ଯୋହନ୍ 9
9
ଜିସୁ ଜନମ୍ କାନାନ୍ କୋଣ୍ଡାଙ୍କ୍ ୱେସ୍ହିତ୍ତଣ୍ଡ୍
1ଜିସୁ ହାର୍ଦାଗ୍ ଆଦାନ୍ ୱେଲେ ୱେରଣ୍ଡ୍ ଜନମ୍ କାନାଙ୍କ୍ ଉଡ଼୍ତଣ୍ଡ୍ । 2ମେଣ୍ଡେ, ଅନ୍ ଶିଷ୍ୟନଡ଼୍ ଅଂକିଙ୍କ୍ ପାଚ୍ରାମାଡ଼୍ତଡ଼୍, “ହୋ ଗୁରୁ, ବେନ ପାପ୍ ମାଡ଼୍ତାଙ୍କ୍ ଇଣ୍ଡ୍ କାନାଲ୍ ଆସ୍ମିନ୍ଦେଣ୍ଡ୍ ? ତାନ୍ ନିଜେତାଦ୍ ନା ତାମ୍ ୟାୟ୍ ବାବାଲଡ଼ାଦ୍ ?”
3ଜିସୁ ଉତ୍ତର୍ ହିତ୍ତଣ୍ଡ୍, “ଅନ୍ୱାଦ୍ ବା ଅନ୍ ୟାୟ୍ ବାବାଲ୍ ପାପ୍ ମାଡ଼ଡ଼୍, ବାତେଙ୍କ୍ ଇତ୍କେ ଇଶ୍ୱର୍ତେ ଶକ୍ତିତାଦ୍ ପାଡ଼୍ୟି ବେଲାନ୍ ଇନାଗେ ତିଆର୍ ଆଦ୍ତେ, ଆଦିନ୍ ସେଙ୍ଗେ ଇଦ୍ ଗଟେମ୍ ଆଦ୍ତେ । 4ଦିନାମ୍ ମାଞ୍ଜ୍ ମାଞ୍ଜ୍ ନା ୱାଦାନ୍କର୍ତ୍ତାଲ୍ ଇଶ୍ୱର୍ତେ ପାଡ଼୍ୟି ମାଡ଼ାଙ୍କ୍ ମାନାଦ୍ ପାଡ଼୍ୟି; ବେନ୍ ସମୟ୍ତେ ବେନ୍ ପାଡ଼୍ୟି ମାଡ଼େପାର୍ୱଣ୍ଡ୍, ଇଦ୍ଲେକାମ୍ ଇକାଡ଼୍ ୱାସମିନ୍ଦେ ବେସୁଟ୍ ବେନ ବାତେଏ ପାଡ଼୍ୟି ମାଡ଼େପାର୍ୱଣ୍ଡ୍ । 5#ମାତିଉ ୫:୧୪; ଯୋହନ୍ ୮:୧୨.ନାନ୍ ବେସୁଙ୍କ୍ଯାକ ଜଗତ୍ତାଗ୍ ମିନ୍ଦେନ୍, ଆସୁଟେ ଯାକ ନାନ୍ ଜଗତ୍ତେ ୱେସ୍ ।”
6ଇଦ୍ କେତ୍ତେ ପେର୍କେ ଜିସୁ ନେଲ୍ ଉସି ଅଣ୍ଡ୍ ଉସ୍ତାଦିନ୍ ତଡ଼୍ ବୁରୁଦା ମାଡ଼୍ତଣ୍ଡ୍, ମେଣ୍ଡେ ଅନାଦ୍ ରେଣ୍ଡେ କଣ୍ଡାନାଗ୍ ବୁରୁଦା ତମି ଅଂକିଙ୍କ୍ କେତ୍ତଣ୍ଡ୍, 7ଅନ୍, “ଶିଲୋହ#୯:୭ ହିଦିନ୍ ଇତ୍କେ ପ୍ରେରିତ୍ ଏର୍ୱିନାଗ୍ ମକମ୍ ନର୍ମ୍ ।” ଆଗାଙ୍କ୍ ଅଣ୍ଡ୍, ପେଇସ୍ ଆଞ୍ଜ୍ ନର୍ତଣ୍ଡ୍ ନୁ ଅଂକିଙ୍କ୍ କଣ୍ଡା ତନ୍ତା ।
8ଅନ୍ ଗାରେତଡ଼୍ ନାରୁଡ଼୍ ନୁ ବେନଡ଼୍ ଅଂକିଙ୍କ୍ ମୁନେଙ୍କ୍ ତାଲ୍କାନାଦ୍ ଉଡ଼ିମାତ୍ତଡ଼୍, ଅଡ଼୍ କେତ୍ତଡ଼୍ “ଇ ନାରୁନ୍ ବାତେଏ କୁଦି ତାଲ୍କମାନନ୍ ?”
