ATŨMWO 13
13
1NA rĩrĩ, kanitha-inĩ ũrĩa warĩ Antiokia nĩkwarĩ anabii amwe na arutani metagwo aa Baranaba, na Sumeoni ũrĩa wetagwo rĩĩtwa rĩngĩ Nigeri, na Lukio mũndũ wa Kurene, na Manaeni ũrĩa wareranĩirũo na Herode ũrĩa mũthamaki, o na Saulu. 2Na hĩndĩ ĩmwe maahoyaga Mwathani, makĩĩgiragia kũrĩa irio, Roho Mũtheru akiuga atĩrĩ, Ta nyamũrĩrai Baranaba na Saulu, nĩ getha makarute wĩra ũrĩa ndĩmetĩire. 3Na thutha ũcio, maarĩkia kwĩgiria kũrĩa irio, na kũhoya, na kũmaigĩrĩra moko, makĩmatũma mathiĩ.
4Nao, nĩ ũndũ wa kũrekio nĩ Roho Mũtheru magĩtherera magĩthiĩ Seleukia; magĩcoka makiuma kuo mahaicĩte marikabu, magĩkinya Kuporo. 5Na rĩrĩa maakorirũo marĩ Salamisi, makĩheana Ũhoro wa Ngai thunagogi-inĩ cia Ayahudi: na maarĩ na Johana akamatungatagĩra.
6Na rĩrĩa maatuĩkanĩirie gĩthama kĩu gĩothe nginya o Pafo, magĩkora mũndũ mũragũri wĩ mũnabii wa maheni, Mũyahudi wetagwo Barijesu; 7na nĩaaikaraga kwa barũthi wetagwo Serigio Paulo, ũrĩa warĩ mũndũ mũkuũku. Barũthi ũcio agĩĩta Baranaba na Saulu moke harĩ we, akĩenda kũigua Ũhoro wa Ngai. 8No rĩrĩ, mũndũ ũcio mũragũri wetagwo Elumo, (narĩo rĩĩtwa rĩu rĩake rĩgĩtaũrũo no ta kuuga mũragũri) akĩmehotorera, akĩgeria ũrĩa angĩringĩra barũthi ndagetĩkĩre gwĩtĩkia Ũhoro wa Ngai. 9Nowe Saulu, ũrĩa warĩ na rĩĩtwa rĩngĩ Paulo, aiyũrĩtwo nĩ Roho Mũtheru, akĩmũkũũrĩra maitho, 10akĩmwĩra atĩrĩ, Wee ũiyũirũo nĩ wara wothe o na waganu-rĩ, wee mũrũ wa mũcukani, ũtũire ũrĩ ũthũ na ũhoro wothe wa ũthingu-rĩ, kaĩ ũtangĩgĩtiga kwogomia njĩra iria cierekereire cia Mwathani? 11Na atĩrĩ, rĩu guoko kwa Mwathani nĩgũgũkinya harĩ wee, na nĩũgũtuĩka mũtumumu, wage gũcoka kuona ũtheri wa riũa ihinda. Na kahinda o kau agĩitĩka kuona marundurundu, akĩgĩwo nĩ nduma; agĩcoka gũcangacanga agĩcaragia andũ a gũthiĩ nake mamũnyitĩte guoko. 12Hĩndĩ ĩo barũthi ona ũguo gwekwo, agĩcoka gwĩtĩkia, agegete nĩ ũndũ wa ũrutani ũrĩa wa Mwathani.
13Na rĩrĩ, Paulo na andũ a thiritũ yake makiuma Pafo mahaicĩte marikabu, magĩkinya Periga thĩinĩ wa bũrũri wa Pamfulia: nake Johana akĩmatiga agĩcoka Jerusalemu. 14Nao maarĩkia gũtuĩkanĩria bũrũri ũcio moimĩte Periga, magĩkinya Antiokia itũũra rĩa bũrũri wa Pisidia. Na magĩtonya thunagogi mũthenya wa thabatũ, magĩikara thĩ. 15Na kwarĩkia gũthomwo ũhoro wa watho o na wa anabii, anene a thunagogi makĩmarekanĩria makĩmera atĩrĩ. Ariũ a Ithe witũ, mũngĩkorũo mũrĩ na ũhoro wa kũũmĩrĩria andũ naguo, wariei. 16Nake Paulo agĩkĩrũgama, na aarĩkia kũmakiria na guoko, akiuga atĩrĩ,
Andũ aya a Isiraeli, na inyuĩ mwĩtigagĩra Ngai, ta thikĩrĩriai. 17#Thama 1.7; Thama 12.51.Ngai wa rũrĩrĩ rũrũ rũa Isiraeli nĩaathurire maithe maitũ, agĩtũũgĩria andũ a rũrĩrĩ rũu hĩndĩ ĩrĩa maatũire bũrũri wa Misiri, agĩcoka akĩmoimia kuo na guoko gwake kwĩ na ũhoti. 18#Ndar 14.34; Gũcok 1.31.Na ihinda ta rĩa mĩaka mĩrongo ĩna agĩkirĩrĩria mĩthiĩre ĩrĩa maathiaga nayo werũ-inĩ. 19#Gũcok 7.1; Josh 14.1.Na aarĩkia kũnina ndũrĩrĩ mũgwanja bũrũri-inĩ wa Kanaani, agĩcoka akĩmahe bũrũri wacio ũtuĩke igai rĩao, matũũre kuo ta mĩaka magana mana ma mĩrongo ĩtano. 