JAHJA 4
4
Samaria Jagamo Kodo
1Jahja ma ko Jesus etope-tai wedaba ebukai ma, me wedaba baptis etai ma mana kodo Parisi bagee juwita ko Tuhan epi.
2(Jesus kidaa baptis etai beu kidija, etope-taido ka to.)
3Okai kouja okai Judea dokoo jaikidokijake Galilea dokoo wo uwii.
4Okai Samaria dokoudaiga wokaato kai beu kai peu.
5Okai Samaria dokoo ka maki katouda eka ko Sichar dakii, Jakub jokame Jusuf kidi menita mude watija.
6Kouda kodaa Jakubja uwo komo. Jesus ita jaweete ee gajake kou uwo komo watija kodaa animakai, dagi epouda gaa.
7Tijake Samaria ka jagamo idaana uwo nogoune mei. Jesus eteete mana, „Uwo no-naimi,” etii.
8Etope-taido kou maki okogouda naija agijo ooda-uwitoojogo gaa kodaa.
9Tijake Samaria jagamo kodaa joko eteete mana, „Kawe dani tijake aki ki Jahudi me idaana ani uwo nadiimeege, ani ko Samaria ka jagamo no?” etii. Jahudi bagee kede Samaria bagee ma takadega beu kouja.
10Tijake Jesus wo eteete mana, „Kou danite Ugatameja niimita agijo epi naako, daana uwo kadiimeegi me kidi kii kidi kijoka egai naako, beu ma ko beu, aki maija okaapa ediimijake okaija gei tai uwo kani-toja kodaa,” etii.
11Jagamo kodaa wo eteete mana, „Ei, Tuhan, akeepa ko uwo no-motii agijo beu topa, daana kii uwo komo ki woja; no, kaija make gei tai uwo kodo nogou?” etii.
12„Iniija aijame Jakub kidi, uwo komo ki niimita me kidi ma ko aki ki ibo, mee? Okai kidaa maija uwo ki nota, daana okaija jokaaneido ma, munii agijoudo maija,” etii.
13Tijake Jesus wo eteete mana, „Meija kii uwo nopi naidi taitagi;
14kodeja meija anija menita ka uwo kodo nopi ko, imo to togoo naidi te taitagi. Anija menita uwo kodo okai duba puduu tijake ajii tai imo to togoo,” etii.
15Tijake jagamo kodaa eteete mana, „Tuani, uwo kodo ani naimidodou; ani uwo naidi te tijake, uwo joko te nogoune no,” etii.
16Tijake Jesus eteete mana, „Aku waka manaa-te-uwijake joko aamei,” etii.
17Tijake jagamo kodaa wo eteete mana, „Ani waka beu,” etijake Jesus eteete mana, „’Ani waka beu’ eneege kou ko maakidi.
18Jame idibi aki waka uwidou tita kouja, daana ito ko akeepa topi ka me kidi aku waka beu, kojoka akaa eneege kii ko maakidi,” etii.
19Tijake jagamo kodaa wo eteete mana, „Tuani, aki ki Ugatameja gokobaki tijawiidaiga wega-tai me kagaaga.
20Iniija aijaane muumaane kii waiko dimiida kiija migaakobe tei tita. Kodeja ikiija ka wegai ko, Jerusalim to me ka migaakobe tijaida ko,” etii.
21Jesus wo eteete mana, „Ei, jagamo, ani maakodo nagai. Putu naago kaita kojoka, ikii Enatobapa migaakobe etaita, kii waiko dimiida make ko beu, Jerusalim maija beu.
22Ikiija migaakobe eteiga kidi ikii ewo. Inii epi iniija migaakobe etai agijo, ajii tai mana epauto ko Jahudi tumaidaiga kouja.
23Kodeja putu naago kaita, daana ito kou maija putuuda keega, maakidi ka migaakobe ete-tai bagee kedaa kegepa ka ma, maakodo ka ma, Enatobapa migaakobe etaitai. Kou dani migaakobe etai bagee Enatobapa eubaate kodaa.
24Ugatame kidi Roh bokouto. Migaakobe etai bagee maija roh ka ma maakodo ka ma migaakobe etai beu kai peu,” etii.
25Tijake jagamo kodaa wo eteete mana, „Ani epi Messias meitagi mana (Keristus eebatita me kidi). Okai mepi ko utoma agijo utoma niti-niimaitagi,” etii.
26Jesus wo eteete mana, „Ani ki mana kaawegaate me kidi okai kii kidi,” etii.