9ବେନ କେତ୍ତଡ଼୍, “ଇଣ୍ଡ୍ ତ ଅଣ୍ଡେ;” ମେଣ୍ଡେ ବେନ୍ ବେନ କେତ୍ତଡ଼୍, “ଇଲା, ଇଣ୍ଡ୍, ଅନ୍ ଲେକାମ୍ ।”
ବାତେଙ୍କ୍ ଇତ୍କେ ଅଣ୍ଡ୍ କେତ୍ତଣ୍ଡ୍, “ନାନ୍ ଆ ନାରୁନ୍ ।”
10ଆଗାଙ୍କ୍ ଅଡ଼୍ ଅଂକିଙ୍କ୍ କେତ୍ତଡ଼୍, “ଆଲାଇତ୍କେ ନିୟାଉ କୋଣ୍ଡା ବେଲା ତନ୍ଦ୍ତା ?”
11ଅଣ୍ଡ୍ ଉତ୍ତର୍ କେତ୍ତଣ୍ଡ୍, “ବେନଙ୍କ୍ ଜିସୁ ଇଞ୍ଜ କେତିତଡ଼୍, ଆ ନାରୁଣ୍ଡ୍ ବୁରୁଦା ମାଡ଼ି ନାୱାଉ ରେଣ୍ଡ୍ କୋଣ୍ଡାନାଗ୍ ବୁରୁଦା ତମିତ୍ତଣ୍ଡ୍, ମେଣ୍ଡେ ନାକିଂଙ୍କ୍ କେତ୍ତଣ୍ଡ୍, ଶିଲହ ତାଗ୍ ଆଞ୍ଜ୍ ମକମ୍ ନର୍ମ୍, ଆଦିଙ୍କ୍ ନାନ୍ ପେଇସ୍ ଆଞ୍ଜ୍ ନର୍ତାନ୍ ନୁ ମେଣ୍ଡେ ନାୱାଉ କଣ୍ଡା ତନ୍ତା ।”
12ଅଡ଼୍ ଅଂକିଙ୍କ୍ କେତ୍ତଡ଼୍, “ଅଣ୍ଡ୍ ବେକେ ?” ଅଣ୍ଡ୍ କେତ୍ତଣ୍ଡ୍, “ନାନ୍ ପୁନନ୍ ।”
ପାରୂଶୀଡ଼୍ ହି ପାଡ଼ିୟିଦାଗ୍ ତୋଡ଼୍ ଆଦ୍ତନ୍
13ବେନ ମୁନେଙ୍କ୍ କାନାଲ୍ ମାତ୍ତଣ୍ଡ୍, ଅଡ଼୍ କାନାଙ୍କ୍ ପାରୂଶୀନଡ଼୍ ପାକେ ତାତ୍ତଡ଼୍ । 14ଜିସୁ ବେନ୍ ଦିନ୍ ବୁରୁଦା ମାଡ଼ି ଅନ୍ କୋଣ୍ଡାଙ୍କ୍ ୱେସ୍ ମାଡ଼୍ତଣ୍ଡ୍, ଆଦ୍ ଦିନ୍ ବିଶ୍ରାମ୍ଦିନେ ଦିନ୍ ମାତ୍ତେ । 