Luka 6
6
Lilako ja Yesu ja Sabata
(Mt 12.1-8; Mk 2.23-28)
1Nda mbile ea Sabata aotuwana basala ba blé. Ko bakimi bakae baomuka bifunza bia blé, ko baonokola limamposo la nkakosa ea blé ndʼakata. 2Lolo Bafalusi bamo baolakela, Inyo lokela joi lifeji la mbile ea Sabata lae? 3Ko Yesu aolaamba, aolakela, Kamba lotafoanda joi liki Dawidi okelaka akiʼndʼokaka nzala, ende lʼiyʼaki lʼende? 4Elengʼekiʼndʼotswaka ndʼilombe ya Nzakomba, ko aokola mampa yʼoeko, ko aleki iko, ko akaaki iyʼaki lʼende? Mampa itakʼeji wae banto bale imola nko nkanga kika? 5La ngoko aolasangela wete, Bonʼowʼonto ale Nkolo o lʼea Sabata.
Yesu aikya bontʼoki la likata linyeelaki
(Mt 12.9-14; Mk 3.1-6)
6Ko nda Sabata emo aolotswa nda sunangonga, ko aolaka lilako. Ko bonto aki eko, likata likae jʼelome jonyeela. 7Ko bakoci bʼenkanda lʼafalusi baololenda tee wae bene, nkina ifoikyʼontʼoko nda Sabata, wae bofotsʼende likambo. 8Lolo ende aokotola bekakaza bekiyo, ko aotefeelʼonto oki la likata jonyeela, Emala ko silama nkʼeko ndʼetei. Ko aolemala nkʼeko. 9Nkako Yesu aolakela, Njuolʼinyo wuo wete, Joi lisongi lʼEsekyelo na, wae nkakela eʼolotsi nda Sabata, nkina nkakela eʼobe; mbaikya eʼonto, nkina mbaoma? 10Aolanzʼaiso nkʼelʼiyʼauma, nkako aokela bontʼoko, Sembya likata like. Aokela ngoko, ko likata likae joika ci. 11Lolo iyo baokaka la nkele ngole tsa, ko baoluwana wae joi liʼiyʼokela la Yesu na.
Esonelo lʼetelo ea ba-jom lʼafe
(Mt 10.1-4; Mk 3.13-19)
12Ndʼembilʼeko aocwa nda ngongo wae aonde. Ko botsʼoumaka aondaki Nzakomba mbaonda. 13Ko aki nkesa okite, aoleta bakimiʼakae, ko limʼelʼiyo aosona jom lʼafe, bakiʼndʼotangaka bikima, wete; 14Simona, okiʼndʼilaka nkombo Petelo, la Andelo oki la Petelo isʼemoko, la Yakobo la Yoane, la Filipo la Balutolomayo, 15la Matayo la Toma, la Yakobo bonʼowa Alafayo, la Simona otangema owa Zelote, 16la Yuda bokune owa Yakobo, ko la Yudasa bosi Keliota, ondoangelakʼende.
Yesu alaka ko aikya banto lima nkangi
(Mt 4.23-25)
17Nkako aokitela lʼiyo, ko aosilama ndʼitenela ya lambe. Ko bouke wʼakimiʼakae, ko lʼetukuluku mongo eʼanto lima Yudea euma, la Yelusalema la bokili wa Tula la Sidona; bantʼako bayaki wae boke lilako likae, ko baikyame lima nkangi ikiyo. 18Ko iyʼatumolamaki lʼelimo bia linyamo baoikyama. 19Ko banto ba linyenga basaki lofomwʼende, la ncina wete mpamba olaki limʼelʼende, ko eolaikya nkʼiyʼauma.
Lilako ja Yesu nda ngongo
(Mt 5.1-12)
20Nkako aosangyʼaiso ele bakimiʼakae, ko aokela,
Inyo beola, lokemʼekemo, ele likulaka ja Nzakomba lile likinyo.
21Inyo bandoka nzala aeyoko, lokemʼekemo, elʼinyo lifokinda mbimbi.
Inyʼalela o ndalela aeyoko, lokemʼekemo, elʼinyo lifoseka tola.
22Inyo lokemʼekemo ae banto oinʼinyo jino, ko batandolʼinyo, ko basaolʼinyo isaola, ko bafofya o la baina bakinyo nga baina bʼobe ndʼewelʼea Bonʼowʼonto. 23Losalangana nda mbilʼeko, ko lotatamba lʼesaza, ele ndako ekinyo elʼonene nda loola; ele baiseʼakiyo bakeelaki bateli nkʼelengʼeko.
24Lolo elo elʼinyo baaci, elʼinyo losilʼoata elombwelo ekinyo!
25Elo elʼinyo bakinda mbimbi aeyoko, elʼinyo lifoka nzala!
Elo elʼinyo baseka tola aeyoko! elʼinyo lifokesela la lokeseli ko la mpisali!
