Yoane 6
6
Yesu aleya banto nkoto itano toma
(Mt 14.13-21; Mk 6.30-44; Lk 9.10-17)
1Limʼako Yesu aofenda lieke ja Ngalilaya, wae lieke ja Tibelia, 2ko etukuluku eʼanto eʼenene baolokima ndʼewelʼekiʼyʼenaka ntaza ikiʼndʼokelaka elʼiyʼandokaki nkangi. 3Ko Yesu aounda nda ngongo ko aokitʼase eko ende lʼakimiʼakae. 4Ko elambo ea Efendelo ea Ba-Yuda eotutama. 5Aki Yesu ounzakʼaisoʼakande aolena etukuluku eʼantʼauke baoya elʼende, aokela Filipo, Mpa tosombe mampa wae bane bale lima nko? 6Aokela ngone wae omeke, ekiʼnde mongo eaka joi liʼendʼokela. 7Filipo aoloamba, Mampa ya denalio benkamʼefe ifaokoka lʼiyo wae wengiʼonto ambʼisisi. 8Omo owʼakimi, Andelo, okosangi ise la Simona Petelo, aolokela, 9Bonoju alʼane ole la mampa itano ko la nse ife; lolo iko yokoka lʼantʼauke ngone ngamo? 10Yesu aokela, Lokelʼanto wae bakitase. Bailo bʼesobe bauke baki ndʼitenelʼiko. Ko baende baokitase, boanjiʼokiyo nga nkotʼitano. 11Yesu aokola mampa, aokanga lokango ko aokafelʼiyo bakokitase, o ngoko la nse iuke ngokʼiyʼolangaka. 12Akiʼyʼokindaka aokela bakimiʼakae, Lotakanya bitei biciki, nyango yomba ifofitana. 13Akiʼyʼo-leke, baotakanya bitei biko, ko baoyoza tofole jom la tofe la bitei bikociki lima mampa ikʼitano. 14Aki banto enaka lotaza lokiʼndʼokelaka, bakela, Nsosolo, one ale boteli oko osoya ndʼokili.
15Aki Yesu okotolaka wae baoyʼokandʼende wae boile roi, aokokwana ko aoluta lenkina nda ngongo nkʼende kika.
Yesu ayolande ndʼasi njafema
(Mt 14.22-33; Mk 6.45-52)
16Aki bokolo okite, bakimiʼakae baokitela nda lieke, 17ko baokondelʼa wato, ko baofenda lieke wae bacwe Kapalanauma. Wilima bokwa, ko Yesu atafoyʼelʼiyo. 18Ko lieke jofukyama la ncina wae bompompo wʼonene boyokumbe. 19Akiʼyʼoluka nkai kilométres nkina nsambo, baolena Yesu ayolande nda lieke ko aotutama la wato; ko baanga mbaanga; 20lolo ende aolakela, Ale nkʼemi, taloangake. 21Balangaki lokolʼende nda wato, ko nkakoyoko wato bokitʼokili bokiʼyʼocwaka.
Yesu ayolake ndʼewela ea mampa ea nsosolo
22Nda mbile ea lobi, etukuluku eʼanto baki wijʼa lieke baolena wae boki eko nko wato bomoko kika, ko Yesu ntakondelaki lʼakimi nda wato boko, lolo bakimi bacwaki nkʼiyo kika. 23Lolo biato bemo beoya lima Tibelia, ntutama lʼitenela ikiʼyʼoleka mampa; aki Nkolo osimaka Nzakomba boya; 24koko aki linyenga jʼanto ene wae Yesu lʼakimiʼakae ntabaki eko, iyo mongo baokondelʼa biato beko, ko baoya nda Kapalanauma, bayase Yesu.
25Akiʼyʼotanʼende wijʼa lieke, baolokela, Labi, oyaki ane ekeke ele nko? 26Yesu aolaamba, akela, Nsosolo, nsosolo, nsangelʼinyo londasa, afa ndʼewelʼekiʼnyʼenaka ntaza, lolo ekiʼnyʼoleke mampa, ko lokindaki mbimbi. 27Talokambake ndʼewelʼea toma tofitanaka; lolo lokambaka wae loate toma tosekwa elaka nko loiko ja seko: o toko toe Bona owʼonto okayʼinyo: ele Nzakomba Ise aoloakelʼende lotaza lokae. 28Baolokela, Joi li isʼokela wae tokambe belemo bia Nzakomba na? 29Yesu aolamba, aolakela, Bolemo wa Nzakomba wae bone, wete limezʼende okiʼndʼotomaka. 30Baolokela, Lotaza loe wʼokela, wae tene, ko timeza na? Bolemo bokamba we na? 31Baise bakiso baleki mana ndʼetekeleke; elenge ekotama joi, Aolakaya mampa lima loola wae bale. 32Yesu aolakela, Nsosolo, nsosolo, nsangelʼinyo, Mose ntakaakʼinyo mampa lima loola, lolonde Fafa ekami ayoka inyo mampa ea nsosolo lima loola. 33Ele mampa ea Nzakomba wete ende okitela lima loola, ko okaya Ba-bokili loiko. 34Baolokela, Nkolo, otokaya mampa ene wengiʼaefa.
