenge.
17Chama anyun Kwanda amu noto, amu agoitoi sobondanyu, si kobiit anam kogeny. 18Marebena chi, ago agoitoi anege. Atinye kimnatet agoito, ak atinye kimnatet anam kogeny. Kiataach ng’atutioni eng’ Baba.
19Kibiit toiyet kogeny eng’ Yahudik agobo ng’alechuto. 20Ak kile che chang’ eng’ ichek, Tinyei oindet, ak koamei iywek; kalya si ogas inendet? 21Kole alage, Ma bo ng’alechu chi ne tinyei oindet. Tos imuchi oindet koyat konyekab chito ne korat?
Jesu eng’ igortab katabanet
22Ak kimi igortab katabanet eng’ Jerusalem: ak ki betusiekab kaititindo; 23ak kiwendot Jesu eng’ hekalut eng’ keterut ne bo Solomon. 24Kibwa anyun Yahudik koyiem inendet, kolenji, Igonech kigenisie eng’ saget kot kotianit? Ngo i Kristo, imwawech komie. 25Kowolji Jesu kolenji, Kiamwawok, amoyani: boisiosiek che ayae eng’ kainetab Baba ko choto che baorianjina. 26Ago moyani, amu mobo kechirekyuk. 27Kasei kutinnyu kechirekyuk, ak angen ichek, ak kosuba: 28ak agochini ichek sobondab koigeny; ak magoi lusyo, ama rebena chi ichek eng’ eunnyu. 29O Baba, ne kigona ichek, kosiir tugul; ama mi chi ne imuchi koreb ichek eng’ eutab Baba. 30Ane ak Kwanda, ko ki agenge.
Koromnatetab Yahudik
31Kinam anyun Yahudik koik kogeny kolen kolach inendet. 32Kowolji Jesu kolenji, Koaboruok boisiosiek che chang’ che miach che bunu Kwanda; olacha agobo boisio nee eng’ choto? 33Kowolji Yahudik inendet kolenji, Magilachin amu boisiet ne mie, ago amu chotisiet; ak amu inye ne i chi, iyaege iegu Jehovah. 34Kowolji Jesu bichoto, kolenji, Tos ma sirat eng’ Ng’atutieng’wong’ kele, Kiamwa ale, O cheptalelisiek? 35Ngo kigoguure inendet ichek cheptalelisiek, icheget che kinyonji ng’olyotab Jehovah (ama imugaksei kebut sirutiet), 36tos omwae agobo inendet, ne kiitaban Kwanda ak koyokto kwo ng’ony, olenjini, Ichotisiei; amu kiale, A Weritab Jehovah? 37Ngot ko mayai boisiosiekab Kwandanyu, ko mat oyana. 38Ago ngayai, ko agot ngo moyana, oyan boisiosiek: si kobiit onai ak oyan ole mi Kwanda eng’ ane, ak ane eng’ Kwanda. 39Kicheng’ anyun kogeny konam inendet: ago kibetito eng’ eunekwak.
40Ak kiwa kogeny Jordan komosin ole kiibatisanisie Johana eng’ tai; ak kitebi eng’ oloto. 41Ak kibwanji che chang’ inendet; ak kole, Kima yai Johana kaborunet; ago tuguk alak tugul che kimwa Johana agobo chichi ko bo iman. 42Ak kiiyan inendet che chang’ eng’ oloto.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JOHANA 10: BUKUIT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
God's word open for all
©Bible Society of Kenya, 2020
