Luka 10
10
Yezo ato azi sui mbara mbara ndoni sɛ na kwa
1So pɛni, Gbia Yezo ahã azi mɛ ndɛ̃ sui mbara mbara ndoni sɛ, ya ni to la se sɛ uzu tɛ ni ka ya kɔdɔrɔ zu, nga ka ndo zu mɛ lo nvɛni na nɔngɔ da. 2Lo pa hɛ̃ la ya: “Tɛ ma wo ma ale ka lɛ yaka, kanda awa kwa ti kɔngɔ tɛ ni adu yakere. Ale ĩ sambela Nzapa mɛ nvɛ̃ yaka ni ya, lo to awa kwa gba, ko ala kɔ tɛ tɛ lo mɛ ka yaka ni. 3Ĩ nɔ! Mbi to ĩ, ko ĩ na dungɔ nga ma aya ngasã ngbaga ka popo tɛ azɛ̃. 4Ta ĩ mu ngenza, na bozo, nga na pɔrɔ ti yungɔ ma. Ta ĩ dɔ ĩ lo so ta lege, ĩ bala zo ma. 5Ngoi mɛ ĩ li na ya da ko, ĩ pa uzu ya: ‘Bɛ azi ti ya da olo adu pii!’ 6Wa se zo mɛ ndoye dungɔ na bɛ pii, adu so ya da ni ko, bɛ lo na dungɔ pii, na lo ti balangɔ mɛ ĩ bala na lo. Ta so ma ko, ta lo na luangɔ bɛ pii ma. 7Ĩ ngbã so ya da ni ko, ĩ tɛ, ĩ nyɔ aye mɛ anvɛ̃ da ni na hɛ̃ngɔ ĩ. Ta sanga ma, ale wa kwa alua mbana gɛrɛ lo. Ta ĩ tongbi da ma. 8Ngoi mɛ se ĩ si na ya mbanga kɔdɔrɔ kɔi, se ayamba ĩ ko, ĩ tɛ ye mɛ azi na hɛ̃ngɔ ĩ. 9Ĩ sara awa ngã ti kɔdɔrɔ ni ko, ĩ́ pa nga hɛ̃ awa kɔdɔrɔ ni ko ya: ‘Nzapa adoli so lɛngɔ gbia ndo ĩ.’ 10Wa se ĩ si na mbanga kɔdɔrɔ kɔi, awa kɔdɔrɔ ni akɛ̃ yambangɔ ĩ ko, ĩ si ka lege, ĩ pa hɛ̃ la ya: 11‘Abɛ nga sese ti kɔdɔrɔ tɛ ĩ mɛ alakata bɛ gɛrɛ e ko, e goro ni so fangɔ ya, siɔ ye tɛ ĩ angbã ka li ĩ nvɛni. Wa ĩ hĩnga nzɔ̃ni ya, Nzapa adoli so lɛngɔ gbia ndo ĩ.’ 12Mbi pa hɛ̃ ĩ ya, na lá ti fangɔ ngbanga gbanda ko, azi ti kɔdɔrɔ ni ko alua gbanda etumbu mɛ aɔ etumbu tɛ azi ti Sɔdɔmɛ.”
Ambanga kɔdɔrɔ mɛ azi ni akɛ yengɔ lo tɛ Yezo
(Mat. 11.20-24)
13“Ĩ awa kɔdɔrɔ ti Kɔrazɛnɛ, siɔ lo ati na ĩ! Ĩ awa kɔdɔrɔ ti Bɛtɛsaida, siɔ lo ati nga na ĩ! Ta sanga ma, aye ti kpɛnɛ mɛ ndo mbi li so tɛ ĩ, se adu ya, mbi li ndo ni ka tɛ azi ti kɔdɔrɔ ti Tirɛ, nga ka tɛ azi ti kɔdɔrɔ ti Sidona ko, ale ala du ndo tise gã, ayu kunyɛ, ahĩni tɛrɛ la na mbi wá so fangɔ ya, ani gbinya bɛ ani wɛ. 14Ĩ ba nda mɛ gbanda etumbu tɛ ĩ aɔ etumbu tɛ azi ti Tirɛ na ti Sidona, na lá ti fangɔ ngbanga la. 15Wa adu tɛ ĩ azi ti Kapɛrnaumɛ ko, ĩ da bɛ ĩ ya, Nzapa aya gbanda ĩ akpa ka yayu? Ipɔ! Nzapa azu gbanda na ĩ ka lifɛlo.”
