ATHƐSALONIANAƐ NSENDƐ 5
5
Ŋa che bɛmpani ha hun Bɛɛ
1Kɛ ko mɛŋkɛ ni nɛnthɛ, anyami, ŋa biɛni len gbi la ha gbalni konɔkoɛ. 2Haliwɔ ŋan ayɛn ŋa siɛ hɔɛ Bɛɛ biha hun sɔŋgɔma nɔ dwiyɛ ichɔl lɛ. 3Yɛ ayin ŋa wɔɛ, “Mbɔs ni paa ma lɔɛ”, ni gbundɛ likith hɔ ŋae bɔnth sɔŋgɔma yɛ nɔma wɔ che thɔkɔtok gbemɔɛ, ni kimɔ biɛni ha chelɔ. 4Kɛ ŋa cheni rithiay, anyami, ha hɔɛ yɛ vɛ wolnɔni mɔɛ nɔ dwiyɛ. 5Haliwɔ han gbi ŋa apuma cheche ni apuma hɔɛyɛ; hi chendɛ anya ichɔl o rithi. 6Labiɛ lɛ hi ma lɔl, sɔŋkɔma anya tilaŋ, kɛ hi chea chɛnthilɛ ni sɔbɛ 7Haliwɔ ŋanɛ ŋa lɔl ichɔl lɛ, ni ŋanɛ ŋa yil lɛ ŋa che yilɛ ichɔl lɛ. 8Kɛ, yɛ hi anya ipal lɛ, hi chea sɔbɛ, ni hi tɔy ya laanɛ ni chɔŋmalen kendɛ yen paa kethɛ , ni bɔɔ pɛmdɛ ŋhɔɛ kithgbɔl lol lɛ. 9Haliwɔ Hɔbatokɛ chuwɔ hini su ŋa thenɛki ishilin wɔay, kɛ hi ha sɔthɔ lol Bɛɛ Jisɔs Kraystay, 10wɔ wu ha hindɛ chelɛ hi ma bɛ che lɛli o lɔl hi bɔ che ni wɔn. 11Labiɛ lɛ ŋa thɛthɛ ni ni ŋa bɛmani athɔma nɔɛ ha ŋan sɛm kath, kendɛ hɔ ŋa haɛ.
Mɛyŋ mɛkindɛ ni lɛyŋ mɛkindɛ
12Kɛ hi nɔ thɛlɛni, anyami, ŋa ka limani ko ŋanɛ ŋa ha mpanth ŋan thiyeŋdɛ ni ŋa nɔ atokɛ Bɛɛay yɛ ni ŋa nɔ mɛy yɛ, 13ni ŋa ka ŋa manili bom nchɔŋmalenay ha mpanth ma ŋaɛ. Ŋa che mbɔsay han ndɛndɛ thiyeŋ.
14Ni hi nɔ thɛlɛni, anyami, ŋa mɛy ŋanɛ ŋa yemani ha mpanthɛ, ŋa thɛthɛ ŋanɛ ŋa gbɔl thijɛthillɛ, ŋa bɛmani a jɛthjɛthɛ, ha bi muyu ni han gbi. 15Ŋa keɛ lɛ nɔ gbi muŋgɔni iwɔy ha iwɔy, kɛ ŋa keɛ lɛ ŋa haa ikɛlɛŋ ko ŋan ndɛndɛ ni ko nɔ-o-nɔ.
16Ŋa che mɛmiɛni mɛŋkɛ hɔn gbi, 17Ŋa sɛli bɔnɔbul, 18ŋa wɔŋ chɔŋsɛkɛ ki len gbi; haliwɔ lanɔ ki la Hɔbatokɛ yema ha ŋandɛ Krayst Jisɔsay.
19Ŋa ma nyumi jɛmdi Min Charaŋdɛ, 20ŋa ma thɛkɛ kechee kɛndanɔɛ, 21kɛ ŋa hɛl len-o-len; ŋa yɛthi jali yegbe kath, 22ŋa kosini iwɔy gbi.
23Ha Hɔbatokɛ mbɔsɛ wɔnayɛn ha nɔ charaŋ naythindɛ gbi; ni ha minsa nɔɛ ni min ihɔlɔŋdɛ ni jal thi nɔɛ thache thɔndɔ charaŋ ni ibiɛ nthɛkɛ mɛŋkɛ hɔ Bɛɛ Jisɔs Krayst wɔ hundɛ. 24Wɔnɛ wɔ velɛ nɔɛ wɔ tiŋtiŋ, ni bi ha hala.
25Anyami ŋa sɛliɛ hi.
26Ŋa lɛiŋɛ hi anya hiɛ ka gbaŋa chɔŋmalen.
27Ya nɔ thɛlɛni ka Bɛɛ ni pɔ kaŋ rayo ki ko anya hiɛ ŋan gbi.
28Ha wɔŋɔ Bɛɛ hiɛ Jisɔs Krayst chema nɔ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ATHƐSALONIANAƐ NSENDƐ 5: SNT
Highlight
ಶೇರ್
ಕಾಪಿ
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fkn.png&w=128&q=75)
Want to have your highlights saved across all your devices? Sign up or sign in
Sherbro New Testament Portions © Bible Society in Sierra Leone, 2020.