15ଅଣ୍ଡ୍ ବେଲା କଣ୍ଡା ଉଡ଼୍ତଣ୍ଡ୍, ଆଦ୍ ପାରୂଶୀଡ଼୍ ମିକା ଅଂକିଙ୍କ୍ ମେଣ୍ଡନ୍ନ୍ଦାମ୍ କେତାନଙ୍କ୍ କେତ୍ତଡ଼୍, ଆଗାଙ୍କ୍ ଅଣ୍ଡ୍ ଅଡ଼୍କ୍ କେତ୍ତଣ୍ଡ୍, “ଅଣ୍ଡ୍ ନା କଣ୍ଡାନାଗ୍ ବୁରୁଦା ତମିତ୍ତଣ୍ଡ୍, ତାନ୍ପେର୍କେ ନାନ୍ ଶିଲହ ତାଗ୍ ଆଞ୍ଜ୍ ନର୍ତାନ୍ ନୁ ଉଡ଼୍ପାର୍ତାନ୍,” ଇଞ୍ଜେ ନାନ୍ ଉଡ଼୍ ପାର୍ତାନ୍ ।
16ପାରୂଶୀଡ଼୍ ଡ଼ାଗାଙ୍କ୍ ବେନ କେତ୍ତଡ଼୍, “ବେନ ଇ ପାଡ଼୍ୟି ମାଡ଼୍ତଣ୍ଡ୍, ଅଣ୍ଡ୍ ଇଶ୍ୱର୍ତାଗାଙ୍କ୍ ୱାଡ଼ନ୍, ବାତେଙ୍କ୍ ଇତ୍କେ ବିଶ୍ରାମ୍ଦିନେ ପାଲନ୍ ମାଡ଼ନ୍ ।”
ବାଗାତଡ଼୍ କେତ୍ତଡ଼୍, “ୱେରନ୍ ପାପି ଆସ୍ ଇଦ୍ ଲେକାମ୍ ଆଶର୍ଯ୍ୟ ପାଡ଼୍ୟି ମାଡ଼େପାର୍ତନ୍ ?” ଇ ବିଷୟ ତେ ଅଡ଼୍ଲୋପେ ମତବେଦ ଆତ୍ତେ ।
17ତାନ୍ପେର୍କେ ଅଡ଼୍ ମେଣ୍ଡନ୍ନ୍ଦାମ୍ ଆଦ୍ କାନାଙ୍କ୍ ପଚ୍ରାରା ମାଡ଼୍ତଡ଼୍, “ଅଣ୍ଡ୍ ଯେ ନି କଣ୍ଡାଙ୍କ୍ ସାୟେ ମାଡ଼୍ତେନଣ୍ଡ୍, ଆଗାଙ୍କ୍ ନିମ୍ ଅନ୍ ବିଷୟ୍ତେ ବାତେଏ କତୁତିନ୍ ?”
ଅଣ୍ଡ୍ କେତ୍ତଣ୍ଡ୍, “ଅଣ୍ଡ୍ ୱେରଣ୍ଡ୍ ବାବବାଦି ।”
18ଅଣ୍ଡ୍ ଯେ କାନାଲ୍ ମାତ୍ତଣ୍ଡ୍ ମେଣ୍ଡେ କଣ୍ଡା ତନ୍ଦିତା, ଆ କାନାନ୍ ୟାୟ୍ ବାବାଲ୍ କେଲ୍ୱେ ଯାକ ଯିହୁଦୀ ନେତାନଡ଼୍ ଆଦ୍ ଅନ୍ ମୁନେ ବିଶ୍ୱାସ୍ ମାଡ଼ଡ଼୍ । 19ଅଡ଼୍ ୟାୟ୍ ବାବାଙ୍କ୍ କେତ୍ତଡ଼୍, ମିଇ ବେନ୍ ମାର୍ କାନାଲ୍ ଆସ୍ ଜନମ୍ ଆସ୍ମାତ୍ତଣ୍ଡ୍ ଇଞ୍ଜ କେସମିନ୍ଦେଡ଼ି, “ଇଣ୍ଡ୍ ବାତେଏ ମିଇ ମାର୍ ? ଆଲାଇତ୍କେ ଅଣ୍ଡ୍ ବେଲା ଇଞ୍ଜେ ଉଡ଼ୁତଣ୍ଡ୍ ?”
