Luka 15
15
Matɔ tɛ ngasã ngbaga mɛ agere
(Mat. 18.12-14)
1Mbanga la kɔi, awa sɔrɔngɔ lapo na ambanga awa lingɔ siɔ ye aga zu ka tɛ Yezo so mangɔ tɛnɛ tɛ lo. 2Afarizeo na awa hangɔ ndia ĩ hũ so ko, ala so ndunguma ka popo tɛ la, ala ya: “Kɔli olo ndoyamba awa lingɔ siɔ ye, ko lo na la ndotɛ nga ye ndoni kɔi o!” 3La Yezo ato matɔ hɛ̃ la ya: 4“So popo tɛ ĩ, se mbanga zo adu na ngasã ngbaga ngbangbo kɔi, ko kɔi agere ko, ye mɛ lo na lingɔ nɛ? Lo na ziangɔ atanga ni ko sui gumbaya ndoni gumbaya na lɛ nyama, so nɔngɔ gingɔ oko kɔi mɛ agere. Lo na gingɔ ni ngbĩi, nga ka lo lua ni, ta seni la ma? 5Ngoi ko la lo lua ngasã ngbaga ko we ko, bɛ lo ade siriri, ko lo mu lo, lo sɔ̃ ndo gɔ̃ lo, 6lo diri ka tɛ lo. So pɛni, lo ili akwa lo na azi mɛ da tɛ la so tɔ̃ da tɛ lo, lo pa hɛ̃ la ya: ‘E zu é saba, ta sanga ma, mbi lua ngasã ngbaga tɛ mbi mɛ agere!’ ” 7La Yezo apa nga ya: “Mbi pa hɛ̃ ĩ ya, se mɛ nga gbanda awa yayu adu na dengɔ bɛ sĩ na lo tɛ wa lingɔ siɔ ye mɛ agbinya bɛ lo la. Ko dengɔ bɛ ni aɔ gbanda dengɔ bɛ mɛ ala na ni na lo tɛ abɛta azi sui gumbaya ndoni gumbaya mɛ ta ndodu na gwɛ̃ ti gbinyangɔ bɛ la ma.”
Matɔ ti le nwa kɔi mɛ agere
8Yezo apa ya: “Bere se mbanga wali adu na nwa sui kɔi, la kɔi agere ko, ye mɛ lo na lingɔ nɛ? Lo na zɔngɔ mɔinda, yɔngɔ ya da, zingɔ bɛ lo, gingɔ le nwa ko kɔi ngbĩi, nga ka lo lua ni, ta seni la ma? 9Wa ngoi ko la lo lua ni wɛ ko, lo ili akwa lo awe, na awe mɛ da tɛ la na tɔ̃ da tɛ lo, ko lo pa hɛ̃ la ya: ‘E zu é saba, ta sanga ma, mbi lua le nwa tɛ mbi mɛ agere!’ ” 10La Yezo apa nga ya: “Mbi pa hɛ̃ ĩ ya, se mɛ nga bɛ aangelo tɛ Nzapa ndode na lo tɛ wa lingɔ siɔ ye mɛ agbinya bɛ lo la.”
Matɔ tɛ nyingambi mɛ adiri ka tɛ to lo
11Yezo ato matɔ hɛ̃ la ya: “Mbanga kɔli kɔi adú ndo ayangambi ti kɔli sɛ. 12Lá kɔi, ngambi nyi apa hɛ̃ to lo ya: ‘Baba, kangbi ya aye tɛ mɔ, ko mɔ hɛ̃ mbi tɛ mbi mɛ mbi lengbi ti luangɔ ni.’ La to lo akangbi ya aye tɛ lo, ahɛ̃ tɛ zo kɔi kɔi hɛ̃ lo. 13Ĩ la so pɛni yakere ko, wa ngambi aka tɛ lo aye ni, amu faranga ni, agwe na ni ka kɔdɔrɔ mɛ yɔngɔrɔni. Lo ĩ si kai ko, lo da wa lingɔ ye yenge yenge, lo gbɛ̃ faranga tɛ lo hororo. 14Ngoi mɛ lo ĩ gbɛ̃ faranga tɛ lo kwɛ zu wɛ ko, kota gwɛ̃ aya so ya kɔdɔrɔ ni ko, ko ta lo ti dɛ na ye ti zangɔ na tɛrɛ lo ma. 15Lo ĩ hũ so ko, lo nɔ lo mu kwa ka tɛ mbanga zo kɔi ti kɔdɔrɔ ni ko, la zo ni ko ato lo ka yaka tɛ lo ya, lo bata akɔsɔ. 