ଲୁକ 19
19
ଜିସୁ ନି ଜକିୟ
1ୱେନ୍କା ଜିସୁ ଜିରିହୋ ଗାଡ଼୍ତୁ ଡ଼ୁଗୁଜି ନାଡ଼୍ମିସିଜି ସଲ୍ସିମାର୍ଆନ୍ । 2ମାରି ସୁଡ଼ୁଦୁ, ଜକିୟ ଦର୍ତି ଅରେନ୍ ଲୋକୁ ମାର୍ଆନ୍, ମାରି ୱାନ୍ ଅରେନ୍ ପେରି ସିସ୍ଟୁଲସ୍ନିକାନ୍ ମାରି ମାଜନ୍ ମାର୍ଆନ୍ । 3ଜିସୁ ଏନ୍, ଆକା ସୁଡ଼ୁଦେଙ୍ଗ୍ ୱାନ୍ ବଦା କିଜିମାର୍ଆନ୍, ମାତର୍ ଲୋକା ଗଲିଦି ଉଣ୍ତିଙ୍ଗ୍ ସୁଡ଼ୁଦେଙ୍ଗ୍ ଆଟ୍ଏଜି ମାର୍ଆନ୍, ଇରିଙ୍ଗ୍ ୱାନ୍ ବୁଟ୍କା ମାର୍ଆନ୍ । 4ଆଦେଙ୍ଗ୍ ୱାନ୍ ଲୋକା ଆଗ୍ଡ଼ି ଉରୁକ୍ସି ସଲ୍ସି ଜିସୁଙ୍ଗୁଁ ସୁଡ଼ୁଦେଙ୍ଗ୍ ଇଜି ଉଣ୍ତ୍ରି ତଗାମାରାନ୍ତୁ ଏକ୍ତାନ୍, ଇରିଙ୍ଗ୍ ଆୟା ସାରି ସିଜି ଜିସୁ ସନିକା ମାର୍ଆତ୍ । 5ଜିସୁ ଆୟା ବାଡିଦୁ ୱାଜି ମୁସ୍କୁ ବେସ୍ସି ଜକିୟଙ୍ଗ୍ ଇର୍ଆନ୍, “ଜକିୟ, ବେଗି ରେସିରାଆ, ଇରିଙ୍ଗ୍ ନେର୍ ନାଙ୍ଗିଁ ମି ଇନ୍ଡ୍ର ଏଣ୍ତେସ୍ବା ତେବାଦେଙ୍ଗ୍ ଆନାତ୍ ।”
6ଆବେଟ୍ ଜକିୟ ଦାପ୍ରେ ରେସିୱାଜି ୱେଡ଼ିକାଦାନ୍ ଜିସୁଙ୍ଗୁଁ ୱାନି ଇଣ୍ତ୍ର କୁକ୍ତାଅତାନ୍ । 7ଆକା ସୁଡ଼ୁଜି ୱିଜେରେ କାଡ଼୍ଜି ଇନ୍ଣ୍ତ୍ରେଙ୍ଗ୍ ଆସ୍ତାର୍, “ୱାନ୍ ଅରେନ୍ ପାପି ଲୋକ୍ତି ଇଣ୍ତ୍ର ତେବାଦେଙ୍ଗ୍ ସର୍ଆନ୍ନି ।”
8ମାତର୍ ଜକିୟ ନିର୍ଆନ୍ନୋ ପ୍ରବୁଙ୍ଗ୍ ଇର୍ଆନ୍, “ଏ ପ୍ରବୁ, ସୁଡ଼ୁଆ, ନା ଦନ୍ ଆଦାବାଗ୍ କାକୁର୍ତି ଲୋକାଙ୍ଗ୍ ସିଜିନା, ମାରି ଜଦି ଅନ୍ୟାୟତାନ୍ ଏମାଣୁକୁ ଇନିକା ଅନାମାନା, ଆତିଙ୍ଗ୍ ସାରି ଗୁଣ୍ତାନ୍ ଡ଼େସିସିଜିନା ।”
9ଆବେଟ୍ ଜିସୁ ୱାନି ବିସୟ୍ତାନ୍ ଇର୍ଆନ୍, “ନେର୍ ଇୟା ଇଣ୍ତ୍ର ରକିୟା ପଇନିକା ଇଗା ୱାତାମାନାତ୍, ଇରିଙ୍ଗ୍ ଇକାନ୍ ବା ଅବ୍ରାହାମତି ଅରେନ୍ ମାରିସି । 10#ମାତିଉ ୧୮:୧୧.ଇରିଙ୍ଗ୍ ଆମାକା ମୁରିତାମାନାତ୍, ଆକା ପୟଜ ରକିୟା କିଦେଙ୍ଗ୍ ମନୁସ୍ୟପୁତ୍ର ୱାତାମାନାନ୍ ।”
