Johani 9

Kuhanyiswa ka wu a nga velekwa i di dibhofu

1Ngako Jesu a txi pinda, a to wona m'thu wa dibhofu, kukhukhela kuvelekwani kwakwe. 2Se vagondiswa vakwe va to mu wotisa, va txi kha vona: “M'gondisi, i mani a nga onha, ngene mwendo mbaveleki vakwe, ku kala e velekwa i di dibhofu kani?” 3Jesu a to va xamula a txi khene: “Hi nga ene a nga onha, hambi ni vaveleki vakwe; atiya ti mahekile kasi kuwonekiswa mithumo ya Txizimu ngu ngene. 4Ta laveka ti taku ani ni maha mithumo ya wule a nga ni ruma, na i di ngadi mitshikari; wusiku wata, ahawa m'thu asi sikotiko kuthuma txilo. 5#Wona ni ka: Mat. 5:14; Joh. 8:12. Ngako ni ku ngadi ho ha ditikoni, ni liwoningo la ditiko.” 6A di wombile tiya, a to thura lure hahatshi, e maha ndope ngu lure, e tota ngu yona maso a dibhofu dileya; 7e di gela ku khene: “Tsula u txi ya samba dizivani ka Silowame (ti ti wombako ku ‘Txirumwa’).” Ti di mahile eto, ene a tsute eya samba, se e wuya a txi wona. 8Sekoko vaakelani vakwe ni vale va nga ti m'wonile ti to a hanya ngu kukombela, va to womba va txi kha vona: “Ina hi nga ene wule a nga ti khalahatshile e kombela kani?” 9Vamwani va txi kha vona: “Ngene wuwa.” Aniko vamwani va txi kha vona: “Wo fana nayo.” Se ene a nje kutiangulela, a txi khene: “Ngani.” 10Sekoko, va txi mu wotisa, va txi kha vona: “Nji txani txi nga maheka, kasiku maso ako me mana kuwona kani?” 11Ene a xamute a txi khene: “M'thu wule a dhanwako ku i Jesu, a to maha ndope e ni tota ngu yona mu ka maso, e ni gela tiya: ‘Tsula dizivani ka Silowame, u txi ya samba.’ Se konako ni to tsula ni ya samba, se ni khata kuwona.” 12Vona va to womba va txi kha vona: “Ahani ene?” Ene a to xamula a txi khene: “Kha ni tizivi.”

13Se va to mteka awule i nga ti dibhofu, ve mu yisa ka Vafarisi. 14Kambe ditshiku di Jesu a nga vhuva ngu dona ndope e mu tula maso, i ti ditshiku da Sabbata. 15Se Vafarisi va to engeta kambe ve mu wotisa ti to ti mahisile kutxani kumana kuwona kani; ene a to womba a txi khene: “A to ni tota ndope mu ka maso, ni txi ya samba, se konkuwa na wona.” 16Sekoko vamwani Vafarisi va to womba va txi kha vona: “Awuwa m'thu hi nga wa ka Txizimu, nguko kha veketi Sabbata.” Vamwani va txi kha vona: “Ti nga mahisa kutxani ka m'thu wu i ku muonhi, kumaha sidiwukiso siya kani?” Se va to khata kuphikizana ngu txawe. 17Va to engeta kambe ve womba ka dibhofu, va txi kha vona: “Awe u wona txani ngu wule a nga kutula maso kani?” Ene a va xamute a txi khene: “Mprofeti.”

