ମାତିଉ 11
11
ଜିସୁ ଆରି ଦିକ୍ୟା ବିଣ୍ଡ୍ରେ ଜହନ୍
(ଲୁକ୍ ୭:୧୮-୩୫)
1ଜିସୁ ମେଁନେ ଗମ୍ବାର୍ କ୍ଲିଗ୍ ସିସ୍ଇଂକେ ଆକେନ୍ ସାପା ଆଦେସ୍ ବିଃଡାଲା ଆତେନ୍ ଜାଗା ଆନ୍ତାର୍ଚେ ଇନିନ୍ନିଆ ୱେକେ ଆରି ସିକ୍ୟା ବିନେସା ବାରି ବାସଙ୍ଗ୍ ଡିଙ୍ଗ୍ନେସା ମୁଲେକେ ।
2ଆତେନ୍ ବେଲା ଣ୍ଡିଆନ୍ନିଆ ଦିକ୍ୟା ବିଣ୍ଡ୍ରେ ଜହନ୍ ବନ୍ଦି ସାଲ୍ନ୍ନିଆ ଲେଃଗେ । କ୍ରିସ୍ଟ ମେଁନେ ସାପା କାମ୍ ଡିଙ୍ଗ୍ବଗେ ମେଁନେ ସାମୁଆଁ ଅଁ ମେଁ ନିଜେନେ ମ୍ବାୟା ସିସ୍କେ କିସ୍ଟ ଡାଗ୍ରା ବେକେ । 3ମେଇଂ ୱେଚେ ଜିସୁକେ ସାଲ୍ୟାକୁକେ “ମୁଡ଼ି ରେମୁଆଁ ପାଙ୍ଗ୍ଏ ଡାଗ୍ଚେ ଜହନ୍ ବାସଙ୍ଗ୍ ବଗେ ନା ମେଃନେ ମେଁ ? ଲେଃନେ ବିନ୍ ଆଜାକେ ଉର୍ନେଲେଏ ?”
4ଜିସୁ ଉତର୍ ବିଚେ ବାସଙ୍ଗ୍କେ “ପେ ଆଣ୍ଡେ ୱିଗ୍ଚେ ମେଁନେ କେପେଡିଙ୍ଗ୍ ଆରି ଅଁପେଡିଙ୍ଗ୍ ଆତେନ୍ ୱେଚେ ଜହନ୍କେ ଆମ୍ୟାପା । 5କାନାଇଂ କେୟା ଡିଂଆର୍କେ, ଚଟାଇଂ ଅଲେଙ୍ଗ୍ ଡିଂଆର୍କେ, କୁଷ୍ଟରଗିଇଂ ନିମାଣ୍ଡା ଡିଙ୍ଗ୍ଆର୍ଡିଂକେ, ବଇରାଇଂ ଅଁଆର୍ଡିଂକେ, ଗୁଏଃକ୍ନେ ରେମୁଆଁଇଂ ବାର୍ ମୁଇଂତର୍ ଜିବନ୍ ଡିଙ୍ଗ୍ଆର୍ଡିଂକେ ବାରି ଦରିଦ୍ର ରେମୁଆଁଇଂନ୍ନିଆ ଡିଗ୍ ନିମାଣ୍ଡାନେ ସାମୁଆଁ ସାଲ୍ୟାକୁ ଡିଙ୍ଗ୍ଆର୍ଡିଂକେ । 6ନେଙ୍ଗ୍ନେ ବିସୟ୍ରେ ଜାଣ୍ଡେନେ ମେଃଡିଗ୍ ସନ୍ଦେଅ ଆଲେଃ । ମେଁ ନିମାଣ୍ଡା ?”