26Elo elʼinyo ae bantʼauma otefela baoyi ba losimo ndʼelokʼekinyo! ele baise bakiyo bakelaki ngoko la bateli ba bampulu.
Njooka baini eefe
(Mt 5.38-48; 7.12a)
27Lolo nsangelʼinyo bandoka o njooka, Loka bainiʼakinyo eefe, ko lokelʼolotsi ele bandinʼinyo jino. 28Losakelʼiyʼatolʼinyo bitoi bokako wa swa. Loondelʼanto banyokolʼinyo benyoko. 29Ele bonto okosakola lotaka nda litama line, wokengweele linkina; ko ngʼonto akokoela bonkoto wʼaliko, tofimakʼende simisi eke ngoko. 30Kaya wengiʼonto okolomba; ko ngʼonto akofonola toma toke tuolake wae akuteya toko. 31Ko elenge elangʼinyo wae banto bakeelʼinyo, lakeelʼiyo elengʼeko.
32Ayaka lokʼeefe ele banto bandokʼinyo eefe, losimo loatʼinyo la joi liko na? Ele bantʼobe, ngoko, balangʼanto bandalangʼiyo. 33Ko nga lokelʼolotsi elʼako kika bandokeelʼinyo bolotsi, elengʼeko eatelʼinyo losimo nko? Ele bantʼobe, o lʼiyo, bakela ngoko. 34Ko ayaka losombya nsombi elʼako balendeza inyo wae lifamba lenkina, elengʼeko eatelʼinvo losimo nko? O la bantʼobe basombya bantʼobe nsombi wae bambe lenkina ngokiʼyʼosombyaka. 35Lolo loka baini bakinyo eefe, ko lakeelʼiyo bolotsi, ko losombya nsombi efʼinyo olendeza yomba limʼelʼiyʼasombaki, ko ndako ekinyo ifoyala bonene, ko lifoyalema bana ba Oleki ndekola, elʼende eneya liota ele bantʼasamba boya ko lʼelʼantʼobe. 36Loyalemʼanto bʼisei, nkʼelengʼelʼIsʼekinyo owʼisei.
Njeeza ea baoyi bʼanto
(Mt 7.1-5)
37Talezake banto baoyi, ko inyo lofaezama baoyi, Talumbake banto likambo, ko lofaumbama bakambo. Lotungolʼanto, ko inyo lifotungwa. 38Lokaya ko ifokaema elʼinyo; bifokayʼinyo nda ntolo ikinyo jeza jʼolotsi, linyekama, lifukyama, ko lindutela. Ele jeza lindezʼinyo lifezama elʼinyo lenkina.
39Ko aolasangela esonganya: Bontʼoweiʼaiso akuseya olongya oweiʼaiso nda mboka nde? Iyʼakʼafe bafaokwa nda lifoku nde? 40Bokimi ntalekolaka bolaki okae, lolo wengiʼokimi olakema baoyiʼauma, ifoyalema ngole bolaki okae. 41Olenda ifufumbu ile nda liso ja lilongo like, lolo ofokotole wae botondo bole nda liso like mongo ngamo? 42Ko okuseya okeela lilongo like ngamo? Lilongo kela nkimole ifufumbu lima liso like, ko wʼofene botondo bole nda liso like mongo? We owʼokakatano mo! Oza joso botondo lima liso like, mpanga wene ci wae woza ifufumbu lima liso ja lilongo like.
Botamba la bamuka bʼoko
(Mt 7.16-20; 12.33-35)
43Botamba wʼolotsi ntabocweka bamuka bʼobe, ko botamba wʼobe ntabocweka bamuka bʼolotsi. 44Ele wengi botamba weana lʼamuka bʼoko mongo. Batamukaka bateli lima baeke, ko batamukaka mba lima lionje. 45Bontʼowʼolotsi ozaka baoyi bʼolotsi limʼako bafongama ndʼotemʼokae; ko bontʼowʼobe ozaka nkʼobe limʼobe bokande. Ele bomwa botefela lima bofula wʼaoyi bʼotema.
Okelo lʼekambelo
(Mt 7.24-27)
46Lontangʼemi Nkolo! Nkolo! lolo lofokele baoyi basangʼemi lae? 47Wengi bonto oyakʼelʼemi, ko okozaka baoyiʼakami, ko akelakʼako, njifoleneya esonganya esongi lʼende; 48asongi lʼontʼotongʼilombe, ko ayocime la njindo mongo, ko ayotande jango ndʼekenje mongo; nkako eya mpela, ko ekunda ntando ndʼilombe iko, itakuseyʼofukyʼiko, elʼiko itongamaki bolotsi mongo. 49Lolo bonto ondoka, ko afokele, asongi lʼonto otongakʼilombe ndʼamoci, nko jango; ntando eokundʼiko, ko yokwa nkakoyoko, ko efitanelo eʼilombʼiko ekoleki mo!
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 6: LOL87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
