Mithumo 3

Kuhanyiswa ka txilima ha txikeni ka Dithepele

1Pedro ni Johani va to kwela veya Dithepeleni kuya maha mkombelo ngu txikhati txa wuraru txa minova. 2Ha txikeni ka Dithepele, ahawa ku nga ti dhanwa ku Txike txo Tshura, a ti ti ho m'thu wokari, a nga velekwa i di txidiya, awuwa va nga txi tolovela ku mu gula, otshe masiku, va ta mu veka kona hale, kufela ku e kombela sa kuhiwa ka vale va nga txi wulela Dithepeleni. 3Mbimo yi a nga wona Pedro ni Johani va di hafuhi ni kuwulela Dithepeleni, a to va kombela txivhuno. 4Ti di mahile eto, Pedro kumweko ni Johani, a to gula maso a txi mu wonisisa, se a txi khene kwakwe: “Hi wone!” 5Awu wa txilima e tshembereka a txi va wonetela ngu wumbidi wawe, na a txi pimisa ti to va lava ku muha txivhuno txa male. 6Kambe Pedro a to khene kwakwe: “Kha ni nga ni nzalama mwendo silivhela, aniko asi ni ku naso ni na kuninga: Ngu ditina da Jesu Kristu wa Nazareta, khukha u txi tsimbila!” 7Ngu msana a to mñola ngu diwoko da txinene e mu emisa. Kunukunuko mikondo yakwe ni mazolo akwe me tsana. 8Se ene a to ndaka a txi ema, e khata kutsimbila. Se e wulela navo Dithepeleni, e tsimbila a txi giringa, na a txi dhumisa Txizimu. 9Votshe vathu va mu woni a txi tsimbila, na a txi dhumisa Txizimu. 10Va mu zivile ti to ngene wule a nga ti zumba ha Txikeni ko Tshura, a txi kombela, se ve xamala ngutu ni kudiwuka totshe tile va nga ti wona ti di mahekile kwakwe.

Pedro ngako a txi gondisa m'hubheni ka Solomoni

11Se ngako m'thu wuwa a nga ti namarela ka Pedro ni Johani, votshe vathu va to xamala, ve tutumela m'hubheni, awu wu dhanwako ku mbwa Solomoni. 12Ku ti ngako Pedro a txi wona tiya, a to gela vathu, a txi khene: “Vavamna va Israyeli, mi xamalela txani mhaka yiya kani? Mwendo mi hi ronolela ngu txani, mi txi nga hi to mu tsimbilisa m'thu wuwa ngu mtamo wathu, mwendo ngu wukhongeli wathu, kani?”

13“Txizimu txa Abrahamu ni txa Isaake ni txa Jakobe, Txizimu txa vatate vathu txi dhumisile txithumi txa txona Jesu, awu anu mi nga mningela, mi nga mlamba kambe masoni ka Pilato, kasi ene a ti ti lamute ti to a na thukunyulwe. 14#Wona ni ka: Mat. 27:15-23; Mar. 15:6-14; Luk. 23:13-23; Joh. 19:12-15. Mi lambile Msawuleki ni Mlulami, mi tamarisa mi txi kombela kuthukunyulwa ka txigevenga, 15mi txi dayisisa mningi wa wutomi. Txizimu txi mwusile ngu ka vakufa; athu hi tifakazi ta eyo mhaka. 16Ngu kukholwa ditinani ka Jesu, ngu dona ditina dakwe di nga tsanisa m'thu wuwa mi mu wonako ni ku m'ziva; se likholo liya ngu lona li nga mu hanyisa ngu ditshuri masoni kwanu motshenu.”

17“Hambi keto, vanathu, na tiziva ti to mi mahile tiya ngu kusisalelwa, kufana ni vona vathangeli vanu. 18Kambe Txizimu, ngu nzila yo nga tiya, txi lavile kutatisa ati txi nga songolela ku ti womba ngu txisofu txa votshe vaprofeti, atiya taku: Kristu a fanete kuxaniseka. 19Ngu toneto, pandisekani mbiluni kwanu, mi txi hunduluka, kasi mi na mana divalelo ya sionho sanu. 20Se Mkoma Txizimu a na mi wuyisela mbimo ya kuhumula; ka yoneyo mbimo a na mi rumela Kristu, awu a nga mi thembisa, i ku ene Jesu, 21awu nzuma yi fanelako ku mu amukela, kala kuza kuhoka mbimo ya kuwuseta sotshe si Txizimu txi nga si womba ngu sisofu sa votshe vaprofeti va txona vo sawuleka, va kale ni kale. 22Mosi a wombile, a txi khene: ‘Mkoma, Txizimu txanu, a na mi humisela, hagari ka vananu, mprofeti wu a fanako ni nani, mi na mu engisa ka totshe ti a mi gelako tona; 23se wuhi ni wuhi a no mbi engisa mprofetiyo, a na thaviswa ha ditikoni.’ 24Votshe vaprofeti va va nga womba-womba, kukhukhela ka Samuwele ni va va mu gametako, votshe va ma profetile masiku awa. 25#Wona ni ka: Gen. 22:18. Nganu mi ku vanana va vaprofeti ni va txitumelelano txiya Txizimu txi nga txi maha ni vatate vathu ngako txi txi womba mapswi awa ka Abrahamu: ‘Ngu konaho ka liveleko lako, totshe tixaka ta mafu ti na katekiswa.’ 26Txizimu txi khatile ngu nganu ku mi wuyisela Txithumi txa txona Jesu, txi m'rumela ku ta mi katekisa, kasiku mi hunduluka, mmwani ni mmwani kubihani kwakwe.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Mithumo 3: BEC2016

Highlight

ಶೇರ್

ಕಾಪಿ