Marku 6
6
Jesu ngako asi amukelwi Nazareta
(Matewu 13:53-58; Luka 4:16-30)
1Jesu a to khukha konaho e tshumelela ditikoni kwawe, se vagondiswa vakwe ve mu londisa. 2Ngako di di hokile ditshiku da Sabbata, a to khata kugondisa disinagogani, se vathu votala, va nga mu engisa, va to xamala va txi kha vona: “Timhaka tiya a ti mana hani? Mbuzivi muni wona wuwa a nga ningwa ni sixamaliso si si mahwako ngu manza akwe, kani? 3Ina hi nga ene wuwa m'vati, mwanana wa Mariya, mwanawe Jakobe, ni Josi, ni Judha, ni Simoni, kani? Ina tindiyakwe kha ti nga ho hagari kwathu kani?” Se ve khuveka ngu ngene.
4 # Wona ni ka: Joh. 4:44. Kambe Jesu a ti khene kwawe: “Mprofeti kha kanyiswi, ngako i si nga ditikoni kwawe ni maxakani kwawe, ni nyumbani kwawe.” 5Konaho kha sikota kumaha txidiwukiso ni txa tximwetxo, hahanze ka valwali vokari, a nga va sanzeka manza, a txi va hanyisa. 6A to xamala ngu kuwona ti to vona kha va na likholo. Se a to tsimbilatsimbila a txi gondisa ka miti ya hafuhi.
Kurumwa ka Vapostoli va digumi ni vambidi
(Matewu 10:5-15; Luka 9:1-6)
7Ene a to dhana vapostoli va digumi ni vambidi, a txi khata ku va ruma, ngu vambidivambidi, a txi va ninga mtamo wa kuxula mimoya ya nzambwa. 8A txi va leleta ti to va si longi txilo txa nzila, hahanze ka ndonga dwe, hambi mbuva, hambi msava, hambi male ya kusungelelwa txiwununi. 9Aniko va na ambale masandazi mikondoni kwawe, kambe va si teki mabhaji mambidi. 10A txi va gela ku khene: “Ka nyumba yihi ni yihi mi no wulela, zumbani koneho, kala kuza mi huma. 11#Wona ni ka: Mith. 13:51. Ngako ka wukhalo wokari, va si mi amukeli, mwendo va si mi engisi, mbimo yi mi humako, huphutani lithulu la mikondo yanu ngu wufakazi wa ku va sola.” 12Se va di khukhile ve tsula, va to txhumayela ti to vathu va na hunduluke, 13se va txi tovela madhimoni o tala, va txi tota mafura valwali votala, va txi va hanyisa.
Kufa ka Johani Mubhabhatisi
(Matewu 14:1-12; Luka 9:7-9)
14 # Wona ni ka: Mat. 16:14; Mar. 8:28; Luk. 9:19. Ku ti ngako mfumeli Herodha a di pfite timhaka ta Jesu, nguko ditina dakwe di ti ni nduma ngutu, a to khene: “I Johani Mubhabhatisi a nga wuka ngu ka vakufa, ngu konaho mitamo yi thuma ngu ngene.” 15Vamwani va txi kha vona: “I Elija.” Vamwani va txi kha vona: “I mprofeti wa kufana ni vamwani vaprofeti.” 16Kambe Herodha, ngako a txi tiengisa a to khene: “I Johani wu ni nga mu wila msungo, a nga wuka ngu ka vakufa.”
17 # Wona ni ka: Luk. 3:19-20. Nguko ene Herodha a ti rumile vathu veya ñola Johani ve mu sekela mkorani, ngu mhaka ya Herodhiya, msikati wa Filipi, mwanawe, nguko a ti mu tekile. 18Se ka yoneyo mbimo, Johani a ti khene ka Herodha: “Kha ta lulama kuteka msikati wa mwananu.”
19Herodhiya a to wukela Johani, e lava ni ku m'daya, aniko asi sikoti. 20Nguko Herodha a ti thava Johani, ngu kuziva ti to ene i m'thu wo lulama ni wo sawuleka, kambe a ti ti mu vhikela. Mbimo yi a nga txi mu engisa, a ti thelwa mphume, aniko a ti mu engisa ngu kutsaka.
21Kambe di to hoka ditshiku da dinene, ahawa Herodha a nga mahela tinganakana takwe ni tinduna ta yimbi, ni va hombe va Galileya, m'buso wa kualakanya ditshiku da kuvelekwa kwakwe. 22Mwanana wa muhorana wa Herodhiya, a to wulela, a txi sinya e tsakisa Herodha ni va va nga ti khate nayo ha sakudyani. Se mfumeli a txi khene ka wule wa muhorana: “Ni kombele sotshe si u si lavako, ni na kuninga.” 23A to xambanya a txi khene: “Atxi u no kombela txona, ni na kuninga, hambi i di ku kubhandela mfumo wangu ngu hagari.” 24Se awu wa txihoranana a to huma, a txi ya khene ka mame wakwe: “Ni na kombela txani kani?” Ene a to xamula a txi khene: “Kombela msungo wa Johani Mubhabhatisi.” 25Konako a to tshumela ngu kukuluveta, a txi ta ka mfumeli, a txi ta kombela a txi khene: “Ni randa ku u txi ni ninga konakuwa, mbiyani muwa, msungo wa Johani Mubhabhatisi.” 26Mfumeli a to karateka ngutu, kambe e tandeka ku mu lambela ngu mhaka ya kuxambanya kwakwe, ni mhaka ya va a nga ti zumbile navo ha sakudyani. 27Se kunukunuko, a to ruma nduna e yi leleta ku yi na nehe msungo wa Johani. 28Se nduna yiya yi to tsula yi ya wila msungo wa Johani mkorani, yi txi neha msungo wakwe mbiyani, yi txi wu ningela ka txihoranana; se txona txi wu ningela ka mame wa txona. 29Se vagondiswa va Johani, ngako va di ti zivile, va to ya teka txirumbi txakwe, veya txi tshotsha diyivani.
