ମାତିଉ 21
21
ଯିରୁଶାଲେମ୍ତାଗ୍ ଜିସୁ ଗୌରବ୍ତେ ହସାନାଦ୍
(ମାର୍କ ୧୧:୧-୧୧; ଲୁକ ୧୯:୨୮-୪୦; ଯୋହନ୍ ୧୨:୧୨-୧୯)
1ଜିସୁ ନୁ ତାନ୍ ଶିଷ୍ୟଡ଼୍ ଯିରୁଶାଲେମ୍ ତେ ଗାର୍ରେହେଉସ୍ ବେତ୍ପାଗୀ ସହର୍ ସୁଦୁଟ୍ ଯେକା ମାନ୍ଦାନ୍ ଜୀତ ମେଟେତାଗ୍ ହେଉତଡ଼୍ । 2ଇର୍ୱୁଡ଼୍ ଶିଷ୍ୟଡ଼୍କ୍ ଆଦେଶ୍ ଇସ୍ ଜିସୁ କେତ୍ତାନ୍, “ମୁନେ ମାନ୍ଦାନ୍ ଆଦ୍ ନାର୍ ଆନୁଟ୍ । ଆଗେ ହେଉଦାନ୍ ୱେଲେ ଉଡ଼ିତିଡ଼୍, ୱେରଡ଼୍ ଗଦ ତହସ୍ ମାନ୍ତଡ଼୍ ନୁ ତାନ୍ ଗାର୍ରେ ତାନ୍ ପିଲେ ମିନ୍ଦେ । ଆଦିଙ୍କ୍ ଲେସ୍ ନା ପାକେ ତାଡ଼ାଟ୍ । 3ବେନ ବାତେଏ କେତ୍କେ, କେତିତିଡ଼୍ ଇଦ୍ ଗୁରୁଙ୍କ୍ ଦର୍କାର୍ ମିନ୍ଦେ । ଆସୁଙ୍କ୍ ସାଙ୍ଗେ ସାଙ୍ଗେ ଅଣ୍ଡ୍ ଅଡ଼୍କିଂଙ୍କ୍ ରସିତ୍ତନ୍ ।”
4ହି ଗଟ୍ନା ତଡ଼୍ ବାବବାଦୀଡ଼୍ ମଦଲ୍ କେତ୍ତାଦ୍ ବାଣି ସାରେ ହାତ୍ତେ ।
5“ସିୟନ୍ତେ କନ୍ୟାୟାତିଙ୍କ୍ କେଲ୍ମୁଟ୍ ।
ଉଡ଼ାଟ୍, ମିଇ ରାଜାଲ୍ ମିଇ ପାକେ ୱାଦୁତନ୍,
ଅଣ୍ଡ୍ ବେସର୍ ନମ୍ର ଗଦପିଲେତ୍ ପରୁକୁଦି ୱାଦୁତନ୍;
ଉଡ଼ାଟ୍, ଅଣ୍ଡ୍ ଗଦପରୁ କୁଦି ୱାଦୁତନ୍ ।”
6ଶିଷ୍ୟଡ଼୍ ଆଞ୍ଜ୍ ଜିସୁ କେତ୍ତେ ଲେକାମ୍ ମାଡ଼୍ତଡ଼୍ । 7ଗଦ ନୁ ତାନ୍ ପିଲେତିଙ୍କ୍ ତାସ୍ ନିଜେ ନିଜେତାଉ ସିଲେ ଗଦତ୍ ପରୁ ୱାଟି ଜିସୁଙ୍କ୍ କୁସ୍ପ୍ତଡ଼୍ । 8ଆଗେ ମାନ୍ଦାନ୍ ନାରୁଡ଼୍ ଜିସୁ ଆଦାନ୍ ଆର୍ଦାଗ୍ ନିଜେ ନିଜେତ୍ତାଉ ସିଲେ ତାର୍ତଡ଼୍ ନୁ ବେସ୍କ୍ ତଡ଼୍ ହେତେଲ୍ ମାଡ଼େତ୍ ମେଟା ନାଡ଼୍କି ତାସ୍ ଆଦାନ୍ ଆର୍ଦାଗ୍ ୱାଟ୍ଟଡ଼୍ । 9ଜିସୁନ୍ ମୁନେ ନୁ ପେର୍କେ ଆଞ୍ଜମାନ୍ଦାନ୍ ନାରୁଡ଼୍ ଗାଟି ଲେଙ୍ଗ୍ଦେ କେତ୍ତଡ଼୍, “ଦାଉଦ୍ତେ ମାରିଙ୍କ୍ ପ୍ରସଂଶା ହାଇ, ବେନ ପ୍ରବୁନ୍ ପେଦେର୍ତେ ୱାଦୁତନ୍, ଇଶ୍ୱର୍ ଅଂକିଙ୍କ୍ ଆର୍ଶିବାଦ୍ ମାଡ଼ିଣ୍ଡ୍ । ଇଶ୍ୱର୍ତେ ପ୍ରସଂଶା ମାଡ଼ାଟ୍ ।”
