Luka 8
8
Aka barĩa bagendanagia na Jesũ
1Kagiita kanini gakũthira Jesũ nĩ athiĩrĩre mataũnini manene na ntũũrani, akĩunjagia Nteto Ĩmbega ya Ũnene bwa Ngai. Arutwa bae barĩa ĩkũmi na baĩrĩ nĩbathijanĩtie nawe, 2o na aka bamwe barĩa baragithĩtue nkoma na mawonje. Nabo nĩbo Maria, ũrĩa wetagwa Magidalina, na no we warutĩtwe nkoma mũgwanja, 3Joana mũka wa ntungata ya Herode ĩrĩa yetagwa Kuza, Susana, na bangĩ baingĩ. Aka baba nĩbamenyagĩĩra Jesũ na arutwa bae, bakĩbatugaga na into jiao eene.
Ngerekano ya mũandi wa mbeũ
(Mat 13.1-9; Mar 4.1-9)
4Antũ nĩ baumire mataũnini nkũrani nkũrani bakĩthĩ kĩrĩ Jesũ, na rĩrĩa bethĩranire bagĩtuĩka antũ baingĩ mũno Jesũ nĩ aberire na ngerekano:
5“Mũrĩmi nĩ aumagarire akĩthi kũanda mbeũ. Na rĩrĩa aandaga mbeũ imwe ikĩgwa njĩrani, igĩkinyangwa na irĩa jiĩngĩ ikĩrĩwa nĩ inyoni. 6Jiĩngĩ ikĩgwa maigani, na rĩrĩa jiamerire ikĩũma nĩ kwaga rũjĩ. 7Najio jiĩngĩ ikĩgwa kũrĩa kwarĩ na mĩgua, ikĩmeranĩria amwe, ikĩmuntangwa nĩ mĩgua ikĩũma. 8Jiĩngĩ nĩ jiagwĩre mũthetuni ũrĩa mũnoru na igĩkũra, ikĩjiara o mpĩndĩ maita ĩgana.”
Akĩrĩkĩĩria akiuga na mũgambo mũnene atĩrĩ, “Ũrĩa ũrĩ na matũ ma kwĩgua nĩ egue.”
Gĩtũmi gĩa gũtũmĩra ngerekano
(Mat 13.10-17; Mar 4.10-12)
9Rĩrĩa arutwa bae bamũririe gĩtũmi kĩa ngerekano ĩu, 10nĩ aaberire atĩrĩ, “Bwiũ nĩbũetwe ũũgĩ bwa kũmenya ciri jia Ũnene bwa Ngai, ĩndĩ mbaragĩria barĩa bangĩ na ngerekano nĩkenda baraitha barege kũona na begua barege gũtaũkĩrwa.
Jesũ gũtaũra ngerekano ya mũandi mbeũ
(Mat 13.18-23; Mar 4.13-20)
11“Ngerekano ĩno ĩrĩtaũka ũũ: Mbeũ nĩ kiugo kĩa Ngai. 12Mbeũ irĩa jiagũĩre njĩrani nĩ antũ barĩa begujaga nteto jia Ngai ĩndĩ Nkoma akeja akaruta nteto ĩu nkoroni jiao nĩkenda batĩgetĩkie, beja kũonoka. 13Najio irĩa jiagwĩre maigani nĩ antũ barĩa begujaga nteto na bakaijũkia bakenete mũno, ĩndĩ nteto iu ikarega kũgwata nkoroni jiao; betĩkagia kagiita kanini ĩndĩ magerio mabejĩĩra bagatiganĩria wĩtĩkio wao. 14Najio mbeũ irĩa jiagwĩre mĩguani ni barĩa begujaga nteto ĩndĩ mĩtangĩko na motonga na ikeno jia gũkũ ndĩ ikabarigicania o kaora, nteto ikaaga kũreta majiaro mĩtũrĩreni yao. 15Najio mbeũ irĩa jiagwĩre mũthetuni ũrĩa mũnoru, nĩ antũ barĩa begujaga kiugo kĩa Ngai na bagaking'inyia barĩ na nkoro irĩa mbega na mbathĩki, bagekara bakirĩrĩtie, na bakagĩa na majiaro mega.
