LUKA 9
9
1Kïkur Yeso kinetankachi chay le taman nko odeny akutö owesyö nko wowïn paraku oy akusop sömewut. 2Atolapay kïyonta chane kwamta Pöyunöto Tororöt akusop cho chirsot. 3#Luk 10:4-11; Ist 13:51. Kïmwochï chane lö, “Mop kïgh nyonikïny ompö pantangwo, kö lïkïp anta mïloto okörö, anta omisyö anta ropïyen anta koti nyo pö odeny. 4Ompurökwa kö anka tïkwïl nyo kakïtakenakwa ntökïtenö angetenakwa wöloni 5akï wop anka tïkwïl nyo matekekwanye pich angeta wöloni akwotini opetöy aparta terïtyon nyo mi kelyekwa, lïku nyoni rirunat ompö chane.”
6Kïpa kinetankachi kïlïtöy kanastin löwïr akwomtoy Lökoy cho Karamach akusop pich ompö wop anka tïkwïl.
Kawanga Erode
(Mat 14:1-12; Mrk 6:14-29)
7 #
Mat 16:14; Mrk 8:28; Luk 9:19. Kïkany kïlïm Erode kirwokinto Kalilaya löwïr tïkwïl cho kigh Yeso kïwanga, ompöwölo kilentöy pikö walaka, kikututï Yoana Kipatisanintö. 8Kïlö walaka kikuchumï Eliya, kïlentöy walaka ketutunö pich cho kimeghö werkoyonto könyisyok. 9Kïlö Erode, “Nkolentan kyasilan Yoana möt, kï ngo nyu nyï kalïman ngal cho pö kwongut?” Kïyar or nyo tuyegho nyinte.
Kapagh Yeso söpïch nyo wow
(Mat 14:13-21; Mrk 6:30-44; Yna 6:1-14)
10Kïmïlisyö kiyoktoghï wölo mi Yeso akïmwochï tïkwïn tïkwïl cho kigh chane. Kumït Yeso chane opïn kutang kanasyan nyo kïkuro Petsayda. 11Kikany kïlïm söpïchischay wölo kitany Yeso, kïrïp kïpa nyinte. Kïtak Yeso chane akïngölonchï ngala Pöyunöto Tororöt akusop pich cho kimököy kisopöt.
12Kïkany kwimön kïpa pïchay le taman nko odeny wölo mi Yeso akïlenchï, “Mwochinö pïchï kipechï kegh, kïpa kutang keston nko paren cho lekïtöch atökïnyorï omisyö nko wölo rusot, ompöwölo siriron wölete.”
13Wölo kïlenchï Yeso chane, “Otönö akwane chane omisyö kwam.”
Kuyokyï chane lö, “Kïtïngetecha makatin mut nko kaghagh odeny kïpoto! Eso nyu ato kïpecha kyolchï söpïchete kïmïkul omisyö!” 14(Kingata söpïchoni kimi atoni, mïrön 5,000.)
Kïlenyona, kïlenchï Yeso kinetankachi, “Omwochinö pikö kumpur ngwïny ompö söpïchis cho pö tömönut mut.”
15Kwigh kinetankachi lenyoni, kumpur pïchay ngwïny löwïr, 16Kïcheng Yeso makatinechay le mut nko kaghaghechay le odeny akïtopön yïm, akusoyön, akïmïnchïran akutö kinetankachi kuporchï pïchoni. 17Kyomisyö pïchay tö kïpïghyö löwïr. Kïkwagh kinetankachi rarakan kïnyïghï köröpon taman nko odeny cho le ngötunön.
Kamwa Petro lö, Yeso kï Kristo*
(Mat 16:13-19; Mrk 8:27-29)
18Kimito asistanka Yeso kïsoghöy onkït, akimi kinetankachi ato lekït. Kïtep Yeso chane, “Lentöy pich ochan ngo?”
19 #
Mat 14:1-2; Mrk 6:14-15; Luk 9:7. Kuyokyï chane lö, “Lentöy cho chang Yoana Kipatisanin, kïlö walaka Eliya, kïlö walaka ketutï akong ompö werkoyi könyisyok.”
20 #
Yna 6:68-69. Wölo kïtep Yeso chane lö, “Acho le akwa, olentekwa ochan ngo?”
Kuyokyï Petro lö, “Ichinyi Kristo nyo pö Tororöt.”
Ngölono Yeso kiwongunötenyi nko meghenyi
(Mat 16:20-28; Mrk 8:30–9:1)
21Kïtagha Yeso chane nyoman lö, “Motöp ntomwochï chi ngölyontononi.”
