Luka 22
22
1Lilia lyobukima li ta li namamera lya langwa Lipasaka, lya li himbi. 2Kandi avasalisi vanene navang'odi venya inzira yokumwiita; kigira va tia avandu. 3Kandi Setani yingira Yuda wa langwa Iskarioti, mulala ku va li likumi na vaviri. 4Kandi ya twula na a tsia kuvolerana navasalisi vanene navanyampara, kuli wa a nyala kumuzama kuvo. 5Navo va yanza, ni va lagana naye kumuha ifetha. 6Kandi ya bugirira, ni yenya ubwiyangu bwokumuzama kuvo bugira kiduma ho.
7Lidiku lyobukima bu ta li namamera lya duka, kulyo bwa li bulahi kwiita ligondi lyelipasaka. 8Ya tuma Petro na Yohana, na a vola, Mu tsie, mu ku lombere lipasaka, ku lie. 9Kandi va mu volera Wenya ku ku lombere ha li ha? 10Naye ya va volera, Henza, lwa na mwingire mu lidala mu la vugana nomundu na a gingi isiongo yamadzi; mu mu londe mu inyumba ya na yingire mu. 11Kandi mu la volera mwene inyumba, Mwegidzi a ku volera, Inyumba yavageni i veye ha li ha, ya ndi liira mu lipasaka navegidzwi vange? 12Naye a la mu mannya inyumba inene yigulu i lombeywi: mu lombe yimu. 13Kandi va tsia, ni va nyola kuli wa ya va volera: ni va lombera mu lipasaka.
14Isaa lwa ya duka, yikala, navatumwa halala naye. 15Kandi ya va volera, Likayirwa nkayirwa kulia lipasaka yili halala nemwinye ni nkikiri kusaliridzwa: 16kigira mmu volera, Si nda li lia kandi, li luhe li duke kukolwa mu bwami bwa Nyasaye. 17Kandi ya vugula kikombe, na lwa ya mala kusantidza, ya vola, Mu vugule yiki, mu gavulane: 18kigira mmu volera, Inze si nda nwa kandi amakuyu gemizabibu, bu luhe budze ubwami bwa Nyasaye. 19Kandi ya vugula ubukima, na lwa ya mala kusantidza, ya megannya na a va ha, na a vola, Yibu nu mubiri gwange gu haanwa kigira mwinye: mu kole yiki kunzidzulitsa. 20Kandi ndiyo kikombe inyima yokumala lilia, na a vola, Kikombe yiki ki veye amalagano amahya agoku masahi gange, aga sundulwa kigira mwinye. 21Navutswa henza, mukono gwoyu u nzama gu veye ninze halala ku imeza. 22Kigira Mwana wa Adamu a tsia ligali kuli u saaveywi: navutswa bayaye bu veye ku mundu uyu u li mu zama 23Ni va tanga kutevana avene, ni bwaha kuvo u li kola kindu yiki.
24Ga duka amahangali kuvo, u li ha kuvo u langwa munerle. 25Naye ya va volera, Avami ve Tsihiri vamiha kuvo: kandi ava veye netsingulu kuvo va langwa Avavakolerabulahi. 26Navutswa mwinye mu ta va ndiyo: navutswa uyu u veye munene ku mwinye, a gwe kuli mukekeke; noyu wamiha a ve kuli u tumika. 27Kigira u veye munene nu u li ha, wikaye ku vyokulia, naho u tumika? Si a li uyu wikaye ku vyokulia? Navutswa inze mbeye hagati henyu kuli u tumika. 28Navutswa mwinye nivo ava hongera ninze nuligeridzwalyange; 29kandi inze mmu vikira ubwami kuli Dada ya mbikira ubwami, 30mu duke kulia nokunwa ku imeza yange mu bwami bwange; kandi mu likala ku visako vyobwami mu kalagira tsihiri likumi na tsiviri tsya Israeli.
31Simoni, Simoni, henza, Setani ya mwenya, a duke kumusesa kuli ingano: 32navutswa inze mmali kukusaalira, lisuuvira lilyo li ta geha; kandi ive lwa u li mala kwirana, u luviridze avamwavo vovo. 33Naye ya mu volera Mwami, nzetegeki kutsia halala nive mu libofwa kandi mu likudza.
34Naye ya vola, Nku volera, Petro, lero idaywa si i la lagula ive u luhe u duke kunyambakana hali kavaka, si u mmanya.
35Kandi ya va volera, Lwa nda mu tuma kutsia bugira isyaho nemuya, nevilatu, mwa daka kindu? Navo va mu volera, Auwa. 36Kandi ya va volera, Navutswa kalunu u veye nemuya a vugule, kandi isyaho ndiyo; no u ta veye nakyo, a gamannye ingubo yeye a gule kivavi. 37Kigira mmu volera, Yago aga ng'odwa, ga niga ga dukidzwe ku inze, Naye ya validzwa halala navoni: kigira aga veye ku inze ga veye neliduka. 38Navo va mu volera, Mwami, henza, hano vivavi viviri. Naye ya va volera, Vi duki.