Taa ĩtĩkunĩkagĩrwa na ndoo
(Mar 4.21-25)
16“Gũtĩ muntũ ũgwatagia taa amĩkunĩkĩra na ndoo kana amiiga rungu rwa gĩtanda. Amigaga antũ ĩgũrũ nĩkenda barĩa bagũtonya nyomba baũmba kwona werũ.
17“Gũtĩ ũntũ o na bũrĩkũ bwithe bũtĩkonanua werũni na gũtĩ bwaragua na ciri bũtĩkamenyeka.
18“Kwogu bwĩmenyagĩĩreni bũkĩthikĩrĩria kiugo kĩa Ngai, tontũ muntũ ũrĩa ũrĩ na into akongerwa jiĩngĩ, na ũrĩa ũtĩ najio nĩka agatunywa o na irĩa agwĩciiria arĩ najio.”
Gina wa Jesũ na ba mũruagina
(Mat 12.46-50; Mar 3.31-35)
19Rĩu gina wa Jesũ na ba mũruagina na Jesũ nĩ bathiire kĩrĩ we, ĩndĩ bakĩremwa nĩ kũmũkinyĩra nĩ bũrĩa antũ batĩkanĩte. 20Jesũ akĩrwa atĩrĩ, “Nyũkwe na ba mũruanyũkwe nĩ barũngi nja, bakĩenda gũkwona.”
21Ĩndĩ we akĩbeera atĩrĩ, “Antũ barĩa begujaga kiugo kĩa Ngai na bagakĩathĩkĩra nĩbo iya na bamũruaiya.”
Jesũ kũmaarĩria rũkũngi
(Mat 8.23-27; Mar 4.35-41)
22Ntukũ ĩmwe Jesũ na arutwa bae nĩbatũire ĩtarũni, nawe akĩbeera, “Tũriũkeni tũthi mũrĩmo ũrĩa ũngĩ wa ĩria.” Bakĩambĩĩria kũrĩũka. 23Barĩ rũgendoni kũu ĩriani Jesũ akĩgwatwa nĩ toro, akĩmama. Gũgĩcoka gũkĩgĩa kĩbubani, gĩgĩtindĩka rũjĩ ĩtarũni rĩkĩambĩĩria kwĩjũra rũjĩ, o akuĩ rĩorokera ĩriani. Jesũ na arutwa bakĩthĩrwa barĩ ũgwatini mũnene. 24Arutwa bakĩthi kĩrĩ Jesũ bakĩmũũkĩria bakĩmwĩra, “Mwathani, Mwathani, nĩ tũkũthira!”
Jesũ agĩũkĩra, agĩkania kĩbubani na mĩkuũko#8.24 mĩkuũko: Kũtherũka na gũkuthũka kwa rũjĩ ĩriani mĩnene ya ĩria. Kĩbubani gĩgĩtiga kurutana na ĩria rĩkĩmaarĩra. 25Agĩcoka akĩũria arutwa bae, “Nĩka wĩtĩkio bwenu bũrĩ kũ?”
Ĩndĩ bo bakĩĩgua ũkĩri na bakĩũrania barigarĩte, “Ũũ karĩ ũ, ũkwatha kĩbubani na ĩria na ikamwathĩkĩra?”
