Marku 4
4
Txidinganiso txa wu a mphayako
(Matewu 13:1-9; Luka 8:4-8)
1Jesu a to engeta e gondisa hafuhi ni digova, se dibutho da hombe di sengeletana kwakwe, se ene a to wulela ngalavani, ayi yi nga ti digovani e khalahatsha ka yona. Vathu votshe va ti mabambe ka digova. 2Se a to va gondisa timhaka ta tingi ngu sidinganiso. Kugondisani kwakwe a va gete a txi khene:
3“Engisani. Mphayi a humile a txi ya phaya. 4Ngako a txi phaya, timwani timbewu ti to wela hanzila, se sinyana si ta, si ta dyela totshe. 5Timwani timbewu ti to wela marigwini, ahawa ka ku ambi na mafu amangi, se ti kuluveta kumila, nguko mafu ma ti sa tshima. 6Kambe ditambo, ngako di txi thola, tona ti to wuna, ti oma, ngu kupwata mikuluti. 7Timwani timbewu ti to wela mipani. Yona mipa, ngako yi txi kula, yi to ti kura, se ti tandeka kuveleka. 8Timwani timbewu ti to wela ka mafu amanene, ti txi mila, ti txi kula, ti txi veleka: Yimweyo yi veleka magumi mararu, yimwani mtxhanu wa magumi ni dimwedo, yimwani dizana.” 9Se a txi khene: “Awu a ku ni tinzeve to engisa, a na engise.”
Txigelo txa sidinganiso
(Matewu 13:10-17; Luka 8:9-10)
10Ku ti ngako a di phuho, ava va nga ti nayo ni va va digumi ni vambidi va to mu wotisa ngu mhaka ya sidinganiso. 11Se a txi khene kwawe: “Anu mi ningilwe kuziva misisalo ya Mfumo wa Txizimu, kasi ka vale va ku hahanze, totshe ti humelela ngu sidinganiso, 12ti taku,
‘Hambi i di kuwona ve wona
kambe va si wonisisi;
hambi i di kuengisa ve engisa
kambe va si pfisisi;
kasiku va si thuki ve hunduluka,
se ve divalelwa sionho.’ ”
Txhamuselo ya txidinganiso txa mphayi
(Matewu 13:18-23; Luka 8:11-15)
13A to engeta a txi khene kwawe: “Ina kha mi txi pfisisi txidinganiso txiya kani? Idito, se mi na pfisisa kutxani sotshe sidinganiso kani? 14Mphayi a phaya dipswi. 15Ava va ku hafuhi ni nzila, ahawa dipswi di nga phaywa kona, ngu vale va ku, ngako va di di pfite, Sathani e kuluveta a txi ta kwawe, a ta va tekela dipswi di di nga phaywa timbiluni kwawe. 16Ngu toneto, timbewu ti ti nga phaywa marigwini ngu vale va ku, ngako va di di pfite dipswi, ve kuluveta ku di amukela ngu kutsaka. 17Aniko kha va nga ni mikoloti vapune; mba mbimonyana dwe; se ngako dikhombo ni kuxaniswa si txi va humelela, ngu mhaka ya dipswi, va kuluveta ve rereka. 18Atiya ti nga phaywa mipani, ngu va va engisako dipswi, 19kambe kukhutalela sa mafu awa, ni kukanganyiswa ngu tithomba, ni kunavela ka silo simwani, ku txi welela vona, ku txi kura dipswi, se di si veki mihando. 20Ati ti nga phaywa ka mafu amanene, ngu va va engisako dipswi, ve di amukela, se ve veleka mihando, mbewu yimweyo yi veleka magumi mararu, yimwani mtxhanu wa magumi ni dimwedo, yimwani dizana.”
