YOHANA 4

Yesu nende omukhasi Omusamaria

1Omwami yamanya mbu Abafarisayi bahuliye mbu Yesu anyoolanga nabaputisa abechi abenji okhuyomba Yohana.

( 2Kali Yesu omwene siyabaputisakhwo omundu tawe, nebutswa abechi baabe nibo ababaputisa.) 3Kho yarula musibala sie Buyahudi nakalukha Galilaya. 4Kali khatimba abir're mu Samaria.

5Niyoola hetaala lia Samaria elilangwa Sukaru, ahembi khwiloba lia Yakobo yali niyaha omusiani uwe Yosefu.#Okhuch. 33:19; Yosh. 24:32 6Ahene yaho sialiho esitaho sia Yakobo, ne khulwa mbu Yesu yali nachonyele noluchendo lulwe, yekhala hasitaho. Tsiali singa etsisaa tsisasaba tsiam'basu.

7Omukhasi Musamaria niyetsaho okhutaha amaatsi, ne Yesu namubool'la, “Mbekhwo amaatsi nywe.”

( 8Abechi baabe bali nibatsiiye mwitaala okhukula ebiokhulia.)

9Omukhasi Omusamaria namubool'la, “Oli Omuyahudi, nase ndi Omusamaria, kho wakhasaba mbwena amaatsi kokhunywa.” (Abayahudi sibahambananga mwing'ana liosi nende Abasamaria tawe.)#Esira 4:1-5; Neh. 4:1-2 10Yesu namukalusia, “Olaba omanyile khwo esihanwa sia Nyasaye ahaananga nende uyo okhusabanga amaatsi kokhunywa, wakhamurebele naye yakhakhuheye amaatsi akahaananga obulamu.” 11Omukhasi namubool'la, “Omwami, sioli nende esiokhutayila tawe, ne esitaho nasio siatsia hasi buli. Wakhahinia hena amaatsi akahaananga obulamu yako? 12Kuka wefwe Yakobo niye owakhuhelesia esitaho yisi. Ne yanywetsanga mwo omwene, nende abaana baabe, khandi ebiayo bibie. Ibe oli omukhongo okhuyomba kuka wefwe Yakobo?” 13Yesu namukalusia, “Siomundu onywetsanga amaatsi yaka obuluho bwakhamuhamba khandi, 14nebutswa siomundu wosi onywetsanga amaatsi akandimuha obuluho sibwakhamuhamba khandi tawe. Amaatsi akandimuha ise, kakhabe muye esitaho siamaatsi akasenukhanga akobulamu nikamuha obulamu oburahwa.” 15Omukhasi namubool'la, “Omwami, umbekhwo amaatsi tsana, nambule okhuba nobuluho, kata mbule okhwitsanga hano okhutaha amaatsi.” 16Yesu namubool'la, “Tsia olange omusaatsa uwo, ma mwitse hano n'naye.” 17Omukhasi namukalusia, “Ise sindi nomusaatsa tawe.” Yesu namubool'la, “Oli habwene olwa obooye sioli nomusaatsa tawe. 18Wali okhuteesibwa nende abasaatsa barano, ne owoli n'naye luno siali omusaatsa uwo tawe. Kho umbooleye akatooto.”

19Omukhasi naboola “Omwami, ndutsi ibe oli omuroobi. 20Abakuka befwe bekayakayanga Nyasaye musikulu yisi ne inywe muboolanga mbu, Yerusalemu niho hakwan'ne abandu okhwekayakayila Nyasaye.” 21Yesu namubool'la, “Omukhasi, huchil'la, inyinga yitsanga eya abandu sibaliekayakaya Papa, musikulu yisi, nohomba ha Yerusalemu tawe. 22Inywe mwekayakayanga esia muramanyile; Ifwe khwekayakayanga esia khumanyile; sichila obuhoni bwitsanga okhurula mu Bayahudi. 23Nebutswa inyinga yitsanga, ne nayo imal'le okhwola, olwa abekayakayi batooto, baliekayakaya Papa mumwoyo nende mubwatooto, okhuba Papa arunanga abandu yabo baabe abekayakayi baabe. 24Nyasaye abetsanga Omwoyo nabo abamwekayakaya bahel'le bamwekayakaye mumwoyo nende mubwatooto.” 25Omukhasi namubool'la, “Ndamanya Masihi yetsanga (olangwanga Kristo) ne nyinga yakhetse alikhuribul'la amang'ana kosi.” 26Yesu namubool'la, “Ise obool'lananga n'nawe nise owatsana.”

27Yaho abechi ba Yesu bamala nibetsa, ma nibahuka okhumunyoola nal'lomanga nende omukhasi uyo. Nebutswa siyaliho kata mulala khubo owareeba omukhasi, “Orunanga sina?” tawe. Nohomba owareeba Yesu “Obool'lananga n'naye busina?”