10ଜିସୁ ଯିରୁଶାଲେମ୍ ହେଉଦାନ୍ ୱେଲେ ଆଗେ ଅଂକିଙ୍କ୍ ଉଡାଙ୍କ୍ ନାରୁଡ଼୍ ଗୁଡ଼୍ତଡ଼୍ ।
11ନାରୁଡ଼୍ କେତ୍ତଡ଼୍, ଅଣ୍ଡ୍ ବେନ ? ବାଗାତଡ଼୍ କେତ୍ତଡ଼୍, “ଅଣ୍ଡ୍ ଆଦୁତନ୍, ଗାଲିଲୀତେ ନାଜରିତିୟ ବାବବାଦୀ ଜିସୁ ।”
ଜିସୁ ମନ୍ଦିର୍ତା ଆତ୍ତନ୍
(ମାର୍କ ୧୧:୧୫-୧୯; ଲୁକ ୧୯:୪୫-୪୮; ଯୋହନ୍ ୨:୧୩-୨୨)
12ଜିସୁ ମନ୍ଦିର୍ ଲୋପେ ଆଞ୍ଜ୍ ଆଗେ ଆସାନ୍ ୱାମାନ୍ ମାଡ଼ମାନ୍ଦାନ୍ ସାରେତଡ଼୍କିଂଙ୍କ୍ ବାଇଦେ ପେସ୍ପିତନ୍ । ଡାବ୍କ୍ ବ୍ୟବସାହୀଡ଼୍ ବେଦି ନୁ ବଡେ ୱାମାନଡ଼୍ ମେଜତିଙ୍କ୍ ଉଲ୍ଟା ମାଡ଼ିତ୍ତନ୍ । 13ଅଡ଼୍କ୍ ଅନ୍ କେତ୍ତାନ୍, “ଦର୍ମଶାସ୍ତ୍ରତାଗ୍ ଲେକାମିନ୍ଦେ, ‘ନା ମନ୍ଦିର୍ ପ୍ରାର୍ତନା ଲୋନ୍ ଇଞ୍ଜ୍ କ୍ୟାତ ଆଦ୍ତେ,’ ବାତେଙ୍କ୍ ଇତ୍କେ ମିଡ଼୍ ଆଦିଙ୍କ୍ ଦସ୍ୟୁଡ଼୍ ଲୋନ୍ ଲେକାମ୍ ମାଡ଼୍ତିଡ଼୍ ।”
14ଜିସୁ ମନ୍ଦିର୍ତାଗ୍ ମାନ୍ଦାନ୍ ୱେଲେ କାନାଲଡ଼୍ ନୁ କୁଟାଲଡ଼୍କ୍ ଅନ୍ ପାକେ ୱାତ୍ତଡ଼୍ ନୁ ଜିସୁ ଅଡ଼୍କ୍ ସୁସ୍ଥ ମାଡ଼୍ତଣ୍ଡ୍ । 15ବେଡ଼ିଇ ଯାଜକ୍ ନୁ ଦର୍ମଗୁରୁଡ଼୍ ଅନ୍ ବାକ୍ୱା ପାଡ଼୍ୟି ସାରେ ଉଡ଼ି ନୁ ପିଲାକି ଦାଉଦ୍ତେ ମାରିଙ୍କ୍ ପ୍ରସଂଶା ଇଞ୍ଜ୍ କେସମାନ୍ଦାନ୍ କେଞ୍ଜି କପାମ୍ ଆଦ୍ତଡ଼୍ । 16ଅଡ଼୍ ଜିସୁଙ୍କ୍ କେତ୍ତଡ଼୍, “ଇଡ଼୍ ବାତେଏ କେସମିନ୍ଦେଡ଼୍, ନିମ୍ କେଞ୍ଜୁତିନ୍ ?” ଜିସୁ କେତ୍ତାନ୍, “ନିଜାମ୍ କେଞ୍ଜୁତାନ୍ । ଦର୍ମଶାସ୍ତ୍ରତାଗ୍ ଇଦ୍ ଗଟ୍ ବାତେଏ କାର୍ୱିଡ଼୍ ? ନିମ୍ ପିଲା ନୁ ସୁଦୁ ପିଲାଙ୍କ୍ ସାୟେଲେକାମ୍ ପ୍ରସଂଶା ମାଡ଼ାନ୍ ଶିକ୍ଷା ହିତ୍ତିନ୍ ।”