16Lo pa nga hɛ̃ ava lo ya: “Zo ko la ama ĩ ko, afa ya, lo ma nga mbi. Zo ko la akɛ̃ ĩ ko, afa ya, lo kɛ̃ nga mbi. Wa zo ko la akɛ̃ mbi ko, afa ya, lo kɛ̃ nga wa tongɔ mbi.”
Awa nɔngɔ kwa sui mbara mbara ndoni sɛ adiri ka tɛ Yezo
17Azi sui mbara, mbara ndoni se mɛ Yezo ato la na kwa adiri ka tɛ Yezo na dengɔ bɛ sĩ. Ala pa hɛ̃ Yezo ya: “Gbia, abɛ nga asiɔ tɔrɔ ko, ala ndoma nga nyɔ e na ngoi mɛ e ndohɛ̃ nyɔ hɛ̃ la na ili mɔ!” 18Yezo agbinya hɛ̃ la ya: “Mbi ndoba ndo ndo, ko mbi hũ Satana alo ka ndozu ati ge tise, nga ma se mɛ bekpa ndozu na ni. 19Ĩ ma mbi! Mbi hɛ̃ ĩ nguru ya, ĩ dɔrɔ angbɔ na akpakete. Mbi hɛ̃ nga ĩ nguru ya, ĩ bi nda nguru tɛ Satana zu, ko ta ye kɔi alengbi ti lingɔ ĩ ma. 20Kanda ta ĩ saba na lo ko la asiɔ tɔrɔ ama nyɔ ĩ ma, kanda ale ĩ saba na lo ko la Nzapa asu ili ĩ ka ya buku tɛ lo ka yayu.”
Bɛ Yezo ade
(Mat. 11.25-27; 13.16-17)
21Bo na ngoi ni nvɛni ko, Tɔrɔ Santo asa dengɔ bɛ na bɛ Yezo, ko Yezo apa ya: “Oo Baba, mɔ Gbia ti yayu, mɔ nga Gbia ti tise, mbi hɛ̃ mɔ sia kɔli, ta sanga ma, ye mɛ mɔ hɔndɛ na awa ndara, mɔ hɔndɛ nga na awa mbɛti ko, mɔ fa ni na ambumbusɛ azi. Biani, Baba, seni la, na lo mɛ ya, mɔ ye ndo ya adu bo nga so, ko ade bɛ mɔ. 22To mbi azia ye zu na ti mbi. Ta zo kɔi ahĩnga mbi mɛ Nyi lo ma, kanda bo lo la lo hĩnga mbi. Ta zo kɔi ahĩnga nga To mbi ma. Kanda bo mbi mɛ Nyi lo, nga na azi mɛ mbi ye fangɔ lo na la, la e hĩnga lo.”
23So pɛni, Yezo asana tɛrɛ lo ka tɛ ava lo, apa bo hɛ̃ la kɔi ya: “Dengɔ bɛ ati na ĩ, na lo mɛ ya, ĩ hũ ye mɛ asi gbɛlɛ ĩ. 24Ta sanga ma, mbi pa hɛ̃ ĩ ya, awa pangɔ nyɔ Nzapa ma wo ma, nga na agbia asepara ndo ya, ani hũ ye mɛ ĩ hũ, kanda ta ala hũ ni ma. Ala separa nga ndo ya, ani ma tɛnɛ mɛ ĩ ma, kanda ta ala ma tɛnɛ ni ma.”
Matɔ tɛ nzɔ̃ wa Samaria
25La mbanga wa hangɔ ndia amu tɛnɛ, ahũnda Yezo so gbɔ̃ngɔ nda. Lo pa ya: “Wa hangɔ lo tɛ Nzapa, ye mɛ mbi lengbi ti lingɔ, wa mbi lua du ti kaka nɛ?” 26Yezo agbinya hɛ̃ lo ya: “Tɛnɛ mɛ asu na ya buku ti ndia tɛ e nɛ? Ngoi mɛ mɔ ndodi ni ko, tɛnɛ mɛ mɔ ndoma nɛ?” 27Kɔli ko agbinya hɛ̃ lo ya: “Asu ka ya buku ya, ‘Ale mɔ ye Gbia Nzapa tɛ mɔ na bɛ mɔ kɔi, na tɔrɔ tɛrɛ mɔ zu, na nguru tɛ mɔ zu, nga na kɔdɛ tɛ mɔ zu.’ Asu nga ya: ‘Ale mɔ ye afɔ̃ mɔ, nga ma se mɛ mɔ ndoye na tɛrɛ mɔ nvɛni.’ ” 28Yezo apa hɛ̃ lo ya: “Mɔ gbinya nzɔ̃ni. Li nga so, wa gbanda ko, tɔrɔ tɛrɛ mɔ aso.”