18Hambi keto, Vajudha kha va kholwa ti to ngu ditshuri ene i ti dibhofu ni ti to a nga va a di tulekile maso, kala kuza ve dhana vaveleki vakwe wule se a wonako. 19Va va wotisile va txi kha vona: “Ngene wuwa mwanana wanu, mi ku khanu a velekilwe i di dibhofu kani? Ti mahisile kutxani kumana kuwona kani?” 20Se vaveleki va va xamute va txi kha vona: “Ha tiziva ti to awuwa ngene mwanana wathu, ni ti to a velekilwe i di dibhofu. 21Aniko ati ti nga mahisa tona kala a txi mana kuwona, kha hi ti zivi, hambi ni wule a nga mu tula maso, kha hi m'zivi. Nene mbwa hombe, mu wotiseni, a na ti xamulela apune.” 22Vaveleki vakwe va wombisile tiya ngu kuthava Vajudha. Nguko vona Vajudha va ti langanile tito, ngako m'thu wokari a txi womba ti to Jesu ngene Mesiya, a na tovelwa disinagogani. 23Ngu toneto, vaveleki vakwe va nga womba va txi kha vona: “Nene mbwa hombe, mu wotiseni, a na ti xamulela apune.”

24Ka wumbidi, va to engeta ve m'dhana m'thu wule i nga ti dibhofu, va txi kha vona kwakwe: “Dhumisa Txizimu! Athu ha tiziva ti to eyo m'thu muonhi!” 25Kambe ene a xamute a txi khene: “Ati to muonhi, ani kha ni tizivi; mhaka yimweyo ni yi zivako ngu yiya ya ku ani ni ti dibhofu, aniko se na wona,” 26Va to engeta kambe va txi kha vona: “A to kumaha txani Ene kani? A mahisile kutxani ku kutula maso kani?” 27Ene a va xamute a txi khene:

“Ni wombile, mi txi tiengisa, i mhaka muni mi lavako ku tiengisa kambe kani? Kasi na nanu mi lava kumaha vagondiswa vakwe kani?” 28Sekoko va to khata ku mruketela, va txi kha vona:

“Mgondiswa wakwe ngawe wekha, athu hi vagondiswa va Mosi. 29Ha tiziva ta tinene ti to Txizimu txi wombawombile ni Mosi, kambe awu kha hi ti zivi ti to a ta ngu hani.” 30Se mu'thu wule a to ti angulela a txi khene: “Ta xamalisa ngutu kha ditshuri tito, anu kha mi m'zivi emo a tako ngu kona, na kasi ngene a nga ni tula maso. 31Kambe ha tiziva ti to Txizimu kha txi engisi vaonhi; aniko awule a txi khozelako, a txi maha kuranda ka txona, eyo txona Txizimu txa mu engisa. 32Kha hi zivi ku tipfa ti to nombwe wokari a tute maso m'thu wo velekwa i di dibhofu. 33Idiku Ene i ti si nga wa Txizimu, nga a sa sikota kumaha txilo.” 34Se vona va txi mu angula, va txi kha vona: “U veleketwe txionhoni, ngu wutumbu wako wotshe, se u lava ku hi gondisa kani?” Konaho va to mu humisa hahanze.

35Jesu a ti engisile ti to va mu humisile hahanze, se ngako a di manani nayo, a to mu wotisa a txi khene: “Wa kholwa ka Mwanana wa M'thu kani?” 36Se ene a txi khene: “Ngu mani, Mkoma, kufela ku ni kholwa kwakwe kani?” 37Jesu a nje khene: “Awe se u mu woni; ngene wu a wombawombako ni nawe,” 38Ene a to xamula a txi khene: “Na tumela, Mkoma!” Se a to khizama, a txi mu khozela.

39Konaho Jesu a to womba a txi khene: “Ani ni tete ku ta lamula ha ditikoni, kufela ku ava va si woniko ve mana kuwona, ani vale va wonako ve maha mabhofu.” 40Se Vafarisi vokari, va nga ti kumweko nayo, ngako va di engisile tiya, va to mu wotisa, va txi kha vona: “Ina hi mabhofu nathu kani?” 41Jesu a to va xamula, a txi khene: “Idiku kha mi nga mabhofu, nga mi si nga ni mnandu. Aniko ngako mi ku khanu: ‘Ha wona!’ Ngu toneto, txionho txanu txi namarete.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Johani 9: BEC2016

Highlight

ಶೇರ್

ಕಾಪಿ