Jesũ kũragithia muntũ warĩ na nkoma
(Mat 8.28-34; Mar 5.1-20)
26Jesũ na arutwa bae nĩ bathiire nkinya ntũũra yetagwa Gerasa#8.26 Gerasa: Mandĩko mangĩ maugaga “Gadara”, namo mangĩ makauga “Gerigesa.” Raitha Mat 8.28, ĩrĩa yaarĩ mwerekana na Galili. 27Jesũ akuuma ĩtarũni agĩkinya ndĩ mpũmũ nĩ atirimirwe nĩ muntũ warĩ na nkoma, wa taũni nene ĩu. Muntũ ũu nĩ athirĩtie kagiita karaja atĩgwĩkĩra nguo, na atekaraga nyomba; atũũraga kũrĩa mbĩrĩra jiarĩ. 28Rĩrĩa muntũ ũu onire Jesũ akĩambĩĩria kuuga mbu, akĩgwa ndĩ mbere ya Jesũ na akiugĩĩria, “Jesũ Mwana wa Ngai Ũrĩa ũrĩ Ĩgũrũ Mũno, nĩmbi ũkwenda nani? Ndagũkaĩra ũtĩkambangaĩkie.” 29Muntũ ũu aaragia ũgu nĩũntũ Jesũ nĩ aarĩ akwatha nkoma iu jiume ndani yae. (Nkoma iu nĩ jiamũgwataga maita maingĩ, agekaraga emwoanie na nyororo na mpengũ magũrũ na njara; ĩndĩ agaituĩkangia na nkoma iu ikamwĩngĩĩria rwanda.)
30Jesũ akĩmũũria atĩrĩ, “Wĩtagwa atĩa?”
Muntũ ũu akĩmũcokeria, “Mbĩtagwa mbũtũ.” Aacokirie ũgu nĩũntũ nkoma irĩa jiamũtonyete jiarĩ nyingĩ. 31Nkoma iu igĩkaĩra Jesũ atĩkajiĩngĩrie ĩrimani rĩrĩa rĩtĩ mũthia.
32O au akuĩ nĩ kwarĩ na gĩkundi kĩa ngũrwe jiarĩjaga rwaruni rwa karĩma. Nkoma igĩkaĩra Jesũ ajiĩtĩkĩĩrie itonye ngũrweni iu, nawe akĩjiĩtĩkĩĩria. 33Nkoma ikiuma kĩrĩ muntũ ũu igĩtonya ngũrweni. Gĩkundi kĩonde kĩa ngũrwe gĩkĩthingithũkĩĩra ncurĩrani gĩkĩthũngĩra ĩriani, na ngũrwe iu ikĩũragwa nĩ rũjĩ.
34Rĩrĩa arĩthi ba ngũrwe iu bonire bũrĩa gwekara bakĩũra, bakĩthi bakĩaragia nteto iu mataũnĩni o na ntũũrani. 35Nabo antũ bakiuma kwao mĩjiĩ bakĩthi kwĩonera bũrĩa gwekarĩkĩte. Rĩrĩa bakinyire arĩa Jesũ aarĩ bakĩthĩra muntũ ũu nkoma jiarutĩtwe kuuma kĩrĩ we ekarĩte ndĩ magũrũni ma Jesũ, arĩ na nguo na arĩ na kĩongo kĩega. Bakĩgwatwa nĩ ũkĩri. 36Barĩa beonerete muntũ ũu warĩ na nkoma akĩragithua bakĩĩra antũ bau bũrĩa Jesũ amũragithirie. 37Ĩndĩ atũũri bonde ba mĩena ĩu yonde ya Gerasa bakĩĩra Jesũ aume kwao. Gĩtũmi nĩ atĩ nĩbagwatirwe nĩ ũkĩri bũnene mũno. Kwogu Jesũ agĩtũa ĩtarũni nĩkĩo acoke Galili. 38Muntũ ũrĩa waragithĩtue nkoma agĩkaĩra Jesũ amwĩtĩkĩĩrie ekaranie nawe.
Ĩndĩ Jesũ akĩrega, akĩmwĩra 39“Coka mũjiĩ kwenu; thi ũkamenyithie antũ maũntũ manene marĩa Ngai akũrũthĩrĩte.”
Muntũ ũu akiuma au akĩthi akĩanagĩĩra kunde ntũũrani ĩu bũrĩa Jesũ aamũrũthĩrĩte.