29Ko wa hangɔ ndia aye ndo hãngɔ kamɛnɛ mɛ agbɔ̃ lo, la lo hũnda Yezo ya: “Fɔ̃ mbi na?” 30Yezo agbinya hɛ̃ lo ya: “Mbanga kɔli kɔi alo ndo ka Yeruzalɛmɛ, so gwengɔ ka Yeriko. Ka ta lege ko, awa nzĩ agbɔ̃ lo, ahãna bɔngɔ tɛ lo na tɛrɛ lo, anzĩ ni. Ala sɔ̃nɔ lo, lo kpi ndo nyingɔ lo, ala dɔ lo vakpa azia aɔ. 31Ko mbanga wa lungɔ Nzapa na ye aɔ nga ndo ti lege ni ko. Lo ĩ hũ kɔli ko ko, lo ɔ tɛ lo ti mbage lege. 32Se mɛ nga mbanga wa kwa ti ya kota da Nzapa ali na ni la. Lo ĩ ga ĩ si so ndo ni ko, lo i tɛrɛ lo ndɛ̃ɛ, lo hũ kɔli ko, ko lo ɔ nga ti mbage lege. 33Kanda mbanga wa Samaria aga nga ti gwengɔ fɔnɔ nga bo ti lege ni ko, lo si so tɔ̃nda kɔli ko, lo ĩ hũ lo ko, lo ma vundu tɛ lo sĩ. 34Lo i tɛrɛ lo ka tɔ̃nda lo, lo sa kpɔ̃, lo sa nga kana na lɛ kã tɛ kɔli ko, lo gbe ni. So pɛni, lo mu lo, lo kpã na ndo punda tɛ lo nvɛni, lo gwe na lo ka ya da tɛ awa fɔnɔ, lo bata lo nzɔ̃ni. 35Ĩ la bu ndã ĩ de ko, lo yɔrɔ ti lo na ya bozo tɛ lo, lo mu faranga sɛ, lo hɛ̃ nvɛ̃ da tɛ awa fɔnɔ, lo pa hɛ̃ lo ya: ‘Bata kɔli olo nzɔ̃ni. Ngoi mɛ mbi na diringɔ ti lege mɛ ko, mbi nvɛni na futangɔ faranga mɛ mɔ gbɛ̃ na lo tɛ lo, na ndo omɛ mbi hɛ̃ mɔ.’ ” 36Yezo apa nga hɛ̃ wa hangɔ ndia ko ya: “Na popo tɛ azi ko ta ko, zo mɛ mɔ hũ lo ka lɛ mɔ ya, lo fɔ̃ kɔli ko fɛrɛ awa nzĩ asɔ̃nɔ lo na?” 37Wa hangɔ ndia agbinya hɛ̃ lo ya: “Adu zo ko la ali lo nzɔ̃ni.” Yezo ĩ ma so ko, apa hɛ̃ lo ya: “Wa gwe, ko mɔ̃ li nga bo so.”
Marta na Maria aili Yezo ka tɛ la
38Ngoi mɛ ndo Yezo na ava lo so lege so ndogwe ko, ala si na ya mbanga kɔdɔrɔ kɔi, ko zo wali kɔi mɛ ili lo la Marta ayamba la ka ndo tɛ lo. 39Marta ndo na nyita lo ti wali da, ili nyita lo ni la Maria. Ko Maria adu so tɔ̃ gɛrɛ Gbia Yezo, lo ndoma tɛnɛ mɛ Gbia Yezo ndoha na azi. 40Lɛ Marta ada ndo yenge yenge, na lo mɛ ya, lo ndo na kwa ma wo ma ka ya da. La lo ga lo pa hɛ̃ Yezo ya: “Gbia, Maria azia bo mbi kɔi ya mbi li kwa zu, ko mɔ hũ ni ka lɛ mɔ nzɔ̃ni? Pa hɛ̃ lo ya, lo ga lo za mbi.” 41La Gbia Yezo agbinya hɛ̃ lo ya: “Marta, Marta, bɛ mɔ angbã ngbũ, ko mɔ ndogia tɛrɛ mɔ na lo ti aye ma wo ma, 42kanda bo ye kɔi la adu ngbondoni. Maria asara tɛ lo ye mɛ nzɔ̃ni, ko ta zo amu ni gbanda na ti lo ma.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 10: NGB87
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