ବାଙ୍ଗାଁରାମ୍ ଅଦ୍ଲିଦି କାତା
(ମାତିଉ ୨୫:୧୪-୩୦)
11ଲୋକୁ ଇୟା ମାଟା ୱିଜୁ ୱେନିୱାଲେ ଜିସୁ ମାରି ଉଣ୍ତ୍ରି କାତା ୱେର୍ତାନ୍, ଇରିଙ୍ଗ୍ ୱାନ୍ ଜିରୁସାଲାମ୍ ଲାକ୍ତୁ ଇତା ମାର୍ଆନ୍ ମାରି ମାପୁରୁଦି ରାଜି ଦାପ୍ରେନେ ୱାନାତ୍ ଇଜି ୱାର୍ ଅଡ଼୍ବିଜି ମାର୍ଆର୍ । 12ଆବେଟ୍ ୱାନ୍ ଇର୍ଆନ୍, ଅରେନ୍ ପେରି ଲୋକୁ ରାଜା ଆଦେଙ୍ଗ୍ ଉଣ୍ତ୍ରି ଆକ ରାଜିଦୁ ସନ୍ଡ଼୍ରେଙ୍ଗ୍ ତିଆର୍ ଆଜି ମାର୍ଆନ୍, ୱେନ୍କା ୱାନ୍ ଡ଼େସିୱାଜି ନିଜେଦି ଲୋକା ମୁସ୍କୁ ସାସନ୍ କିଦେଙ୍ଗ୍ ଅଡ଼୍ବିଜି ମାର୍ଆନ୍ । 13ୱାନ୍ ନିଜେଦି ଦସ୍ଲୋକ୍ ସାକର୍କାଙ୍ଗ୍ କୁକ୍ସି ୱାରିଙ୍ଗ୍ ୱିଜେରିଙ୍ଗ୍ ଉଣ୍ତ୍ରି ଉଣ୍ତ୍ରି ବାଙ୍ଗାଁରାମ୍ ଅଦ୍ଲି ସିଜି ଇର୍ଆନ୍, ନାନ୍ ୱାନି ସାନ୍ଦି ବେପାର୍ କିଦୁ । 14ମାତର୍ ୱାନି ଦେସ୍ତି ଲୋକୁ ୱାନିଙ୍ଗ୍ କାଡ଼୍ଜି ମାର୍ଆର୍, ମାରି ୱାର୍ ୱାନି ୱେନ୍କା ଅରେନ୍ ୱାନିଙ୍ଗ୍ କାବୁର୍ ପୋକ୍ସି ଇର୍ହାର୍, ଇକାନ୍ ଜେ ମା ମୁସ୍କୁ ସାସନ୍ କିନାନ୍, ଇକା ମା ବଦା ସିଲେତ୍ । 15ୱେନ୍କା ୱାନ୍ ରାଜା ଆଜି ଡ଼େସିୱାତାନ୍, ମାରି ଆମା ସାକର୍କାଙ୍ଗ୍ ଡାବୁଙ୍ଗୁଁ ସିତାମାର୍ଆନ୍, ୱାରି ଲୋଇ ବେପାର୍ କିଜି ଏନ୍ ଏସୋ ଲାବ୍ ପୟତା ମାନାନ୍, ଆକା ନେସ୍ତେଙ୍ଗ୍ ଇଜି ୱାରିଙ୍ଗ୍ ୱାନି ଲାକ୍ତୁ କୁକ୍ସୋ ତାତେଙ୍ଗ୍ ଆଦେସ୍ ସିତାନ୍ । 16ଆବେଟ୍ ପାର୍ତୁମ୍ତିକାନ୍ ୱାଜି ଇର୍ଆନ୍, ପ୍ରବୁ, ନି ଉଣ୍ତ୍ରି ବାଙ୍ଗାଁରାମ୍ ଡାବୁଦୁ ନାନ୍ ମାରି ଦଶଗୋଟା ବାଙ୍ଗାଁରାମ୍ ଡାବୁଙ୍ଗୁଁ ଲାବ୍ କିତାମାନା । 