20ଆଗାଙ୍କ୍ ଅନ୍ ୟାୟବାବାଡ଼୍ ଅଡ଼୍କିଂଙ୍କ୍ କେତ୍ତଡ଼୍, “ଇଣ୍ଡ୍ ଯେ ମାନ୍ ମାର୍ ନୁ ଇଣ୍ଡ୍ ତ କାନାଲ୍ ଆସ୍ ଜନମ୍ ଆସ୍ ମାତ୍ତଣ୍ଡ୍ ଇଦ୍ ଯେ ମାମ୍ମେ ପୁତ୍ତମ୍; 21ବାତେଙ୍କ୍ ଇତ୍କେ ଇଣ୍ଡ୍ ବେଲା ଇଞ୍ଜେ ଉଡ଼ୁତଣ୍ଡ୍, ଆଦ୍ ପୁନମ୍, ବେନ ଅନାହୁ କଣ୍ଡା ସାୟେମାଡ଼ିତ୍ତଣ୍ଡ୍, ଆଦ୍ ବାଡ଼େ ମାମ୍ମେ ପୁନମ୍, ଅଂକିଙ୍କ୍ କେଲ୍ମୁଟ୍, ଅଣ୍ଡ୍ ତ ବୟସ୍ତେ ମିନ୍ଦେଣ୍ଡ୍, ଅଣ୍ଡ୍ ମିଇ ଗଟି ଜାମେ କେତିତଣ୍ଡ୍ ।” 22ତାମ୍ ୟାୟ୍ ବାବାଲଡ଼୍ ଯିହୁଦୀ ନେତାନଡ଼୍ ୱେର୍ସ୍ମାନାଙ୍କ୍ ଇଦ୍ ସାରେ ଗଟି କେତ୍ତଡ଼୍, ବାତେଙ୍କ୍ ଇତ୍କେ ଯଦି ବେନ ଆଦିଙ୍କ୍ ମସିହ ଇଞ୍ଜ ସ୍ୱୀକାର୍ ମାଡ଼୍କେ, ଆଲେକେ ଅଣ୍ଡ୍ ସମାଜ୍ ବାଇଦେ ମାଡ଼ାନଙ୍କ୍ ଇଞ୍ଜ ମୁନେଙ୍କ୍ ଯିହୁଦୀନଡ଼୍ ୱେରଡ଼୍ ମାନ୍ ଆସ୍ମାତ୍ତଡ଼୍ । 23ଆଦିନ୍ ମାଇଦିଙ୍କ୍ ଅନ୍ ୟାୟ୍ ବାବାଲ୍ କେତ୍ତଡ଼୍, “ଅଣ୍ଡ୍ ବୟସ୍ତେ ମିନ୍ଦେଣ୍ଡ୍ ଅଂକିଙ୍କ୍ କେଲ୍ମୁଟ୍ ।”
24ଆଗାଙ୍କ୍ ମୁନେଙ୍କ୍ କଞ୍ଜ୍ କାନାଲ୍ ଆସ୍ ମାନ୍ଦାନ୍ ନାରୁଙ୍କ୍ ଅଡ଼୍ ଦ୍ୱିତିୟ ଦାମ୍ କେତ୍ତଡ଼୍, “ଇଶ୍ୱତିଙ୍କ୍ ସମ୍ମାନ୍ ଇସ୍ କେତ୍ତଣ୍ଡ୍, ଅଣ୍ଡ୍ ଯେ ପାପି, ଇଦ୍ମାମେ ପୁତ୍ତମ୍ ।”
25ଆଗାଙ୍କ୍ ଅଣ୍ଡ୍ ଅଡ଼୍କ୍ କେତ୍ତଣ୍ଡ୍, “ଅଣ୍ଡ୍ ପାପି କି ଇଲ୍ଲେ, ନାନ୍ ଆଦ୍ ପୁନନ୍; ନାନ୍ ଅଣ୍ଡୟ୍ ବିଷୟ ପୁତାନ୍, ନାନ୍ କାନାଲ୍ ଆସ୍ ମାତାନ୍, ଇଞ୍ଜେ ଉଡ଼େ ପାର୍ଦୁତାନ୍ ।”
26ଆସୁଙ୍କ୍ ଅଡ଼୍ ଅଂକିଙ୍କ୍ କେତ୍ତଡ଼୍, “ଅଣ୍ଡ୍ ନିକିଂଙ୍କ୍ ବାତେଏ ମାଡ଼ିତନ୍ ? ଅଣ୍ଡ୍ ବେଲା ନିୟାଉ କଣ୍ଡାଙ୍କ୍ ସାୟେମାଡ଼୍ତଣ୍ଡ୍ ?”