Jesu e dyisa vathu vavangi
(Matewu 14:13-21; Luka 9:10-17; Johani 6:1-14)
30Se vapostoli va to ya tshangana masoni ka Jesu, va txi mu xawutela totshe ti va nga thuma ni ti va nga gondisa. 31Se ene a nje khene kwawe: “Ngonani kheno anu mokha, he tsuleni txiwulani, mi na ya humula kudotho.” Nguko i ti vathu vavangi, ava va nga txi tsulela ni va va nga txi ta, ahawa ka kuza vagondiswa va txi pwata ni mbimo ya kudya sakudya. 32Va to khukha ve tsula ngu ngalava ka wukhalo wa txiwula, vona vokha. 33Se ngako vavangi va txi va wona ni kukhukha, va to tekela ku kuziva amu va nga txi ya kona; ve huma ngu ka otshe madhoropa ve tsimbila ngu minenge, va txi ya ka wukhalo wule, ve va thangela kuhoka. 34Ngako a di humile ngu ngalavani, Jesu a to wona dibutho da vathu vavangi, a txi va pfela wusiwana, nguko va ti fana ni tinvuta to mbi na m'dyisi. Se e khata ku va gondisa timhaka to tala.
35Ngako ditambo di txi ya kuswani, vagondiswa vakwe va to tshuketela kwakwe va txi kha vona: “Wukhalo wuwa njiwula, ditambo ni dona di ya kuswani. 36Va tshumete veya tithembweni ni mitini, ayi ya hafuhi, veya ti xavela sakudya.” 37Jesu a to va xamula a txi khene: “Va heni anu sakudya.” Vona va ti kha vona kwakwe: “Ina hi nga tsula hi txi ya xava mapawu a mazana mambidi a madhenari, hi ta va ninga va txi dya kani?” 38Ene a to wotisa a txi khene kwawe: “Mi na ni mapawu mangahi kani? Tsulani mi ya wona.” Ku ti ngako va di ma woni, va to kha vona kwakwe: “Mtxhanu wa mapawu ni sihaka simbidi.” 39A to ruma kuva txi khalahatshisa vathu votshe amu ka mwasi wo hanya. 40Vona va to khalahatshela ngu mitxawa ya dizana, ni ya mtxhanu wa magumi. 41Jesu, ngako a di tekile mapawu a mtxhanu ni sihaka sa simbidi, a to gula maso e wona nzumani e si katekisa e bhandela mapawu e ninga vagondiswa vakwe, ti to vona va txi ma avela ka vathu. Ni sihaka sa simbidi kambe asi avete ka votshe. 42Votshe va to dya va txi khura. 43Se va to rolela ve tata digumi da sirundu ni simbidi ngu wururu wa mapawu ni wa sihaka. 44Ava va nga dya mapawu i ti 5.000 a vavamna.
Jesu e tsimbila txitimwi ka mati
(Matewu 14:22-33; Johani 6:15-21)
45Se Jesu kunukunuko a to kurumeta vagondiswa vakwe ti to ve wulela ngalavani ve thangela veya ka phuho ya mtxhatuko, ka kugwatama ni Bhetsayidha, na ene a di ngadi e tshumeta dibutho. 46Msana ka kuva a di va tshumetile, a to tsula eya khongela mmangoni. 47Ngako di di swite, ngalava yi ti hagari ka digova, se ene a ti sate ekha mabambe. 48Se e va wona va txi karateka ngutu ngu kutxungela, nguko moya wu ti va lambela. Ku ti ngako ku txi lava kumaha mbimo ya kuwonelela ka wumune ka wusiku, a to ta kwawe, na a txi tsimbila txitimwi ka digova a txi nga wo va pinda eya masoni. 49Kambe ngako va txi mu wona a txi tsimbila txitimwi ka digova va to pimisa ku njigono, se ve peka huwa. 50Nguko votshe, mbimo yi va nga mu wona, va to dhuka; kambe ene a to kuluveta e womba-womba navo, a txi khene kwawe: “Tsanani misana. Ngani!” 51Se a to wulela ngalavani kwawe, konako moya wu renga, se ve xamala ka kupindisa. 52Nguko va sanzi ku ti pfisisa ta txixamaliso txa mapawu, timbilu tawe i ti to banga.
Jesu a txi hanyisa valwali Genezareta
(Matewu 14:34-36)
53Ku ti ngako va di txhatukile linene, va to konama ditiko da Genezareta, se ve hoka wubambe. 54Ngako va di humile ngalavani vathu va kona va to kuluveta ve m'ziva. 55Va to tsimbila ka dotshe ditiko dile ve khata kurwalela valwali ngu mataho awe ve va yisa hayi ni hayi va engisako ti to Jesu waho. 56Kambe kotshe hawa a wulelako kona, mikhokholani ni madhoropani mwendo mu tithembweni, va ti ti veka va va lwalako, mitendelani, se ve mkombela ti to e va tumelela kugwesa, hambi i di wuziva wa nguwo yakwe. Se votshe va va nga txi mu gwesa, va ti hanyiswa.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Marku 6: BEC2016
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
