Joh GÎTAARÎRIA
GÎTAARÎRIA
Ûvoro Mwaro ûrîa wavecanirwe nî Johana wonanagia atî Jesû aarî ta kiugo gîa tene na tene kîa Ngai. Nake ûrîa wîtagwa kiugo “Nîwatuîkire mûndû na agîtûûrania natue.” (1.14) Ûvoro Mwaro ûrîa ûrî îvukuurî rîîrî, wandîkirwe nîguo andû arîa makaaûthomaga makaavotaga gwîtîkia atî Jesû nîke Mûvonokia ûrîa Ngai eerîre andû, na nîke Mûriû wa Ngai, na atî andû mamwîtîkia nîmakûgîa na mwoyo (20.31).
Îvuku rîîrî rîambîrîrîtie na kwonania atî Jesû nîke Kiugo gîa tene na tene kîa Ngai. Gîcunjî kîa rîo gîa kwambîrîria, kîvecanîte ûvoro wîgiî ciama cia mîthemba mîîngî, irîa cionanîtie atî Jesû nîke Mûvonokia ûrîa Ngai eerîre andû, na atî ke nîke Mûriû wa Ngai. Gîcunjî kîu gîcokete gîkarûmîrîrwa nî ûvoro ûrîa ûtaarîrîtie maûndû marîa mamenyekanîte kuumana na ciama icio. Gîcunjî wa kîu nwakîo kîonanîtie ûrîa andû amwe meetîkirie Jesû na magîtuîka arûmîrîri ake, nao engî makîmûkararia na makîrega kûmwîtîkia. Ndûmîrîri îrîa yandîkîtwe kwambîrîria mûrango wa îkûmi na ithatû kûthiî nginya mûrango wa îkûmi na mûgwanja, yonanîtie na njîra ndaca ûvoro wa ngwatanîro nene ya Jesû na arutwa ake ûtukû ûrîa aanyitirwe. Ndûmîrîri îo nwayo yonanîtie mîario ya kûmavarîrîria na kûmaûmîrîria mbere ya araûke kwambwa mûtharavarî îgûrû. Mîrango ya mûthiia yonanîtie ûrîa Jesû aanyitirwe na agîcirithua, ûrîa aambirwe mûtharavarî îgûrû na akîriûka, na ûrîa aaumîrîre arutwa ake aarîkia kûriûka.
Rûgano rûrîa rwonanagia mûndûmûka ûrîa wanyitirwe agîka maûndû ma ûtharia (8.1-11), nî rûvingîre nîûndû rûtiîthagîrwa rûrî vo mandîkorî meengî wa vamwe na mandîkorî marîa mengî maataûrirwe vîndî ya tene. Mandîko mengî namo marwîkagîra icunjîrî ciîngî.
Johana nîmûkinyîrîriu mûno ûvoro wîgiî ûrîa andû mavecagwa mwoyo wa tene na tene na njîra ya Kristû. Kîveo kîu kîambagîrîria vîndî îno na gîûkaga kûrî andû arîa metîkagia atî Kristû nîke njîra, ûma, na mwoyo. Ûvoro wa mwanya ûrîa Johana avecanîte, nî atî atûmîrîte indo irîa cionekanaga ûtûûrorî wa andû, ta rûûri rwa kwonania maûndû ma kîîroho. Indo icio nî; manjî, mûgate, ûtheri, mûrîthi wa mbûri na mbûri ciake, na mûttavibu na thavibu ciaguo.
Ûvoro ûrîa ûrî îvukuurî rîîrî
Ûvoro ûrîa wambîrîrîtie 1.1-18
Johana Mûvatithania na arutwa a mbere a Jesû 1.19-51
Wîra wa Jesû kûrî andû 2.1—12.50
Mîthenya ya Mûthiia ya Jesû arî Jerusalemu, na arî vakuvî nakuo 13.1—19.42
Kûriûka kwa Mwathani na maumîra make 20.1-31
Ûvoro ûrîa ûrîkîrîrîtie: Mwathani nîwaumîrire rîngî îtûûrarî rîa Galili 21.1-25
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Joh GÎTAARÎRIA: KKB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019