LUKA 16
16
1Kilet Yeso tagh kïlenchï kinetankachi, “Kimito chi akong nyo kile sïkön nyo kitïng mötworin nyo kitö kughyongtö tïkuchï. Atoni nyu kïpka kïmwochï pikö walaka sïkönonay lö, kiserser kighyongtoghintonay tïkuchi. 2Kïkur sïkönonay akïtep lö, ‘Ne nyi kalïman lö, keghanyi? Porune ya wölo kapkanta nko wölo kepöghisyeghtenyi ropïyenichan, ompöwölo metösenyinye tagh ghyongchine tïkuchan.’ 3Kunonchï kegh kighyongtoghintonay lö, ‘Otï ye kikutulenanïn echotyontenyan pöghisyö, oghan kïgh ne? Akwanyï momukanye owö par ongorsyö. Alïkwï ye somin? Mö arasnye nyoni kwïle? 4Konyorwan ye nyu kïgh nyo oghöy! Mito or nyo osïkonan kongot cho tokanïn ompö kestonikwa otini kewonyö pöghisyonï.’ 5Kïlenyona, kïkur kukenta pïchay kipösön tïkuko echotyontenyi. Kïlenchï nyo tagh, ‘Tya pösön nyo pö echotyontenyan nyo itïngetenyi?’ 6Kuyokyï lö, ‘Tïramtin 100 cho pö mwowöy.’ Kïlenchï, ‘Anyï palalyante anka, kira pösöntongu lö tïramtin tömönut mut.’ 7Atolapay kïtep anka lö, ‘Kïtya pösöntanyi.’ Kuyokyï lö, ‘Kwïnïyis 1,000 cho pö nkanun.’ Kïlenchï, ‘Anyï palalyante anka, kira lö kwïnïyis tömönut mut nko sömök.’
8“Otini kilïm, ngalechoni kïsal echotyontenyi kighyongtoghintonay ompö chïreryo lïs nyo kitïng. Ompöwölo chïreröch tya pipö ngwïnyinï ompö ortïnekwa kegh, kïtïl pipö löpoyïn.”
9Kulet tagh Yeso kïmwa lö, “Nyo omwokwa ye lö, oghchinö kegh kongotnön ompö sïkönöto ngwïny, nyo ato wonyö kïtachekwa Tororöt ompö söpon nyo pö kokay. 10Chi anka tïkwïl nyo ghanate ompö kïgh nyo mïnïng tya, keghönöy ompö nyo wow tïkwïl. Akwanka tïkwïl nyo meghanatenye ompö kïgh nyo mïnïng, kïmeghönönye chi ompö nyo wow tïkwïl. 11Kïkany ye ato melö kighönokwa ompö sïkönöto ngwïnyinï, kï ngo nyu nyo ghönokwa ompö sïkönöto man? 12Ato tomönye alïkunakwa cho ghönote ompö tïku chito anka, ngo nyu nyo konokwa cho le chikwo kegh?
13 #
Mat 6:24. “Möminye mötworintö nyo pöghisyechini echot odeny, ompöwölo töghöy anka kïcham anka, anta terchï nko anka kïsas anka. Momukekwanye topöghisyechï Tororöt nko mökosyö.”
Kinetut pö Yeso walaka
(Mat 11:12-13; 5:31-32; Mrk 10:11-12)
14Otini kilïm Parisaytin* ngalechoni löwïr, kïsas Yeso ompöwölo kichömöy ropïyen. 15Kïlenchï Yeso chane, “Akwa chay oghekwa kegh lö, kïchï karamach ompö tawu pich, wölo nkït Tororöt lö ochikwa pich ne. Ompöwölo tïkwïn cho kusöy pich, kï samï ompö tawu Tororöt.
16 #
Mat 11:12-13. “Kintöghoghwokwa Kirurut pö Musa nko kikirut pö werkoy ntökïtenö osiswo Yoana Kipatisanin. Kïngeta atoni Lökoy cho Karamach cho pö pöyunöto Tororöt, pöyunöt nyo mi chi anka tïkwïl kïporyot kïlït ompö owesyö. 17Wölo kwïskwïs tya kuwer yïmö nko ngwïny, kïtïl kengongoghta kemeryan nyo le kite nyo pö kirurut.
18 #
Mat 5:18. “Chi nyo tyoköy korkenyi akwip anka, kwighöy cheporesnan, akwanka tïkwïl nyo ipöy korka nyo kakityak kwighöy cheporesnan.
Sïkön nko Lasaro
19“Kimi kitas tagh Yeso kïlenchï pïchay, chi nyo kile sïkön nyo kiloköy sïro cho pö olyot nyo wow tya, akïtöpo atöp nyo pö mökosyö kïtenö osis. 20Kimi tïkwïl chitö anka nyo kile meywon nyo kikïkuro Lasaro nyo kitöpo kuka chichay le sïkön kïmïkul. 21Kipïrchini Lasaro lö, tapagha kegh rarakan cho kichïnuno mesanay pö sïkönonay. Otini kimi atoni, kipkonöy ompö kukïdinö kïmelöy moyokachi.
22“Kitöpö meywontonay ntö kïma. Kïpka kumït malayken nyinte kïwö kïtöpö nko Apraam. Kite kïma sïkönonay tïkwïl, aketïp. 23Otini kimi sïkönonay kiwonguno ma nyo wow ompö ngwen, kïtopön yïm akïsïwa Apraam nko Lasaro cho kimi wölo low. 24Kïkursyegho wölini lö, ‘Paponyu Apraam! Syonchante wey! Yonwo Lasaro kungwïn kulut walto morïnenyi pögh atökïnukö ngalyapunyan, ompöwölo kowongwan tya ompö mayï.’ 25Wölo kiwöghökyï Apraam lö, ‘Nane ya montanyu lö, kirotyinyi tïkwïn cho karamach atanya kimitenyi ngwïny, kirotyï Lasaro cho ghach. Wölo kïsoghsogho ye nyinte yi imitenyi ngwonïn. 26Akïmöchonicha opïn, mito ngötutyö nyo wow kwenuncha nko akwa. Akwompö ngötutyononi puryö chi nyo muköy kwowï wöloni anta kwowï wölete.’ 27Wölo kïlö sïkönonay, ‘Osominyi we papo Apraam lö, yontena Lasaro kïwö katancha, 28kanya kïwö kïrirchï werköcha cho le mut, tömapka asïyech wölï omitan, asïyech wölo mi nyarïl nyo wow.’ 29Wölo kïlenchï Apraam, ‘Mi chane nko Musa nko werkoy cho rirchini. Nya kïter chane.’ 30Kuyokyï lö, ‘Mölenye nyona, paponyu Apraam, möterönye! Wölo nyu ato wö chi nyo ketutunö ngwen akïngölonchï chane, kumuköy kïkötö ngokikwa.’ 31Wölo kïlenchï Apraam, ‘Ato möterchïcha Musa nko werkoy, kïmöminye chi anka nyo terchini, kïrkegh köngetunö ngwen.’ ”
Ngokï
(Mat 18:6-7,21-22; Mrk 9:42)
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUKA 16: PIPÏLIA
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