16Lo ye ndo tɛngɔ ye mɛ akɔsɔ ndotɛ, ko ta zo kɔi ahɛ̃ ndo ni hɛ̃ lo ma. 17Ko ngoi mɛ kɔdɛ ĩ ti li lo ko, lo pa ya: ‘Awa kwa tɛ to mbi zu na ye ti tɛngɔ ma wo ma, ko mbi ge, mbi ndokpi gwɛ̃ nga sia? 18Mbi na diringɔ ka tɛ to mbi, pangɔ hɛ̃ lo ya, Baba, mbi li Nzapa siɔni, mbi li nga mɔ siɔni. 19Ta mbi ti dɛ zo mɛ mbi lengbi ti mɔ mungɔ mbi ya, mbi nyi mɔ ma. Kanda mu mbi nga ma mbi wa kwa tɛ mɔ.’ 20La lo hã nɔ, lo diri ka tɛ to lo. “Ngoi mɛ to lo ahũ lo ka yɔngɔrɔni so ndo ga ko, lo ma vundu tɛ nyi lo, la lo su kpɛ, lo nɔ so ngorongɔ lo. Ala ĩ tengbi ko, lo bɔmbɔ nyi lo, lo fɔ̃ lo na tɛrɛ lo ka ka ka. 21Nyi lo apa hɛ̃ lo ya: ‘Baba, mbi li Nzapa siɔni, mbi li nga mɔ siɔni, ta mbi ti dɛ zo mɛ mbi lengbi ti mɔ mungɔ mbi ya, mbi nyi mɔ ma.’ 22La to lo apa hɛ̃ awa kwa tɛ lo ya: ‘Ĩ mu bɔngɔ mɛ adɛ̃ ma wo ma, ĩ ga na ni hiɔ ĩ yu na lo, ĩ bi pɛtɛ li ti lo, ĩ yu lo na pɔrɔ. 23Ĩ ga na nyi bagara mɛ akpɛ̃ nyɔkpɔ̃ nyɔkpɔ̃, ĩ ho, ĩ tɔ, ko é tɛ na dengɔ bɛ. 24Ta sanga ma, nyi mbi olo ndo nga ma zo mɛ akpi, la lo so, lo gɛrɛ ndo, ko mbi lua lo.’ La ala to nda kota yenga.
25“Na ngoi ko ndo ko, kɔzo nyi ade tɛ lo ka yaka. Ngoi mɛ lo ĩ lo ka yaka ĩ diri, ĩ doli na da tɛ la ko, lo ma azi ndoye bia, ndodɔ dɔ. 26La lo ili mbanga wa kwa tɛ to lo, lo hũnda lo ya: ‘Lo mɛ asi ge nɛ?’ 27Wa kwa ko agbinya hɛ̃ lo ya: ‘Ngambi mɔ adiri aga, la to mɔ ahɛ̃ nyɔ, é ho bagara mɛ akpɛ̃ nyɔkpɔ̃ nyɔkpɔ̃ na lo tɛ lo, na lo mɛ ya, lo lua lo na gbe tɛrɛ lo nzɔ̃ni.’ 28Kɔzo nyi ĩ ma so ko, ngɔnzɔ agbɔ̃ lo, lo kɛ̃ lingɔ da. La to lo alo ka ya da asi, avɔrɔ bɛ lo ya, lo ga lo li da. 29La kɔzo nyi agbinya hɛ̃ to lo ya: ‘Ma mbi, mbi ya ndo lingɔ kwa hɛ̃ mɔ aɔ ndo mɛ buru gba. Ta mbi dɛ mbi kɛ̃ nyɔ mɔ bɛ gbɔ ma. Kanda ta mɔ dɛ mɔ hɛ̃ mbi bɛ nyi ngasã kɔi ya, mbi ho, ko e na akwa mbi e tɛ, e du nga na dengɔ bɛ ma. 30Ko ngoi mɛ mɔ hũ nyi mɔ mɛ agbɛ̃ nwa tɛ mɔ zu na pɛko awe ngbabo, ĩ diri ĩ ga ko, mɔ hɛ̃ nyɔ, aho hɛ̃ lo nyi bagara mɛ akpɛ̃ nyɔkpɔ̃ nyɔkpɔ̃.’ 31To lo agbinya hɛ̃ lo ya: ‘Nyi mbi, e na mɔ e ndodu ngoi zu ndoni kɔi, ko ye zu mɛ mbi na ni nga ti mɔ. 32Ko ale e li yenga, é saba, ta sanga ma, nyita mɔ olo ndo nga ma zo mɛ akpi, la lo so, lo gɛrɛ ndo, la mbi lua lo!’ ”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 15: NGB87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