35Yesu aolakela, Emi nde mampa ea loiko: endʼoyʼelʼemi, afaoka nzala nye, ko onjimezʼemi afaoka mposa nye. 36Lolo nsangelʼinyo, wete lonjenaki lolo lofimeza nye. 37Bakʼauma baki Fafa onkaaka bifoyʼelʼemi, ko osʼoyʼelʼemi, mpaitanya nye. 38Elʼemi njokitela lima loola, afa wae nkele wangoʼokami mongo, lolo wangoʼokande ontomaki. 39Koko bone wae wangoʼokande ontomaki, wete mpocweyʼomoko owa bakʼauma bakiʼndʼonkaaka, lolo mbetole bauma nda mbile ea nsukela. 40Ko bone wae wango wa Fafa ekami wete wengiʼonto oteemeza Bona, ko ondoimezʼende aate loiko ja seko; ko njifoetolʼe-nde nda mbile ea nsukela.
41Nkako Ba-Yuda baomemesana ndʼewelʼekande, ekiʼndʼokelaka, Emi wae mampa ekitelaki lima loola. 42Iyo baokela, One afa Yesu, bona owa Yosefa? Tea ise la nyango ekae; lʼaeyoko endʼakela, Nkitelaki lima loola, ngamo? 43Yesu aolaamba, aolakela, Talomemesanake elʼinyo mongo. 44Nkʼonto okuseya loya elʼemi imola nko Fafa ontomaki aolobela, ko njifoetolʼende nda mbile ea nsukela. 45Joi jokotama ndʼenkanda bia bateli, Iyʼauma bifolakema la Nzakomba. Wengiʼonto ondokaki Fafa, ko ende ondekela lʼende, aoyʼelʼemi. 46Afa wae bontʼomo aolena Fafa, imola nkʼende ole limʼele Nzakomba; ende aolena Fafa. 47Nsosolo, nsosolo, nsangelʼinyo, endʼondimeza aoata loiko ja seko. 48Emi nde mampa ea loiko. 49Baiseʼakinyo baleki mana ndʼetekeleke, ko bawaki. 50Ene wae mampa ekitela lima loola, ncina wae bonto ale mampa eko ndala ko afaowa. 51Emi nde mampaeyoike, ekitelaki lima loola; ayaka bonto nko loswele ala mampʼene ifoika seko; koko mampa e emʼokaya ele wae wunyu bokami, bokaema ndʼeloko ea loiko jʼanto bʼokili.
52Ndʼewelʼeko, Ba-Yuda baolikyana bikoji, baokela, One akuseya lotokaya wunyuʼokande wae tole ngamo? 53Yesu aolakela, Nsosolo, nsosolo, nsangelʼinyo, Ayakʼinyo lofole wunyu wa Bona owʼonto, ko lofomele balongoʼakae, lofa la loiko elʼinyo mongo. 54Osʼola wunyuʼokami ko amela balongoʼakami, aata loiko ja seko; ko njifoetolʼende nda mbile ea nsukela. 55Ele wunyuʼokami bole toma ta ndala ta nsosolo, ko balongoʼakami bale emeelo ea nsosolo. 56Endʼola wunyuʼokami, ko amela balongoʼakami ayalʼelʼemi, ko emi njalʼelʼende. 57Elenge eika Fafa ontomaki, ko emi mbika ndʼewela ea Fafa, o ngoko bonto ondʼemi ndala, ifoika ndʼewela ekami. 58Ene ele mampa ekitelaki lima loola, afa ngoki baisʼakinyo oleke mana, ko bawaki; osʼola mampʼene ifoika seko. 59Atefelaki baoyiʼane nda sunangonga, alakʼende nda Kapalanauma.
Bakimi ba Yesu baokakaana
60Aki bouke wʼakimiʼakae okaka baoyiʼako, baokela, Joi line wae bolo mo! Okuseya lokoza liko na? 61Lolo Yesu aokotola ndʼotemaʼokae wae bakimiʼakae baomemesana ndʼewela ea joi liko, ko aolakela, Kamba joi line joku-numwezʼinyo? 62Ayaka lena Bona owʼonto ayulela wiji bokiʼnde joso mo? 63Bo-limo akaaka loiko, wunyu bofa Poke to; baoyi bakiʼmʼosangelakʼinyo bale bolimo ko bale loiko. 64Lolo bamʼakinyo bafimeza. Eki Yesu eaka limʼiango bantʼako bafimeza, ko la bonto ocwʼoangelʼende. 65Ko aokela, La ncinʼeko, nsangelakʼinyo wae nkʼonto okuseya loya elʼemi imola nkʼende oki Fafa okaaka eyelo.
Bakimi ba Yesu bafotamelʼende mpeka la bankina baolosundola
66Limʼekekʼeko, bouke wʼakimiʼakande baolututa, ko ntabutʼokenda lʼende bolongo. 67Nkako Yesu aokela ba-jom lʼafe, Lʼinyo ngoko, lolanga limane? 68Simona Petelo aoloamba, akela, Nkolo, tocwʼele na? We ole la baoyi ba loiko ja seko; 69ko tosilʼoimeza, ko tolea fombo, wae we ole owʼoeko owa Nzakomba. 70Yesu aolaamba, Ncisonakʼinyo ba-jom lʼafe nde? Lolo omo okinyo ale owa Satana. 71Aotefela la ncina ea Yudasa bona owa Simona, bosi Keliota, elʼende wae osʼocwʼangela Yesu, ko aki omo owa ba-jom lʼafe.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yoane 6: LOL87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
