Lûqa 1

Dostê Mi Teofîloso Ercîyaye

1Girweyê ki Ellay wahd kerdê ew nê girwey mîyabeyndê ma di bîyê û ameyê herun, bol merdimî qayil bî ki nînan yazi kerê. 2Naqor, êyê ki sifte ra şahdeyê nê girwan û xizimkarê qisandê Ellay bî, înan nê girwey pêro ma rê vatê. 3Mi zî nê girweyê ki bîyê, siftedê ci ra pêro rind pers kerdê ew ez newe qayil a ki înan hemin to rê pêdima yazi kera. 4Winî bizanê ki çîyê ki ti misayê, heme raştî yê.

Ellaydeyayişê Yehyay Xeber Deyeno

5Wexto ki Hêrodesî#1:5 Hêrodes: Nameyê ci zî Hêrodeso Gird bi, o jew Qiralê Romay bi ew ey 40 serr verdê ellaydayenda Îsay (M.Ö.) ra heta 4 serrî zî bahdê ellaydayenda Îsay (M.S.) hukumdarey kerdbi. Yawudîye#1:5 Yawudîye nameyê jew welatî yo. (Bewnîrê harîta, peynîda nê kitabî.) di hukumdarey kerdê, jew kahîn#1:5 Kahînî merdimê Yawudî yê ew ê yê Keyedê Ellay di, sûkda Yeruşalîm di, xizmet kenê, qandê nê xizmetî abiryaye yê. (Bewnîrê listeda qisan, peynîda nê kitabî.) bi ew nameyê nê kahînî Zekerya bi. No qelfeyê kahînano ki nameyê ci Abîyay o, o no qelfe ra bi. Cenîya ci Elîzabêt zî ezbetda Harûnî ra bî. 6Wirdina zî Ellay çim di merdimê raştî bî, Qanûndê Rebbî di çiçî emir bîyo ew vajîyayo se, înan ardê ca. 7Qeçê înan çinê bî, çiki Elîzabêt ocaxkor bî ew serrê wirdina zî bol ravêrdîbî.

8Rojê, wexto ki nobet#1:8 Yazî: nomet amêbî qelfedê ci, Zekeryay Ellay vero karê kahîney kerdê. 9Wexta kahînan zeydê hirg fina peşk çekerdê ew nobeta Keyedê Ellay, xo mîyabeyn di kerdê bara. Ê rojan mîyan di, jû roj di Zekeryay do Keyedê Ellay di bixur#1:9 Bixur zeydê vaşdê wişkî yo ew kahînî ey wekenê ki boya ci û dûmandê cîya werzenê azmîn, Ellay hetek. biveşnayê. Qandê nê girwî şi Keyedê Ellay mîyan, 10a çeq di, mileta ki tebera bî, hemin duay kerdê.

11Zerre di jew melekê Rebbî jû find' Zekeryay ra asa. No melek sekûda qurbanî#1:11 Sekûya qurbanî maseyêndo berz bî ew kahînî ey sero komira bixur veşnenê. hetek di, cayo ki sero bixur veşnayê, uja di kişta raştî di vinderdê. 12Zekeryay o dî se, xewf kewt ey pîze ew o bol tersa. 13Hima nê melekî ey rê va: “Meters Zekerya, duayê to qebul bî. Cenîya to Elîzabêt do to rê jew lajek bîyaro dinya ew ti do nameyê ey Yehya panê. 14Ti do bol kêfêndo gird bikerê ew bol merdimî do zî ellaydayişdê ey rê şa bê. 15Çiki o do Rebbî çim di bol ercîyaye bo. O do qe şerab û îçkîya nêşimo, hewna marda xo pîze di, o do Rihdê Ellaya pirr bo. 16Ew qewmdê Îsraîlî ra bolinê ci, o do fina peyser açarno Rebbî, Elladê ci. 17Rih û quweto ki Pêxember Îlyasî di bi, zeydê eya o do Rebbî ver di şiro, winî ki o do zerrîya pêrandê ci açarno qeçandê ci ser. Ew êyê ki goştareya qisan nêkenê, înan zî do açarno rayda raşt ser. O do wuna Rebbî rê jew qewm biresno ew qandê amayişdê Rebbî hadre kero.”

18Zekeryay melekî rê va: “Ez do senî bizana ki no do wuna bo? Ez xora merdimêndo kal a, ew serrê cenîyerda mi zî ravêrdê.”

19Melekî ey rê wuna va: “Ez Cebraîl a, qatdê Ellay ra, Ellay ez rişta ki to rê na mijdîyanî bîyara. 20Mi to rê çiçî va, wextdo belikerde di qiseyê mi do bîrê ca. Hima to emel mi nêkerd, qandê coy ziwanê to do lal bo. Hetanî nê qisey bîrê ca, ti do nêşê qisey bikerê.”

