Yoane 1
1
Yesu Nkolo limʼiango
1Joi liki ndʼiango, ko Joi liki la Nzakomba, ko Joi liki Nzakomba. 2Ende aki la Nzakomba ndʼiango; 3wengi yomba yemamaki lʼende, ko lakʼende, nkʼolemʼomoko wemamaki. 4Loiko loki elʼende ko loiko loki fole eʼanto; 5fole eyongese nda wilima, ko wilima ntabolongʼeko.
6Bontʼomo oki la lina Yoane, atomamaki limʼele Nzakomba. 7Ayaki ngole bosangi wae asange nsango ea fole, ncina wae bantʼauma bimeza lʼende. 8Ende ntaki fole eko, lolo ayaki losanga nsango ea fole.
9Fole ea nsosolo eki eko efolaza wengiʼonto, eko eoya ndʼokili, 10Endʼaki ndʼokili, ko bokili bolemama lʼende, lolo ba-bokili ntaboea. 11Ayaki ndʼokiliʼokae mongo, ko bakande ntaboamba. 12Lolo elʼiyʼandoambaki, aolakaya mpifo wae bayaleme bana ba Nzakomba wae iyʼandimeza nda lina likae. 13Iyo baotswaki, afa lʼalongo, afa la wango wa jonge, ko afa la wango wʼonto, lolo baotswaki limʼele Nzakomba.
14Ko Joi joyalema jonge, ko likokitase lʼiso, ko iso tenaki jilangi likae, wae jilangi nga liko ja bona owa likinda owʼIse, ko aokama lʼoya ko la nsosolo. 15Yoane aosanga nsango ndʼeloko ekande, ko aosangya lofoso, akela, One alʼende okiʼmʼosangelakʼinyo, Oso oyandʼafekaʼakami, aoyala nda joso likami, ekiʼnde eko nda joso likami. 16Isʼauma tosilʼamba lima bofulaʼokae, wete boya bokokyama ndʼoya, 17ele Esekyelo ekaemaki la Mose, lolo boya la nsosolo bayaki la Yesu Masiya. 18Nkʼonto ondenaki Nzakomba ekekʼemo nye; lolo Bona owa likinda, ole nda ntolo ea Ise, ende aoleanya Nzakomba.
Temoignage ea Yoane-Wini ele Yesu
(Mt 3.1-12; Mk 1.1-8; Lk 3.1-18)
19Ene wae nsango eki Yoane osangaka. Aki Ba-Yuda lima Yelusalema otomelakʼende nkanga la Ba-Lewi wae bouole, We ole na? 20Aolimeza, ko ntangana nye, lolo aolimeza, Emi mpa Masiya. 21Ko baolouola, Nkina ngoko, ole na? Wʼole Eliya? Aokela, Mpʼende. Wʼole boteli oko? Aolamba o nye. 22Baolokela, Wʼole na? wae tokaoza iyʼatotomaki. Joi litefela we ndʼeloko eke na? 23Akela, Emi nde lolaka jʼontʼomo obeleza ndʼetekeleke, Locilaza mboka ea Nkolo ci, ngoki Yesaya boteli otelaka.
24Iyʼatomamaki elʼende baki limʼele Bafalusi 25ko iyo baolouola, Nkina ofa Masiya, ko ofa Eliya, ko ofa boteli oko, oyinʼanto lae? 26Yoane aolaamba, akela, Emi njinʼanto ndʼasi, omo ayemale ndʼetei ekinyo, ofʼinyʼea, 27wae ende ondielʼemi, ofʼemʼeji lotungola bekulu bia sandale ekae. 28Baoyiʼane bakela-maki nda Betania, wijʼa Yoladane, endina Yoane banto.
Bona owa Mpate owa Nzakomba
29Nda mbile ea lobi, aolena Yesu aoyʼelʼende, ko akela, Bala, Bonʼowa mpate owa Nzakomba oyimole bobe wʼokili! 30One wae endʼokiʼmʼosangaka, Ndʼafekaʼakami, bonto aoya oyalemaki nda joso likami, ekiʼnde nda joso likami. 31Ko emi ncoea, lolo njoyʼinʼanto ndʼasi wae ende enya ele Yisalaele. 32Yoane aosanga, akela, Njenaki Bolimo ayokitele, ngolʼembenga, lima loola, ko aokotamʼelʼende nkotama. 33Ko emi ncoea; lolo endʼontomaki wae njinʼanto ndʼasi, aonkela, Ende oe wena Bolimo ayokitele ko asilamʼelʼende, wetʼende ondinʼanto ndʼolimo wʼoeko. 34Nsolena ko nsosanga nsango wae one ale Bonʼowa Nzakomba.
Bakimi ba Yoane la Yesu
35Lenkina, nda mbile ea lobi, Yoane akemi, lʼakimiʼakae bafe, 36ayolende Yesu alandʼende, ko aokela, Bala, Bonʼowa mpate owa Nzakomba. 37Ko bakimiʼakae bafe baoloka atefelʼende, ko baokima Yesu. 38Ko Yesu aokengwana, ko aolaena bayokimʼende, ko aolakela, Ondasʼinyo na? Iyo baolokela, Labi, wae Bolaki, okitase nko? 39Endʼaolakela, Loyaka, lene. Ko iyo baocwa, ko baolena boyalo bokiʼnde, ko baokitase lʼende mbilʼeko: eki nkina jefinei. 40Andelo okosangi ise la Simona Petelo, aki omo owa bakʼafe bandokaki Yoane ko bakimaki Yesu. 41Nda joso aotana Simona osangi lʼende, ko aolokela, Tolena Masiya; wae Kilisto. 42Ko aoloyelʼele Yesu. Ko Yesu aoloteemeza, ko akela, We ole Simona, bonʼowa Yoane: wifotangema Kefa, wae Petelo.
43Nda mbile ea lobi Yesu alangaki lokenda nda Ngalilaya, ko aotana Filipo, ko Yesu aolokela, Yonkime. 44Filipo aki bosi Betesaida, bonanga wa Andelo la Petelo. 45Filipo aotana Nata-naele, ko aolokela, Totanʼendʼoki Mose okotaka ndʼEsekyelo, ko oki bateli otelaka, wae Yesu owa Nazaleta, bonʼowa Yosefa. 46Koko Natanaele aolokela, La joi jʼolotsi joya lima Nazaleta nde? Filipo aolokela, Yaka, yene. 47Yesu aolena Natanaele ayoyʼelʼende, ko akela, Bala Bo-Yisalaele owa nsosolo, ofa la jongo nye. 48Natanaele aolokela, Onjea emi lima nko? Yesu aolamba aolokela, Atafa Filipo oketa, aki we ndʼase ba botamba wa boteli, nkenaki. 49Natanaele aoloamba, Labi, We ole Bonʼowa Nzakomba, Roi ea Yisalaele. 50Yesu aolamba, aolokela, Wimeza nde ndʼewelʼekiʼmʼokosangelaka, Nkenaki ndʼase bʼotamba wa boteli? Wifena baoyi balekola bane. 51Koko aolokela, Nsosolo, nsosolo, ndosangelʼinyo, lifena loola lokombwa, ko bikima bia Nzakomba bayounde ko bayokitele nda Bonʼowʼonto.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yoane 1: LOL87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
