YOHANA 12

Yesu yabakhwa amafura nali Betsania

(Mat. 26:6-13; Mk. 14:3-9)

1Amatukhu kasasaba Epasaka nesili okhwola, Yesu yatsia Betsania, hango hanga Lasaro tsana; owa Yesu yali niyasimukusiiye okhurula mubafu. 2Bamutekhela ho ebiokhulia biamukoloba ne Maritsa niye owabikabula. Lasaro yali mulala khubandu abekhala okhulia n'naye. 3Mariamu nabukula amafura akahunya esuswa, enusu yelita, akakulwanga obukusi obutinyu, natsukhil'la khubilenje bia Yesu ma nabieya nende liswi lilie. Inyumba yosi nehunya esuswa yamafura yako.#Lk. 7:37-38 4Nebutswa Yudasi Isikariote, mulala khubechi baabe, owamala namusiemana, naboola, 5“Busina amafura yaka karakusiibwe etsidinari etsimia tsitaru, ma tsilahebwa abatakha?” 6Yako siyaboola sichila ubahendeye abatakha tawe, nebutswa sichila yali nali omwibi. Yachinganga omutata kwamapesa nabukulanga khu biabikhanga mwo. 7Kho Yesu naboola, “Mulekhe omukhasi uyu abe. Lekhe akabikhile khwitukhu liokhuyabilwa khwanje. 8Mulabetsanga nabatakha amatukhu kosi; nebutswa ise simuli n'nase amatukhu kosi tawe.”#Okhuka. 15:11

Obusiemani bwokhwira Lasaro

9Abandu abenji khu Bayahudi bahul'la mbu Yesu ali Betsania, ma nibatsiayo. Sibaitsa khulwa Yesu yenyene tawe, nebutswa khandi balole Lasaro owa Yesu yali niyasimukusisie okhurula mubafu. 10Kho abesaalisi abakhongo nibalomba omuse kwokhwira Lasaro, 11sichila khulwa ye abandu abenji khu Bayahudi babasuula, nibasubila khu Yesu.

Yesu yenjila Yerusalemu nomwekhoyo

(Mat. 21:1-11; Mk. 11:1-11; Lk. 19:28-40)

12Litukhu elialondakhwo omukanda omukhongo okwali nikwitsile mwisabo lie Pasaka bahulila mbu Yesu yetsanga Yerusalemu. 13Kho babukula tsisaka tsiamasindu nibarula nibatsia okhumwakan'na, nibalanjisia mbu, “Nyasaye yetsomibwe! Noweikhabi uyo owitsanga muliira lio Mwami. Nyasaye alamile Omuruchi wa Isiraeli Ikhabi.”#Etsisa. 118:25,26 14Naye, Yesu nanyoola esimoosi siesikhili naniina khwo singa obwa Amahandiko Amatsienukhu kaboolanga,

15“Oraria tawe, ibe litookho lia Sayuni!

Lola, omuruchi uwo yetsanga,

naniinile khusimoosi siesikhili.”#Sak. 9:9

16Abechi baabe sibamanyilisia esifune sie ling'ana yilio olwokhuranga tawe, nebutswa betsul'la amang'ana yaka olwa Yesu yafumibwa mbu niye owakahandikwa khwo, khandi niko akabamukholeye. 17Omukanda kwabandu yikwo abali halala n'naye olwa yalanga Lasaro okhurula musilindwa, namusimukusia mubafu, baribula kol'lani, akali nikekhol'le. 18Nisio esiachila omukanda nikutsia okhumwakan'na, sichila bali nibahuliye niye owakhol'le akamangalimwa tsana. 19Abafarisayi nibabool'lana, “Lole obwa khukhumbuywe! Lole, esibala siosi simulondanga!”

Abalala khu Bayunani baruna okhulola Yesu

20Abalala khu Bayunani bali halala neyabo abatsia Yerusalemu okhwekayakaya mwisabo. 21Abene yabo betsa khu Filipu, owali okhurula Betsisaida mu Galilaya, nibamubool'la, “Omwami, khwakhenya okhulola Yesu.”

22Filipu natsia okhubool'la khwo Anderea; kho Anderea halala nende Filipu, nibatsia okhubool'la Yesu. 23Yesu nabakalusia, “Esaa eyokhufumibwa khwo Omwana wo Mundu yol'le luno. 24Siahene siahene, mubool'langa, inzoli yeingano ebetsanga inzoli yeingano butswa okhwola olwa erakwa mwiloba, ma efwe. Olwa ebetsanga niyakhafwa, yamanga ebiamo ebinji. 25Omundu oyanzanga obulamu bubwe abukosianga, ne naye obihil'lwanga obulamu bubwe musibala yisi, niye olibuhonia anyoole obulamu oburahwaho.#Mat. 10:39; 16:25; Mk. 8:35; Lk. 9:24; 17:33 26Omundu niyenya okhuurumikhila ise, akwana yanonde ise, ne aha Ise ndi, ahene yaho omurumikhili wanje naye abeho khandi. Omundu wosi owurumikhilanga ise, Papa wanje alamufumia.

