Toango 8
8
Ekaselo ea mpela, ko olelo lima basua
1Nkako Nzakomba aolofwa Noa, ko la nyama iuma yʼokonda la nyama iuma ya mbongola iki lʼende ndʼasua. Ko Nzakomba aolekya bompompo ndʼokili, ko basi baokokwa. 2Ko bitoko bia njindo, ko la bikuke bia loola biokombama, ko mbula lima loola eosukama. 3Ko basi baolututa ndʼokili. Aki bembile bonkama la ntuku itano osilaka basi baokokwa. 4Ko nda nsanza ea nsambo, nda mbile ea jom la nsambo ea nsanza eko basua baokakema nda ngongo ea Alalata. 5Ko basi baokongʼokasa elaka nko nsanza ea jom. Nda nsanza ea jom, nda mbile ea joso ea nsanza eko, nsonge ea ngongo yolenya. 6Ko aki bembile ntukʼinei olekaka, Noa aokombola fenêtre ekiʼndʼokelaka nda basua. 7Ko aoloza wanganga, ko boko bolete ta, bocwa ko boluta elaka nko basi baokasa ndʼokili. 8Nkako aoloza empompo wae ene nkina basi baokokwa limʼokili. 9Lolo empompo ntetana emaelo eʼakaka, ko eolutʼelʼende nda basua, ele basi baki eko ndʼokili bouma. Ko aoloza likata, aokolʼempompo, ko aoluteya eko nda basua elʼende. 10Ko aolendeza bemo bembile nsambo, nkako aosokola lenkina empompo lima basua; 11ko empompo eolutʼelʼende lʼokolo, ko bala lokasa jʼaeyoko jʼolaya lokiʼndʼomukaka, loki ndʼomwa bokae. La joi liko Noa aolea wae basi baokasa ndʼokili. 12Ko aolendeza lenkina bembile nsambo, nkako aokenza empompo eko, ko ntutʼelʼende lenkina nye.
13Aki Noa okitaka mbula benkamʼotoa lʼemoko, nda nsanza ea joso, ko nda mbile ea joso ea nsanza, basi baokasa ndʼokili. Ko Noa aolimola ekukelo ea basua, aoala, ko aolena wae bokili bokasa. 14Nda nsanza eʼife, nda mbile ea ntukʼife la nsambo ea nsanza eko, bokili bokasa kasu. 15Ko Nzakomba aotefela la Noa, akela, 16“Ola lima basua, we la waji oke, la banaʼake, la baaji ba banaʼake. 17Oza bayoike bauma la we bolongo, la tofulu la nyama ya mbongola, la wengi nyama la towawa bandakula ndʼamoci, wae baotʼauke ndʼokili, ko bafunzole ko bafule.” 18Ko Noa aolola, ende lʼana bakande, la waji okae, labaaji ba banaʼakande: 19la wengi nyama la towawa bandakula ndʼamoci, la wengi tofulu, ko la wengi bayokende ndʼokili, la bilenge bikiyo, baolola limʼasua.
20Ko Noa aotongela Yawe nkinda ea mbeka; ko aokola lima wengi nyama ya feto, ko lima tofulu ta feto, ko aolekyʼiko mbeka ea ntatumba nda nkinda ea mbeka. 21Ko aki Yawe ombelaka mpimbo eʼolotsi ea mbeka, Yawe aokela ndʼotema bokande; “Mpaamba lenkina bokili la wambo wa tu la ncina eʼanto nye; mpeka fa lokai jʼotema wʼonto lole ndʼobe limʼonolu bokande mongo; mpautʼooma bayoike bauma ngokiʼmʼokelaka nye. 22Ayala bokili, ekeke ea njoona lʼea emukelo, ekeke ea mpio lʼea angala, ekeke ea ete lʼea hiver, ko la mbile lʼotso, bafaambya nye.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Toango 8: LOL87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987