JOHANA 9
9
1NINGĨ akĩhĩtũka, nĩonire mũndũ watũire e mũtumumu kuuma o aaciarũo. 2Nao arutwo ake makĩmũũria atĩrĩ, Rabii, nĩ ũrĩkũ wehirie, nĩ mũndũ ũyũ kana nĩ amũciari, agĩgĩciarũo e mũtumumu? 3Nake Jesu agĩcokia atĩrĩ, Mũndũ ũyũ o na kana amũciari-rĩ, gũtirĩ wehirie, aaciarirũo atariĩ ũũ nĩ getha mawĩko ma Ngai monithanio nĩ ũndũ wake. 4Ũndũ kũrĩ, no tũrute mawĩra ma ũrĩa wandekirie, tũmarute rĩu kũrĩ o mũthenya; ũtukũ nĩũgũũka, gũtarĩ mũndũ ũngĩhota kũruta wĩra. 5#Mat 5.14; Joh 8.12.Hĩndĩ ndĩ kuo gũkũ thĩ, nĩ niĩ ũtheri wa thĩ. 6Aarĩkia kuuga ũguo, agĩtua mata thĩ, akĩringia ndaka na mata macio, akĩhaka mũndũ ũcio ndaka ĩo maitho 7agĩcoka akĩmwĩra, Thiĩ, ũgethambe karia ga Siloamu (narĩo rĩĩtwa rĩu rĩataũrũo nĩ atĩrĩ, Gũtũmwo). Nake agĩgĩthiĩ, agĩĩthamba, agĩũka akĩonaga. 8Tondũ ũcio, andũ a kwao, na arĩa maamuonaga mbere ĩo e mũthĩni ũhoyaga thendi, acio makĩũria atĩrĩ, Ũyũ githĩ ti ũrĩa ũraikaraga thĩ akahoyaga thendi? 9Angĩ makiuga, Nowe; angĩ nao makiuga, Aca, tiwe, na nĩ take. We mwene akiuga, Nĩ niĩ. 10Magĩkĩmũũria atĩrĩ, Ũkĩhingũrirũo maitho atĩa? 11Nake agĩcokia atĩrĩrĩ, Mũndũ ũrĩa wĩtagwo Jesu nĩaringirie ndaka, aa’haka maitho, aanjĩra, Thiĩ Siloamu, ũgethambe; na niĩ ndagĩthiĩ ndethamba, ndahota kuona. 12Makĩmũũria, E kũ mũndũ ũcio? Akiuga, Ndiũĩ harĩa arĩ.
13Makĩmũtwara kũrĩ Afarisai, mũndũ ũcio warĩ mũtumumu mbere ĩo. 14Na rĩrĩ, mũthenya ũcio Jesu aaringirie ndaka, akĩmũhingũra maitho, warĩ wa thabatũ. 15Nao Afarisai magĩkĩmũũria rĩngĩ kĩrĩa gĩatũmire ahote kuona. Nake akĩmera atĩrĩ, Nĩ ndaka anjĩkĩrire maitho, na niĩ ndethamba na rĩu nĩnguona. 16Tondũ ũcio Afarisai amwe makiuga atĩrĩrĩ, Mũndũ ũcio ndoimĩte kwĩ Ngai, amu ndamenyagĩrĩra mũthenya wa thabatũ. No angĩ makiuga, Mũndũ wĩhagia ahote atĩa gwĩka ciama ta icio? Makĩya kwamũkana o ene. 17Magĩgĩcoka makĩũria mũtumumu ũcio o rĩngĩ atĩrĩrĩ, Wakiuga atĩa wee, ũhoro wake, tondũ nĩagĩkũhingũrire maitho? Nake akiuga atĩrĩ, Nĩ mũnabii. 18Nao Ayahudi magĩkĩrega gwĩtĩkia ũhoro wake atĩ oima mũtumumu na nĩacokete kuona, nginya maarĩkia gwĩta amũciari ũcio wacokete kuona, 19makĩmoria atĩrĩ, Ũyũ nĩwe mũrũ wanyu, ũrĩa muugaga atĩ aaciarirũo e mũtumumu? Nĩ atĩa rĩu tondũ nĩekũhota kuona? 20Nao amũciari magĩcokia makiuga atĩrĩ, Nĩtũũĩ ũyũ nowe mũrũ witũ, na nĩtũũĩ nĩaaciarirũo e mũtumumu; 21no kĩrĩa gĩtũmĩte rĩu ahote kuona, ithuĩ tũtikũmenya, nake ũrĩa ũmũhingũrire maitho, tũtimũũĩ ithuĩ: mũtikĩmũũrie we; nĩ mũndũ mũgima, nĩearĩrĩrie. 22Makiuga ũguo amũciari, nĩ ũndũ nĩmetigĩrĩte Ayahudi, nĩ gũkorũo Ayahudi nĩmaarĩkĩtie kwĩrana atĩ mũndũ angĩĩtĩkĩra atĩ Jesu nĩwe Kristo, agirio athiage thunagogi. 23Nĩkĩo amũciari moigire ũguo atĩ, Nĩ mũndũ mũgima; mũtikĩmũũrie we.
