TOWUNÖT 28
28
1Kïlenyona kïkur Isak Yakopo tökuperur akuyomis akïlenchï, “Metöp lö opöy chepö pipö Kanan. 2Ngeta aiwö Mesopotamia, kö pö kukötöngu Petuel, papoto yongu. Atepchinö kegh korkengu ompö wöloni kïngetunö tipö Lapan nyo tupchö nko yongu. 3Nya kuperurinyi Tororöt Kimuktoghin akwigh piko yiyengu kïtösisyö, atelïkuna pipö punton cho chang. 4#Tow 17:4-8.Nya kïkoninyi nko moneku perur nyo lata nyay kitö Apraam atemïlanyi koronete imitenyi iwestegho kïle ato ichinyi ton, koronini kitö Tororöt Apraam!” 5Kïlenyona, kïyonta Isak Yakopo, kïwö ntökwit Mesopotamia wölo mi Lapan, wero Petuel chi pö Sirya werto ompö Repeka, yoto Yakopo nko Esau.
Kep Esau korka anka
6Kïsïwa Esau lö kikuperur Isak Yakopo akïyonta kïwö Mesopotamia, kïwö kïkensyö ompö wölini, akinkïtï lö otini kisoyön Isak nyinte, kuyomis lö, “Mepchï kegh korka ompö tipö Kanan.” 7Akunkïtï lö kilïmchï Yakopo kwanta nko kame ngalekwa akïwö kutang Mesopotamia. 8Kïlenyona kunkïtï Esau lö, kitagha kwanta Isak tipö Kanan, 9kïwö nyu Esau wölo mi Ismael akwip Maalat chepto ompö Nepaiot, chepö Ismael wero Apraam, kïtas kegh nko koru walaka cho kökikwip nyinte.
Kerwotïtö Yakopo ompö Petel
10Kïweghö Yakopo Persyepa kutang Aran. 11Otini kit ato syom, kïrï atoni ompöwölo kökikïröytö asis. Kïchenga atoni kogh akïtighö mötïnyi, kunuk akïrï. 12#Yna 1:51. Kurwotïtö, kïsïwa ompö kirwotïtoghoni lontöwon nyo kikigh kughyongö ngwïny akwitïta waltanyi yïm akimito malaykeni Tororöt kïlongöy akïrökuno lontöwontonay. 13#Tow 13:14-15. Akimito ECHOTYON kughyongo parakuto lontöwontononi#28:13 lontöwontononi: Parakuto lontöwontononi anta kamasunyi. akïlö, “Ochan ECHOTYON, Tororöt pö papongu Apraam, achï Tororöt pö Isak. Okoninyi koronete irïwenyi kïlïku nyengu töninan piko yiyengu. 14#Tow 12:3; 22:18.Chongitu asïyech piko yiyengu le terïtyo ngwïny, aighömunyi woptin löwïr, wölnö le ta nko kongasis nko wölnö ketang okumpö löt nko wölnö ketang okumpö tagh, akeperuröy pipö ngwïny kïmïkul ompö nyi nko ompö piko yiyengu. 15Omitan nko nyi arïpotoninyi ompö wop anka tïkwïl wölo iwetenyi amïtunyi ato le asïyech ntengwïn koronete ngat, ompöwölo mopïstoninyinye ntökïtenö awunyi ngalechini tïkwïl koyomisunyi.”
16Atolapay kïngeta Yakopo rïwöntenyi akïlö, “Mi ECHOTYON yeteyi nyo pö nyoman amelö konkïtön!” 17Kuwagh Yakopo akïlö, “Wow kïtya kiwaghata nyo mi yi! Kö pö Tororöt yeteyi nyo mötïny, akïyete ato le kuka yïm.”
18Kïnget Yakopo otini le kiwasan akïcheng koghay kötigho nyinte mötïnyi akwigh kïlïkwï pchörï akïmïlchï mwagh parakunyi. 19Akïkurö atoni Petel,#28:19 Petel: Ompö Eprania kelentöy, “Kö pö Tororöt.” wölo kikuro kaynata kanasyantanoni atokile tagh Lus. 20Atolapay kuwalwal Yakopo akïlö, “Ato töp Tororöt ntökïmi nko ani, akïripotanïn ompö aranï owetan, akïkonanïn omisyö nyo omöy nko sïro cho oloköy, 21ntamïlan kato paponyan ompö kalya, kïlïku ECHOTYON Tororötïnyan, 22akïlïkwï Kö pö Tororöt koghete kaghan kïlïkwï pchörï akoninyi nyoman kareran nyo pö taman nyo pö kïgh anka tïkwïl nyo ikonaninyi.”
Ketïta Yakopo ka Lapan
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
TOWUNÖT 28: PIPÏLIA
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019