27Okai kou gaa kodaa etope-taido kede mei. Jesus kidi jagamo kodo ma mana aawegai kouja okei ego takuu-takuu tai, kodeja me idaana ma „Magijo ubaate?” juwa, „Má mana wegaate?” juwa, egaado tai beu.
28Jagamo kodo uwaawe jaikidokijake maki okogoudaapa uwijake meidoopa eteete mana,
29„Mewei, edou no, anija kei titaido utoma nati-naimipi me na ki. Beu, mee? okai ki Keristus kidi,” etii.
30Tijake okei makiida make podomijake Jesus edou uwii.
31Okai kou gaa kodo etope-taido ediimeete mana, „Ei, Kuduu, ito ko nai,” etii.
32Kodeja okai wo eteete mana, „Aneepa naija agijo topa ani naine ikii ke gai beu agijo na ko,” etii.
33Tijake etope-taido okei kede wegaate mana, „Me idaana ka naija agijo jadoke-mepije?” wegai.
34Jesus eteete mana, „Anija naija agijo kou ko nabadikumita meja dimi ekowai kou, daana okaija kei tai agijo boko jaduwajawii kou.
35Beu, mee? ikiija ka wegai ko, Agoo wii ma umipa ko uta duwai wagi. Beu maa kou ani kitiine, peka wado dojake taida doumigidowei, ito ko enáá keega kouja duwaine kidi.
36Duwaja bagee kede duwata ageja motija, daana kotuu timakijake ajii tai imo to togoo wado goune. Kigii tija bagee ma duwaja bagee ma enaimo ideide akaate te-tijake.
37Kii wegaigai mana muto kii ko umina maa kou: Me ino ko kigii tijake me ino ko duwai.
38Ikiija kei tai beu agijo duwa-tijake ani kibadikumii. Me ino kei tijake ikii maija okeija kei teeteida wadoujo kai,” etii.
39Tijake Samaria ka bagee wedaba kou makiida Jesus maakidi egai, jagamo kodaa etita mana maida make, „Anija kei tita agijoudo utoma eni-naimipi,” etita mana kodo.
40Samaria bagee mejake okei wa ooto-tijake ediimai. Tijake kouda kodaa naago wija ootou.
41Tijake me abuma maakodo egai, Jesus kidaa mana kodo jajuwijake kouja.
42Tijake okei jagamo kodoopa eteete mana, „Ito ko akaa eneege mana to ko beu inii maakodo egai, kodeja inii kede juwijake epi keege, okai kidi makiida maki utoma ajii tai bokouto duwa-tai me kidi,” etii.
Kapernaum ka Ibo Kidaa Jokame Beu Jaawita
43Uno wija umijake Jesus podomijake Galilea dokoo uwii.
44Okai kidaa wegata kouja, „Gokobaki tijawiidaiga wega-tai me idaana ma beu okai kidaa makiida ibo ejaikai.”
45Galilea dokoo dakii tijake Galilea bagee ka ejakimakai, Jerusalim makiida ibo naago kodaa kei titaido jadojake kouja. Okei na ibo naago kodo dijo doune uwijake kouja.
46Kigeena ma okai Kana makijo, Galilea dokoo uwii, uwo kodo utaadijo awitaida kodaa. Kapernaum makijo ka ibo idaana jokame didi umina teetigo.
47Jesus Judea dokoo make Galilea dokoo mepi mana okai juwijake Jesus edou uwii, jokame didi jaojawe-tijake ediimaine, bokaine dani kouja.
48Tijake Jesus eteete mana, „Dou beu agijoudo ma, ego takuu-takuu agijoudo ma, ikii te dopa ko, ikii maakodo gai beu,” etii.
49Tijake kii ibo kidaa eteete mana, „Ei, Tuani, mei, ani joka kidi bokai beu gaa kodaa,” etii.
50Tijake Jesus wo eteete mana, „Aki uwii. Aki joka ija keegi,” etii. Me kidi Jesusja mana kodo maakodo egajake uwii.
51Okai ita uweetigo jakei te-tai bagee ma akado tai, jokame ija kipi mana doke-meta bagee kede.
52Tijake menoka didi beu kai okai egaado tijake joko eteete mana, „Geto meuka amo etigajake gobi beu keetegi,” etii.
53Tijake nakame kidi dimi wado gajake okai kou gaa kodo maija Jesusja kou dani etita kodo, „Aki joka ija keegi” etita mana. Okai kidi na maakodo gai, daana okaija uguwo maija.
54Kii ke wijaago ka dou beu agijo Jesusja kei tita, Judea dokoo make Galilea dokoo mejake.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JAHJA 4: EKG
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
