LUKA 10
10
1Atolapay kïkïl Echotyon pikö walaka cho le 72. Kïyonta chane kïpeghategha odeny odeny kïnya kipa wölo mi kestonï nko kanastin löwïr cho kimököy nyinte kïwetöy. 2#Mat 9:37-38. Kïlenchï pïchay, “Kirïr pagh nyoman, wölo ngörï ilï. Osomö nyu chito pagh kitöswok ilï walaka kwil paghe. 3#Mat 10:16.Ape ankïtï lö, kayontokwa le wara kechir cho mi kwenu suyï. 4#Mat 10:7-14; Mrk 6:8-11; Luk 9:3-5. Mop takolu ropïyen anta mïla psawach anta kwegh. Opïstö kitakwesat nyo chengöy nyo kogh ato omi or. 5Akwato olït kö pö chi nyo katakakwa, amwagh nyo tagh lö, ‘Nya kïkonok Tororöt kalya akwa cho omi köyï.’ 6Ato mi chi nyo chömöy kalya, wöloni akany kïtöpö kitakwesatengwo nyo pö kalya parakunyi kinyïl ato, alïng kitakwesatengwo nyo pö kalya. 7#1Kr 9:5-14; 1Tm 5:18. Ato kolït kanasyan anka tïkwïl mowusotö. Otïpinö köyoni katakakwa. Omekwa aghegh choni konokwa chane, ompöwölo mïchini kïsïch chi nyo kegh ighisyö ropöwontenyi. 8Atolïtokwa kanasyan akïtachakwa pich, am kïgh anka tïkwïl nyo konokwa chane 9asop cho chiryote. Akwotini osopekwa chane olenchï, ‘Kikungwïnchokwa Pöyunöto Tororöt.’ 10#Ist 13:51. Wölo kanasyan anka tïkwïl nyo kolïtökwa akï möminye chi nyo katakakwa, apa ortïna kanasyantanoni amwagh lö, 11‘Kakïpartecha terïtyo kanasyantenkwa cho mi kelyecha atökïlïkwï söwintön lö kikerichokwa. Wölo mowutyeghö kïnye lö, kikungwïnchokwa Pöyunöto Tororöt.’ 12#Tow 19:24-28; Mat 11:24; 10:15. Amwowokwa lö, ngwongwonöy Tororöt Sodoma ompö asispa kirwok kïtïl kanasyantanoni.
Kanastin cho kimötïngcha kighanat
(Mat 11:20-24)
13 #
Isa 23:1-18; Esk 26:1–28:26; Yol 3:4-8; Amo 1:9-10; Sak 9:2-4. “Heywey Korasin! Heywey Petsayda! Ompöwölo ntökikigh töngönchin ompö Tiro nko Sidon, le wölo kyaghan ompö kwenunkwa, kötökikuchukö kegh aryon piko kanastinechoni könyisyok, akulak sarankwachtin omö kiporunöt lö kipïstö chane ngokikwa. 14Wölo ngwongwonöy Tororöt pipö Tiro nko cho pö Sidon asispa kirwok kïtïlakwa cho kasïwa. 15#Isa 14:13-15. Ekï nyi ye we Kapernaum, imökenyi syole kegh yïm so? Kitörengunyi röytenö ngwen.”
16 #
Mat 10:40; Mrk 9:37; Luk 9:48; Yna 13:20. Kïlenchï Yeso kinetankachi, “Chi anka tïkwïl nyo chömöy ngalekwa, kïchömöy ngalechan, akwanka tïkwïl nyo töghokwa, kïtöghanïn tïkwïl, akï nyo töghanïn kïtöghöy Tororöt nyinte nyini kiyonwanïn.”
Kömïlisyö pïchay le 70
17Otini kimïlonchö pïchay kikïl Yeso le 72, kwitï pich cho kitïng ngörekyö nyo wow kïlenchï Yeso, “Echotyon, kighisyö töngönchin nyo kisopchö pich cho kichiryote akïterwecha ompö kaynengu chini le ompö oy!”
18Kïlenchï Yeso chane, “Kyasïwan Onyöt kichïnï lö chwat le kiryal nyay soröy ngwïny. 19#Tum 91:13. Kokonokwa owesyö atïkatena moroyut nko tokolonoy nko owesyö nyo orïntegho punyontonay le Onyöt akï möminye kïgh nyo atomelö chomnyenyan ompö akwa nyo muköy ntökïswangakwa. 20Wölo mongörekyö, pat lö köterwech oy, wölo ongörökyenö ompöwölo kikekir kaynötutkökwa ompö yïm.”
Turönöto Yeso
(Mat 11:25-27; 13:16-17)
21Ompö atoni kïturön Yeso ompö Mïkulögh nyo Tïlil akïlö, osölinyi, “Echotyonto yïm nko ngwïny, ompöwölo keporchinyi sölwöy tïkwïn cho kewïngenyi pich cho lechini kegh kïchï ngöghomöch anta kïchï chïreröch. Wölo kengongchinyi cho mïnïngitöy kegh le tengon. Nyoman Papo, lenyoni wölini kitatïtenyi ompö pöropchengu.”
