LUKA 15

Eng’ondi ensiru

(Mat 18:12–14)

1Nabo abarusia ebango na abanyene ebibe bonsi nigo baare komoika Yeso ang’e komotegerera. 2Abafarisai na aborokia b’amariko bakemurungania, bakabora, “Oyo nigo akoroisia abanyene ebibe, na koria amo nabarabwo.”

3Erio akabatebia omoreng’anio oyo: 4“Monto ki oino oyore ne ching’ondi rigana erimo, na eyemo esire, tagotiga chiria emerongo kianda na kianda ase erooro, na gochia korigia eria yasirire, goika ayenyore? 5Nabo kayenyorire ayebeka amareko aye nomogoko. 6Na ekero akoirana inka, narangerie abasani baye na abagisangio baye, abatebie: Goka amo nainche, ekiagera nanyorire eng’ondi yane eria yasirete. 7Naboigo nabatebirie, nobe omogoko igoro ase omonyene ebibe oyomo oonchokire, kobua ase abanyene oboronge emerongo kianda na kianda, abatarigeti okoonchoka.

Ebesa ensiru

8“Gose mokungu ki ore ne chisiringi ikomi, na eyemo esire, tagotongia etaya na kwabusa enyomba, arigie nomokia goika ayenyore? 9Kayenyorire, narangerie abasani baye na abagisangio baye, abatebie: Goka amo nainche, ekiagera nanyorire esiringi eria nasiria. 10Naboigo, nabatebirie, nore omogoko ase abamalaika ba Nyasae ase omonyene ebibe oyomo oonchokire.”

Omwana omomura omoria bobe

11Naende agateba, “Omonto oyomo narenge nabamura babere. 12Oria omoke agatebia ise: Tata, ing’a ensemo y’enibo entungetie. Ise akabaatanera ebinto biaye. 13Nyuma y’amatuko atai mange oria omoke agasangereria ebinto biaye bionsi, akaimoka akagenda orogendo gochia ense y’aare; agasiarera agwo enibo yaye ase ogokora kw’obokayayu. 14Gakoorire bionsi, enchara enene egasoa ase ense eria, ere akaremerwa. 15Akagenda akabwatana nomonto oyomo bw’abanyene ense eria; ere akamoira ebitii biaye korageria chimbeche. 16Akaba nkogania are koigotia enda yaye ase amasabo aria chimbeche chiarenge koria; monto onde tarenge komoa gento. 17Goika agachia kweirana kweboria ere omonyene, akabora: Abasomba b’eng’eria ba tata mbarenga bakare koria endagera na gotigaria, na inche aiga ngokwa nenchara! 18Ninyimoke, ngende ase tata, imotebie: Tata, namochire ase oyore igoro na ase obosio bwao, 19tingwenereti naende ndokwe omwana oo, tiga imbe buna oyomo bw’abasomba bao b’eng’eria. 20Akaimoka, akagenda ase ise. Agachia koba okare are, ise akamorora, akamororera amabera, akaminyoka, akamoboania rigoti, akamonyunyunta mono. 21Omwana oria akamotebia: Tata, namochire ase oyore igoro na ase obosio bwao, tingwenereti naende ndokwe omwana oo. 22Korende ise agatebia abasomba baye: Renta bwango eganchwa ere engiya, momobekere; mobekere nebonyi ase ekiara kiaye, na ebikoroto ase amagoro aye. 23Nyerente emori eria ere enoru, moyenyenye, torie na kogoka, 24ekiagera oyo omwana one konya okure, naende moyo are; konya osirire, korende bono ororekanire. Bagachaka gochenga.

25“Nabo oria omomura oye omonene nigo arenge mogondo; agachia goika ang’e nenyomba, akaigwa egeturi ki’ogotera na ogotenga. 26Akarangeria oyomo bw’abasomba, akamoboria amang’ana ayio, engencho yaye inki. 27Ere akamoiraneria: Momura omino ochire, na iso omonyenyeire emori enoru, ekiagera amonyora ore omogima. 28Korende akabea, tarigia gosoa. Erio ise agasoka, akamosorora, 29korende ere akamoiraneria: Rora, inche nagokoreire emiaka eye emenge, tinsareti ogochika kwao kero kende gionsi; korende tikwana kong’a emanwa y’embori, erinde ingoke amo nabasani baane. 30Korende ochia gocha omwana oo oyo, orire ebinto biao nabakungu abatayayi, kwamonyenyeire emori enoru. 31Ise akamotebia: Omwana one, aye amatuko onsi nigo ore amo nainche, na ebinto bionsi inde nabirobio nebiao. 32Mboronge gokora omogoko na gochenga, ekiagera oyo momura omino konya okure, na bono moyo are; konya osirire, na bono ororekanire.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

LUKA 15: EKEGUSIIBBLE

Highlight

ಶೇರ್

ಕಾಪಿ