KORINTUS 1 11
11
1 #
Kor.1. 4:16; Plp. 3:17 Duduiaidon onu in inaidanku, ná doman akuoi dinumudui kon onu inta inaidan i Kristus.
Soaḷ koḷob in uḷu wakutu in moibada
2Pujionkubí totok in moiko sin umuran mokotorop kon i nakó. Bo onu inta sinundúku kon i monimu, umuran doman duduian monimu. 3Tongá ibogonku in bá kotaauan doman monimu in atorang mita kon bonu in jamaat. Tongguḷu i Kristus in ki Allah. Tongguḷu in ḷoḷaki in ki Kristus. Yo tongguḷu in bobay tuata in ḷoḷaki. 4Ḷoḷaki inta mosambayang ande inta mopoyaput in Habar Mopia nongkon i Allah kon tayowon intau mobarong bo mogi koḷob in uḷu, yo tua in mangaḻenea moningkuḻe kon i Kristus in sia. 5Tongá aka bobay bo mosambayang ande mopoyaput in Habar Mopia nongkon i Allah bo diá mogi koḷob in uḷu, yo tua in mangaḻenea diá hargaannea in ki buḷoinea ḷoḷaki inta nobaḻí tongguḷunea. Bobay tatua in naonda bo intau inta nokiḷogatdon. 6Sin podudui in kabiasaan kon jamaat, aka bobay bo doí mogikoḷob in uḷu yo maníka poki ḷogatdon in buoknea tua. Táe aka mokiḷogat ande mokigonsing domandon in sia, yo tua in notongkai bidon in mokopohinamai kon inia tontaní. Manangka intua sia in musti mogi koḷob in uḷu. 7#Kḻn. 1:26-27 Aka ḷoḷaki yo diábí nongonu aka diá mogi koḷob in uḷu, sin bayongan kaadaan bo kawasa i Allah in ontongonbí kon inia. Táe kahoromatan in ḷoḷaki ontongonbí kon bobay, 8#Kḻn. 2:18-19 sin ḷoḷaki in deemanbí inaidan nongkon bobay, táe bobaybí in inaidan nongkon ḷoḷaki. 9Bo ḷoḷaki in inaidan, deemanbí lantaran oyúon in bobay, táe bobaybí in inaidan lantaran oyúon in ḷoḷaki. 10Tuamai bá mopia in gina in malaekat mita, dá bobay in mustibí mogi koḷob in uḷu, saḷaku tanda kon sia tua in kon bonupabí in kawasa i buḷoinea. 11Umpaka natua in kabiasaan naton saḷaku intau Keresten, táe bobay in diábí mobiag aka diá in ḷoḷaki. Natua doman, ḷoḷaki in diábí doman mobiag aka diá in bobay. 12Sin umpaka inaidan nongkon ḷoḷaki in bobay inta muna, táe noiduduimai kon tua ḷoḷaki in noilahir bidon nongkon bobay; sin bayongan in yagi-yagi komintanbí nongkon i Allah.
13Raika monimu: Umpaka yo mopia in bobay inta mosambayang kon i Allah kon tayowon intau mobayong bo diá mogi koḷob in uḷu? 14Kinotaauan bidon naton komintan, kon aka ḷoḷaki bo buok moḷanggó yo diábí mopia. 15Táe aka bobay bo moḷanggó in buok, yo tua in tobatúbí kahoromatan kon inia, sin buok tatua in inogoi kon inia, sin pogoḻingoi kon uḷunea. 16Tongá aka oyúon in momayow kon soaḷ tanaa yo nanaa in pogumanku kita andeka jamaat mita i Allah ibanea, komintanbí tongá tobatú tatua in nobaḻí kabiasaan kon bonu in jamaat i Allah, diábí in ibanea mako.