17ୱାନ୍ ୱାନିଙ୍ଗ୍ ଇର୍ଆନ୍, ନିନ୍ ବେସି ନେଗି ସାକର୍, ନିନ୍ ଉଣା ବିସୟତୁ ବିସ୍ବାସ୍ତାନ୍ ପାଣି କିତିମାନି ଆକା ନିନ୍ ଦସ୍ଗୋଟା ଗାଡ଼ାକା ମୁସ୍କା ଅଦିକାର୍ ପୟଦେଙ୍ଗ୍ ସିଜିନା । 18ମାରି, ଅରେନ୍ ୱାଜି ଇର୍ଆନ୍, ପ୍ରବୁ, ନି ଉଣ୍ତ୍ରି ବାଙ୍ଗାଁରାମ୍ ଡାବୁଦାନ୍ ନାନ୍ ପାସ୍ଗୋଟା ବାଙ୍ଗାଁରାମ୍ ଡାବୁଙ୍ଗୁଁ ଲାବ୍ କିତାମାନା । 19ୱାନ୍ ୱାନିଙ୍ଗ୍ ବା ଇର୍ଆନ୍, ନିନ୍ ବା ପାସ୍ଗୋଟା ଗାଡ଼ାକା ମୁସ୍କୁ ଅଦିକାର୍ ପୟଦେଙ୍ଗ୍ ସିଜିନା ।
20ମାରି ଅରେନ୍ ୱାଜି ଇର୍ଆନ୍, ପ୍ରବୁ, ସୁଡ଼ୁଆ, ଇୟା ନି ବାଙ୍ଗାଁରାମ୍ ଡାବୁଙ୍ଗୁଁ, ନାନ୍ ଇୟା ପାଗାଦୁ ତର୍ତା ଇଟ୍ଟା ମାର୍ଆ; 21ଇରିଙ୍ଗ୍ ନାନ୍ ନିଙ୍ଗିଁ ତିଲାତା, ଇରିଙ୍ଗ୍ ନିନ୍ ଅରେନ୍ ଆଟ୍ୱାଦି ଲୋକୁ, ଆମାକା ଇଡ୍ଇମାନି, ଆକା ପେର୍ନିଅନି, ମାରି ଆମାକା ୱିତ୍ଇ, ଆକା କୟନି । 22ୱାନ୍ ୱାନିଙ୍ଗ୍ ଇର୍ଆନ୍, ରେ ତାଗ୍ଇ ସାକର୍, ନି ମୋକମ୍ତି ମାଟାଦି ନି ବିସାର୍ କିନା । ନାନ୍ ଅରେନ୍ ଆଟ୍ୱାଦି ଲୋକୁ, ଆମାକା ଇଡ୍ଏମାନା, ଆକା ପେର୍ନାଅନା, ମାରି ଆମାକା ୱିତ୍ଏମାନା, ଆକା କୟନା, ଇକା ଇନିକା ନେସ୍ତିମାର୍ଇ ? 23ଜଦି, ଇୟା ମାଟା ସତ୍, ବ୍ୟାଙ୍କ୍ତୁ ଏନ୍ଦା ନା ବାଙ୍ଗାଁରାମ୍ ଡାବୁଙ୍ଗୁଁ ଇଡ୍ଇତି ? ଆତିଙ୍ଗ୍ ନାନ୍ ୱାଜି ବ୍ୟାଙ୍କ୍ତାନ୍ ଉପ୍ରି ପଇତାମାନ୍ଦି ।
24ମାରି, ଆୟା ଲାକ୍ତୁ ନିର୍ଇ ମାର୍ଇ ଲୋକାଙ୍ଗ୍ ଇର୍ଆନ୍, ୱେନି ମାଣାନ୍ ଇୟା ବାଙ୍ଗାଁରାମ୍ ଡାବୁଙ୍ଗୁଁ ଅସି, ଆମାୱାନିମାନୁ ଦଶଗୋଟା ବାଙ୍ଗାଁରାମ୍ ଡାବୁଙ୍ଗୁଁ ମାନେ, ୱାନିଙ୍ଗ୍ ସିଦୁ । 25ଆବେଟ୍ ୱାର୍ ୱାନିଙ୍ଗ୍ ଇର୍ହାର୍, ପ୍ରବୁ, ୱାନିଙ୍ଗ୍ ତୋ ଦାସ୍ଗୋଟା ବାଙ୍ଗାଁରାମ୍ ଡାବୁଙ୍ଗୁଁମାନେ । 26#ମାତିଉ ୧୩:୧୨; ମାର୍କ ୪:୨୫; ଲୁକ ୮:୧୮.