28Khe omukhasi yalekha isongo yiye, natsia mwitaala nabool'la abandu, 29“Hambe mulole omundu oumbooleye akandali okhukhola kosi. Yakhaba nali Masihi noho?” 30Kho barula mwitaala, nibatsia khu Yesu.

31Munyinga yene yiyo abechi baabe, bamusaaya nibamubool'la, “Omwibaali, liakhwo esindu.” 32Nebutswa yababool'la, “Ise ndi nende ebiokhulia ebia muramanyile tawe.” 33Khe abechi nibarebana, “Omundu yakhaba namulereye ebiokhulia noho?” 34Yesu nababool'la, “Ebiokhulia bianje bibetsanga okhukhola obulalilo obwe uyo owaruma, khandi okhumalilisia emilimo chichie. 35Inywe simuboolanga ‘Chisili emiesi chine, khe lichesa naliole noho?’ Nase mubool'langa, Tikul'le tsimoni tsienywe, muhenge emikunda, sichila chiamala okhulaba chicheswe. 36Omundu ochesanga anyoolanga omurungo, ne abunjelesianga ebiamo biobulamu oburahwa. Kho omundu orakanga nende ochesanga bekhoyelanga halala. 37Khulwa akene yako okhuboola yikhwo nokhwatooto mbu ‘Mulala arakanga ne oundi nachesa.’ 38Nase ndamurumile okhuchesa yibio ebia muranyakhana khwo nimuraaka. Abandu bandi nibo abanyakhana nibaraka, nenywe munyoolanga obukhala khumilimo chiabwe.”

39Abasamaria abenji bomwitaala yilio basubila muye khulwa obukobokholi bwomukhasi uyo, owali nababooleye mbu, “Yambooleye kosi akandakhola.” 40Kho olwa Abasamaria bali nibetsele, bamuhomba mbu amenye n'nabo ne Yesu nakonayo amatukhu kabili.

41Ne abandi abenji basubila khulwa amang'ana kaake, 42ma nibabool'la omukhasi tsana, “Luno sikhusubiye khulwo okhuboola khukhwo tawe, nebutswa khusubiye sichila khuhuliye ifwe abene, ma khumanyile mbu ye niye omuhonia wabomusibala.”

Yesu ahonia omwana womukhongo

43Olwe inyuma wamatukhu kabili Yesu yarulayo natsia Galilaya. 44Okhuba Yesu mwene yakobokhela okhuboola mbu, “Omuroobi siabetsanga noluyali musibala siabwe siene tawe.”#Mat. 13:57; Mk. 6:4; Lk. 4:24 45Olwa yali niyol'le Galilaya, Abagalilaya bamwinjisia sichila bali mbaluutsi kosi aka yakhola mu Yerusalemu olwali khwitukhu lie Pasaka; okhuba nabo bali nibatsiyeyo khulwe lisabo.#Yoh. 2:23

46Ma Yesu yakalukha mu Kana lia Galilaya, aha yali niyakalukhania amaatsi okhukwa ewaini. Ne ebwene yiyo yaliho omundu omurumikhili womuruchi, omwanawe yali nalwalanga Kaperinaumu.#Yoh. 2:1-11 47Nyinga yahulila Yesu urul'le Ebuyahudi witsile Galilaya, yatsia khuye namusaaya mbu yetse Kaperinaumu okhuhonia omwana uwe, owali nali ahembi okhufwa. 48Kho Yesu namubool'la, nimuba nimuralola ebilolelo nende akokhuchenya, simwakhasubila kata nahati tawe! 49Omurumikhili wo Mwami namubool'la “Omwami, yanza khutsieyo omwana wanje nasili okhufwa.” 50Yesu namubool'la, “Tsia butsia ingo omwanawo alahona.” Omusaatsa uyo nasubila amang'ana ka Yesu yamubool'la ma natsia.

51Ne olwa yali natsitsanga nasili khunjila abarumikhili baabe nibamwakan'na nibaboola mbu “Omwana uwo nomulamu.” 52Naye nabareeba mbu “Tsiali etsisaa tsianga etsia yachiachiye mwo okhuba omulamu?” Nabo nibaboola, “Yachiachile okhuba bulahi olwabeye khusaa yakhane nakhataru.” 53Ne samwana namanya niyo esaa yatsana eya Yesu yali namubooleye mbu “Omwana uwo yetsa okhuhona.” 54Isi nisio esilolelo siamangalimwa siakhabili esia Yesu yakhola olwa yali narul'le Ebuyahudi okhutsia Galilaya.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

YOHANA 4: EBAIBO

Highlight

ಶೇರ್

ಕಾಪಿ