Johani 5

Jesu a txi hanyisa txidiya kona Bhetesdha ngu Sabbata

(Matewu 14:13-21; Marku 6:30-44; Luka 9:10-17)

1Msana ka toneto, ku to mahwa m'buso wokari, wa Vajudha, se Jesu e kwela Jerusalema. 2Aniya Jerusalema ku ti ni diziva do sambela ka dona, hafuhi ni Txike txa Tinvuta, adiya di dhanwako ngu Txihebheru ku i Bhetesdha. Diziva diya di ti ni mtxhanu wa sike. 3Ka sona sike sileya ku ti zumbile dibutho da hombe da valwali, mabhofu ni vo khwita ni va kuoma sihango, na va txi verela kuvhiluka ka mati. 4Nguko, ngelozi yi ti txhikela dizivani ngu mbimo yokari, yi ta vhilusa mati; se awu a nga txi thanga ene e wulela, na mati ma di ngadi kuvhiluswa, a ti ti hanyiswa ka wulwati wakwe, hambi wuhi ni wuhi.

5Se a ti ho konaho m'thu wu a nga lwala magumi mararu a malembe ni mtxhanu ni mararu. 6Jesu, ngako a txi mu wona a di otete, ngu kuziva ti to i kale a txi lwala, a to khene kwakwe:

“Wa ti lava kuhanyiswa kani?”

7Mlwali a to xamula a txi khene:

“Mkoma, kha ni nga ni m'thu wo ni beta dizivani, mbimo yi mati ma khatako kuvhiluswa; kambe na ni di ngadi ni txi ya kona, mmwani e ni thangela e kwitima.”

8Jesu a to khene kwakwe:

“Khukha, u teka ditaho dako u txi tsula.”

9Se kunukunuko, m'thu wule a to hanyiswa, e teka ditaho dakwe, a txi tsula. Aniko ditshikudo i ti Sabbata. 10Sekoko Vajudha va txi kha vona ka wu a nga hanyiswa:

“Khu nga ni fanelo yo rwala ditaho dako ngu ditshiku da Sabbata.”

11Ene a to xamula a txi khene:

“Awu a nga ni hanyisa, ngene a nga ni gela ku khene: ‘Teka ditaho dako u txi tsula.’ ”

12Vona va to mu wotisa va txi kha vona:

“I mani eneyo a nga khene: ‘Teka ditaho dako u tsula kani?’ ”

13Aniko awu a nga hanyiswa a ti si mu zivi, nguko Jesu a ti khukhile hagari ka dibutho di di nga ti konaho.

14Msana ka tiya, Jesu a to mu mana Dithepeleni a txi khene kwakwe:

“Wa ti wona, u hanyisilwe; u nga engete u txi onha, kasiku di si ku humeleli dikhombo da hombe kupinda di do thanga.”

15M'thu wule a to gela Vajudha a txi khene i Jesu a nga mu hanyisa. 16Ngu konaho, Vajudha va to khata kuvengela Jesu, ngukuva a di mahile tile ngu ditshiku da Sabbata.

17Aniko Jesu a to va xamula a txi khene:

“Tate wangu a ngadi a txi thuma ni konkuwa, nanani na thuma.”

18Ngu toneto, va to xota ku m'daya, i si nga ngu mhaka ya kundaka mlayo wa Sabbata dwe, aniko ngutu-ngutu ngu kuwa a nga khene Txizimu i Tate wakwe ngu wutumbu, e ti dinganisa ni Txizimu.

Mtamo wa Mwanana wa Txizimu

19Jesu a to xamula a txi khene kwawe:

“Ngu ditshuri, ngu ditshuri, na mi gela ku khani: Mwanana ene apune kha sikoti kukhata e thuma txilo, hahanze ka tile a nga ti wona ti txi thumwa ngu Tate wakwe; nguko totshe ti ti nga mahwa ngu Tate, Mwanana a ti mahisa toneto. 20Nguko Tate wa randa Mwanana, wa mu kombisa totshe ti a ti mahako; se a na mu kombisa mithumo ya hombe kupinda yiya, kasiku mi txi xamala. 21Nga kuwa Tate a wusako vafi e va hanyisa, nene Mwanana wa hanyisa ava a va randako. 22Tate kha lamuli m'thu ni wammweyo, aniko a ningile Mwanana kulamula kotshe. 23Kasiku votshe ve thava Mwanana, nga ti va thavisako tona Tate. Awu asi thaviko Mwanana, kha thavi ni Tate wu a nga mruma.”