ନାନ୍ ମିଙ୍ଗିଁ ୱେର୍ସିନା, ଏମେଲୋକାଦି ମାନାତ୍, ୱାନିଙ୍ଗ୍ ସିନାର୍, ମାତର୍ ଆମାୱାନିଙ୍ଗ୍ ସିଲେତ୍, ୱାନି ଲାକ୍ତୁରାନ୍ ଆମାକା ଉଣାମାନାତ୍, ଆକାବା ୱାନି ମାଣ୍କୁ ଅନାର୍ । 27#ମାତିଉ ୨୫:୧୪-୩୦.ମାତର୍ ନା ଇୟା ଆମା ସାତ୍ରୁର୍ ନାନ୍ ୱାରି ମୁସ୍କୁ ସାସନ୍ କିନା ଇଜି ବଦା କିଏଜିମାର୍ଆର୍, ୱାରିଙ୍ଗ୍ ଇବେ ତାସିନା ଆଗ୍ଡ଼ି କାତ୍ତୁ ।
ଜିସୁ ଜିରୁସାଲାମ୍ତୁ ଜିଣାଜି ସନିକା
(ମାତିଉ ୨୧:୧-୧୧; ମାର୍କ ୧୧:୧-୧୧; ଜୋହନ ୧୨:୧୨-୧୯)
28ଜିସୁ ଇୟା ମାଟା ୱେର୍ତି ୱିସ୍ତି ୱେନ୍କା ସିସୁରି ଆଗ୍ଡ଼ି ଆଗ୍ଡ଼ି ଜିରୁସାଲାମ୍ ତରିନ୍ ସନ୍ଡ଼୍ରେଙ୍ଗ୍ ଆସ୍ତାନ୍ । 29ମାରି, ଏସ୍ତିୱାଲେ ଜିସୁ ଜୀତ ଗରନ୍ ଲାକ୍ତୁରି ବେତ୍ପାଗି ନି ବେତନିୟା ଲାକ୍ତୁ ଇତାନ୍, ନାସ୍ତିୱାଲେ ୱାନ୍ ୱାନି ସିସୁରି ଲୋଇ ରିଏରିଙ୍ଗ୍ ଇୟା ମାଟା ୱେର୍ସି ପୋକ୍ତାନ୍, 30ମି ଆଗ୍ଡ଼ିରି ଆୟା ଆୟା ନାଟ ସାନ୍ଡ୍ରୁ; ଆବେ ଇତି ଦାପ୍ରେ, ଆମାତାନି ମୁସ୍କୁ ଏସାଙ୍ଗ୍ ଏନ୍ ବାସ୍ଏନ୍, ଇୟାୱାଜା ଉଣ୍ତ୍ରି ଗଦପିଲାଦିଙ୍ଗ୍ ତର୍ନି ମାନିକା ସୁଡ଼ୁନିଦେର୍; ତାନେଙ୍ଗ୍ କୁତ୍ସ ତାଗାଟ୍ । 31ମାରି, ଏନ୍ ଜଦି ମିଙ୍ଗିଁ ଏନ୍ଦା କୁତ୍ସି ଅସିନିଦେର୍ ଇଜି ୱେନ୍ବାନାନ୍, ମିର୍ ଇୟାୱାଜା ଇନିଦେର୍, ଇରିଙ୍ଗ୍ ତେନେମାନୁ ପ୍ରବୁଙ୍ଗୁଁ ଦର୍କାର୍ ମାନାତ୍ ।
32ଆବେଟ୍ ଆୟା ରିଏର୍ ସିସୁର୍ ନାର୍ତୁ ସରଆର୍, ମାରି ପ୍ରବୁ ୱାରିଙ୍ଗ୍ ଏଣ୍ତେସ୍ ଇର୍ଆ ମାର୍ଆନ୍, ଆୟାୱାଜାନେ ସୁଡ଼ୁତାର୍ । 33ମାରି, ୱାର୍ ଗଦପିଲାଦିଙ୍ଗ୍ କୁତ୍ନିୱାଲେ ଗଦପିଲାଦି ମାଲିକ୍କୁ ୱାରିଙ୍ଗ୍ ୱେନ୍ବାତାନ୍, ଏନ୍ଦା ଗଦପିଲାଦିଙ୍ଗ୍ କୁତ୍ସିନିଦେର୍ ?