24Nao magĩgĩĩta mũndũ ũcio hingo ya kerĩ, ũcio warĩ mũtumumu, makĩmwĩra atĩrĩ, Gooca Ngai; ithuĩ nĩtũũĩ mũndũ ũcio nĩ mwĩhia. 25Nake agĩgĩcokia atĩrĩ, Korũo nĩ mwĩhia, niĩ ndiũĩ; njũĩ o ũndũ ũmwe niĩ, njũĩ o rĩrĩ, atĩ tondũ nyuma mũtumumu, rĩu nĩ kuona nguona. 26Magĩkĩmũũria, Atĩ nĩ atĩa agwĩkire? Akũhingũrire maitho atĩa? 27Nake akĩmacokeria atĩrĩ, Ndamwĩra o rĩu, na mũtinaigua; mũkwenda kũigua rĩngĩ nĩkĩ? mũkwenda na inyuĩ mũtuĩke arutwo ake? 28Nao makĩmũruma, makiuga, Wee nĩwe mũrutwo wake; ithuĩ tũrĩ arutwo a Musa. 29Ithuĩ nĩtũũĩ Ngai nĩaarĩirie Musa, no mũndũ ũcio rĩ, tũtiũĩ na kũrĩa oimĩte. 30Nake mũndũ ũcio agĩcokia akĩmera atĩrĩ, Kaĩ ũguo nĩ ũrirũ-ĩ! atĩ inyuĩ mũtiũĩ kũrĩa oimĩte, na no a’hingũrire maitho. 31Nĩtũũĩ Ngai ndaiguaga arĩa mehagia; no rĩrĩ, mũndũ aakorũo nĩ mũhoi Ngai, na agekaga ũrĩa we endaga, ũcio nĩamũiguaga. 32Kuuma o kĩambĩrĩria gĩa thĩ gũtirĩ kwaiguwo mũndũ wahingũrire ũngĩ maitho waciarirũo e mũtumumu. 33Mũndũ ũcio atangiumĩte kwĩ Ngai, ndarĩ ũndũ angĩhota gwĩka. 34Magĩcokia makĩmwĩra atĩrĩ, Wee waciarirũo wĩ wa mehia matheri, na githĩ ũgũtũruta ũhoro ithuĩ? Magĩkĩmũthinĩkania makĩmuumia nja.
35Nake Jesu akĩigua atĩ nĩmamuumĩtie nja; na aathiĩ aamũkora, akĩmũũria, Wee-rĩ, nĩwĩhokete Mũrũ wa Ngai? 36Nake agĩcokia akiuga atĩrĩ, Nake nĩ ũrĩkũ, mũthuri ũyũ, ngamwĩhoke? 37Jesu akĩmwĩra atĩrĩ, Nĩũmuonete, o na nowe mũraaria nake. 38Nake akiuga, Mwathani, ndĩ gwĩtĩkia. Akĩmũgũĩra thĩ. 39Nake Jesu akiuga atĩrĩ, Niĩ ndokire thĩ ĩno gũtuithia matuĩro, atĩ arĩa matonaga mone, na arĩa monaga matuĩke atumumu. 40Nao Afarisai arĩa maarĩ nake nĩmaaiguire ũhoro ũcio, makĩmũũria, Tũrĩ atumumu na ithuĩ? 41Nake Jesu akĩmera atĩrĩrĩ, Mũngĩrĩ atumumu, mũtingĩrĩ na wĩhia; no tondũ muugaga ũũ, Ithuĩ nĩtuonaga-rĩ, wĩhia wanyu no ũtũũre.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JOHANA 9: OGKBIBLE
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