Yesu yaboola akokhufwa khwe

27“Luno omwoyo kwanje kuhendanga muno kho namboole mbwena? Ndakhaboola mbu ‘Papa, oralekha esaa yiyi yinzitsile tawe?’ Nebutswa amang'ana yaka, niko akachila ninzitsa mbu mbir're khusaa eyomunyakhano yiyi. 28Papa fumia eliira lilio.” Ma omwoyo nikurula mwikulu nikuboola, “Ndifumiisie khandi nandifumie.” 29Omukanda okwali nikusinjiyeho, kwahulila omwoyo tsana ma nikuboola mbu ikhupa irindukhile; ne abandi nibaboola “Om'malaika ul'lomele n'naye.”

30Yesu nabakalusia, nababool'la “Omwoyo yikwo sikul'lomele khulwe ise tawe, nebutswa khulwe inywe. 31Luno okhukhalachilwa esiina khwesibala yisi khwol'le; luno omukhongo wesibala yisi alafuubwa esioba. 32Nase olwa njingulwa ikulu okhurula khusibala, ndikhwesa abandu bosi okhwitsa khwise.” 33(Akene yaka yali okhuboola, nabuulanga singa obwa alifwa.)

34Abomukanda nibamukalusia mbu “Amalako kefwe kakhubool'langa mbu Masihi watsana, yakhamenye inziaiyo! Nawe oboolanga mbwena mbu Omwana wo Mundu akwana okhuchingulwa? Omwana wo Mundu tsana uyo niwina?”#Etsisa. 110:4; Isaya 9:7; Esek. 37:25; Dan. 7:14 35Yesu nabakalusia mbu, “Obulafu yibwo busili n'nenywe hatututu. Chende olwa musili nobulafu, kho esiilima silekhe okhwitsa khwinywe, okhuba omundu nachendanga musiilima siamanyanga ahatsitsanga tawe.”

Okhubula okhusubila khwabandu

36Kho, musubile mubulafu olwa musili nabwo, khe mube abandu bobulafu. Yesu niyakhamala okhuboola amang'ana yako yarulayo ma natsia okhwebisa.

37Kata olwa yali niyakhola akamangalimwa amenji imbeli wabwe, sibasubila khuye tawe. 38Kho Ling'ana liomuroobi Isaya yaboola liekhole, elia yali okhuboola;

“Omwami niwina owasubila amang'ana kefwe?

Niwina owo Mwami yabisul'la obunyalibwe?”#Isaya 53:1

39Khulwe yaka sibanyala okhusubila, sichila Isaya yali niyaboola khandi mbu,

40“Nyasaye yababofusia tsimoni tsiabwe

Niyekal'la amachesi kabwe,

baralola netsimoni tsiabwe,

khandi baramanya mumioyo chiabwe,

kata barakalukhana nase nimbahonia tawe.”#Isaya 6:10

41Amang'ana yaka Isaya yaboola, sichila yalola obukhongo bwa Yesu ma nal'loma khukaake.

42Kata olwene yilwo, abenji khubakhulundu ba Bayahudi basubila khu Yesu; nebutswa khulwa okhuria Abafarisayi, sibayeribulanga kol'lani tawe, khase bakhahinibwa musinakoki, 43okhuba bali okhuyanza ifuma yabandu okhuyomba ifuma ya Nyasaye.

Amang'ana ka Yesu kakhakhalachila abandu

44Yesu yaboola nomwoyo omukali mbu: “Omundu osubilanga mu ise, siasubilanga mwise sienyene tawe nebutswa asubilanga mu uyo owaaruma. 45Ne uyo oundolanga ise, khandi alolanga uyo owaruma. 46Ise ndetsa okhuba obulafu musibala mbu omundu wosi niyakhasubila alekhe okhumenya musiilima. 47Omundu wosi naba nahul'la amang'ana kanje ne narakakhola tawe, sindimukhalachila esiina tawe. Sindaitsa okhukhalachila abomusibala esiina tawe, nebutswa okhuhonia esibala. 48Oufukulanga ise, narahuchil'la amang'ana kanje tawe, ali nende olimukhalachila esiina. Amang'ana aka ndaboola niko akalimukhalachila esiina khwitukhu liesihesi. 49Yaka kali habwene sichila simboolanga khubwanje tawe, nebutswa Papa awaruma ise niye owandaka akangwan'ne okhuboola nokhul'loma. 50Ne nase ndamanya mbu lilako lilie, lileranga obulamu bwe inziaiyo. Eliamboolanga nelia Papa yandachile okhuliboola.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

YOHANA 12: EBAIBO

Highlight

ಶೇರ್

ಕಾಪಿ