34ୱାର୍ ଇର୍ହାର୍, ତେନେମାନୁ ପ୍ରବୁଙ୍ଗ୍ ଦର୍କାର୍ ମାନାତ୍ । 35ମାରି, ୱାର୍ ଗଦପିଲାଦିଙ୍ଗ୍ ଜିସୁ ଲାକ୍ତୁ ଆୟା ଗଦ ମୁସ୍କୁ ନିଜେ ନିଜେଦି ୱାତିଙ୍ଗ୍ ପାର୍ସି ଜିସୁଙ୍ଗୁଁ ବାସ୍ସିତାର୍ । 36ମାରି, ୱାନ୍ ସନିୱାଲେ ଲୋକୁ ରାସ୍ତାଦୁ ନିଜେ ନିଜେଦି ୱାତିଙ୍ଗ୍ ପାର୍ସି ସିଦେଙ୍ଗ୍ ଆସ୍ତେ ।
37ମାରି, ୱାନ୍ ଏସ୍ତିୱାଲେ ଜୀତ ଗରନ୍ତି ଗାଡ଼୍ଗାଡ଼ା ବାଡି ଲାକ୍ତୁ ଇତାନ୍, ନାସ୍ତିୱାଲେ ୱିଜେରେ ସିସୁର୍ ସୁଡ଼୍ତି ମାର୍ଇ ୱିଜୁ ସାକ୍ତିଦି ପାଣି ଉଣ୍ତିଙ୍ଗ୍ ୱେଡ଼ିକାଦାନ୍ ନାଣ୍ତ ଆଉଲି ଆଜି ମାପୁରୁଦି ଦନ୍ୟବାଦ୍ କିଜି କିଜି ଇର୍ହାର୍, 38ପ୍ରବୁ ଦର୍ତାନ୍ ଆମା ରାଜା ୱାଜିନାନ୍, ୱାନ୍ ଦନ୍ୟ । ମୁସ୍କୁପୁର୍ତୁ ସାନ୍ତି ମାରି ଗୌରବ୍ ମାପୁରୁଦି ଦନ୍ୟବାଦ୍ ଆପିତ୍ ।
39ଆବେଟ୍କୁ ଲୋକା ଲୋଇ ଏସୋ ପାରୁସିର୍ ଜିସୁଙ୍ଗୁଁ ଇର୍ହାର୍, “ଏ ଗୁରୁ, ନି ସିସୁରିଙ୍ଗ୍ ଆଲ୍ଜ ମାନ୍ଡ଼୍ରେଙ୍ଗ୍ ଇନ୍ଆଁ ।”
40ଜିସୁ ଇର୍ଆନ୍, “ନାନ୍ ମିଙ୍ଗିଁ ସତ୍ ଇଜିନା, ଇକାର୍ ଆଲେତି ମାର୍ରିଙ୍ଗ୍, କାଲ୍କୁ ଆଉଲି ଆନେ ।”
ଜିସୁ ଜିରୁସାଲମ୍ତି ଉଣ୍ତିଙ୍ଗ୍ ଆଡ଼୍ବାତାନ୍
41ମାରି, ଏସ୍ତିୱାଲେ ଜିସୁ ଜିରୁସାଲାମ୍ ଲାକ୍ତୁ ୱାତାନ୍, ନାସ୍ତିୱାଲେ ଗାଡ଼୍ତିଙ୍ଗ୍ ସୁଡ଼ୁଜି ତାନେ ଉଣ୍ତିଙ୍ଗ୍ ଆଡ଼୍ବାଜି ଇର୍ଆନ୍, 42“ନିନ୍, ହୁଁ, ନିନ୍ ଜଦି ନେର୍ ସାନ୍ତି ପୟ୍ନି ବିସୟ୍ତିଙ୍ଗ୍ ନେସ୍ତି ମାନ୍ଦି ! ମାତର୍ ଇଲେଇ ଆୟାୱିଜୁ ନିବାଣ୍କୁ ମାର୍ଗିତା ମାନାତ୍ । 