योहान 10
10
गोवालान किस्सो
1यीशु केयो, “मी तुमूह खेरीच खेरीच केथु: ‘जो बी बायणाम रेन मेंड्रान कोठाम नाह रिगेत, पुण दिहरी उगे रेन चेड़ीन जाथे, तो चोर एने डाकु हे।’ 2पुण जो बायणाम रेन रिगेह तो मेंड्रान गोवाल हे। 3तानकेरता बायणान राखवाल्यो बायणो उगाड़ दिथे, एने मेंड्रा तान आवाज होमेलतेह, तो तान मेंड्राह नाव लेन हादेह, एने ताह बाहेर ली जाथे। 4एने जेवी तो तान आखा मेंड्राह बाहेर काड़ दिथे, तेवी तो तान ओंगाण ओंगाण चालेह, एने मेंड्रा तान पासाण पासाण चाल पोड़तेह, काहाकाय ता तान बोली ओलेखतेह। 5एने ता केदी बी पारायान पासाण नाह जाते; पुण ताह देखीन नाहती, काहाकाय ता पारायान बोली नाह ओलेखते।”
6ज्यो किस्सो यीशु ताह केयो, तीबी ता ज्यु वातुह नाह सोमेजना काय यीशु काय केणे बाजरिनोह।
यीशु हाजालो गोवाल हे
7तेवी यीशु ताह पुशो केयो, “मी तुमूह खेर खेरीच केथु: मेंड्रान बायणो मी हे। 8जोला माहु रेन पेल आयेल ता आखा चोर एने डाकु हेते, पुण मेंड्रा तान उकुम नाह मान्या। 9बायणो मी हे। मार द्वारा एगदो माय रिगी ताहार तो वोचाड़ाय जाय; एने मायतो बाहेर आव जाव केरी एने ताह चारो जुड़ी। 10चोर ते चोरी केरने, मारने, एने खेतेम केरनेन उलोस आवेह। पुण मी ज्यानकेरता आवो काय ताह जुलूम होवटी जीवाय जुड़ी।
11“मीच हाजालो गोवाल हे, हाजालो गोवाल मेंड्रान केरता तान जीव आपेह। 12मोजुर गोवाल एने मेंड्रान मालीक नाय मीले, तानकेरता तो कोलवाह आवतालो देखीन मेंड्राह सोड़ीन नाह जाथे; एने कोलवो ताह दिरेह एने ताह वेरासेर केर दिथे। 13तो माणुह वेचातो लायेल मोंजऱ्यो हे, तानकेरता तो नाह जाथे, एने ताह मेंड्रान कालजी नाह। 14#मत्ती 11:27; लुका 10:22हाजालो गोवाल मी हे; मी मारा मेंड्राह जाणथु, एने मारा मेंड्रा माहु जाणतेह। 15जिहकेरीन आबोख माहु जाणेह एने मी आबाख जाणथु, एने मी मेंड्रान केरता मार जीव आपथु। 16#10:16 ता बोणती; थोड़ाक लेख माय एती लिखेल हे।मारा दिहरा उंजु बी मेंड्रा हेते, ता ज्या कोठामवाला नाह सोता। पुण माहु ताह बी लावणे जोरवरी हे; काय ता मार बोली होमेलती, तेवी तान एकुस टुलो एने एकुस गोवाल रेय।
17“मी मारो जीव पुशो मांगणेन केरता आपथु, केरीन आबोख माहु मोंग किरेह। 18कुण बी मारा जीवाह मार फाय रेन सांडाड़ेत नाह। पुण मी सोता मारा जीवाह आपथु, माहु ताह आपणेन आदिकार हे, एने ताह पुशो मांगणेन बी आदिकार हे। ज्यो उकुम माहु आबाख फाय रेन जुड़ेल हे।”
19ज्यी वातीन वोजेसे यहुदि माणहा माय पोशी फुट पोड़ गियी। 20ताम रेन मोकतास माणहे केणे बाज गीया, “ज्या माय बुतड़ो हे! एने ज्यो गांडो हे! तान वातु तुमू काहा होमेलतेह?”