17ଇଦ୍ କେସ୍ ଜିସୁ ଅଡ଼୍କ୍ ୱିଡ଼୍ସି ଯିରୁଶାଲେମ୍ ତାଗାଙ୍କ୍ ବେତନିୟାତାଗ୍ ଆତ୍ତଣ୍ଡ୍ । ଆଗେ ଅଣ୍ଡ୍ ନାର୍କା ତିଙ୍କ୍ ମାତ୍ତନ୍ ।
ଜିସୁ ତୟାମାଡ଼ାତିଙ୍କ୍ ଅବିଶାପ୍ ହିତ୍ତନ୍
(ମାର୍କ ୧୧:୧୨-୧୪,୨୦-୨୪)
18ତାନ୍ ମେଣ୍ଡନ୍ ଦିନ୍ ନାର୍କୁକ୍ ଜିସୁ ଯିରୁଶାଲେମ୍ ତା ଆଦାନ୍ ୱେଲେ ଗାଟି କାର୍ପୟିତେ । 19ଆର୍ ଗାର୍ରେ ୱେରଡ଼୍ ତୟାମାଡ଼ା ମାତ୍ତେ । ଜିସୁ ମାଡ଼େତ୍ ଗାର୍ରେ ଆଞ୍ଜ୍ ଆଗେ ଅଂକିଙ୍କ୍ ୱିଡ଼୍ସି ମେଣ୍ଡେ ବାତେଏ ଉଡ଼ନ୍ । ଆଦିଙ୍କ୍ ଅଣ୍ଡ୍ ମାଡ଼େତିଙ୍କ୍ କେତ୍ତାନ୍, “ନିମ୍ ମେଣ୍ଡେ ବେସୁଙ୍କ୍ବା କାୟା ଆଦ୍ୱିନ୍ ।” ଆସୁଙ୍କ୍ ସାଙ୍ଗେ ସାଙ୍ଗେ ତୟା ମାଡ଼ା ୱାସିଆତ୍ତେ ।
20ଶିଷ୍ୟଡ଼୍ ଆଦ୍ଉଡ଼ି ବାକ୍ୱା ଆସ୍ କେତ୍ତଡ଼୍, “ତୟା ମାଡ଼େ ହିସର୍ ଯାପେ ବେଲା ୱାସ୍ତେ ?”
21 #
ମାତିଉ ୧୭:୨୦; ୧ କରନ୍ତିୟ ୧3:୨. ଜିସୁ ଉତ୍ତର୍ କେତ୍ତାନ୍ “ନାନ୍ ନିକିଂଙ୍କ୍ ନିଜାମ୍ କେତୁତାନ୍, ମନ୍ତାଗ୍ ଇସୁର୍ମିକା ଏର୍କା ମାଡ଼କଟ୍ ସାରେ ବିଶ୍ୱାସ୍ ମାଡ଼ାଟ୍, ନାନ୍ ଇ ତୟା ମାଡ଼େତ୍ ସେଙ୍ଗେ ବାତ୍ମାଡ଼୍ତାନ୍, ମିଡ଼୍ ମିକା ଆଲା ମାଡ଼େ ପାର୍ଦ୍ତିଡ଼୍ । ମାତର୍ ଆସର ଆୟ୍ୟ, ଇ ମେଟେ ତେଦିମିକା ସମୁଦ୍ର ତାଗ୍ ରାଲ୍ ଇଞ୍ଜ କେତ୍କେ, ଆଦ୍ମିକା ଆଦ୍ତେ । 22ବିଶ୍ୱାସ୍ତେ ପ୍ରାର୍ତନାତାଗ୍ ବାତ୍ ତାଲ୍କିତିଡ଼୍ ଆଦ୍ ଦର୍କିତ୍ ।”
ଜିସୁନ୍ ଅଦିକାର୍ ବିଷୟ୍ତେ ପ୍ରଶ୍ନ
(ମାର୍କ ୧୧:୨୭-୩୩; ଲୁକ ୨୦:୧-୮)
23ଜିସୁ ମନ୍ଦିର୍ ତା ମାଲ୍ସ୍ ୱାସ୍ ଆଗେ ଶିକ୍ଷା ହିଦାନ୍ ୱେଲେ ବେଡ଼ିଇ ଯାଜକ୍ ନୁ ଯିହୁଦିନେତାନଡ଼୍ ଅଂକିଙ୍କ୍ କେତ୍ତଡ଼୍, “ବେନ୍ ଅଦିକାର୍ତେ ନିମ୍ ହିଉସାରେ ପାଡ଼୍ୟି ମାଡ଼ୁତିନ୍ ? ନିକିଂଙ୍କ୍ ଇ ଅଦିକାର୍ ବେନ ହିତ୍ତନ୍ ?”
