Johani 2

Jesu a txi ya ka mtxhadho wa Kana

1Ngu ditshiku da wuraru, kumahilwe mtxhadho Kana ka Galileya. Se a ti ti ho koneyo Mame wa Jesu. 2Jesu nene a ti rambilwe kona mtxhadhoniyo kumweko ni vagondiswa vakwe. 3Ku ti ngako vhinya yi di gumile, Mame wa Jesu a to mu gela ku khene:

“Kha va nga ni vhinya.”

4Aniko Jesu a ti khene kwakwe:

“Wamsikati, mhaka yako ni nani ngu yihi kani? Txikhati txangu kha txi nzi kuhoka.”

5Se Mame wakwe a to gela sithumi, a txi khene:

“Mahani totshe ti a no mi gela.”

6Ti ti tsikaretilwe konaho mtxhanu wa tifuko ni yimweyo, ta mraka, ngu mhaka ya kusamba, madingano ni kuruma ka mlayo wa Vajudha. Yimwani ni yimwani ka tona yi ti tatwa ngu mipimo yimbidi mwendo yiraru ya so thelwa. 7Jesu a to va gela ku khene:

“Ti tateni ngu mati.” Se vona va ti tatile ti txi fi. 8Msana keto, a ti khene kwawe:

“Konkuwa, rekani mi txi ya ninga mthangeli wa m'buso.”

Se vona ve ma yisa kwakwe. 9Mbimo yi mthangeli wa m'buso, a nga tshurumba mati ale ma nga hindulwa me mahwa vhinya, ene asi ti zivi ti to vhinya yiya yi ta ngu hani; aniko ti txi ziwa dwe ngu sithumi, si si nga reka mati. Konaho mthangeli a to dhana mteki, 10a txi mu gela ku khene:

“Votshe vathu va thanga ngu vhinya ya yinene ve yi humisa, se ngako va di sete ta tinene ava va nga rambwa, ngu kona va humisako yo va i si nga ya yinene ngutu. Kambe awe u veketile vhinya ya yinene kala ayi mbimo!”

11Makhato awa a sidiwukiso, Jesu a ma mahete Kana ka Galileya, e komba wudhumo wakwe, se vagondiswa vakwe va to kholwa kwakwe.

12 # Wona ni ka: Mat. 4:13. Msana ka tiya, Jesu a to relela eya Kapernawume, ene ni mame wakwe ni vanawe ni vagondiswa vakwe. Va ti ya zumba kona masiku madotho.

Jesu a txi sawulekisa Dithepele

(Matewu 21:12-17; Marku 11:15-19; Luka 19:45-48)

13Pasika ya Vajudha yi ti hafuhi, se Jesu a to kwela Jerusalema. 14Dithepeleni, a to ya mana vathu va va xavisako tihomu ni tinvuta ni situvani, ni va va txitxako timale va di zumbile konamo. 15Ku ti ngako a di mahile txisepu ngu tingoti, a to va tovela votshe Dithepeleni, ni tinvuta ni tihomu; a txi hangalasa ni male ya vale va bhindulako, e retha ni timeza tawe ti wela. 16A txi gela va va xavisako situvani a txi khene: “Thavisani sotshe siya hawa; mi nga tekeni nyumba ya Tate wangu mi yi maha nyumba ya mabhindu.” 17#Wona ni ka: Mas. 69:9. Se vagondiswa vakwe va to alakanya ati ti nga ti bhatwe, taku: “Kupandisekela nyumba yako ku na ni dya.”

18Se Vajudha va to womba-womba, va txi kha vona kwakwe:

“Njikombiso muni u hi kombisako ngu txona ti to u na ni mtamo wa kumaha toneto kani?”

19 # Wona ni ka: Mat. 26:61; 27:40; Mar. 14:58; 15:29. Jesu a to xamula a txi khene:

“Khundumusani Dithepele diya, ani ni na di wusa ngu masiku mararu.”

20Se Vajudha va txi kha vona:

“Dithepele diya di akilwe ngu mune wa magumi a malembe ni mtxhanu ni dimwedo, se awe u khawe u na di wusa ngu masiku mararu kani?”

21Aniko ene a ti ti womba ngu dithepele da mmidi wakwe. 22Ngu toneto, mbimo yi a nga wuka ngu ka vakufa, vagondiswa vakwe va to khumbula ti to a va gete mhaka yiya; se ve kholwa ka Mibhalo ni ka dipswi di di nga wombwa ngu Jesu.

Jesu wa tiziva ti vathu va pimisako tona

23Ene a di ngadi Jerusalema, ngu mbimo ya m'buso wa Pasika, vathu vavangi va to kholwa ditinani kwakwe, ngako va nga txi wona sixamaliso si a nga txi si maha. 24Kambe Jesu kha va themba, nguko a ti va ziva votshe, 25i ti si nga wolava kumaha ngu kugelwa ta m'thu, nguko ene a txi tiziva ti ti ku timbiluni ka vathu.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Johani 2: BEC2016

Highlight

ಶೇರ್

ಕಾಪಿ