LUKA 13

Ogosororwa gw’okoonchoka

1Ekero ekio mbachete aroro abanto bamotebetie amang’ana igoro y’Abagalili, baria Pilato asang’ananetie amanyinga abo nebing’wanso biabo. 2Akabairaneria, akabatebia, “Mokagete ng’a Abagalili abwo nigo barenge abanyene ebibe kobua Abagalili bande bonsi, ekiagera banyorete emechando buna eyio? 3Nabatebirie, taibo; korende motaonchogeti mwensi namosire boigo. 4Gose baria ikomi na batano na batato bagweretwe norwaki orotambe ase Siloam, rokabaita, mokagete ng’a nigo barenge abasaria kobua abanto bonsi abamenyete Yerusalemu? 5Nabatebirie, taibo; korende motaonchogeti mwensi, namosire boigo.”

Omoreng’anio bw’omoko omogomba

6Agakwana omoreng’anio oyo, “Omonto oyomo narenge nomoko osimekire ase omogondo oye bw’emesabibu; akagenda korigia amatunda ase omoko oria, korende tanyora gento. 7Agatebia omoroiseria bw’omogondo bw’emesabibu: Rora, emiaka eye etato nachire korigia amatunda ase omoko oyo, na tindanyora gento. Yonache! Nase ki ogosaria riroba? 8Akamoiraneria: Omonene, yotige omwaka oyo naende, goika nyoburugere na koyobekera obwoyo. 9Noro korame amatunda, mbuya; onye taibo, erio oyonache.”

Omokungu ogwenetigwe rituko ri’Esabato

10Akaba okworokereria ase esinagogi eyemo ase rituko ri’Esabato. 11Naende rora, narengeo omokungu obwatire nekerecha ki’oboreu ase emiaka ikomi na etano na etato, na ere konya okogotaire, tare konyara kwerambora nonya ng’ake. 12Ekero Yeso achia komorora, akamorangeria, akamotebia, “Aye omokungu, gwasiboirwe korwa ase oboreu bwao.”

13Akabeka amaboko aye igoro asare, na ere akaramboka erio kegima, akamotogia Nyasae. 14Korende omotang’ani bw’esinagogi eria akabea, ekiagera Yeso agwenia omonto ase rituko ri’Esabato, agatebia abanto, “Nare amatuko atano na rimo agwenerete mwanyabanto bakore emeremo; ase ayio, inchuo ase amatuko ayio mogwenigwe, korende tari ase rituko ri’Esabato.”

15Korende Omonene akamoiraneria, “Inwe abang’ainereria, Inee, kera oyomo oino tari gosibora eng’ombe yaye gose etigere yaye korwa bweri ase rituko ri’Esabato, ogenda nero koyenyoisia? 16Oyo nenyaroka ya Ibrahimu; ekiagera Saitani omosibire emiaka eye ikomi na etano na etato, temogwenereti asiborwe korwa ase egesibo eke ase rituko ri’Esabato?”

17Naende ekero are gokwana aya, abanto bonsi abare koamererania nere bagasookigwa. Abanto bonsi bakagoka ase engencho y’amang’ana onsi amanene akorire.

Omoreng’anio bw’entetere y’omote onga buna omosabisabi na oyo bw’ememera

(Mat 13:31–33; Mar 4:30–32)

18Naende akabora, “Oboruoti bwa Nyasae nigo boreng’anirie naki? Ninki nkoboreng’ania? 19Mboreng’anie nentetere y’omote onga buna omosabisabi omonto abogoretie, akayesimeka ase omogondo oye; egakina, ekaba omote. Chinyoni chia igoro chikaroisia ebiswa ase chinsagia chiaye.”

20Agakwana eria kabere, “Ninki nkoreng’ania oboruoti bwa Nyasae? 21Igo boreng’anirie nememera omokungu abogoretie, akayebeka ase ebirengo bitato bi’obosie, goika bionsi bikabota.”

Egesieri ekegote gochia ase obogima

(Mat 7:13–14,21–23)

22Ekero arenge kogenda Yerusalemu, agaeta ase emechie na ebichie okworokereria. 23Omonto oyomo akamoboria, “Omonene, barabwo abaratoorigwe nabake?”

Akabatebia, 24“Teema mono gosoa ase egesieri kere ekegote, ekiagera nabatebirie: Abanto abange nabarigie gosoa, na barabwo tibakonyara. 25Ekero omonyene enyomba araimoke na gosieka egesieri, inwe namochake gotenena isiko na gotura gesieri, mokobora, Omonene, toigorere, na ere nabairanerie: Timbamanyeti aase mokorwa. 26Erio namochake goteba: Nigo tware koria na konywa ase obosio bwao, naye nkworokereria kwarenge ase chinchera chiaito. 27Korende ere natebe: Nabatebirie, timbamanyeti aase mokorwa; karue asende, inwe mwensi abakori amabe. 28Erio namobe nokorera na okoriania amaino, ekero morarore Ibrahimu, na Isaka, na Yakobo, na ababani bonsi ase oboruoti bwa Nyasae, na inwe abanyene namotugutwe isiko. 29Naende mbache abanto korwa moocha na bosongo, na korwa sugusu na irianyi, na barabwo mbaikaranse ase oboruoti bwa Nyasae. 30Na rora, mbare ab’omoerio barache koba abe ritang’ani, naende mbare abe ritang’ani barache koba ab’omoerio.”

Obobisa bwa Herode

31Ekero keria abande b’Abafarisai bakamochiera, bakamotebia, “Imoka korwa aa, ogende, ekiagera Herode narigetie kogoita.”

32Akabatebia, “Genda motebie ekebwe ekio: Rora ngoseria nde ebirecha, ngokora nde emeremo y’okogwenia abanto rero na ankio, ne rituko ria gatato ninkoore emeremo yane. 33Korende ningwenerete kobwatia enchera yane rero, na ankio, na ankio ende, naki temogwenereti omobani asirere isiko ya Yerusalemu.

Ogoichanerwa kwa Yerusalemu

(Mat 23:37–39)

34“Aye Yerusalemu, Yerusalemu, ogoita ababani na kobaaka amagena abatomirwe asore! Ng’ara karenga narigirie gosangereria abana bao buna engoko egosangereria ebichuchu biaye aase chimbaba chiaye ime, korende timwancha! 35Rora, enyomba yaino mwatigeirwe ere ritombe; na inche nabatebirie ng’a timokondora nonya ng’ake, goika ekero keria morache goteba: Nasesenirie oyogocha ase erieta ri ’Omonene.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

LUKA 13: EKEGUSIIBBLE

Highlight

ಶೇರ್

ಕಾಪಿ