Jɛnɛsis WOLO LƐ HE SANE
WOLO LƐ HE SANE
Gbɛi “Jɛnɛsis” lɛ, eshishi ji “Shishijee”. Wolo nɛɛ gbaa jeŋbɔɔ he sane, kɛ bɔ ni fee ni abɔ gbɔmɔ adesa kɛ bɔ ni fee ni esha kɛ piŋmɔ ba je lɛ mli, kɛ bɔ ni Nyɔŋmɔ kɛ gbɔmɛi yeɔ ehãa. Jɛnɛsis wolo lɛ, aaanyɛ aja mli enyɔ:
1. Yitso 1-11 gbaa wɔ jeŋbɔɔ kɛ gbɔmɔ adesa he sane. Biɛ agbaa wɔ Adam kɛ Hawa, kɛ Kain kɛ Abel, kɛ Noa kɛ nu afua lɛ, kɛ Babilon mɔ̃ɔ grɔŋŋ lɛ he saji yɛ.
2. Yitso 12-50 lɛ gbaa Israelbii lɛ ablematsɛmɛi lɛ ahe sane. Klɛŋklɛŋ mɔ ji Abraham, mɔ ni ehemɔkɛyeli yɛ Nyɔŋmɔ mli kɛ e-Nyɔŋmɔ toiboo hã ale lɛ jogbaŋŋ lɛ. Lɛ esɛɛ lɛ agbaa emusuŋbi Isak kɛ enabi Yakob, (ni atsɛɔ lɛ akɛ Israel hu lɛ) ahe saji. Nɔ ni nyiɛ sɛɛ ji Yakob nɛɛ bihii nyɔŋma kɛ enyɔ lɛ ni amɛshwiei ji Israel akutsei nyɔŋma kɛ enyɔ lɛ amli bii lɛ ahe sane. Mɔ pɔtɛ̃ɛ he ni awie jogbaŋŋ ji Yosef. Agbaa nibii ni hã Yakob kɛ ebihii krokomɛi lɛ kɛ amɛwekumɛi fã kɛyahi Ijipt shikpɔŋ lɛ nɔ.
Jeee gbɔmɛi ahe saji kɛkɛ wolo nɛɛ gbaa. Shi nɔ krɛdɛɛ ni wolo nɛɛ gbaa he sane titri ji nɔ ni Nyɔŋmɔ efee. Eshishijee lɛ maa nɔ aduatsɔ akɛ Nyɔŋmɔ ni bɔ je lɛ, ni enaagbee hu hãa shiwoo akɛ Nyɔŋmɔ baaka he ekwɛ ewebii lɛ atsiabo. Wolo nɛɛ mli fɛɛ lɛ, Nyɔŋmɔ ji mɔ krɛdɛɛ he ni awieɔ lɛ; lɛ ekojoɔ ni lɛ egblaa efɔŋfeelɔi atoi; lɛ enyiɛɔ ewebii ahiɛ ni ewaa amɛ ni ekudɔɔ shihilɛ. Aŋma nɛkɛ blema wolo nɛɛ koni akɛgba wɔ mɛi komɛi ahemɔkɛyeli he sane, ni eye ebua ni akɛmɔ nɛkɛ hemɔkɛyeli nɛɛ mli koni ekagbo.
Mlijaramɔi
Bɔ ni abɔ jeŋ kɛ gbɔmɔ adesa 1.1—2.25
Esha kɛ nɔnaa shishijee 3.1-24
Kɛjɛ Adam yinɔ kɛyashi Noa yinɔ 4.1—5.32
Noa kɛ nu afua lɛ 6.1—10.32
Babilon mɔ̃ɔ lɛ 11.1-9
Kɛjɛ Shem yinɔ kɛyashi Abram yinɔ 11.10-32
Blematsɛmɛi lɛ: Abraham kɛ Isak kɛ Yakob 12.1—35.29
Esau shwiei lɛ 36.1-43
Yosef kɛ enyɛmimɛi lɛ 37.1—45.28
Israelbii lɛ yɛ Ijipt shikpɔŋ lɛ nɔ 46.1—50.26
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Jɛnɛsis WOLO LƐ HE SANE: NEGAB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.