27ଅଣ୍ଡ୍ ଅଡ଼୍କିଂଙ୍କ୍ କେତ୍ତଣ୍ଡ୍, “ନାନ୍ କେସ୍ ତେର୍ତାନ୍, ମେଣ୍ଡେ ମିଡ଼୍ କେଞ୍ଜ୍ତିଡ଼୍; ବାତେଙ୍କ୍ ମେଣ୍ଡନ୍ନ୍ଦାମ୍ କେଞ୍ଜାଙ୍କ୍ ଇଚ୍ଛା ମାଡ଼ୁତିଡ଼୍ ?” ବାତେଙ୍କ୍ଇତ୍କେ ମିଡ଼୍ ଆନ୍ତେ ଅନ୍ ଶିଷ୍ୟ ଆତ୍ତାଙ୍କ୍ ଇଚ୍ଛା ମାଡ଼ୁତିଡ଼୍ ।
28ଆଗାଙ୍କ୍ ଅଡ଼୍ ଅଂକିଙ୍କ୍ ଅବିଶାପ୍ ଇସ୍ କେତ୍ତଡ଼୍, “ନିମ୍ ଆଗେତ୍ ଶିଷ୍ୟ, ମାମ୍ମେ ମୋଶାନ୍ ଶିଷ୍ୟ । 29ମାମ୍ମେ ପୁତ୍ତମ୍ ଯେ, ଇଶ୍ୱର୍ ମୋଶାଙ୍କ୍ ଗଟ୍ କେସ୍ମିନ୍ଦେଣ୍ଡ୍, ବାତେଙ୍କ୍ ଇତ୍କେ ଇ ନାରୁଣ୍ଡ୍ ବେଗାଙ୍କ୍ ୱାସ୍ମିନ୍ଦେଣ୍ଡ୍, ଆଦ୍ ମିକା ମାମ୍ମେ ପୁନମ୍ ।”
30ଆ ନାରୁଡ଼୍ ଅଂକିଙ୍କ୍ ଉତ୍ତର୍ ହିତ୍ତଣ୍ଡ୍, ଅଣ୍ଡ୍ ନା କଣ୍ଡାଙ୍କ୍ ସାୟେମାଡ଼ି ମିନ୍ଦେଣ୍ଡ୍, ମେଣ୍ଡେ ଅଣ୍ଡ୍ ବେଗାକନ୍ସ୍ ୱାତ୍ତଣ୍ଡ୍, ଆଦ୍ ମିଡ଼୍ ପୁନ୍ୱିଡ଼୍, “ଇଦ୍ ତ ଆଶର୍ଯ୍ୟ ଗଟ୍ । ଅଂକିଙ୍କ୍ ମିଡ଼୍ ପୁନ୍ୱିଡ଼୍ । 31ଇଶ୍ୱର୍ ଯେ ପାପୀଡ଼୍ ଗଟି କେଞ୍ଜଣ୍ଡ୍, ଇଦ୍ ମାମ୍ମେ ପୁତ୍ତମ୍, ବାତେଙ୍କ୍ ଇତ୍କେ ଯଦି ବେନ ଇଶ୍ୱର୍ତେ ବକ୍ତ ଆସ୍ ଅନାଦ୍ ଇଚ୍ଛା ସାଦନା ମାଡ଼ିତନ୍, ଆଲେକେ ଆଦ୍ ଅନ୍ ଗଟ୍ କେଞ୍ଜିତଣ୍ଡ୍ । 32ତିଆର୍ତେ ଆରାମ୍ ଆତ୍ତାଗାଙ୍କ୍ ବେନ କାନାଙ୍କ୍ କଣ୍ଡାଙ୍କ୍ ସାୟେମାଡ଼୍ତଣ୍ଡ୍, ଇଦ୍ ତ ବେସୁଙ୍କ୍ କେଞ୍ଜ୍ୱେ ମାତ୍ତମ୍ । 33ଇ ନାରୁଡ଼୍ ଇଶ୍ୱର୍ ତାଗାଙ୍କ୍ ୱାଡ଼୍ୱେକଟ ମାତ୍କେ ଅଣ୍ଡ୍ ବେସୁଟ୍ ହିଦ୍ ପାଡ଼୍ୟି ମାଡ଼େପାର୍ୱଣ୍ଡ୍ ଆୟେଣ୍ଡ୍ ।”
34ଅଡ଼୍ ଅଂକିଙ୍କ୍ ଉତ୍ତର୍ ହିତ୍ତଡ଼୍, “ନିମ୍ ତ ସାରେ ପାପ୍ ତାଗାଙ୍କ୍ ଜନମ୍ ଆଦ୍ତିଡ଼୍ ନୁ ପାପ୍ତାଗ୍ ପେର୍ସ୍ତି, ମେଣ୍ଡେ ନିମ୍ ମାକିଂଙ୍କ୍ ଶିକ୍ଷା ଇଦୁତିନ୍ ?” ଆଗାଙ୍କ୍ ଅଡ଼୍ ଅଂକିଙ୍କ୍ ବାଇଦେ ପେସ୍ପିତ୍ତଡ଼୍ ।
ଆତ୍ମିକ ଉଡ଼ାନାଦ୍
35ଅଡ଼୍ ଅଂକିଙ୍କ୍ ସମାଜ୍ ଲତ୍ତାଗାଙ୍କ୍ ବାଇଦେ ପେସ୍ପିତ୍ତଡ଼୍, ଜିସୁ ଇଦ୍ କେଞ୍ଜି ଅଂକିଙ୍କ୍ କାଇଲି କେତ୍ତଣ୍ଡ୍, “ନିମ୍ ବାତେଏ ନାରୁନ୍ ପିଲ୍ତିଙ୍କ୍ ବିଶ୍ୱାସ୍ ମାଡ଼ୁତିନ୍ ?”