22Kïmwochï chane ngat lö, “Mïchini Kuwongu Wero Chi nyoman, töghöy nyinte poyï nko tïsï cho echön nko koneti kirurut. Kïpöröy nyinte kïma, akwompö asispa sömök ketutunö wölo mi pich cho kimeghö.”
23 #
Mat 10:38; Luk 14:27. Atolapay kïlenchï nyinte chane löwïr, “Ato mököy chi kïrïpanïn, kïmïchini kïwutyeghö kegh akïkasan kimurtöwontenyi osis löwïr akïrïpanïn. 24#Luk 17:33; Mat 10:39; Luk 17:33; Yna 12:25. Ompöwölo chi anka tïkwïl nyo mököy kïsöru söpontanyi kwighöy kupötöy. Wölo anka tïkwïl nyo wirtoy söpontanyi akwompö ani, kïsöru. 25Ompöwölo tösini ne chi ato nyorï ngwïny kïmïkul akupot söpontanyi? Möminye kïgh nyonikïny! 26Ompöwölo anka tïkwïl nyo lolïyonöy ompö ani nko ngalechan ompö tawu pich, kïlolïyonchini tïkwïl Wero Chi, nyinte ato ngwïn ompö ororyenyi nko ororyeto Kwanta nko malayken cho tïlilöch. 27Omwowokwa nyoman lö, mi pich yeteyi cho mömeghsotcha ntökïtenö kïsïwa Pöyunöto Tororöt.”
Kewenga Yeso
(Mat 17:1-8; Mrk 9:2-8)
28 #
2Pt 1:17-18. Kikany kuwonyö osiswö cho ngata mut nko sömök, kïngeta Yeso kïmwagha ngalechoni, kumït Petro nko Yoana nko Yakopo kïpa kïpus kutïng atökïsagh. 29Akwotini kitökïsoghöy, kuwenga tokochunyi kïsisit, akïrelachitu akukwerkwerisyö sïrokachi lö, pöt. 30Kïnyini lawel kïngalan pich odeny nko nyinte, choni kï Musa nko Eliya, 31cho kichumï ompö ororyö akïngalan nko Yeso ngal cho kiporu wölo kimeghtoy nyinte ompö Yerusalem, kïrïp kegh nko tötut pö Tororöt. 32Kimi Petro ompö rïwön kwen, wölo kikany kïngetyö, kïsïwa ororyo Yeso nko pïchay le odeny kighyongo kamasunyi. 33Kïkany otini kipïstoy pïchay Yeso, kïlenchï Petro Yeso, “Echotyon, pïchigh tya kemitenöcha yeteyi, nya ketekacha yete tunkun sömök, lïku nyengu akong, kïpöyit anka Musa, kïpöyit anka Eliya.” (Akimenkïtnye kini kimwoghöy.)
34Akwotini kitökïngölonöy Petro, kuchumï polta nyo kilum chane. Kimïghyö kinetanchay otini kilum chane poltononi. 35#Isa 42:1; Mat 3:17; 12:18; Mrk 1:11; Luk 3:22. Kïlö kut ompö poltonay, “Werïnyan nyï nyo kyakïlan, alïm ngalechi.”
36Kïkany kutinay kingölonöy, kïmökïsïwacha chi kïpoto Yeso. Kimöngalanacha kinetanchay pö Yeso choni kighisyö akimömwochïcha chi anka tïkwïl choni kisïwa osiswechoni.
Sopöy Yeso karöchïnin nyo kipote oy
(Mat 17:14-18; Mrk 9:14-27)
37Ato mi ato le asïyech, kïrökunö Yeso nko kinetankachi chay le sömök kutïngay. Kuryam nko söpïch nyo wow. 38Kutegha chi söpïchnoni nyo kilö, “Konetin, osoghinyi lö roswante werïnyu, ompöwölo montönyan nyete onkït. 39Nömöy mïkulögh nyo gha nyo ighöy nyinte kuta akïnyini kïwirta kupelpel ngwïny ntökungwïna tankararyanta kut, chopöy nyinte kong amöngetonye lawel. 40Olan orirchï kinetanköku lö tökutul, kïmökumïcha.”
41Kuyokyï Yeso chane lö, “Ochech pïnï masteghate mötïng kighanat. Otöponan amïkukön nko akwa nko oyï?” Atolapay kïlenchï chichay, “Mïtune werïngu yi.” 42Akwotini kitökungwïnöy monïngay kïwirchï oyichay nyinte ngwïny. Kuteghchï Yeso oyichay akusop monïngay akuyokyï kwanta. 43Kitongönchï pïchay löwïr wölo tenö owesyo Tororöt.