20#Atiir 2.16; 1 Sam 3.20.Na thutha wa maũndũ macio akĩmahe Atiirĩrĩri-bũrũri o nginya hĩndĩ ya mũnabii Samueli. 21#1 Sam 8.5; 1 Sam 10.21.Na thutha ũcio makĩhoya maheo mũthamaki: nake Ngai akĩmahe Saulu mũrũ wa Kishu, mũndũ wa mũhĩrĩga wa Benjamini, amathamakĩre ihinda rĩa mĩaka mĩrongo ĩna. 22#1 Sam 13.14; 1 Sam 16.12; Thab 89.20.Na aarĩkia kũmweheria, agĩũkĩria Daudi atuĩke mũthamaki wao; nĩwe Ngai oimbũrire ũhoro wake akiuga atĩrĩ, Nĩnyonete Daudi, mũrũ wa Jesii, arĩ mũndũ ũrĩa ngoro yakwa yendeire o ngoga, ũrĩa ũrĩĩkaga maũndũ marĩa mothe ndĩrĩendaga mekwo. 23Na rĩrĩ, Ngai nĩaarehithĩirie Aisiraeli Mũhonokia oimĩte rũciaro inĩ rũa mũndũ ũcio, o ta ũrĩa eranĩire, nake nĩwe Jesu. 24#Mar 1.4; Luk 3.3.Ũcio atanoka-rĩ, Johana nĩaambire kũhunjĩria andũ othe a Isiraeli ũhoro wa atĩ andũ merire na mabatithio. 25#Joh 1.20; Mat 3.11; Mar 1.7; Luk 3.16; Joh 1.27.Nake Johana, rĩrĩa aakiriĩ kũhingia rũgendo rũake rũa gũkũ thĩ-rĩ, akiuga atĩrĩ, Mũgũkĩĩgereria atĩ niĩ ndĩ ũ? Niĩ ti niĩ ũrĩa ũgũũka. No atĩrĩ, nĩharĩ ũgũũka thutha wakwa, ũrĩa niĩ itaigaine wa kuohora mĩkwa ya iratũ ciake.
26Atĩrĩrĩ, ariũ a Ithe witũ, o inyuĩ ciana cia rũciaro rũa Iburahimu, o na arĩa me thĩinĩ wanyu metigĩrĩte Ngai-rĩ, nĩ ithuĩ tũtũmĩirũo ũhoro wa kũhonokio kũu. 27Nĩ gũkorũo andũ arĩa matũũraga Jerusalemu, na anene ao, tondũ wa ũrĩa maagire kũmũmenya, o na kana kũmenya maũndũ marĩa maarathirũo nĩ anabii, o marĩa matũire mathomagwo mũthenya o mũthenya wa thabatũ-rĩ, nĩo maahingirie maũndũ macio nĩ ũrĩa maamũtuĩrĩire cira atĩ nĩ mwĩhia. 28#Mat 27.22,23; Mar 15.13,14; Luk 23.21-23; Joh 19.15.Ningĩ-rĩ, o na matakĩonire ũndũ wa gũtũma oragwo-rĩ, nĩ gũthaitha maathaithire Pilato atĩ oragwo. 29#Mat 27.57-61; Mar 15.42-47; Luk 23.50-56; Joh 19.38-42.Na maarĩkia kũhingia maũndũ mothe marĩa maandĩkĩtwo ũhoro-inĩ wake, makĩmũcuurũria makĩmũruta mũtĩ igũrũ, makĩmũiga mbĩrĩra-inĩ. 30No Ngai nĩaamũriũkirie oime kũrĩ arĩa akuũ: 31#Atũm 1.3.agĩcoka akĩonwo matukũ maingĩ nĩ andũ arĩa maambatĩte nake Jerusalemu moimĩte Galili, na rĩu nĩo aira a kuumbũrĩra andũ ũhoro wake. 32#Thab 2.7.Na ithuĩ nĩ kũmũrehere twamũrehere ndeto njega cia ũrĩa kĩĩranĩro kĩrĩa maithe maitũ merĩirũo 33kĩhingĩtio nĩ Ngai, nĩguo ciana ciitũ igĩe nakĩo, agakĩhingia nĩ ũrĩa aariũkirie Jesu; o ta ũrĩa haandĩkĩtwo thĩinĩ wa thaburi ya kerĩ, ũũ, Wee nĩwe Mũrũ wakwa, niĩ ũmũthĩ nĩndagũciara. 34#Isa 55.3.Naho ha ũhoro wa ũrĩa aamũriũkirie oime kũrĩ arĩa akuũ, na rĩu ndecoka kuona ũhoro wa kuora-rĩ, Ngai nĩoigire ũũ: Nĩngamũhe mĩtugĩre ĩrĩa mĩtheru na ĩrĩa ĩtarĩ hingo ĩngĩagwo, o ĩrĩa Daudi erĩirũo. 35#Thab 16.10.Nĩkĩo ekuuga thĩinĩ wa thaburi ĩngĩ atĩrĩ, Ndũgetĩkĩra Ũrĩa waku Mũtheru onane na kuora. 36Amu-rĩ, Daudi aarĩkia gũtungatanĩra matukũ-inĩ make kũringana na ũrĩa Ngai endire gwĩkwo-rĩ, agĩcoka agĩkoma toro, agĩthikwo hamwe na maithe make, agĩkĩonana na kuora: 37ĩndĩ ũcio Ngai aariũkirie ndaigana kuona ũhoro ũcio wa kuora.