21दिहरा माणहे केया, “ज्यो वातु बुतड़ो लागेल माणहान नाह रेय सिकेत! काय बुतड़ो आंदला माणहान डोला उगाड़ सिकेह?”
यहुदि यीशुह नाकारनो
22यरूशलेम माय मोंदिरान समर्पणान तिवार मानावणे बाजरियेल एता, तेवी हियालान दिह एता। 23एने यीशु मोंदिर माय सुलेमानान खोली माय फिरने बाजरियेल ईतो, 24तेवी यहुदि ताह कोंडीन केया, “तु आमरा मोनाह केवीह वोर सेंका माय मिलहे? केदी तु मसी एय ते आमुह खेर खेरीच केय दे।”
25यीशु ताह जापाप आप्यो, “मी तुमूह केय दिनो, पुण तुमू बुरहो केरतेस नाह। जो काम मी मारा आबाख ने नावाम केरथु तास मारा गोवा हेते; 26पुण तुमू ज्यानकेरता मार पोर बुरहो नाह केरती, काहाकाय तुमू मारा मेंड्रा नाह सोता। 27मारा मेंड्रा मारो आवाज होमेलतेह; मी ताह जाणथु, एने ता मार पासाण पासाण चालतेह। 28मी ताह जेलेमक्यो जीवाय आपथु, ता केदी बी मोरती नाय। एने ताह कुण बी मार फाय रेन सांडाड़ नाय सेकी। 29#10:29 मारो आबोख जाह माहु आपेल हे तो आखाम रेन मोठो हे, थोड़ाक लेख माय माहु आपेल तो मार आबोख मुठो।मारो आबोख जाह माहु आपेल हे तो आखाम रेन मोठो हे, एने आबाख फाय रेन ताह कुण सांडाड़ नाह सिकेत। 30मी एने मारो आबोख एकुस हेते।”
31तेवी यहुदि माणहे यीशुह देगड़ाठणेन केरता पोशा दिगोड़ विशा। 32यीशु ताह केयो, “मी तुमूह मारा आबाख ने उगे रेन जुलूम होवटा हाजा काम देखाड़ेल हे; ताम रेन काल्ला कामान केरता तुमू माहु देगड़ाठणे होदतेह?”
33यहुदि यीशुह जापाप आप्या, “हाजाला कामान केरता आमु तुवाह देगड़ाठते नाह, पुण बोगवानान चिहटा किरेह केरीन! काहाकाय तु माणुह एन सोताह बोगवान किथे!”
34यीशु ताह जापाप आप्यो, “ज्यो तुमरा नेम माय लिखेल हे बोगवान कियेल, ‘तुमू देवता हेते।’ 35जा माणहाह बोगवानान वचन जुड़नो; ताह तो देवता किथे, एने पुस्तेकीन वात जुठी नाह एय सिकेत। 36ते जाह आबोख निवाड़ेन दुनियाम मुकलेल हे। तुमू ताह केतेह, तु चिहटा किरेह, ज्यानकेरता काय मी केयो, मी बोगवानान बिटोख हे? 37केदी मारा आबाख ने काम मी निहे केरतेय, ताहार मार पोर बुरहो मा किरो। 38पुण केदी मी केरथु, ते मारो बुरहो नाय बी किरो, पुण ता कामाह देखीन ते बुरहो किरो, काहाकाय तुमू जाणो काय आबोख मार माय हे एने मी आबाख माय हे।”
39तेवी ता पोशा यीशुह देरनेन कोसीत केऱ्या, पुण तो तान आथाम रेन निकली गीयो।
40 #
योहान 1:28
उवतो यीशु यरदन नेदीन ती मीरे जा पेल योहान बपतीस्मा देया केरतालो ता जागाम गीयो, एने ताहरी रिनो।
41एने जुलूम माणहे यीशु फाय आवीन केया, “योहान ते काल्ली निसाणी नाह देखाड्यो, पुण जो काय योहान तार बाराम कियेल ईतो, तो सोब खेरलो हे।” 42एने ताहरी जुलूम माणहे यीशु पोर बुरहो केऱ्या।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
योहान 10: NTNii2020
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