Ngölono Yeso meghenyi ngat
(Mat 17:22-23; Mrk 9:30-32)
Otini kitökïmi pich kïtöngönchini tïkwïn cho kigh Yeso, kilenchï Yeso kinetankachi, 44“Akapa yitikwo ater ngalechï ompöwölo kitöni Wero Chi mori pich.” 45Wölo kimöpköchïnye mwaghatanoni, kiwïnga ompö chane ntömökïsöwïcha, kuwagh kïtep Yeso kimi kimwoghöy.
Ngo nyo wow tya?
(Mat 18:1-5; Mrk 9:33-37)
46 #
Luk 22:24. Kit ato kimöl kegh kinetanchay kïlentöy ngo ompö kwenungwa nyo wow kïtïl. 47Otini kïpköchï Yeso kinonutyeto mïkulöwekwa, kïnam monïng akïkany kughyongö kamasunyi 48#Mat 10:40; Luk 10:16; Yna 13:20. akïlenchï pïchay, “Anka tïkwïl nyo toköy monïngï ompö kaynenyan, kïtokanïn akwanka tïkwïl nyo tokanïn kïtoköy nyinte nyini kiyokwanïn. Ompöwölo anka tïkwïl nyo mïnïng tya ompö akwa löwïr, kï wow nyoni kïtïl.”
Chi nyo möwöchokwanye kïmi nko akwa
(Mrk 9:38-40)
49Kimi ato kïlö Yoana, “Konetin kakïsïwecha chi nyo yonöy oy ompö kaynengu ketaghecha, ompöwölo kömökïminye nyinte nko acha.”
50Kïlenchï Yeso nyinte nko kinetankachi löwïr, “Matagha, ompöwölo nyo möwöchokwanye kïmi nko akwa.”
Katagh kanasyanta Samaria kïtak Yeso
51Kikany kïrich osiswö cho kikipöy Yeso kïwö yïm, kïmut akonga kïwö kutang Yerusalem. 52Kïyonta pich kuntagha cho kïpa wölo mi kestonï ompö Samaria atökwighchï nyinte wölo kimungoy. 53Otini kilïm pïchay pö Samaria lö kimi Yeso pan kiwetöy kutöngöy Yerusalem wölo makïchamcha kïtak nyinte. 54#2Pöy 1:9-16. Kïkany kïlïm kinetankachi Yakopo nko Yoana ngalechoni, kïlenchï Yeso, “Echotyon, imökenyi kekurunöcha ma kungwïna yïm atö kuwany chane?”
55Kïwaghaka Yeso akïsyölchï chane kïlentöy, “Monkïtökwanye lö, mïkulögh ne nyo otïngetekwa, ompöwölo melö kingwïn Wero Chi kuwur söpon pö pich, wölo kingwïn kusop.” 56Atolapay kïpa löwïr kutang wölo mi kestoni walaka.
Cho lïku rïpanpa Yeso
(Mat 8:19-22)
57Kikany otini kipechini kegh pantangwa, kïlenchï chitö anka Yeso, “Orïpïnyi ompö wop anka tïkwïl wölo iwetenyi.”
58Kïlenchï Yeso chichay, “Tïngeto chepkonöw pïrïmpotikwa cho möngöy akïtïng töritwö korikwa, wölo mötïngnye Wero Chi wölo könoghöy mötïnyi atökumuny.”
59Atolapay kïlenchï Yeso chitö anka, “Rïpkanïn.” Wölo kïlö, “Echotyon, pïswante nyo pö tagh amïla atotïp paponyu.”
60Kuyokyï Yeso lö, “Nya kïsïnga pich cho kimeghö meghonkökwa. Wïyö nyo le nyi aiyamta lökoyo Pöyunöto Tororöt.”
61 #
1Pöy 19:20. Kïlö chitö anka, “Orïpïnyi, Echotyon, wölo pïswante nyo pö tagh owö kaw oyomis monechu.”
62Kïlenchï Yeso chichay, “Ngo nyo menkït lö möngoronye par kuten ato nam chi köpompo eghin akïmi kurosöy löt? Kïlenyona ye, ato pïsï chi tïkwïn kukaper möngenyi, kïmötïngnye kinyiwut ompö Pöyunöto Tororöt.”
Yontoy Yeso pikachi 70
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKA 9: PIPÏLIA
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