24ଜିସୁ କେତ୍ତାନ୍, “ନାନ୍ ମିକିଂଙ୍କ୍ ମାତର୍ ୱେରଡ଼୍ ପ୍ରଶ୍ନ କେତିତାନ୍ । ତାନ୍ ଉତ୍ତର୍ ଇତ୍କେ, ନାନ୍ ବେନ୍ ଅଦିକାର୍ତେ ହିଉସାରେ ପାଡ଼୍ୟି ମାଡ଼ୁତାନ୍, ମିକିଂଙ୍କ୍ କେତିତାନ୍ । 25ବାପ୍ତିସ୍ମ ଇଦାନ୍ ଯୋହନ୍ ବେନନାଗାଙ୍କ୍ ଶକ୍ତି ପାଏମ୍ଆତ୍ତନ୍ ଇଶ୍ୱର୍ତାଗାଙ୍କ୍ ନା ନାରୁଡ଼ାଗାଙ୍କ୍ ?” ଅଡ଼୍ ତାମ୍ ତାମ୍ ଲୋପେ ହେର୍କା ମାଡ଼୍ତଡ଼୍, “ଇ ବିଷୟ୍ତେ ବାତେଏ କେତିକାଡ଼୍ ? ଯଦି କେତିକା ଇଶ୍ୱର୍ ତାଗାଙ୍କ୍, ଆଲେକେ ଯୋହନ୍ ତିଙ୍କ୍ ବାତ୍ତିଙ୍କ୍ ବିଶ୍ୱାସ୍ ମାଡ଼୍ୱିଡ଼୍ ଇଞ୍ଜ୍ ଅଣ୍ଡ୍ ମାନ୍ କେତିତଣ୍ଡ୍ । 26ନାରୁନାଗାଙ୍କ୍ ଇଞ୍ଜ୍ ଯଦି କେତିତାଡ଼୍, ଆଲେକେ ନାରୁଡ଼୍କ୍ ମାନାଙ୍କ୍ କାଲ୍କିନ୍ ତଡ଼୍ ରେହେତିତଡ଼୍, ବାତେଙ୍କ୍ ଇତ୍କେ ଯୋହନ୍ ୱେରନ୍ ବାବବାଦୀ ଇଞ୍ଜ୍ ଅଡ଼୍ ବିଶ୍ୱାସ୍ ମାଡ଼ୁତଡ଼୍ ।” 27ଆଦ୍ ଏର୍କା ମାଡ଼ି ଜିସୁଙ୍କ୍ କେତ୍ତଡ଼୍, ମାମ୍ମେ ପୁନମ୍ । ଜିସୁ ଅଡ଼୍ କେତ୍ତାନ୍, “ବେନ୍ ଅଦିକାର୍ତେ ହିୱୁସାରେ ମାଡ଼ୁତାନ୍, ନାନ୍ ମିକା ମିକିଂଙ୍କ୍ କେଲନ୍ ।”
ଇର୍ୱୁଡ଼୍ ପେକଡ଼୍ ତେ ୱେଷଡ଼୍
28“ଆଲେକେ ଇ ବିଷୟ୍ତେ ମିଡ଼୍ ବାତେଏ ଆଲ୍ସୁତିଡ଼୍, କେଲ୍ମୁଟ୍ । ୱେରନ୍ ନାରୁନ୍, ଇର୍ୱୁଡ଼୍ ମାର୍କ୍ ମାତ୍ତଡ଼୍ । ଅନ୍ଦିନେ ବେଡ଼୍ଇ ପେକାଙ୍କ୍ କେତ୍ତାନ୍, ବାବୁ ନେଣ୍ଡ୍ ମାନ୍ ଅଙ୍ଗୁର୍ ୱାୟେତାଗ୍ ଆଞ୍ଜ୍ ପାଡ଼୍ୟି ମାଡ଼େ । 