Perjamuan i Tuhan
17Aka soaḷ moiduduimai naa, yo diábí dayowonku in moiko. Sin aka moyosipun mosambayang in moiko, yo deemanbí mokopoangoi kon inta mopia táe inta diábí mopia. 18Sin ain dinongogku, kon aka aindon moyosipun in moiko mosambayang saḷaku jamaat, yo tantúpabí doman oyúon in bobayowan kon sigad monimu. Bo iraiku kon totuubí in habar tanaa. 19Tongá oyúonbí doman in pianea kon tua, sinbá koontongandon in intau inta totu-totuu nobaḻí Keresten. 20Kon wakutu in moyosipun, moiko in deemanbí mogaid kon perjamuan i Tuhan. 21Sin wakutu in mongaan, moiko tumpaḷabí mogamá kon kaanonnea-kaanonnea, sahingga in oyúon in mokouḻí kon moiḻiu, táe oyúon doman in diá mokouḻí. 22Nongonu sin natuabí in aid monimu? Eta degá diá in baḷoi tontaní pongaanan bo ponginuman monimu? Andeka degá tumuodbí in moiko mokopohinamai kon jamaat i Allah bo mokopooyámai kon intau mita bogá? Naondapa degá in mopomangaḻe kon i monimu? Onupa in posingogku kon i monimu? Degá dayowonku in moiko? Aka oaid natua yo diábí duíonku!
23Sin onu inta ain sinundúku kon i monimu, yo nongkon i Tuhanbí intua komintan: kon doḷom tua, wakutu in ki Yesus, Tuhan naton motoyongdon posarakan, Sia in nogamá kon roti, 24bo naonda in sinambayangan-Nea in roti tatua poḷat binonsi-bonsig-Nea bo noguman, “Naa in awak-Ku inta posarakan kon i monimu. Aidai in naa sinbá umuran kotoropan monimu in Akuoi.” 25#Iḷn. 24:6-8; Yer. 31:31-34 Ná doman tua, naonda in nopaḷutdon mako nongaan, Sia in nogamá kon palo kobonu-bonu in anggur bo noguman, “Anggur tanaa in dodandianbí mobagu i Allah, bo dugú-Ku in mobaḻí tanda. Tuamai in pomuḷoi monginum kon nanaa, nonginumbí sin monorop kon i-Nakó.” 26Sin pomuḷoi in moiko mokaan kon roti tanaa bo monginum kon anggur tanaa, tua in mangaḻenea moiko in mopotaaudon in kinopatoian i Tuhan, modapot in mamangoi bui in Sia.
27Tuamai intau inta nokaan kon roti i Tuhan ande nonginum kon anggur i Tuhan, táe diá totu-totuu yo baradosaanbí kon i Tuhan inta ain noposarakan in awak bo dugú-Nea sin kopontingan in intau tatua. 28Manangka intua intau in mustipabí muna momirikisa kon awaknea bain tua bo motaau mokaan kon roti bo monginum kon anggur tatua. 29Sin aka intau inta nokaan kon roti andeka nonginum kon anggur, táe diá basí mopirisaya kon perjamuan tatua in noidoyonbí kon awak i Tuhan, yo oo bí kon nongaan bo nonginum in intau tatua, táe tongábí potarimaannea kon hukuman i Allah in aidnea tatua. 30Tuabí manangka in nobayong in kon sigad monimu in notakit bo diádon in ropot, bo nodapot doman kon oyúon in minatoi. 31Táe aka akuondon muna naton in aid mita naton inta diá mopia, yo diábí hukumon i Allah in kita. 32Táe aka hukumon i Allah, yo tua in didikan-Neabí kon i naton, sinbá diá hukumon in kita moyotakin in dunia naa.
33Tuamai uḻe utatku mita, aka moiko bo notobatú kon gina in mogaid kon perjamuan i Tuhan, yo musti mosioḷatan. 34Bo munapa mongaan kon baḷoi in batangan, sinbá diá ḷagi gogoyon. Sin aka mosi duduian in moiko, yo ibada monimu tua in mopiabí. Diábí mokouḻí kon hukuman i Allah in moiko. Tongápabí naa in insilanganku kon i monimu, ibanea mako in bain moiangoi bui akuoi.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
KORINTUS 1 11: INOMOG
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.