Mithumo 9

Kuhunduluka ka Sawule

(Mithumo 22:6-16; 26:12-18)

1Kambe Sawule, ngukuva a di ngadi ni mahika a kubavela kudaya vagondiswa va Mkoma, a to tsula ka mphaxeli wa hombe, 2eya kombela kwakwe mapasi awa ma nga bhalelwa masinagoga a Dhamasku, ti to ngako a txi ya mana koneyo vathu va Nzila yiya, vavamna mwendo vavasikati, e va yisa Jerusalema, va di sungilwe. 3Ngako a di ngadi hagari ka kutsimbila, hafuhi ni Dhamasku, kunukunuko kukhanya ka kuta ngu nzumani ku to mu woninga. 4Se a to wa hahatshi, e pfa dipswi di txi: “Sawule, Sawule, u ni xanisela txani?” 5Se ene a to khene: “Ngawe mani, Mkoma kani?” Mkoma a txi khene: “Ngani Jesu, ngani wu awe u mu xanisako. 6Aniko khukha u txi wulela didhoropani, se u na gelwa ti u fanelako ku ti maha.” 7Kambe majaha awa ma nga ti nayo ma ti emile ngu kuwika misana, ngu ku ma nga ti ko pfa dipswi dwe, ma si woni m'thu. 8Se Sawule a to khukha ngu hahatshi, e tula maso, kambe asi nga ngadi e wona. Va to mu ñoleta ngu diwoko ve mu wuleta Dhamasku. 9Se ku txi pinda masiku mararu na asi woni, asi dyi, asi seli txilo.

10A ti ti ho kona Dhamasku mgondiswa wu a dhanwako ku i Ananiya; se Mkoma a to m'dhana ngu txiwoniso, a txi khene: “Ananiya!” Ene a txi orovela a txi khene: “Ni ho hawa, Mkoma.” 11Mkoma a txi khene kwakwe: “Khukha u tsula ka nzila yi yi dhanwako ku i ‘Nzila yo lulama’, u ya wotisa, nyumbani ka Judha, m'thu wu a dhanwako ku i Sawule wa Tarso; ene ndiyo wa khongela; 12se ene ngu txiwoniso a woni m'thu wu a dhanwako ku i Ananiya, a txi wulela e m'sanzeka manza, kasiku e tshumela e wona.” 13Kambe Ananiya a to xamula, a txi khene: “Mkoma, ni engisile vathu votala, va txi womba-womba ngu m'thu wuwa, ve xawutela wotshe wubihi wu a nga wu maha ka vasawuleki vako va Jerusalema. 14Se ahawa a tile a di ningilwe mtamo ngu vaphaxeli va hombe, wo sungelela votshe va va dhumisako ditina dako.” 15Kambe Mkoma a ti khene kwakwe: “Tsula, nguko awuwa, ngu txona txiya txi ni nga ti sawulela txona, kasiku hokisa ditina dangu ka vamatiko, ni ka mfumeli, ni ka vanana va Israyeli. 16Ani nipune ni na mu kombisa ti a fanelako kuxanisekisa tona ngu mhaka ya ditina dangu.” 17Ananiya a to tsula eya wulela nyumbani e msanzeka manza, a txi khene: “Sawule, mwanathu, Mkoma Jesu wu a nga ti wonekisa kwako hanzila, yona yi u nga ta ngu yona, ngene a nga ni ruma kasiku u tshumela u txi wona, u tala ngu Moya wo Sawuleka.” 18Konako marongo ma to moroka ngu khoheni kwakwe, se e tshumela e wona. 19Ku ti ngako a di dyite sakudya, a to tshumela e mana mtamo. Se Sawule e zumba masiku okari ni vagondiswa va Dhamasku.

Ta Sawule ngako a txi txhumayela Dipswi didhoropani ka Dhamasku

20Se Sawule kunukunuko, a to khata kugondisa ta Jesu masinagogani, e huwelela ti to ngene Mwanana wa Txizimu. 21Se votshe va va nga ti mu engisa, va to xamala ngutu, va txi kha vona: “Ina hi nga ene wu a nga ti ti xanisa, ani Jerusalema, avale va nga ti ti dhumisa ditina diya kani? Ina ene kha tela ku ta va teka, va di sungilwe, e va yisa ka vaphaxeli va hombe kani?” 22Aniko Sawule a ti engetelwa mtamo e vhala sisofu sa Vajudha va Dhamasku ngu ku va kombisa ti to Jesu kunene ngene Mesiya.