Jesũ kũragithia mwarĩ wa Jairũ na mũka ũrĩa waumaga ndamu
(Mat 9.18-26; Mar 5.21-43)
40Na rĩ, rĩrĩa Jesũ acokire mũrĩmo ũu ũngĩ wa ĩria, antũ bakĩmũgwata ũgeni nĩũntũ nĩ kĩamweteerete. 41Rĩu muntũ ũmwe wetagwa Jairũ, ũrĩa warĩ mũtongoria wa sĩnagogu, akĩja. Akĩĩgwĩthia ndĩ magũrũni ma Jesũ, akĩmũkaĩra athi kwae mũjiĩ. 42Gĩtũmi nĩ atĩ kaarĩ kae karĩa kaarĩ ka mĩaka ĩkũmi na ĩĩrĩ, kaarĩ akuĩ gũkua.
Na rĩrĩa Jesũ athiĩte kwa Jairũ, antũ nĩ bamwatĩkaga nteere jionde. 43Kũu kĩrĩndĩni nĩ kwarĩ na muntũ mũka ũmwe wekarĩte na mũrimũ wa kumwa nĩ ndamu kagiita ka mĩaka ĩkũmi na ĩĩrĩ,#8.43 Mandĩko mangĩ nĩmongarĩĩra: “Na nĩ athirĩtie into jiae jionde na mandagitarĩ.” ĩndĩ gũtĩ ndagitarĩ waũmbĩte kũmũragithia. 44Riu nĩ akuĩrĩrie Jesũ na mbarĩ ya nyuma, na agĩtongithia tũrigi twa nguo yae O rĩmwe ndamu ĩgĩtiga kuuma. 45Jesũ akĩũria, “Nũũ ũu wantongithia?”
Rĩrĩa antũ bonde bakaanire, Petero akĩmwĩra, “Mũrutani, ũnkĩũria ũgu atĩa na nobu antũ bagwatikire!”
46Ĩndĩ Jesũ akiuga, “Arĩ, kũrĩ muntũ atongithia; nkwĩgua inya yauma kĩrĩ ni.” 47Rĩrĩa muntũ mũka ũu onire akũmenyeka akiumĩra akinainaga, akĩĩgwĩthia magũrũni ma Jesũ. Akiumbũra mbere ya antũ bonde kĩrĩa gĩatũmĩte atongithia Jesũ, na bũrĩa akũmũtongithia aragiirie o rĩo. 48Nawe Jesũ akĩmwĩra, “Mwarĩ wakwa, gwĩtĩkia gwaku nĩku gwatũma ũragia. Thi na ũkiri.”
49Jesũ akĩaragia o ũgu, muntũ ũmwe agĩkinya aumĩte kwa mũtongoria ũu wa sĩnagogu, akĩthi kĩrĩ Jairũ akĩmwĩra, “Tiga gũtanga Mũrutani kaĩrĩ; mwarĩ waku agũkua.”
50Ĩndĩ rĩrĩa Jesũ egwire ũgu akĩĩra Jairũ, “Ũtĩkamake, ĩtĩkia akĩ, na mwarĩgu nĩ agũcoka mwoyo.”
51Rĩrĩa Jesũ akinyire mũjiĩ wa Jairũ atetĩkĩĩria muntũ o na ũrĩkũ atonya nyomba, o tiga Petero na Johana na Jakubu, na ĩthe na gina wa kaana. 52Antũ bonde ba mũjiĩ ũu nĩbarĩraga bagĩkaaga mũno, ĩndĩ Jesũ akĩbeera, “Tigani kũrĩra, mwarĩ tĩ mũkuũ, nĩka amami.”
53Bakĩmũthekeera, nĩũntũ nĩbamenyaga kaarĩ kau nĩ kaarĩ gakuũ. 54Ĩndĩ Jesũ akĩkagwata njara, agĩkera atĩrĩ, “Kaana, ũkĩra!” 55Kaarĩ gakĩriũka, gagĩũkĩra o rĩmwe. Jesũ akĩathana akiuga kanenkerwe gĩntũ gĩa kũrĩa. 56Nabo ajiari ba kaarĩ kau bakĩrigara mũno, ĩndĩ Jesũ akĩbakaania kwĩra muntũ o na ũrĩkũ bũrĩa gwekarĩka.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 8: LUKA
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
God's word open for all
©Bible Society of Kenya, 2021