7ଜହନ୍ନେ ସିସ୍ଇଂ ଆଣ୍ଡେନେ ବେଲା । ଜିସୁ ରେମୁଆଁଇଂକେ ଜହନ୍ ବିସୟ୍ରେ ବାସଙ୍ଗ୍କେ, “ପେ ଜହନ୍କେ କେନ୍ସା ଉଡ଼ି ବେଲା ବାଲିଲନ୍ନିଆ ୱେପେଲେ ମେଁନେ କେନ୍ସା ଆସା ଡିଙ୍ଗ୍ପେଲେ ? ୱେଡ଼ିଆରେ ୱେଡିଙ୍ଗ୍କ୍ନେ ଗାଆଁ ନାଲେଃକେ ? 8ଆଜାକେ କେନ୍ସା ତାର୍ ୱେପେଲେକେ ? ମେଃନେ ଜବର୍ ଦାମ୍ନେ ସକା ସଲେଃକ୍ନେ ମୁଇଙ୍ଗ୍ ରେମୁଆଁକେ ? ଦେତ୍ରକମ୍ ସକା ସଲେଃକ୍ନେ ରେମୁଆଁଇଂ ଇଃସାଙ୍ଗ୍ ପ୍ରାସାଦ୍ନିଆ ଲେଃମ୍ୟାଆର୍କେ । 9ଆନେଙ୍ଗ୍ ବାସଙ୍ଗ୍ ମେଁନେ କେନ୍ସା ୱେପେଲେଗେ । ମୁଇଙ୍ଗ୍ ବାବବାଦିକେ ? ଆତେନ୍ ତ ଡିଲାଡିଗ୍ ସତ୍ ମାତର୍ ବାବବାଦି ବାନ୍ ମୁଇଙ୍ଗ୍ ଜାବର୍ ମ୍ନା ରେମୁଆଁଇଂକେ ଅବା ପେଲେକେ । 10ମେଁନ୍ସା ଡାଗ୍ଲା ଏନ୍ ଜହନ୍ ବିସୟ୍ରେ ସାସ୍ତର୍ନ୍ନିଆ ଗୁଆର୍ ବଆର୍କେ ଇସ୍ପର୍ ବାସଙ୍ଗ୍କେ, ପେ ନ୍ସା ଗାଲି ଆରେନ୍ସା ନେଙ୍ଗ୍ ସେନୁଗ୍ ନେଙ୍ଗ୍ନେ ଦୁତ୍କେ ମ୍ବେଏ । 11ନେଙ୍ଗ୍ ଆପେକେ ସତ୍ ବାସଙ୍ଗ୍ଣ୍ଡିଂ ଏଃକେ ଜାକ ଏନ୍ ଦର୍ତନିନ୍ନିଆ ଉଡ଼ିରୁଆ ଜନମ୍ ଡିଙ୍ଗ୍ଲେ ଆର୍କେ ମେଁଇଙ୍ଗ୍ନେ ସାପାରେବାନ୍ ଜହନ୍ ମ୍ନା ମାତର୍ କିତଂ ରାଜିନ୍ନିଆ ଜା ସାପାରେବାନ୍ ଡାଆଁ ମେଁ ଜହନ୍ ବାନ୍ ମ୍ନା । 12#ଲୁକ୍ ୧୬:୧୬.ଜହନ୍ ମେଁନେ ସାମୁଆଁ ବାସଙ୍ଗ୍ ଡିଙ୍ଗ୍କ୍ନେ ବାନ୍ ଏଃକେ ଜାକ କିତଂ ରାଜିନ୍ନିଆ ଜାବର୍ କିରମର ଡିଙ୍ଗ୍ଆର୍ଡିଂକେ । ଦଦ୍ୟା ବୁଦିନେ ରେମୁଆଁଇଂ ଆତ୍ନିୟା ବପୁ ଆସୁଏଚେ ଅଦିକାର୍ ଡିଙ୍ଗ୍ନ୍ସା ଚେସ୍ଟା ଡିଙ୍ଗ୍ଆର୍ଡିଙ୍ଗ୍କେ । 13ଜହନ୍ ପାଙ୍ଗ୍ ଜାକ ମୋଶାନେ ନିଅମ୍ ବାରି ବାବବାଦିଇଂନେ ସାମୁଆଁ କିତଂ ରାଇଜ୍ ବିସୟ୍ରେ ବାସଙ୍ଗ୍ ବଗେ । 14#ମାତିଉ ୧୭:୧୦-୧୩; ମାର୍କ ୯:୧୧-୧୩.ଜଦି ମେଁଇଂନେ ସାମୁଆଁ ସତ୍ ପେମାନେଏ ତେଲା ଜହନ୍ ଡିଙ୍ଗ୍ ଡିଙ୍ଗ୍କେ ଏଲୀୟ ଜାଣ୍ଡେ ସେନୁଗ୍ ପାଙ୍ଗ୍ନେ ଲେଃଗେ । 15ଜାଣ୍ତେନେ ଦ୍ରିଗ୍ ନ୍ସା ନ୍ଲୁଗ୍ ଲେଃକେ ମେଁ ଦ୍ରିଗ୍ପା ।”
