Mithumo 6
6
Mtxhanu wa vavhuneteli va vapostoli
1Ngu ka oneyo masiku, ngako mtengo wa vagondiswa wu nga txi anda, vamwani ka vona, ava va nga txi womba-womba lidimi la Txigriki va to khata kungurangura ve sola va, va nga txi womba-womba lidimi la Txihebheru, va txi kha vona tinoni ta ka kwawe ta divalwa kuphamelwani ka sakudya sa ditshiku ni ditshiku. 2Se va Digumi ni Vambidi va to ramba dibutho da vagondiswa, ve va gela tiya:
“Kha ti laveki ti to hi leka kutxhumayela Dipswi da Txizimu, hi thumela timezani. 3Ndinene, vanathu, kukhedha hagari kwanu, mtxhanu wa majaha ni mambidi a kuthembeka ta tinene, na ma di tate ngu Moya wo Sawuleka ni wuzivi, kasiku hi va veka ve thuma mthumo wuwa. 4Kasi athu hi na khutala hi txi ti ningetela ka mthumo wa kukhongela ni kutxhumayela.”
5Txikungo txiya txi tsakisile dibutho, se konaho va to khedha Sitefani, i nga ti dikholwa da kutsana, na a di tate ngu Moya wo Sawuleka, ni Filipi, ni Prokoro ni Nikanori, ni Timoni ni Parmenasi ni Nikolawu, mlondeteli wa kuta ngu Antiyokiya. 6Va to va emisa masoni ka Vapostoli, se vona ve va mahela mikombelo ni ku va sanzeka manza.
7Ti di ngeto, Dipswi da Txizimu di to khata kuanda, se mtengo wa vagondiswa wu to engeteleka ngu kutsakisa ditikoni ka Jerusalema; se dibutho do tala da vaphaxeli ve kholwa.
Kuñolwa ka Sitefani
8Sitefani, a di tate ngu kateko ni mtamo, a to maha sidiwukiso ni sikombiso hagari ka vathu. 9Kambe vamwani va kuta ngu ka disinagoga di di dhanwako ku nda Vathuseki, ni vamwani va Kirene ni va Alexandriya kumweko ni vamwani va Kilikiya ni va Aziya, va to ema ve kanetisana ni Sitefani. 10Aniko ve tandeka ku kona wuzivi wakwe ni Moya wu a nga txi womba-womba ngu wona. 11Sekoko va to xavelela vathu kasiku ve womba ku kha vona:
“Hi mu pfite a txi womba mapswi a kuruka Mosi ni Txizimu.”
12Ngu toneto, va wusile vathu, ni madhota ni vabhali, se va to mu tela ngu txidhukisa, va ta mñola, ve mu yisa banzani ka wukoma. 13Se ve humisa tifakazi ta makuhu, ati ti nga womba ti txi kha tona:
M'thu wuwa, kha leki kuwombawomba timhaka ti ti poyilako Wukhalo wo sawuleka ni Mlayo; 14nguko athu hi muengisile, a txi khene: “Jesu wa Nazareta a na fuvisa Wukhalo wuwa e txitxa ni mahanyelo awa hi nga ningwa ngu Mosi.”
15Sekoko votshe va va nga ti khate ha banzani ka wukoma va to mu ronokela ngu maso ve wona khohe yakwe yi txi fanana ni ya ngelozi.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mithumo 6: BEC2016
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