38Hakĩrĩ ũguo-rĩ, ariũ a Ithe witũ menyai atĩ ũhoro wa kũrekerũo mehia nĩũkũheanwo kũrĩ inyuĩ nĩ ũndũ wa mũndũ ũcio: 39ningĩ atĩ mũndũ ũrĩa wothe ũmwĩhokete nĩegũtuwo mũthingu nĩwe, ehererio maũndũ mothe marĩa watho wa Musa waremirũo nĩ kũmwehereria inyuĩ nĩguo mũtuwo athingu. 40Tondũ ũcio-rĩ, menyai mũgakorererũo nĩ ũhoro ũrĩa waaririo nĩ anabii atĩrĩ,
41 #
Hab 1.5. Rorai, inyuĩ arurũkani, mũgege na mũũre biũ;
Nĩ ũndũ rĩ, he wĩra ndĩraruta matukũ-inĩ manyu,
Na mũtiĩtĩkia atĩ nĩndĩraũruta, o na mũngĩheo ũhoro waguo nĩ mũndũ.
42Na rĩrĩa andũ acio moimaga nja, magĩthaithana atĩ makaheo mohoro macio mũthenya ũyũ ũngĩ wa thabatũ. 43Na rĩrĩa kũu thunagogi-inĩ gwaitĩkire kũharaganio-rĩ, andũ aingĩ, Ayahudi o na andũ meamũrĩire Ngai a thiritũ ya arĩa megarũrĩte magatuĩka Ayahudi, makĩrũmĩrĩra Paulo na Baranaba: nao atũmwo acio makĩmaarĩria, makĩmahatĩrĩria atĩ matũũre marũmĩte Wega-inĩ wa Ngai.
44Naguo mũthenya ũyũ ũngĩ wa thabatũ gũgĩkinya atĩrĩ, atĩ ta andũ othe a itũũra makĩũngana maigue Ũhoro wa Ngai. 45No rĩrĩa Ayahudi monire kĩrĩndĩ kĩrĩa kĩingĩ kĩonganĩte, makĩigua ũiru mũno, magĩkararia maũndũ marĩa maaragio nĩ Paulo, makĩmũruma. 46Nao Paulo na Baranaba magĩitĩka kwaria na ũcamba, makĩmera atĩrĩ, Nĩkwarĩ bata atĩ Ũhoro wa Ngai wambe wario kũrĩ inyuĩ. No rĩrĩ, kuona atĩ nimwaũrega kũna, mwaũte, mwatua atĩ mũtiagĩrĩirũo nĩ kũheo muoyo wa tene na tene, rĩu-rĩ, tũkũgarũrũkĩra andũ arĩa a Ndũrĩrĩ. 47#Isa 42.6; 49.6.Nĩ gũkorũo ũguo nĩguo Mwathani atwathĩte twĩke, akoiga atĩrĩ,
Nĩngũigĩte Wee ũtuĩke ũtheri wa gũtherera andũ a Ndũrĩrĩ,
Nĩ getha ũtuĩke wa gũkinyia ũhoro wakwa wa kũhonokania o ituri-inĩ ciothe cia thĩ.
48Nao andũ arĩa mataarĩ Ayahudi maaigua ũhoro ũcio, magĩkena, magĩgĩkumia Ũhoro wa Ngai: nao arĩa othe maathĩrĩirio kuona muoyo wa tene na tene magĩĩtĩkia.
49Naguo Ũhoro wa Mwathani ũgĩkĩhunja bũrũri ũcio wothe. 50No rĩrĩ, Ayahudi makĩhatĩrĩria atumia arĩa meamũrĩire Ngai, o arĩa maarĩ igweta, o na anene a itũũra, makĩrutithia ngũĩ nĩguo Paulo na Baranaba manyarirũo, makĩmaingata na hinya moime ndere-inĩ ciao. 51#Mat 10.14; Mar 6.11; Luk 9.5; 10.11.No-o magĩthukia magũrũ mao rũkũngũ rũitĩke, kũmenyũo atĩ nĩmaatigana nao, magĩthiĩ Ikonio. 52Nao arutwo magĩkena o gũkena, na makĩiyũrũo nĩ Roho Mũtheru.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ATŨMWO 13: OGKBIBLE
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