16“ଏନ୍ ଜୁଗ୍ନେ ରେମୁଆଁଇଂ ଜା ଏତେ ସମାନ୍ ଣ୍ଡ୍ରାଡିଙ୍ଗ୍ଏ ? ମେଇଂ ସାନ୍ତା ମଜେ କଚେ ବ୍ଲୁଡିଙ୍ଗ୍କ୍ନେ ଗଡ଼େଇଂ ସୁଗୁଆ ମୁଇଂପାକାନେ ଗଡ଼େଇଂ ବିନ୍ ପାକାଣ୍ଡ୍ରେକେ ବାସଙ୍ଗ୍ଏ 17ସାମୁଆଁନେ ବିହେ ଡୁଆ କାଣ୍ଡେଙ୍ଗ୍ ନେବଗ୍କେ, ମାତର୍ ପେ ପେୱାକେ ଣ୍ଡୁ । ନେ ଦୁକ୍ନେ ଅସ୍ମାର୍ ନେସାର୍କେ ମାତର୍ ପେ ପେଅଁକେ ଣ୍ଡୁ । 18ଜହନ୍ ପାଙ୍ଗ୍ଚେ ଉପାସ୍ ଡିଙ୍ଗ୍ ଡିଙ୍ଗେ ମାତର୍ ଦ୍ରାକ୍ଷାରସ୍ ଉଗ୍ ଆଡିଙ୍ଗ୍ଗେ ଣ୍ଡୁ, ଆରି ରେମୁଆଁଇଂ ବାସଙ୍ଗ୍ଆର୍କେ, ଆମେକେ ବୁତ୍ ସାଃଲେକେ । 19ଉଡ଼ିବେଲା ରେମୁଆଁ ଉଙ୍ଗ୍ଡେ ପାଙ୍ଗ୍ଚେ ଚଙ୍ଗ୍ ଉଗ୍କେ ସାପାରେ ବାସଙ୍ଗ୍କେ, ଏନ୍ ରେମୁଆଁକେ କେଲାପା । ମୁଇଙ୍ଗ୍ କାଉରା ଗିଃଗାଃ ବାରି ମଦୁଆ ସିସ୍ତୁ ସାଲିଆଣ୍ଡ୍ରେ ଆରି ପାପିଇଂନେ ସାଙ୍ଗ; ମାତର୍ ଇସପର୍ନେ ଜ୍ଞାନ୍ ନିଜର୍ନେ କାମ୍ ବାନ୍ ଆତେନ୍ ସତ୍ ଡାଗ୍ଚେ ଆମ୍ୟା ପେବିଏ ।”
ଅବିସ୍ବାସ୍ ଲେଃକ୍ନେ ଇନି ରେମୁଆଁ
(ଲୁକ୍ ୧୦:୧୩-୧୫)
20ଆଣ୍ଡିନେ ଇନିନ୍ନିଆ ଜିସୁ ମେଁନେ କାବା ସୁଗୁଆ ଜାବର୍ କାମ୍ ଡିଙ୍ଗ୍ବଗେ ଆତେନ୍ ଏରିଆନେ ରେମୁଆଁ ମେଁଇଙ୍ଗ୍ନେ ପାପ୍ ଆତ୍ଲା ମନେ ମାଏତେନେ କେଚେ ଜିସୁ ଆତେନ୍ ଇନିଇଂକେ ତିରସ୍କାର୍ ଡିଙ୍ଗ୍ଚେ ବାସଙ୍ଗ୍କେ 21ଅ କୋରାଜିନ ଉଡ଼ି ବୟାଙ୍କାର୍ ଡଣ୍ଡ୍ ପେବାଏ ! ବେଥ୍ସାଇଦା ପେନେ ଡଣ୍ଡ୍ ଡିଗ୍ ବୟ୍ଙ୍କାର୍ । ପେ ବିତ୍ରେ ମୁଡ଼ିନେ ଇରିଆତୁଗ୍ କାମ୍ଇଂ ଡିଙ୍ଗ୍ବଆର୍କେ ଆତେନ୍ ସାପା ଜଦି ସୋର ଆରି ସୀଦୋନନ୍ନିଆ ଡିଙ୍ଗ୍ ପାବଆର୍ ଆତ୍ଅରିଆନେ ରେମୁଆଁଇଂ ଗାଗ୍ଡ଼େ ଉଗ୍ସ ଲିଗ୍ବୁର୍ଚେ ବାସ୍ତା ୱାଡ଼େଗ୍ଚେ ଦୁକ୍ ପାଡିଙ୍ଗ୍ଆର୍ । 22ନେଙ୍ଗ୍ ନିମାନ୍ ସୁଗୁଆ ବାସଙ୍ଗ୍ଣ୍ଡିଂ ଇସ୍ପର୍ ବିଚାର୍ ଡିଙ୍ଗ୍କେଲା ପେନେ ଡଣ୍ଡ୍ ବାନ୍ ସୋର ଆରି ସୀଦୋନନେ ରେମୁଆଁଇଂକେ ଜାବର୍ ଲିବିସ ଆଃସୁଏ । 23“ରେ କୁପର୍ନହୁମ୍ ବାସା ଲେଃକ୍ନେଣ୍ଡ୍ରେ ! ନାଁ ମେଃନେ ନିଜେ କିତଂ ୱେନ୍ସା ଚେସ୍ଟା ଡିଙ୍ଗ୍ନାଡିଙ୍ଗ୍କେ ? ନାଁ ନର୍କେ ନାଲଃଏ । ନାଁ ଡାଗ୍ରା ମୁଡ଼ି କାବା ଡିଂନେ କାମ୍ ଡିଙ୍ଗ୍ବକେ ଆତେନ୍ ଜଦି ସଦୋମନ୍ନିଆ ଡିଙ୍ଗ୍ପାବ ଆତେନ୍ ନଗର୍ ଏଜାକ ଡାଟ୍ ଡିଙ୍ଗ୍ଚେ ପାଲେଃ । 24#ମାତିଉ ୧୦:୧୫; ଲୁକ୍ ୧୦:୧୨.ନେଙ୍ଗ୍ ଆପେକେ ସତ୍ ବାସଙ୍ଗ୍ ଣ୍ଡିଙ୍ଗ୍ ଇସ୍ପର୍ ବିଚାର୍ ଡିଙ୍ଗ୍ ଦିନା ପେବାନ୍ ସଦୋମ ଦେସ୍ନେ ରେମୁଆଁଇଂ ଆଡ଼ାତ୍ରା ଜାବର୍ ଦୟା ଆଃସୁଏଃଏ ।”