21Mileta ki tebera Zekerya pawitê ecêb mendîbî, çiki o xeylê mihal Keyedê Ellay di mendibi. 22Bahdo Zekerya ame teber se, nêşayê înana qisey bikero. Wexta înan zana ki ey Keyedê Ellay di çîyê dîyo. Ey bixo înan rê pey destana kerdê ki çîyê vajo, hima nêşayê qisey bikero.

23Nay sera, Keyedê Ellay di nobeta ci qedîyêbî ew Zekerya şi keyedê xo. 24Bahdê jew mihalî cenîya ci Elîzabêt hala mend ew panj mengî keyedê xo ra teber nêvijyê. 25Ay va: “Ella weyna ridê mi ew Ey şermê ocaxkorey mi ra girot.”

Ellaydeyayişê Îsay Xeber Deyeno

26Wexto ki Elîzabêt mengda şeşî di bî, Ellay melek Cebraîl rişt dîyardê Celîle mîyan di, sûkda Nasira. 27Na sûk di rişt jû keynekerda ezeb hetek, nameyê na keyneker Meyrem a, ew na keynek waştîya jew camêrdî ya. Nameyê nê camêrdî Wûsib o, ew Wûsib zî ezbetda Qiral Dawidî#1:27 Qiral Dawidî hezar serr verdê Îsay (M.Ö) emir kerd ew ey çewres serr zî Îsraîlî sero padîşayîn kerdbi. Ellay verî ra wahd kerdbi ki Mesîh do ezbetda Qiral Dawid ra bîyameyê. ra yo. 28No melek ame ay hetek û ay rê va: “To rê silametey bo, Meyrem, Reb toya pîya yo ew rehma Rebbî ya to sero.”

29Na silam sera xewf kewt Meyrem pîze ew xo bixo rê pers kerd, mahneyê na silam çiçî yo? 30Uja di melekî ay rê va: “Meters Meyrem, to rehma Ellay dî! 31Ti do hala bimanê ew jew lajek bîyarê dinya. Ti do nameyê ey Îsa panê. 32O do gird bo ew ê do Ey rê vajê, ‘Oyo ki heme çî sera yo, No lajê ey o.’ Reb Ella do textî bido Ey, no textê kalikdê ci, Qiral Dawidî yo. 33Ew O do zî hetan û hetan ezbetda Yaqûbî#1:33 Yaqûb torinê Îbrahîmî bi ew Ellay ey rê va, nameyê to do Îsraîl bo. Qandê coy Yaqûb kalikê heme Yawudîyan o. Bewnîrê kitabdê Yaratılış'î di 32:22-32. sero hukumdarey bikero, soyinê hukumdareyda ey do nîro.”

34Meyrem melekî ra pers kerd va: “No senî beno? Ez hewna jew camêrdîya pîya nêbîya ki!”

35Ey zî wuna va: “Rihê Ellay do bîro to ser ew quwetê oyo ki heme çi sera yo, O do to sero sersî bikero ew na keramet bîyaro ca. Qandê coy no qeçeko ki ti do bîyarê dinya, O do mibarek bo ew ê do Ey rê vajê Lajê Ellay. 36Merdima to Elîzabêt rê zî, na pîreyda ci di jew lajek do bibo. Ay rê vatê ocaxkor, hima a nika winî hala ya, mengda xo ya şeşî d'a. 37Qandê Ellay çîyo bêmikûn çinî yo.”

38Wexta Meyrem va: “Ez qula Rebbî ya. To senî va, wa mi rê winî bibo.”

Nay sera melek ay hetek ra abirya.

Meyrem Şina Elîzabêt Rê Meymaney

39Bahdê çend rojana Meyrem werişt ew kewt ray, ecele kerdê ki şiro koyandê Yawudîye di jû sûk. 40Uja di şî keyedê Zekeryay ew silam dê Elîzabêt. 41Senî ki Elîzabêt silama ay aşnawit se, qeçeko ki Elîzabêt pîze di bi, tilo bi. A çeq di Elîzabêt Rihdê Ellaya bî pirr 42ew venga veynda: “Cenîyandê dinyay pêrin mîyan di, Ellay ti kerda mibarek ew Oyo ki pîzedê to di, O zî mibarek o! 43Senî ez hendayê ercîyayî ya ki maya Rebbîdê mi yena mi hetek? 44Çiki senî vengê silamda to kewt goşdê mi, wexta qeçeko ki mi pîze di kêfa tilo bi. 45Werrekê to ki Rebbî to rê çiçî xeber daya se, to îman kerdo ay ew a yena ca.”

Beyta Meyrem

46Meyrem zî wuna va:

“Ganê min o Rebbî rê hemd û şukur keno

47Ew ezo qandê Ellay, nê Xeleskardê xo#1:47 Yazî: nê Reynayoxdê xo, kêf ra perrena.

48Çiki ez qula nêercîyaye ya,

Fina zî O weyna ridê mi ra.

Neya tepya cisnê ki do bîrê no dinya,

Heme do vajê ki ‘Werrekê ay’.