22Atolapay kïlenchï pïchay, “Kökonanïn Paponyan tïkwïn löwïr apayta. Möminye chi nyo nkït lö, ngo Weri kïpoto Papo, akï möminye chi nyo nkït lö, ngo Papo, kïpoto Weri nko pich cho kacham nyinte kïngongchï.”
23Atolapay ato kimi Yeso nko kinetankachi opïn, kïmwochï lö, “Ochikwa ngörekyot kïtya cho kasïwa tïkuchete kasïwekwa. 24Nyomwowok nyoman lö, kipïrchini werkoy nko pöytoghï kïsïwa tïkuchï kasïwekwa akïlïm ngalechï kalïmakwa, wölo kimemïcha.”
Körkeyïn pö chi pö Samaria nyo karam
25 #
Mat 22:35-40; Mrk 12:28-34. Kinget asistanka konetinto kirurut kïtyam Yeso ompö teput lö, “Oghan ne nya konetin tosïch söpon pö kokay?”
26Kuyokyï Yeso ompö teput lö, “Mwoghöy ne Kirurut pö Musa? Aköpköchinyi lö ne?”
27 #
Krt 6:5; Law 19:18. Kïlö chichay, “Lentöy kirurut, ‘Chama Echotyon Tororötïngu ompö mïkulöwungu kïmïkul nko söpontongu kïmïkul nko owesyengu kïmïkul nko ngöghomnyengu kïmïkul, aicham pöröryengu le wölo ichömtonyi kegh?’ ” 28Kïlenchï Yeso, “Lenyoni nyoman. Ighanyi nyu lenyoni tesïkö söpon pö kokay.”
29Wölo kïman chichay kwigh kegh lö, opo man kïlenyona, kïtep Yeso ngat lö, “Akï ngo pöröryenyan nyo mïchini achaman?”
30Kuyokyï Yeso ompö körkeyïn lö, “Kimi chi nyo kïweghö Yerusalem kutang Yeriko. Otini kimi pan, kïtuyeghö chelölos ompö arawet. Kïsara nyinte tïkuchi löwïr atolapy kïmuny kurakar. 31Kitewerï tïsin asisoni aranoni nyo, otini kisïwa chichay kïghïtegho ngwïny, kuwer kamas. 32Kïlenyoni tïkwïl, kuwer otini chi nyo pö ara Lawi. Kuros nyinte chichay, atolapay kïwechi kegh kïrop kamas. 33#2Ot 28:15. Wölo sis kïgh nyo kigh chi pö Samaria nyo kiwer aranoni ato kimi tïkwïl pantanyi. Ompöwölo otini kisïwa chichay, kusyonchï. 34Kïrich akïkïtïngö kamasunyi akïmïlchï moyokachi mwagh nko dipay,* atolapay kïrat akïkasana sïkïryenyi, ntökwit kö pö to wölo kimuköy kïsöröro nyinte. 35Kïkany kïyech, kïngwïsï ropïyen odeny cho pö silpa akutö ripinto köyay pö to akïlenchï, ‘Sararena chichï ropïyenichï. Kïnyïl atomaghamnye, ongwïnan onyïghitöy ato owerwan yete.’ ”
36Otini kiwany kïmwa ngalechoni, kïtep Yeso chichay lö, “Ekï ngo nyu ompö pïchoni le sömök nyo ilentenyi pöröryeto chichoni kinor chelölos?”
37Kuyokyï chichay lö, “Achichona kisyonchï nyinte.”
Kïlenchï Yeso chichay, “Winyi nyu aigh lenyoni.”
Körutochï Yeso Marta nko Marya
38 #
Yna 11:1. Kitas tagh Yeso nko kinetankachi ompö pantangwa nyo kipetöy Yerusalem, kipa lenyoni ntökwit keston cho kimöngöy korka nyo kikïkuro Marta. Kitach Marta Yeso ompö konyi. 39Kitïng cheptöngwa nyo kikïkuro Marya, Kïtöpö Marya tawu Yeso kïteröy kinetutkachi. 40Ataye kokay kimi Marta kisïngo ighisyewut pö kö cho chang. Kïlenyona kungwïn wölo mi Yeso akïlö, “Echotyon, isïwïyenyi so nyo karam otï köpïsyanïn cheptöncha agh ighisyewutchï löwïr onkït? Ne memwochï kungwïn kungarakanïn?”
41Kïlenchï Echotyon, “Marta, Marta, ne tesïnga aiwongunö tïkwïn cho chang! 42Kïgh akonga kwïle nyo roko kïlanyi, akakïl Marya kïyoni karam. Ainkïtï nyu lö puryö chi nyo chengo nyinte kïyoni.”
Kinet Yeso paraku saghat
(Mat 6:9-13; 7:7-11)
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKA 10: PIPÏLIA
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