29ଇଲା ନାନ୍ ମାଡ଼ନ୍, ଇଞ୍ଜ୍ ବେଡ଼ିଇ ପେକାଲ୍ କେତ୍ତାନ୍ । ବାତେଙ୍କ୍ ଇତ୍କେ ତାନ୍ ପେର୍କେ ମନ୍ଦାଗ୍ ଏର୍କା ମାଡ଼ି ପାଡ଼୍ୟି ମାଡ଼ାଙ୍କ୍ ଆତ୍ତନ୍ । 30ଆଦ୍ ନାରୁନ୍ ସୁଦୁନ୍ ପେକାଙ୍କ୍ ଆଦ୍ ପାଡ଼୍ୟି ମାଡ଼ାଙ୍କ୍ କେତ୍ତାନ୍ । ଆଲେ ବାବା, ଆଦ୍ତନ୍ ଇଞ୍ଜ୍ ସୁଦୁନ୍ ପେକାଲ୍ କେତ୍ତାନ୍ । ବାତେଙ୍କ୍ ଇତ୍କେ ଅଣ୍ଡ୍ ପାଡ଼ିୟିଦାଗ୍ ମିକା ଆନନ୍ ।” 31କେଲ୍ମୁଟ୍ ଇର୍ୱୁଡ଼୍ ପେକଡ଼ାଗାଙ୍କ୍ ବେନ ତାମ୍ ବାବାନ୍ ଗଟ୍ କେଞ୍ଜ୍ତନ୍ । ଅଡ଼୍ କେତ୍ତଡ଼୍ ବେଡ଼ିଇ ପେକାଲ୍ । ଜିସୁ ଅଡ଼୍କିଂଙ୍କ୍ କେତ୍ତାନ୍, “ନାନ୍ କେତୁତାନ୍ କର ଆଦାୟ୍ ମାଡ଼ାନଡ଼ି ନୁ କଜାନଡ଼୍ ମିୟାଗାଙ୍କ୍ ମୁନେଙ୍କ୍ ଇଶ୍ୱର୍ତେ ରାଜ୍ୟତାଗ୍ ଆଦ୍ତଡ଼୍ ।”
32 #
ଲୁକ 3:୧୨; ୭:୨୯,3୦. ବାପ୍ତିଜିକ ଯୋହନ୍ ମିଇ ପାକେ ୱାସ୍ ସାୟେତ୍ ଆର୍ ତଅସିସ୍ ମାତ୍ତନ୍, ବାତେଙ୍କ୍ ଇତ୍କେ ମିଡ଼୍ ଅଂକିଙ୍କ୍ ବିଶ୍ୱାସ୍ ମାଡ଼୍ୱିଡ଼୍ । ଆଗେକ୍ ବା କର ଆଦାୟ୍ ମାଡ଼ାନଡ଼ି ନୁ କଜାନଡ଼୍ ଅନ୍ ଗଟ୍ତେ ବିଶ୍ୱାସ୍ ମାଡ଼୍ତଡ଼୍, ଆଦ୍ ଉଡ଼ିମିକା ମିଡ଼୍ ମନ୍ ବାଦ୍ଲାମାଡ଼ି ଅଂକିଙ୍କ୍ ବିଶ୍ୱାସ୍ ମାଡ଼ାଟ୍ ।
ଅଙ୍ଗୁର୍ ୱାୟେତାଗ୍ ବାଗ୍ ଚାଷୀନଡ଼୍ ୱେଷଡ଼୍
(ମାର୍କ ୧୨:୧-୧୨; ଲୁକ ୨୦:୯-୧୯)