49Çiki Oyo ki heme çî sera yo ew mibarek o,

Ey qandê mi girweyê girdî kerdî,

50Ew êyê ki Ey ra tersenê,

Rehma ey do torindê torinandê ci sero bo.

51Ey qoldê xo yo quwetina girweyê girdî kerdî.

Êyê ki xo gird tepêşenê, Ey ê kerdî virt û vilay.

52Ey hukumdarî text ra ronay

Ew êyê ki bindest d'ê, werzanay cor.

53Êyê ki veyşanî yê, pey çîdo rinda kerdî mird,

Ew êyê ki zengînî yê, ê zî destveng peyser riştî.

54Ey qulê xo Îsraîl xo vîra nêkerd

Ew qewmdê xo rê rehim kerd.

55Zeki kalikandê ma rê wahd kerdo,

Qewlê Îbrahîm û ezbetda Îbrahîmî ard xo vîrî.”

56Meyrem nezdî hîrê menga Elîzabêt hetek di mend û bahdo ageyrê keyedê xo.

Pêxember Yehya Ellaydeya

57Wextê Elîzabêt amebi ew ay jew lajek ard dinya. 58Embiryananê ci ew merdimanê ci aşnawit ki Ellay ay rê wuna rehma gird kerda. Qandê coy înan aya pîya kêf kerd.

59No lajek bi heşt roje ew roja heştî heme uja di amey pêser ki nê lajekî sinet kerê. Ê qayilî bî nameyê pêrdê ci Zekeryay eya nê. 60Hima mara ci va: “Nê, nameyê ey do Yehya bo.”

61Înan va: “Çi no name? Merdimandê to mîyan di qe kes no nameya çinî yo.”

62Nay sera înan pey destana pêrdê lajekî ra pers kerd ki nameyê nê lajekî do çiçî bo? 63Ey zî înan ra jew texteyê yazi waşt ew ey sero yazi kerd: “Nameyê ey Yehya yo.” Ê pêro ecêb mendîbî. 64A çeq zî Zekerya ame ziwan ew ey qisana Ellay rê şukur kerd. 65Ew êyê ki uja di roniştîbî, xewf kewt hemin pîze. Nê meselîyê ki bîyê, heme cadê koyandê Yawudîye di vajîyayê. 66Kamî ki nê meselî aşnawitê, xo bixo zerrîda xo di vatê: “Eceba no lajek do çiçî bo?” Çiki destê Rebbî Yehyaya pîya yo.

Beyta Zekeryay

67Pîyê lajekî, Zekerya, Rihdê Ellaya bi pirr ew qiseyê pêxemberey kerdî:

68“Rebbî rê, Oyo ki Ellayê Îsraîlî yo,

Ey rê şukur bo,

Çiki O resa qeyretdê ma

Ew qewmê xo bindestey ra girot.

69Ey ezbetda quldê xo Dawidî ra

Ma rê jew Xeleskarêndo quwetin rişt,

70Ey senî ki ma rê bol verî ra xeber daya

Fekdê mibarek pêxemberana.

71Dişmenandê ma ra,

Êyê ki ma ra nefret kenê,

O qayil bi ma înan hemin dest ra bireyno.

72Ey kalikandê ma rê rehma xo misnê

Ew qewlê xo yo mibarek ard xo vîrî.

73Ey pêrdê ma Îbrahîmî rê wahd kerdbi ki#1:73 No wahd kitabdê Yaratılış'î di 22:16-18 vajîyayo.

74-75O do ma dişmenandê ma dest ra bireyno,

Winî ki hendik emrê ma esto,

Bêters ma bişê Ellay rê quley bikem,

Ey vero, bi heme raştey û pakeya.#1:74-75 Yazî: Ey vero, pey heme raştey û pakeya.

76“Ew ti, lajê mi Yehya,

Ti do zî pêxemberê Ellay bê,

Oyo ki heme çî sera yo.

Ti do verdê Rebbî şirê ki

Qandê Ey ray hadre kerê.

77Ti do qewmdê Rebbî rê xeber bidê,

Reynayişo ki Ellay wahd kerdbi,

O yo yeno ki şima gunayan ra bireyno.

78Çiki Ellayê ma bol rind o ew rehmanî yo,

O do ma rê cor ra nê Xeleskarî birişo.

No Xeleskar do zeydê tîjîya akewo,

79Na tîjî do roşnê xo bido,

Ew êyê ki tari di ew sersîda mergî di,

O do înan hemin sero biberqîyo#1:79 Bewnîrê kitabdê Yeşaya'y di 9:1-2 ew 42:6-7.

Ew ray ma misno ki

Ma raya silametey bivînim.”

80Yehya bîyê gird ew fahmê ci zî roj bi roj bîyê vêşî. Bahdo ey xo ant gem, cayêndo bêkes, heta o qewmdê Îsraîlî mîyan di bivijyo werte ew girweyê xo eşkera kero.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Lûqa 1: diq

Highlight

ಶೇರ್

ಕಾಪಿ