24“Ngu ditshuri, ngu ditshuri, na mi gela ku khani: Awu a engisako dipswi dangu, ni kukholwa ka wu a nga ni ruma, ana ni wutomi wo mbi guma, se kha na mbi ngadi e ta kulamulwani, aniko a humile kufani e wulela wutomini. 25Ngu ditshuri, ngu ditshuri, na mi gela ku khani: Yata mbimo, kambe yi hokile konkuwa, ayi vafi va no engisa dipswi da Mwanana wa Txizimu, se ava va no di engisa va na hanya. 26Kufana ni kuwa Tate i ku txisima txa wutomi ngu toneto a ningile Mwanana kuva i di txisima txa wutomi nene. 27Msana keto, a mu ningile mtamo wo lamula, nguko ene i Mwanana wa M'thu.

28Mi nga xamaleni, ngu timhaka tiya: Nguko ya hoka mbimo, ayiya votshe vale va ku mayivani va no engisa dipswi dakwe; 29Se ava va nga maha ta tinene, va na wukela kuya kuhanyani ko mbi guma; ani ava va nga maha to biha, va na wukela kuya kusungwani.”

Ava va fakazelako Jesu

30“Ani ngu kwangu kha ni sikoti kumaha txilo, ani ni lamula madingano ni ti ni ti engisako; se kulamula kwangu ku lulamile, nguko kha ni lavi kumaha kuranda kwangu, aniko ni lava kumaha kuranda ka wu a nga ni ruma.”

31“Ngako ni txi ti fakazela nipune, wufakazi wangu hi nga wa ditshuri. 32Wa ho wu a ni fakazelako, kambe na tiziva ti to wufakazi wu a wu mahako ngu ngani, mbwa ditshuri. 33#Wona ni ka: Joh. 1:19-27; 3:27-30. Mi rumile mitumi ka Johani, se ene a mahile wufakazi wa ditshuri. 34Ngako i di ani, kha ni amukeli wufakazi ka m'thu; aniko ni wombisa tiya, kasiku mi txi hanyiswa.

35Johani i ti liwoningo li li turako, li woningako. Se anu mi randile kutsakela kuwoninga kwakwe ngu mbimoanyana. 36Kambe ani nina ni wufakazi wa hombe ngutu kupinda wa Johani: I mithumo yi Tate a nga ni ninga kasiku ni yi maha. Mithumo yi ni yi mahako, ngu yona yi ni mahelako wufakazi wa ti to ni rumilwe ngu Tate. 37#Wona ni ka: Mat. 3:17; Mar. 1:11; Luk. 3:22. Nene Tate wu a nga ni ruma, a mahile wufakazi ngu ngani. Anu txima kha mi zivi kupfa dipswi dakwe, hambi ni kuwona txiemo txakwe ni ditshiku ni da dimwedo. 38Ni dipswi dakwe kha di zumbi kwanu, nguko kha mi kholwi ka wu a nga mruma. 39Anu mi wonisisa Mibhalo ngu kualakanya tito, mi na mana wutomi wo mbi guma ka yona, kasi ngu yona yi ni fakazelako. 40Aniko anu kha mi tumeli kuta kwangu, kasi kumita mana wutomi.”

41“Hi nga ngu ka vathu ni amukelako wudhumo. 42aniko ani na mi ziva kha kwati, anu kha mi nga ni lirando la Txizimu timbiluni kwanu. 43Ni tile ngu ditina da Tate wangu, aniko kha mi ni amukeli. Ngako a txi ta mmwani ngu ditina dakwe, mi na mu amukela. 44Mi nga kholwisa kutxani, anu mi dhumisanako ngu txanu, mi si laviko wudhumo wu wu tako ngu ka Txizimu txi i ku tximwetxo dwe. 45Mi nga pimiseni ti to ngani ni no ya mi mangalela masoni ka Tata; awu a no ya mi mangalela i Mosi, awu anu mi thembako ene. 46Idiku mi ti ko kholwa ka Mosi, nga mi ndi na kholwa ni kwangu, nguko ene a bhate ngu timhaka tangu. 47Aniko ngako mi si kholwi ka Mibhalo yakwe, mi nga kholwisa kutxani ka mapswi angu kani?”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Johani 5: BEC2016

Highlight

ಶೇರ್

ಕಾಪಿ