Mthumo wa dilambu
(Luka 8:16-18)
21 # Wona ni ka: Mat. 5:15; Luk. 11:33. A to engeta a txi khene kwawe: “Dilambu, ina di nehwa ku ta vekwa hahatshi ka txirundu mwendo hahatshi ka m'bhedhu kani? Ina kasi kha va di nehi ve ta di veka ha phandeni kani? 22Nguko kha ku na txilo txi ku kusisalani, txi na ku ambi wonekiswa; kambe kha ku na txilo txi txi nga tumbetwa, txi no mbi tumbulwa. 23M'thu ngako a di ni tinzeve ta kuengisa a na engise.” 24#Wona ni ka: Mat. 7:2; Luk. 6:38. A to engeta a txi khene kwawe: “Riyani tinzeve ka ti mi ti engisako. Mpimo wu mi pimelako vamwani ngu wona, na nanu mi na pimelwa ngu wona ngu Txizimu, se mi na engetelwa. 25Nguko awu a ku ni txo maha, a na engeta e ningwa, se awu a singako ni txilo, hambi txi a ku natxo, a na tekelwa.”
Txidinganiso txa mbewu
26E engeta a txi khene:
“Mfumo wa Txizimu wu fana ni m'thu wu a nga rinza mbewu mafuni. 27Se hambi a di otete mwendo hambi a di wukile, mitshikari ni wusiku, mbewu yona ya mila yi txi kula, na ene asi ti zivi. 28Mafu mapune ma milisa mbewu. Kukhata kuhuma ditshina ngu msana ku rumbuka diphumbu, se ngu magwito kuvelekwa diphumbu do tala ngu timbewu. 29Se siyalo ngako si di vitute, kunukunuko va wuletisa sikela, nguko se i nyango ya kuelula.”
Txidinganiso txa mbewu ya txinapi
(Matewu 13:31-32; Luka 13:18-19)
30E engeta kambe a txi khene: “Mfumo wa Txizimu hi na wu fanisa ni txani? Hi na wu kombisa ngu txidinganiso muni kani? 31Wu fana ni mbewu ya txinapi, ayi i ku ya yidotho ka timbewu totshe ta mafu. 32Kambe ngako yi di phayilwe, ya kula yi pinda mindonga yotshe ngu kukula, yi va ni madhavi a hombe ahawa ka kuza sinyana sa nzumani si nga aka mtsudini ka yona.”
Mthumo wa sidinganiso
(Matewu 13:34-35)
33E va txhumayela dipswi da Txizimu ngu sidinganiso so tala, nga ti va nga txi sikotisa tona ku di pfisisa. 34Kha womba mhaka kwawe, hahanze ka kumaha ngu sidinganiso. Se ngako va di phuho, a ti ti txhamusela totshe timhaka ka vagondiswa vakwe.
Jesu ngako a txi emisa txihuhuri
(Matewu 8:23-27; Luka 8:22-25)
35Ngu donedo ditshiku, ni minova, a ti khene kwawe: “He txhatukeni hi ya ka yimwani phuho.” 36Ku ti ngako va di siyite dibutho, va to mteka ngu ngalava yi ene a nga ti ka yona, se koneho ku ti ti ho timwani tingalava. 37Se ku so vhiluka nkutxu wa diphuho da hombe, mavimbi me wulela ngalavani, yi za yi lava kutala. 38Jesu a ti txihondoni ka msana ka ngalava a di otete ha txikhigeloni. Se vona ve mu wusa va txi kha vona kwakwe:
“M'gondisi, khu khatali ngu ngathu ngako hi txi lova kani?” 39Se ene a to wuka e dhusa diphuho, a txi khene ka digova:
“Malala, u txi dwe!” Se diphuho di renga, se ku va ni kudikha ka hombe. 40Se a txi khene kwawe:
“Mi thavisa tiya ngu txani kani? Kha mi nzi kuva ni kukholwa kani?”
41Se vona va to telwa ngu kuthava ka hombe, ve gelana va txi kha vona:
“I mani ene wuwa, waku hambi diphuho ni linene si mu engisa kani?”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Marku 4: BEC2016
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