43ଆଦେଙ୍ଗ୍ ନି ମୁସ୍କୁ ମାନି କାର୍ମୁଦି ସମୟ ନିନ୍ ନେସ୍ଇତି ଆକା, ସମୟ ୱାଜିନାତ୍ ଏସ୍ତିୱାଲେ ମି ସାତ୍ରୁର୍ ନି ସାରିବେଡ଼୍ତି ଗାଟୁ ତର୍ସି ନିଙ୍ଗିଁ କେର୍ପ୍ସି ବାଦା କିନାର୍, ମାରି ମି ୱିଜୁ ସେର୍ଲେଙ୍ଗ୍ କେର୍ନାର୍ । 44ମାରି ନିଙ୍ଗିଁ ନିବାନୁ ମାନି ୱିଜୁ ଲୋକାଙ୍ଗ୍ ଗୁଣ୍ତା କିନାର୍, ମାରି ନିବାନୁ ଉଣ୍ତ୍ରି କାଲୁଦିଙ୍ଗ୍ ଆଇ ଉଣ୍ତ୍ରି କାଲୁ ମୁସ୍କୁ, ତେବାଏତ୍, ଇରିଙ୍ଗ୍ ନିଙ୍ଗିଁ ଏସ୍ତିୱାଲେ ମାପୁରୁ ରକିୟା କିଦେଙ୍ଗ୍ ୱାତାନ୍, ନିନ୍ ୱାନିଙ୍ଗ୍ ସିନିସ୍ କିଇତିଦେର୍ ।”
ଜିସୁ ଜିରୁସାଲାମ୍ ମନ୍ଦିର୍ତୁ ସର୍ଆନ୍
(ମାତିଉ ୨୧:୧୨-୧୭; ମାର୍କ ୧୧:୧୫-୧୯; ଜୋହନ ୨:୧୩-୨୨)
45ମାରି, ଜିସୁ ମନ୍ଦିର୍ତୁ ଡ଼ୁଗିତାନ୍ ନୋ ପର୍ନି ଲୋକାଙ୍ଗ୍ ଇକା ଇଜି ସପ୍ତେଙ୍ଗ୍ ଆସ୍ତାନ୍, 46“ଦର୍ମୁସାସ୍ତ୍ରଦୁ ରାସାତାମାନାତ୍, ମାପୁରୁ ଇର୍ଆନ୍, ମା ଇଲୁ ପାର୍ତନାଦି ଇଲୁ ଆନାତ୍, ମାତର୍ ମିର୍ ତାନେଙ୍ଗ୍ ଡଙ୍ଗାଁର୍ଙ୍ଗାଁ ଇଲୁ କିତିମାନିଦେର୍ ।”
47 #
ଲୁକ ୨୧:୩୭. ମାରି, ଜିସୁ ୱିଜୁଦିନ୍ ମନ୍ଦିର୍ତୁ ସିକ୍ଆ ସିଜିମାର୍ଆନ୍, ମାତର୍ ପେରି ଜାଜକର୍, ସାସ୍ତ୍ରିର୍ ମାରି ଲୋକାଣି ପେରିକାର୍ ୱାନିଙ୍ଗ୍ ସାପିସ୍କିଦେଙ୍ଗ୍ ବଦାକିଜିମାର୍ଆର୍ । 48ମାତର୍ ଲୋକ୍ ୱିଜେରେ ୱେଡ଼ିକାଦାନ୍ ୱାନି ସିକିୟା ୱେନ୍ଜିମାର୍ଆର୍, ଆୟାଉଣ୍ତିଙ୍ଗ୍ ୱାର୍ ଇନିକା କିଦେଙ୍ଗ୍ ଆନାତ୍ ଆକା ଅଡ଼୍ବିଦେଙ୍ଗ୍ ଆଟ୍ଏଜି ମାର୍ଆର୍ ।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ଲୁକ 19: NTKoo20
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