33ଜିସୁ କେତ୍ତାନ୍, “ମେଣ୍ଡନ୍ ୱେଷଡ଼୍ କେଞ୍ଜାଟ୍ ।” ୱେରନ୍ ୱାୟେତ୍ ମାଲିକ୍ ତାନ୍ ୱାୟାନାଗ୍ ଅଙ୍ଗୁର୍ ଚାଷ୍ ମାଡ଼୍ତଣ୍ଡ୍ । ୱେଲୁମ୍ କୁର୍ତନ୍ ନୁ ମାନ୍ଦାନ୍ ସେଙ୍ଗେ ୱେରଡ଼୍ ଗୁଡ଼ୁସା ମିକା ତିଆର୍ ମାଡ଼୍ତଣ୍ଡ୍ । ତାନ୍ ପେର୍କେ ୱାୟାନାଗାଙ୍କ୍ ଚାଷିନଡ଼୍କିଙ୍କ୍ ଦୁଡ଼େ ୱିଡ଼୍ଷିସ୍ ଅଣ୍ଡ୍ ବିଦେଶ୍ ଆତ୍ତନ୍ । 34ୱାୟେତାଗ୍ ପସଲ୍ ମାଡ଼ାନ୍ ୱେଲେ ଅଣ୍ଡ୍ ଚାଷୀଡ଼୍ ଆଗାଙ୍କ୍ ନିଜେତ୍ ଦୁଡ଼େ ଆଦାୟ୍ ମାଡ଼ାନ୍ ସେଙ୍ଗେ ନିଜେତ୍ ଦାସଡ଼୍କ୍ ରହତନ୍ । 35ଚାଷୀଡ଼୍ ଆଦ୍ ଦାସଙ୍କ୍ ୱେରଙ୍କ୍ ପିଞ୍ଜ୍ପ୍ତଡ଼୍, ୱେରଙ୍କ୍ ହାଉକିତାଡ଼୍ ନୁ ହେସିତ୍ତଡ଼୍, ମେଣ୍ଡ୍ଆର୍ତୁଙ୍କ୍ ପର୍ର କାଲ୍କ୍ ହେସ୍ତଡ଼୍ । 36ଆଦିଙ୍କ୍ ୱାୟେତ୍ ମାଲିକ୍ ନାର୍ଗେ ମାନ୍ଦେ ବାଗାତ୍ ଚାକରିଡ଼୍କ୍ ମେଣ୍ଡ୍ନ୍ ଦାମ୍ ରହତନ୍ । ଅଡ଼୍କ୍ ମିକା ଚାଷୀନଡ଼୍କ୍ ଆଦେଲେକାମ୍ କାରାପ୍ ବ୍ୟବହାର୍ ମାଡ଼୍ତଡ଼୍ । 37ବାତେଙ୍କ୍ ଇତ୍କେ ନା ମାରିଙ୍କ୍ ଅଡ଼୍ ମାନେମ୍ ଆଦ୍ତଡ଼୍, ଆଦ୍ ଆଲ୍ସି ଅଣ୍ଡ୍ ତାନ୍ ମାରିଙ୍କ୍ ଅଡ଼୍ପାକେ ରହତନ୍ । 38ମାତର୍ ଆଦ୍ ଚାଷୀଡ଼୍ ପେକାଙ୍କ୍ ଉଡ଼ି ତାମ୍ ତାମ୍ କେତ୍ତଡ଼୍, ଇଣ୍ଡ୍ ତ ମାଲିକ୍ତେ ମାର୍; ୱାଡ଼ାଟ୍ ଇଙ୍କ୍ ହାଉକିକାଡ଼୍ ମିକା ଇଣ୍ଡ୍ ଅଦିକାର୍ ମାନ୍ କାଇଦେ ମାଡ଼ିକାଡ଼୍ । 39ଆଦ୍ କେସ୍ ଅଂକିଙ୍କ୍ ୱାୟେତାଗାଙ୍କ୍ ପେସ୍ପି ମିକା ବାଇଦେ ହାୱୁକିତାଡ଼୍ ।
40“କେଲ୍ମୁଟ୍ ତ, ୱାୟେତ୍ ମାଲିକ୍ ବେସୁଙ୍କ୍ ୱାଦ୍ତନ୍, ଅଣ୍ଡ୍ ଚାଷୀନଡ଼୍କ୍ ବାତେଏ ମାଡ଼ିତନ୍ ?”