36ଅଣ୍ଡ୍ ଉତ୍ତର୍ ହିତ୍ତଣ୍ଡ୍, “ହୋ ଗଟ୍, ଅଣ୍ଡ୍ ବେନ କେଲ୍ମ୍, ବେଲାକି ନାନ୍ ଅନାଗ୍ ବେଲା ବିଶ୍ୱାସ୍ ମାଡ଼ିତାନ୍ ?”
37ଜିସୁ ଅଂକିଙ୍କ୍ କେତ୍ତଣ୍ଡ୍, “ନିମ୍ ଅଂକିଙ୍କ୍ ଉଡ଼ିମିନ୍ଦେନି, ମେଣ୍ଡେ ବେନ ନି ତଡ଼୍ ଗଟି କେସମିନ୍ଦେଣ୍ଡ୍, ଅଣ୍ଡେ ଆଦ୍ ନାରୁଡ଼୍ ।”
38ଆଗାଙ୍କ୍ ଅଣ୍ଡ୍ କେତ୍ତଣ୍ଡ୍, “ପ୍ରବୁ, ନାନ୍ ବିଶ୍ୱାସ୍ ମାଡ଼ୁତାନ୍ !” ମେଣ୍ଡେ ଅଣ୍ଡ୍ ଅଂକିଙ୍କ୍ ମୋର୍ମିଣ୍ଡାଇସ୍ ପ୍ରନାମ୍ ମାଡ଼୍ତଣ୍ଡ୍ ।
39ମେଣ୍ଡେ ଜିସୁ କେତ୍ତଣ୍ଡ୍, “ନାରୁଡ଼ାଦ୍ ବିଚାର୍ ମାଡ଼ାଙ୍କ୍ ନାନ୍ ଜଗତ୍ତାଗ୍ ୱାସ୍ମିନ୍ଦେନ୍, ଉଡ଼୍ୱେ ମାନ୍ଦାନ୍ ନାରୁନ୍ ବେଲା ଉଡ଼ିତଣ୍ଡ୍ ନୁ ଉଡ଼ମାନ୍ଦାନ୍ ନାରୁଡ଼୍ ବେଲାକି କାନାଲ୍ ଆଦ୍ତନ୍ ।”
40ପାରୂଶୀଡ଼୍ ଡ଼ାଗାଙ୍କ୍ ବେନଡ଼୍ ଅନ୍ ତଡ଼୍ ମାତ୍ତଡ଼୍, ଅଡ଼୍ ଆଦ୍ କେଞ୍ଜି ଅଂକିଙ୍କ୍ କେତ୍ତଡ଼୍, “ମାମ୍ମେ ବାତ୍ତେ କାନାମ୍ ?”
41ଜିସୁ ଉତ୍ତର୍ ହିତ୍ତଣ୍ଡ୍, “କାନାଲ୍ ଆସ୍ ମାତ୍କେ ମିଡ଼୍ ଦସି ଆୟ୍ୟ ଆୟେଡ଼ି, ବାତେଙ୍କ୍ ଇତ୍କେ ମାମ୍ମେ ଉଡ଼ୁତମ୍, ଇଦ୍ ଇଞ୍ଜେ କେତୁତିଡ଼୍, ମିୱାଦ୍ ପାପ୍ ମିନ୍ଦେ ।”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ଯୋହନ୍ 9: NTKaa20
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Koya Language © The Word for the World International and Koya Translation Samithi, Malkangiri, Odisha 2020