ନେଙ୍ଗ୍ ଡାଗ୍ରା ପାଙ୍ଗ୍ଚେ ପୁଣ୍ଡେପା
(ଲୁକ୍ ୧୦:୨୧-୨୨)
25ଆତେନ୍ ବେଲା ଜିସୁ ପାର୍ତନା ଡିଙ୍ଗ୍ଚେ ବାସଙ୍ଗ୍କେ “ଅ ଆବା କିତଙ୍ଗ୍ଇନି ଆରି ମଞ୍ଚ୍ପୁର୍ନେ ମାପ୍ରୁ ପେ ଜ୍ଞାନି ଆରି ସିକିତ୍ ରେମୁଆଁଇଂନ୍ନିଆ ବୁଡ଼ିଚେ ଅସିକିତ୍ ରେମୁଆଁଇଂନ୍ନିଆ ଆତ୍ନା ନାବଗେସା ନେଙ୍ଗ୍ ଆନାକେ ଦନ୍ୟବାଦ୍ ବିଃଣ୍ଡିଂକେ । 26ଅ ଆବା ନାନେ ଇକ୍ଚାରେ ଏନ୍ ସାପା ଗଟେ ଡିଙ୍ଗ୍କେ ।”
27 #
ଜହନ୍ ୩:୩୫;
ଜହନ୍ ୧:୧୮; ୧୦:୧୫. “ନେମ୍ବା ଆବା ଆନେଙ୍ଗ୍କେ ସାପା କିଚି ଦାନ୍ ଡିଙ୍ଗ୍ ବକେ । ଆବାକେ ଆନ୍ତାର୍ଚେ ଉଙ୍ଗ୍ଡେ ଆରି ଜା ଆମ୍ୟାକେ ଣ୍ଡୁ । ଉଙ୍ଗ୍ଡେ ଜାଣ୍ଡେଇଂ ଡାଗ୍ରା ଆବାକେ ଆତ୍ନାଏ ମାତର୍ ମେଇଂଆ ଆବାକେ ମ୍ୟାଆର୍ଏ ।”
28ଏ ଆଲିଆରେ ଲେଃକ୍ନେ ରେମୁଆଁ ଆରି ଆଃସି ଲେଃକ୍ନେ ରେମୁଆଁଇଂ ସାପାରେ ନେଙ୍ଗ୍ଡାଗ୍ରା ପାଙ୍ଗ୍ଲାପା ନେଙ୍ଗ୍ ଆପେକେ ପୁଣ୍ଡେନ୍ସା ମ୍ୱିଏ । 29ନେଙ୍ଗ୍ନେ ରିଗ୍ନ ଡୁଙ୍ଗ୍ଚେ ନେଙ୍ଗ୍ ବାନ୍ ସିକେପା । ଡାଗ୍ଲା ନେଙ୍ଗ୍ ନିଜେ ଦରମ୍ ବାରି ସିଦା ଡିଙ୍ଗ୍ଲେଲା ପେ ଆତ୍ମାନ୍ନିଆ ପେପୁଣ୍ଡେଏ । 30ନେଙ୍ଗ୍ ପେନେ ଆଡ଼ାତ୍ରା ଆଣ୍ଡିନେ ରିଗ୍ନ ମ୍ବଏ ଆତେନ୍ ଡୁଙ୍ଗ୍ନେସା ସଅଜ୍ । ବାରି ଆନାକେ ଆଣ୍ଡିନେ ଲିଗିଙ୍ଗ୍ ମ୍ୱିଏ ଆତେନ୍ ଡିଗ୍ ଜାବର୍ ଉସାସ୍ ।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ମାତିଉ 11: NTDaa20
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Gata Didayi Testament in Language © The Word for the World International and Didayi Believers Assembly, Kudumulugumma, Malkangiri, Odisha. 2020