Swule a txi pfhuka Vajudha

23 # Wona ni ka: 2 Vak. 11:32-33. Ku di pindile masiku amangi, Vajudha va to sunga txikungo txa ku m'daya. 24Aniko Sawule a to ziviswa ati vona va nga langana tona. Vona va ti ti wonelela sike sa didhoropa wusiku ni mitshikari, kasiku ve m'daya. 25Kambe vagondiswa va to mteka ni wusiku, ve mu txiritela hahatshi ngu ha digumani na a di mu ngulani.

Sawule a txi hoka Jerusalema

26Ngako Sawule a di hokile Jerusalema, a to lava ku ti patanisa ni vagondiswa, kambe votshe va txi mu thava, nguko va si kholwi ti to nene i mgondiswa. 27Sekoko Bharnabhasi a to mteka a txi mu heleketa ka Vapostoli, a txi ya va txhamusela ati ene a nga wonisa tona Mkoma ha nzila, ni tiya Mkoma a nga wombawombisa tona nayo, ni tiya kambe a nga txhumayelisa tona ditikoni ka Dhamasku ngu mtamo wa kuthemba ditina da Jesu. 28Se a to zumba navo Jerusalema, a txi hanya navo ngu wuxaka, a txi gondisa ngu ditina da Mkoma, na asi thavi txilo; 29a ti womba-womba a txi xamulana kambe ni Vajudha va kuwombawomba Txigriki, aniko avava va ti langana makungo a ku m'daya. 30Se ngako va di ti engisile, vagondiswa kulowe, va to mu heleketa Khezareya, ahawa va nga ya mu pindisa ve m'rumela Tarso.

31Hambi keto, Dibanza di ti ni kuthutha ka dotshe ditiko da Judheya ni da Galileya ni da Samariya, di txi kula, di txi hanya ngu kuxonipha Mkoma, di txi anda ngu kuvhunetelwa ngu Moya wo Sawuleka.

Kuhanyiswa ka Eneyasi

32Ngako Pedro a nga ti tsimbilatsimbila ka otshe madhawa, a to hoka ka vasawuleki va va nga ti akile ditikoni ka Lidha. 33A to ya mana m'thu koneyo, awu a nga ti dhanwa ku i Eneyasi a di otelisilwe ha ditahoni txipimo txa mtxhanu wa malembe ni mararu. A ti khwanyete sihango. 34Se Pedro a txi khene kwakwe: “Eneyasi! Jesu Kristu wa kuhanyisa, wuka u txi peta ditaho dako.” Kunukunuko a to wuka. 35Se votshe va va nga aka ditikoni ka Lidha ni Saroni, ngako va txi mu wona, va to hunduluka ve kholwa ka Mkoma.

Pedro ngako a txi wusa Dhorkasi ngu kufani

36Didhoropani ka Jopa, ku ti ni wamsikati wa mgondiswa, awu a nga ti dhanwa ku i Tabhita, atiya ngu Txigriki ti txhamusako ku Dhorkasi. Ene a ti taletwe ngu mithumo ya wumbilu ni wuha. 37Aniko, ka oneyo masiku, a to lwala efa. Ngako va di mu kuwute, va to mu veka ka nyumba ya txitezini. 38Se ngako Lidha i nga ti hafuhi ni Jopa, vagondiswa, va di engisile ti to Pedro waho, va to ruma vavamna vambidi, kuya m'dhana, va txi kha vona: “Kuluveta u txi ta kheno kwathu.” 39Se Pedro a to khukha e tsula navo. Ku ti ngako a di hokile, va to mu yisa ka nyumba yile ya txitezini. Votshe vavasikati va tinoni va to ta mu randela na va txi dila, va txi mkomba mikhatxwa ni tinguwo ti Dhorkasi a nga va rungela tona, a di ngadi navo. 40Se Pedro a to humisa hahanze votshe vathu vale, e khizama a txi khongela. Se a di rendekete txirumbi, a to khene: “Tabhita, wuka!” Ene a to tula maso e wonetela Pedro se e khalahatsha. 41Pedro a to mñola ngu diwoko e mu emisa, se a di dhani vasawuleki ni tinoni a to mu kombisa masoni kwawe na a txi hanya. 42Mhakeyo yi to ziwa ngu dotshe didhoropa da Jopa, se vavangi ve kholwa ka Mkoma. 43Pedro a to zumba Jopa mbimo yo lapha m'tini ka mtxhuki wa madhowo, a dhanwako ku i Simoni.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Mithumo 9: BEC2016

Highlight

ಶೇರ್

ಕಾಪಿ