41ଅଡ଼୍ କେତ୍ତଡ଼୍, “ଆଦ୍ ଦୁଷ୍ଟନଡ଼କ୍ ଅଣ୍ଡ୍ ନିଜାମ୍ ରେହେତିତନ୍ ନୁ ବେନ୍ ଚାଷୀନଡ଼୍ ଟିକ୍ ସମୟ୍ତେ ଅନ୍ ବାଗ୍ ଇଦ୍ତଡ଼୍, ୱାୟାଙ୍କ୍ ଅଡ଼୍ କାଇଦେ ୱିଡ଼୍ସିଦ୍ତନ୍ ।”
42ଜିସୁ ଅଡ଼୍କିଂଙ୍କ୍ କେତ୍ତାନ୍, “ଇଦ୍ ଶାସ୍ତ୍ରତେ ଗଟି ବାତେଏ କାର୍ୱିଡ଼୍ ?
ଲକ୍ ମାଡ଼ାନଡ଼ି ବେନ୍ କାଲ୍ଦିଙ୍କ୍ ପାସ୍କି ମାତ୍ତଡ଼୍,
ଆଦ୍ ମୁଲେ ବେଡ଼୍ୟାଦ୍ ପ୍ରସ୍ତର୍ ଆତ୍ତେ;
ପ୍ରବୁନାଗଙ୍କ୍ ଇଦ୍ ଆତ୍ତେ,
ମେଣ୍ଡେ ଆଦ୍ ମାନ୍ କଣ୍ଡେତେ ବେସର୍ ବାକ୍ୱା ପାଡ଼୍ୟି ?”
43ଜିସୁ ମେଣ୍ଡେ କେତ୍ତାନ୍, “ଆଦିଙ୍କ୍ କେତୁତାନ୍, ଇଶ୍ୱର୍ତେ ରାଜ୍ୟତା ଆତ୍ତାଙ୍କ୍ ଅଦିକାର୍ ମିୟାଗାଙ୍କ୍ ଟେଣ୍ଡି ଆଦ୍ତଡ଼୍ ନୁ ବେନ୍ ନାର୍ ଇ ରାଜ୍ୟତେ ସାରେ ତଅତ୍ତେ ପାର୍ଦ୍ତଡ଼୍, ଅଡ଼୍କ୍ ଆଦ୍ ହିଦ୍ତଡ଼୍ ।” 44ମେଣ୍ଡେ ବେନ ଇ କାଲ୍ଦାଗ୍ ପର୍ର ରାଲିତଣ୍ଡ୍, ଅଣ୍ଡ୍ ଦୁଡ଼ା ଦୁଡ଼ା ଆଦ୍ତନ୍, ମେଣ୍ଡେ ଇଦ୍ କାଲ୍ ବେନ ପର୍ର ରାଲିତ୍, ଅଂକିଙ୍କ୍ ଆଦ୍ ଗୁଣ୍ଡାଲ୍ ମାଡ଼ିତ୍ ।
45ବେଡ଼ିଇ ପୁରହିତ୍ ନୁ ପାରୂଶୀଡ଼୍ ଆଦ୍ ୱେଷଡ଼୍ ଗଟ୍ କେଞ୍ଜି ଜିସୁ ଅଡ଼୍କିଂଙ୍କ୍ ଉଡ଼୍ତନ୍ ଇଞ୍ଜ୍ ପୁତ୍ତଡ଼୍ । 46ଆଦିଙ୍କ୍ ଅଡ଼୍ ଅଂକିଙ୍କ୍ ପଇଦାନ୍ ସେଙ୍ଗେ ଆଲ୍ସି ମାଡ଼୍ତଡ଼୍, ବାତେଙ୍କ୍ ଇତ୍କେ ନାରୁଡ଼୍କ୍ ୱେର୍ଙ୍ଗିଙ୍କ୍ ଅଡ଼୍ ଆଦ୍ ମାଡ଼୍ ପାର୍ୱଡ଼୍, ବାତେଙ୍କ୍ ଇତ୍କେ ନାରୁଡ଼୍ ଜିସୁଙ୍କ୍ ୱେରଣ୍ଡ୍ ବାବବାଦୀ ଇଞ୍ଜ ଏର୍କା ମାଡ଼ମାତ୍ତଡ଼୍ ।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ମାତିଉ 21: NTKaa20
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Koya Language © The Word for the World International and Koya Translation Samithi, Malkangiri, Odisha 2020