39Kandi ya twula na a tsia mu kigulu kya Mizeituni, kuli miima gyigye; navegidzwi veve va mu londa. 40Lwa ya duka ha zana, ya va volera, Mu saale mu tingira mu ligeridzwa. 41Mwene yavukana navo kuli ha u nyala kulasa ligina; na a sigama na a aala, 42na a vola, Dada, Ive nu u lalira, u ntwulidzire kikombe yiki: navutswa ga ta va kuli ubulaliri bwange, navutswa ga ve kuli ubulaliri bubwo. 43Kandi ya loleka kuye ingelosi ya twula migulu, ya mu ha tsingulu. 44Naye ya li mu busa liri, na a kira kusaala ligali; kandi ulugeri lwilwe lwa gwa kuli lito nyatonya linene lyamasahi li tonya hasi. 45Kandi lwa ya singira kutwula ku lisaala lilye, yadza ku vegidzwi veve, na a va nyola va gona tsindolo kigira ubuvereri, 46na a va volera, Kigira ki mu gona tsindolo? Vuki mu saale mu tingira mu ligeridzwa.
47Na a ki vola, henza, kiduma, kandi uyu wa langwa Yuda, mulala ku va li likumi na vaviri, ya vimirira; kandi yisunda himbi ku Yesu kumubusa. 48Navutswa Yesu ya mu volera, Yuda, U zama Mwana wa Adamu nelibusa? 49Navo ava li halala naye, lwa va lola agandi genya kulonda va vola, Mwami ku teme nekivavi? 50Kandi muiala kuvo ya tema mutugwa womusalisi munene na a mu kala gutu gu veye ku luvega lwomukono mulungi. 51Navutswa Yesu ya tivula na a vola, Mu va leke va duke ndi. Kandi ya mu dira gutu gwigwe, na a mu honnya. 52Kandi Yesu ya volera avasalisi vanene, navanyampara velitempeli, navakulundu, ava mu twulira, Mu twula nevivavi netsimpimbo kuli mu twulira mwivi? 53Lwa nda li halala nemwinye kazozo mu litempeli, si mwa nyira amakono genyu kungumira: navutswa yiyi ni isaa yenyu, neyetsingulu tsyekisundi.
54Navo va mu gumira, ni va mwimirira, ni va mu leta mu inyumba yomusalisi munene. Navutswa Petro ya londerera ihale. 55Lwa va mala kufwana muliru hamgidzi hagati, ni vikala halala, Petro yikala hagati havo. 56Mukana mulala mutu gwa, ya mu lola ni yikaye ha bulavu bwomuliru na a mwumika, na a vola Mundu uyu kandi ya li halala naye. 57Navutswa yambakana, na a vola, Mukali, si mmu manya mba. 58Inyima hakekeke, wundi ya mu lola, na a vola, Ive kandi u veye mulala kuvo. Navutswa Petro ya vola, Mundu ive, si mbeye ku mba. 59Kandi inyima yesaa indala wundi ya vola nobuluviriri, na a vola, Ligali mundu uyu ya li halala naye; kigira a veye Mugalilaya. 60Navutswa Petro ya vola, Mundu ive, Si mmanya ga u vola. Nonoho na a ki vola, idaywa ya lagula. 61Kandi Mwa mi yekevuka, na a henza Petro. Na Petro yidzulitsa likuva lyo Mwami kuli wa ya mu volera, Lero idaywa ni i kikiri kulagula u la nyambakana hali kavaka. 62Ya twula na a lira nobuvereri bunene.
63Kandi avandu ava gumira Yesu va mu kolera kihenyahenye, ni va mu duya. 64Kandi va mu fuma tsimoni tsitsye ni va mu teva, ni va vola, Profeta: ibwaha u ku duya? 65Kandi va vola kuye amakuva gandi manyingi gokumunyega.
66Lwa bwa kya nonoho kiduma kyavakulundu vavandu kya vugana, avasalisi vanene navang'odi vombi; ni va mu hila kutsia mu kiyalo kyavo, ni va vola, 67Ive nu u va nu u veye Kristo, u ku volere. Navutswa ya va volera, Kali ni mmu volera, si mu li suuvira: 68kandi ni mmu teva, si mu li tivula. 69Navutswa kutwula kalunu Mwana wa Adamu a likalidzwa ku mukono mulungi gwetsingulu tsya Nyasaye. 70Kandi vosi va vola, Ive niye Mwana wa Nyasaye? Ya va volera, Mwinye mu vola inze niye. 71Navo va vola, Ku daka ki kandi kyokulolekidza? Kigira kwinye avene ku mali kuhulira ku munwa gwigwe.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 22: MBE
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 1967
